%C9xodo 23

Atb'al tzij re u'anik i suk'ul laj atb'al tzij

1Maya awib' chulapik b'i tzij chi qatzij taj, maya awach ru' jun utz ti laj winaq, ma'an taq jun utz ti laj ajsaqinel tzij che awib' chwach jun atb'al tzij.

2Matterej chkij xaq maya awach ku' uk'iyal winaq chu'anik i utz taj; are kasaqij jun tzij chwach i atb'al tzij maya awach ku' wach taq kkib'ij i jub'an chik maya awach ru' i tzij chi qatzij taj. 3Xaq maya taq awib' puwi umak jun nib'a'.

4We xariq jun b'oyex xaq we jun axna sachnaq re i ajch'oj chawij, chajacha che. 5Mamayij uto'ik i jun chi tzel katrilo, we kawil u'axna tzaqnaq chuxe' i reqan, to' maya kan keje ile, chawesaj i eqan chrij.

6Lik cha'ana i atb'al tzij suk'ulik che jun nib'a', ma'an ile chi kajech'b'a b'i atb'al tzij.

7Chajek'a awib' che i t'oronik, mataq ukamsaxik jun utz laj winaq chi nti umak, man Yin kinya ti wib' puwi umak jun ajmak laj winaq.

8Mak'am taq mer puk'exel u'atik jun tzij, man we kak'amo xa kusach kinojb'al i winaq, xaq i utz laj winaq kuch'ak ti uri i ch'oj.

9Xaqmanal taq mi'an che jun aj naj, man yix iweta'am wach taq i k'ax kutij jun aj naj, man yix xitij ile chi ix aj naj are ix o te'eq chila pa Egipto.

I uxlanem lik are jun taqanik

10Waqib' junab' kattikan ni chwach awulew xaq kamol ni uwach atikon, 11xwiri che uwuq junab' matik uwach awulew le, chawuxlansaj, man ni'pa i winaq je nib'a'ib' chi je o pa tinimit kewa ni chwach, xaq chikop aj pa taq es kkitij ni wach kkiya kan i winaq, xaq keje ile cha'ana pa tikb'al a-uva xaq pa tikb'al a-olivo.

12Che i waqib' ij cha'ana ronojel ni'pa i rajwaxik, xwiri che uwuq ij katuxlan na man xaq ke'uxlan ni ab'oyex xaq i a'axna, man xaq kkik'am chik kicho'ab', awinaq chi je o pa k'ax xaq i je aj naj.

13Chi'ana ronojel ni'pa xixintaq che. Lik mikuxtaj xaq minataj kib'i i tiox, xaq lik mitene ktataj kib'i pichi'.

Oxib' nimaq taq nima'ij

14Oxmul che jun junab' ka'an i nima'ij kojb'al re in-ij Yin. 15I nima'ij re i wa re trigo chi nti kunb'al ru', ki'an ni che i ik' Abib, man are i ik' ile ch'iktalik xaq are ik' ile chi xixel li pa Egipto; chrij pacha inb'im chiwe chi wuqub' ij kitij i wa re trigo chi nti kunb'al ru'. Mijun kpe chwilik we nti jun sipon kuk'am loq.

16I nima'ij re i molonik k-ani na are k-an i nab'e molonik. Xaq keje ile k-ani che i nima'ij re i molonik pa taq k'isb'al junab' are kutzin i molonik ronojel.

17Konojel achiyab' kek'un ni chinwach Yin chi in Kajwal Dios, oxmul jun junab'.

18Are keaporoj i chikop chinwach, kaporoj tu b'i ukik'el ru', i wa re trigo kakoj ti kunb'al ru' xaq mak'ol kan uxepuyil i chikop le re chukab' ij.

19Kak'am nu b'i i chomiq taq nab'e uwach atikon prachoch Awajwal Dios.

Micha'saj taq jun ral chab'at chupam i leche re uchuch.

I ángel re i Ajwal

20Yin kintaq b'i in-ángel chiwach re kixuchajij che ib'e, xaq kixuk'am b'i che i k'ijib'al chi inyijb'am chiwe. 21Chakojo retalil wach kub'ij i ángel le chawe, chatkojon che xaq lik matqelan che, man ire ink'exel Yin ku'ano xaq lik kukuy ti aqelanik. 22We qatzij katkojon che i ángel xaq ka'an ronojel ni'pa intaqom u'anik. Lik in ajch'oj uri chkij ajch'oj chawij xaq ni'pa i katki'atij che wach kawaj u'anik. 23I in-ángel knab'ej nu b'i chawach, katuk'am b'i che kulew aj Hamor, aj Het, aj Ferez, aj Canaán, aj Jiw xaq i je aj Jebús, man ike le lik kinsach ni kiwach. 24Matxuki chwach kitiox i winaq le xaq makoj ki'ij, lik ma'ano pacha kki'an ike; are cha'ana lik chasacha uwach kitiox le xaq lik cha'ana ch'aqa taq che xaq i ab'aj chi yatal u'ij.

25Chakojo u'ij i Ajwal, chi i-Dios yix. Man Ire kuya ni utzil chomal puwi awa xaq puwi aya', xaq kresaj i jalajuj taq yob'il pawi. 26Yin kinya ni chawe chi naj katk'asi'ik. Patinimit nti jun ixoq ktzaqanik xaq nti jun chi kalan taj.

27Xab'i chi tinimital ipa katik'aw wi kin-an ni chke ajch'oj chawij chi kkixij ni kib' chawe, ksach ni kino'oj xaq ke'anmaj ni chawach. 28Are kixupon ni che i nim laj tinimit le keinnab'saj nu b'i wonon chiwach, man kekoqtaj b'i aj Jiw, aj Canaán xaq i je aj Het lik kin-an na chi lik kkixij ni kib'. 29Xwiri kewes la tu b'i che jun junab', man moqxa kkanaj kan ulew pacha tz'inilik jyub' chaqij, kek'iyar uri chikop aj pa taq es chwach xa kki'an tan chik k'ax uri chiwe yix are kixuponik. 30Kok'ilal kewesaj b'i chiwach, lik k'a kixk'iyar na, te'uri kkanaj kan ulew le pi'ab'. 31Uchi' itinimit kjeqan b'i chuchi' i Mar Kaq, kupon k'a chuchi' i Mar ke aj Filistea kjeqan chali uchi' pa tz'inilik jyub' chaqij kupon k'a chuchi' i raqana Éufrates, man ni'pa je o chwach ulew le keinjach ni pi'ab', yix keiwesaj nu b'ik.

32Mi'an taq jun trat ku' ike xaq mitene ku' i kitiox. 33Xaq mitene kiya chke chi kekanaj kan piwulew, man xa kki'an chiwe chi kixmakun chinwach Yin. We kikoj ki'ij i kitiox, lik saq laj tzij kixtzaq chupam i utz taj.

Currently Selected:

%C9xodo 23: ACHICUB

Highlight

Compare

Copy