%C9xodo 22
22
Atb'al tzij re tzalijsab'al uk'exel i utz taj chi k-anik
1Jun winaq we xrel-aj jun b'oyex xaq we jun chij, we xukamsaj xaq we xuk'ayij, kuya ni jo'ob' b'oyex uri puk'exel i jun b'oyex xaq kuya ni kajib' chij puk'exel i jun chij chi xrel-aj.
2Jun ili'om we xriqtajik ktijin chu'anik ela', xaq we xkamsaxik, i jun chi xkamsawik lik umak ti uri chi xukamsaj. 3Xwiri we pa'ij kkamsax jun ili'om, i jun chi xkamsawik lik umak uri, xaq lik ajkamsanel.
I ili'om lik kutoj ni ronojel ni'pa i rel-am, xwiri we nti umer are ire uri kk'ayixik tojb'al re wach i xrel-aj.
4We k'a xriqtaj i chikop ru' chi rel-am xaq we k'a k'aslik, lik keb' uri kutojo, tupu we b'oyex, axna xaq we chij.
5Jun winaq we je ro'tam uchikop chwach rulew ulok'anij re keutzuqu, xaq we chupam utikonb'al, lik saq laj tzij uri kutoj ile ru' chomiq taq es chwach i rulew xaq ru' chomiq taq utikon.
6Jun winaq we xro'taj b'i a' pa taq es, we xuk'at b'i uwach i tikon chi moltal chik uchi' xaq we k'a o chwi raqan, we xk'at b'i uwach ulew, saq laj tzij i winaq chi xo'taw b'i a' le, lik kutoj ni ronojel ni'pa i xk'atik.
7Jun winaq we xroqxanij kan umer xaq ub'itaq re chi rachoch ulok'anij, we xel-ax b'i umer xaq i ub'itaq re le, we xriqtaj ili'om chi x-anawik, kukamulij uri utojik chrij ni'pa i rajil i xrel-aj. 8We xriqtaj ti ili'om le, kk'am b'i uri rajaw ja chwach i Dios chi lik are atol tzij, ilb'al re we are ti ire xel-aw i oqxanim kan ru'.
9Jun winaq we xu'an re che jun toro, jun axna, jun chij, jun k'ul xaq we b'iroxik chi xa el-am, we o jun kukoj uch'ojil chi re ire, kek'am b'i uri chekeb' chwach i Dios chi lik are atol tzij, xapachin chke i keb' le ke'eloq ajmak, lik kukamulij uri utojik che i jun chrij ni'pa i rajil xrel-aj. 10Jun winaq we kroqxanij jun u'axna, ub'oyex, uchij xaq xab'i chi chikopil ru' jun ulok'anij, we xkam jun chke i chikop le o we x-ani k'ax che, xaq we xel-axik, xwiri we mijun xilawik pachin x-anawik; 11i lok'anij le lik kub'ij ni uri pub'i i Ajwal che i rajaw i chikop we are ti ire xel-awik; i rajaw kukoj uri i tzij le xaq i ulok'anij lik nti kutojo. 12Xwiri we xrilo pachin xel-awik, ili'om le lik kuya uk'exel uri che i rajaw. 13I chikop le we xtijaw rumal jun itzel chikop, kuk'am li uri i ch'aqa taq k'utb'al re chi lik qatzij xtijawik, man keje ile lik kutoj taj.
14Jun winaq we kuchi'maj jun kaway che ulok'anij, i kaway le we xjoytaj uchel rij xaq we xkamik xwiri we nti rajaw chila are xuk'ulmaj ile, i lok'anij chi chi'mawnaq lik kutoj na. 15Xwiri we o i rajaw i kaway le chila are xkamik, kutoj ti uri rajil, xwi kutoj i chi'mab'al re.
Atb'al tzij puwi i jalajuj taq makunik
16We o jun kut'or jun apoj ali xaq we xumin rib' ru', lik kutoj ni uri u'apojil i ali le xaq lik kk'uli uri ru', xaq ku'an jun nima'ij k'amb'al re ali xaq yab'al re chuqul ire. 17We kkaj ti uqajaw uchuch i ali chi kk'uli ru' ala le, i ala lik kutoj uri ni'pa i mer chi k-e chupam i rilik, utzuqik ali le, xaq i k'ulankil.
18Mijun aj-itz kik'asb'a kanoq.
19Jun achi xaq we jun ixoq, we xmakun chu'anik urayijb'al uch'akul ru' jun chikop, lik kkamsax ni uri.
20Jun winaq we kusujuj jalajuj taq sipon chkiwach i tiox chi xaril je antalik, chi lik chinwach ti Yin chi in Ajwal, lik kkamsax ni uri.
21To' xaqmanal mi'an che jun aj naj xaq mi'an i utz taj che, man yix xaq xitij ile chi ix aj naj are ix ajposar chila pa Egipto.
22To' xaqmanal mi'an chke i malkanib' xaq chke i ak'alab' chi nti chik kiqajaw kichuch, 23man we to' xaqmanal ki'an chke, saq laj tzij Yin lik keinto uri ike we kkitz'onoj kitob'al chwe, 24xaq lik kpe uri woywal chiwe xaq kixinkamsaj ni uri ru' ch'ich'; i iwixoqil kekanaj na je malkan xaq iwak'al kekanaj na chi nti chik kiqajaw.
25We kaya mer pa cha'im chke nib'a' chi je o pintinimit, yet ma'an che awib' pacha jun ajya'ol mer pa cha'im che ire, xaq matz'onoj alaj che amer le. 26I nib'a' we kuya kan u'u' chawe rumal i mer chi kaya che pa cha'im, chatzalij b'i che are kqaj i ij, 27man we xwi u'u' ile olik ch'uqb'al uch'akul tob'al rib' rumal i tew. ¿Wach kuwarb'ej kan uri we katzalij tu b'i che? Ire we kutz'onoj utob'al chwe Yin, lik kinto ni uri, man yin lik o rutzil ink'ux.
28Lik mayo'ya i Dios xaq meak'oqoj i je atol tzij pa tinimit.
29Matb'aytaj chuk'amik li nab'e taq uwach atikon chwe, xaq ronojel uwa'al uva muqb'am chi o awu'.
Xaq i nab'e taq iwak'al lik kiya ni chwe Yin. 30Xaq keje i nab'e taq kak'al achikop xaq i nab'e taq kak'al achij; wuqub' ij kk'iji ni ru' uchuch, te'uri che uwajxaqib' ij ralaxik kaya ni chwe Yin.
31Yix rajwaxik lik ix ch'am laj taq winaq chinwach Yin, rumali mitij kiti'lal i chikop chi kech'aqapux kan kumal itzel taq chikop pa taq es, ile chiya chke i tz'i.
Keje ile xub'ij i Ajwal.
Currently Selected:
%C9xodo 22: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
