%C9xodo 24

I Dios xukub'a utrat ku' aj Israel

1I Ajwal xub'ij che ma Moisés:

—Chatel li wu' chwi jyub', junam ru' ma Aarón, ma Nadab, ma Abiú xaq i je lajuj oxwinaq (70) kiwi kijolom i tinimit Israel; xwiri ike chekanaj kan chinaj, chexukul kan chila chukojik in-ij. 2Xwi yet kattejeb' li wu', i jub'an chik ketejeb' taj, xaq i winaq lik kepe ti awu'; xub'ij i Dios che ma Moisés.

3I ma Moisés x-e chub'ixkil ronojel utzij xaq u'atb'al tzij i Ajwal chke i winaq. Are uri konojel i winaq xkib'ij:

—Kqa'an ni ronojel ni'pa ub'im i Ajwal; xecha.

4Are uri ma Moisés xutz'ib'aj ronojel ni'pa ub'im i Ajwal. Chukab' ij lik we' xwalijik, xu'an jun sujb'al sipon chila xe jyub' xaq xutik kab'lajuj ab'aj chi o ki'ij jujun ke i jutaq tzob'aj aj Israel. 5Juntir xeutaq la b'i jub'an alab'om aj Israel chukamsaxik i torib' xaq chusujuxik chwach i Ajwal, re chomb'al kib' chwach. 6I ma Moisés xuk'am nik'aj che i kik', xuya pa nimaq taq laq, i nik'aj chik xukitzka puwi i sujb'al sipon. 7Te'uri xuk'am i wuj re i trat, xrajlaj uwach chkixikin i winaq, ike xkib'ij:

—Ronojel ni'pa ub'im i Ajwal kqa'an na xaq kojkojon ni che —xecha.

8Are uri ma Moisés xuk'am i kik' xukitzka pkiwi i winaq, xub'ij chke:

—I kik' k'utb'al re chi i Dios xu'an utrat iwu' rumal i tzij chi xub'ij i Ajwal chiwe.

9Te'uri ma Moisés xaq i ma Aarón, ma Nadab, ma Abiú xaq i je lajuj oxwinaq (70) uwi kijolom aj Israel junam xe'el b'i chwi jyub'; 10are uri xkil uwach i Dios ke aj Israel, chuxe' i raqan o i pacha utzunb'al ij lik kwalch'inik, xaq pacha ktzun uwakaj are lik sa'ij. 11I je uwi kijolom aj Israel, tupu xkil u'ij uchomal i Dios xwiri xekam taj, man i Dios nti xu'an chke, rumali k'a xkitij kiwa xaq k'a xkitu' kiya'.

U'enam ma Moisés tzam jyub' Sinaí

12I Ajwal xub'ij che ma Moisés:

—Chatel b'i wu' tzam jyub', chinawoy-ej chila man kinya ni keb' tz'alam ab'aj chawe chi intz'ib'am i atb'al tzij chwach, xaq intzij inpixab' suk'b'al re kik'aslemal aj Israel.

13I ma Moisés xel b'i tzam jyub' re i Dios junam ru' ma Josué chi ajchak chrij. 14Xub'ij chke uwi kijolom aj Israel:

—Chojiwoy-ej kan yix chi, k'a kojtzalij na loq, i ma Aarón xaq i ma Hur kekanaj kan iwu', we o jun o taq uch'oj chub'ij chke ike le —xcha.

15Te'uri xel b'i ma Moisés tzam jyub', are uri xqaj li jub'an sutz' xuch'uq i jyub', 16i u'ij uchomal i Dios xk'iji puwi i jyub' Sinaí, i sutz' waqib' ij xuch'uq i jyub' le, che uwuq ij i Dios xch'aw li che ma Moisés chila chupam i sutz'. 17I u'ij uchomal i Dios xuk'ut rib' chkiwach aj Israel, pacha jun a' kaq wowoj o li tzam jyub'. 18I ma Moisés xkanaj chila chupam i sutz' le kawinaq ij (40) xaq kawinaq (40) a'ab'.

Currently Selected:

%C9xodo 24: ACHICUB

Highlight

Compare

Copy