%C9xodo 21
21
Atb'al tzij pkiwi i winaq chi je o pa k'ax pki'ab' i kajaw
1Are atb'al tzij iri chi kaya ni chke:
2We o jun kulo' taq jun winaq aj Hebreo chi o pa k'ax rumal i rajaw uchak, waqib' junab' uri kchakun na, xwiri che uwuq junab' ko'tax nu b'ik, lik kutoj ti relb'al b'ik. 3I winaq chi o pa k'ax rumal i rajaw uchak we utukel xuponik, utukel uri kel b'ik; we o rixoqil xuponik, junam uri ru' rixoqil ke'el b'ik. 4I rajaw we kuya rixoqil i winaq chi o pa k'ax rumal rajaw uchak xaq i winaq le chi o pa k'ax rumal rajaw uchak we kealax rak'al ru' i rixoqil, i rak'al le xaq i rixoqil je re ti uri ire, je re ni rajaw, rumali i winaq le chi o pa k'ax rumal rajaw uchak le utukel uri k-ek. 5Xwiri i mokom chi o pu'ab' i rajaw we kub'ij: Yin kwaj ti kino'tax b'ik, man k'ax kinna i wajaw, k'ax kinna wixoqil xaq i wak'al. 6I rajaw kuk'am b'i uri chwach i Dios, ku'ayb'a chwach uchija, xaq utz we chwach jun aqan, te'uri kuwor ni uxikin ru' arya. Keje ile lik kkanaj ni uri winaq chi o pa k'ax pu'ab' i rajaw ronojel ij saq.
7We o jun kuk'ayij umi'al re k-e pa k'ax pu'ab' i rajaw, i ali le ko'tax tu b'ik, keje pacha k-ani chke achiyab' chi je o pa k'ax pki'ab' i kajaw. 8Xwiri we i rajaw kuk'am taj re rixoqil man kumaj ti uwach, kya' ni uri che chi ktoj i relb'al b'ik pu'ab' i rajaw, xwiri tupu xajwax taj lik kk'ayix ti che jun aj naj chi etamam ti uwach. 9I rajaw we kuya ali le che uk'ojol re rixoqil, rajwaxik uri chi lik xaqjun rilik ku'an che pacha ku'an che umi'al. 10I uk'ojol we kutzukuj chik jun ixoq, rajwaxik uri chi kumayij ti utzuqik i nab'e rixoqil, kumayij ti ukojik u'u' xaq kumayij ti uya'ik ronojel i o chuqul uya'ik che i ixoq. 11Xwiri we kutzuq taj, kukoj ti u'u' xaq kuya ti chik ronojel i o chuqul uya'ik che i nab'e rixoqil le, i ixoq le k-e uri xaq lik kutoj ti relb'al b'ik.
Atb'al tzij puwi i jun chi kukamsaj jun winaq
12Jun lok'anij we ku'an k'ax che jun rach lok'anij xaq we xkam rumal uk'axk'ol, i x-anawik le lik kkamsax na. 13I x-anaw i kamik le we chu'anik taj xu'ano man i Dios uch'ob'om chik chi keje ile kuk'ulmaj, k-anmaj ni uri chuto'ik uk'aslemal che jun k'ijib'al chi kinb'ij ni che. 14Xwiri jun we kpe roywal che ulok'anij i lik uch'ob'om chik ukamsaxik, lik kkamsax uri ire, tupu kutzukuj uto'ik uk'aslemal chuxe' i sujb'al insipon, lik katzukuj k'a kakamsaj na.
15We o jun kukamsaj uqajaw o xaq we kukamsaj uchuch, xaq lik kkamsax ni uri ire.
16Jun we krel-aj jun winaq, tupu uk'ayim chik o xaq we k'a o pu'ab', are knab'tajik lik kkamsax na.
17We o jun kuk'oqoj uqajaw o xaq we kuk'oqoj uchuch, lik kkamsax ni uri.
18We o keb' winaq kki'an ch'oj, xapachinoq chke we xu'an k'ax che ulok'anij ru' ab'aj xaq we ru' mo'lem ab', we xuli'b'a kan i jun chwi uch'at rumal uk'axk'ol, xwiri we xkam taj, 19xwalijik xaq kb'in pa taq b'e tupu ru' jun ch'amiy, i x-anawik le kkamsax taj; xwi kutoj ukunaxik xaq ni'pa taq i ij xupek'o.
20We o jun ru' che' lik ku'an k'ax che i winaq chi o pu'ab', achi xaq we ixoq, we xukamsaj i rajaw i winaq le kya' uri utojb'alil che rumal umak le. 21Xwiri we xa keb' oxib' ij xkotz'i i winaq rumal i k'ax chi x-ani che, kya' ti uri utojb'alil che i rajaw, man re ire.
22We o keb' achiyab' kki'an ch'oj chkiwach, we xkimaj pan jun ixoq rax winaq, i we xtzaqanik xwiri we nti mas xuk'ulmaj, saq laj tzij i xe'anawik le kkitoj uri kimak chrij pacha kub'ij i rachijil ixoq, xaq pacha kkib'ij i je atol tzij. 23Xwiri we xkam ixoq le xaq kekamsax uri i xe'anawik. 24Man jun we kupuch' ub'a'wach ulok'anij xaq kpuch' chik uri ub'a'wach ire; we kub'oq uware ulok'anij xaq kb'oq chik uri uware ire; we kupatz' u'ab' ulok'anij xaq kpatz' chik uri u'ab' ire; we kupatz' raqan ulok'anij xaq kpatz' chik uri raqan ire; 25we xuk'at ulok'anij xaq kk'at chik uri ire; we xusok ulok'anij xaq ksok chik uri ire xaq we kuch'ay ulok'anij xaq kch'ay chik uri ire.
26We o jun kuch'ay che ub'a'wach uwinaq chi o pu'ab', achi xaq we ixoq, xaq we x-on potz' che jun ub'a'wach, rumal jun ub'a'wach chi xpotz'irik le lik o uri chuqul kro'taj b'ik puk'exel ub'a'wach chi xupuch'u. 27Xaq we o jun kub'oq jun uware uwinaq chi o pu'ab', achi xaq we ixoq lik o uri chuqul kro'taj b'ik puk'exel jun uware le chi xub'oqo.
Atb'al tzij chrij i anik chi xaqte'et kik'awik
28Jun achi xaq we jun ixoq xto' rumal jun toro, we xkamik, saq laj tzij uri kkamsax ni i toro le ru' ab'aj, i uti'lal ktijaw taj, xwiri kya' ti utojb'alil che i rajaw. 29I toro we lik ax kto'on wi, xwiri i rajaw we utz'apim taj tupu rilom chik chi kto'onik, we xukamsaj jun achi xaq we jun ixoq lik kkamsax uri i toro le ru' ab'aj xaq keje k-ani che i rajaw. 30Xwiri we kb'ix che chi kutoj i relb'al chwach i kamik, lik kutoj ni uri ni'pa ktz'onox che puk'exel uk'aslemal. 31Xaq are i atb'al tzij ile k-ani che jun toro chi kuto' jun ala xaq we jun ali. 32I toro we xuto' jun chke awinaq chi je o pa'ab', achi xaq we ixoq, i rajaw i toro le kutoj ni lajuj juwinaq (30) saqpwaq che i rajaw i winaq chi o pa k'ax, xaq i toro kkamsax ni uri ru' ab'aj.
33We o jun kuwor jun k'otom, xaq we to' jun nim laj jul i we xutz'apij ti uwi, i we xtzaq jun b'oyex chupam xaq we jun axna, 34i rajaw i k'otom le kutoj ni uri rajil i chikop le che i rajaw, xwiri kkanaj kan i chikop pu'ab' chi xkam chupam i jul.
35Jun toro we xuto' jun chik toro, i toro chi xto'ik le we xkamik, kk'ayix uri i toro chi k'aslik, i kajaw i chikop le kkijach uri i mer chkiwach, xaq keje kki'an che i chikop chi xkamik kkijach i ti'ij chkiwach. 36Xwiri i toro we lik ax ku'an wi chi kto'onik, xaq we i rajaw reta'am chi kto'onik xwiri uyuqb'am taj, lik jun toro uri k'aslik kuya puk'exel i toro chi xkamik, xwiri kuk'am i ti' re i jun chi xkamik.
Currently Selected:
%C9xodo 21: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
