%C9xodo 25
25
Sipon re anb'al i ja re riqb'al ib' ru' i Dios
1I Ajwal xu'ijla ma Moisés xub'ij che:
2Chab'ij chke aj Israel chi chkimolo jun insipon; xwiri, xwi ike chi ronojel kik'ux kkaj kkiya i sipon le. 3I sipon chi rajwaxik kkimolo are iri: Ab'aj chi lik saq-o'oj, ab'aj chi lik an-o'oj, ab'aj chi kaq-o'oj, 4k'ul xar, k'ul kaq, k'ul kaqkoj, k'ul lino xaq i rismal chab'at, 5utz'umal chij tz'ajtal kaq che, tz'um chi lik wajim xaq i che' chi suj ub'i; 6aceite re tzuk'b'al, kunb'al muy chi k-e ru' aceite re mub'al jolomaj, xaq i kunb'al muy chi k-on muy che ruxlab' i pom, 7ab'aj chi ónice, xaq i jub'an chik ab'aj re wiqb'al re efod#25.7 Iri are pacha jun chaleco jurjik chi kukoj i atz laj ajsujul sipon. chi yut'b'al ki'u' xaq ch'uqb'al uwach uk'ux i atz laj ajsujul sipon. 8Te'uri ki'an jun lo'laj k'ijib'al man kink'iji ni Yin chkixol, 9i ja re riqb'al ib' wu' le chila kink'iji wi Yin xaq ronojel ni'pa rajwaxik chupam, lik k-an ni che chrij pacha kink'ut Yin chawe.
Kaxa re utrat i Dios
10Ka'an jun kaxa che' suj kakoj che, jun mejelik ch'uk kaya che i raqan, oxib' ripaj ab'aj uwach xaq oxib' ripaj ab'aj unajtil rij. 11Chakojo an-o'oj chrij, chupam xaq che uchi'. 12Xaq kayijb'a kajib' ch'ich' sotsaq chi lik an-o'oj, kawoyb'a che kajib' uch'uk, kakab' pa taq utzal. 13Chayijb'a keb' b'alul re i che' suj, chakojo an-o'oj chrij, 14kawik'awsaj i che' le chupam i sotsaq ch'ich' chi awoyb'am pa taq utzal i kaxa, man k'amb'al b'i re i kaxa xaipa. 15I che' le chi xamin chupam i sotsaq ch'ich' re i kaxa, lik mawesaj chik, chaya kan chila. 16Chupam i kaxa le kak'ol wi intzij inpixab' chi kinya ni chawe.
17Cha'ana jun ch'uqb'al an-o'oj, uwi i kaxa; jun mejelik ch'uk ru' jun ripaj ab'aj kaya che i raqan xaq oxib' ripaj ab'aj ru' nik'aj kaya che uwach. 18Cha'ana keb' querubín chi lik an-o'oj, ru' ch'ayb'al kayijb'a wi, i kaya puwi i ch'uqb'al uwi i kaxa. 19Kakoj jujun querubín chi taq uchi' i ch'uqb'al uwi i kaxa. 20I querubín le kiripom kixik' puwi i ch'uqb'al uwi i kaxa, xaq kkitzub'ala kib', xwiri puwi i ch'uqb'al le ketaqen wi. 21Chakojo i ch'uqb'al uwi i kaxa, xaq chupam i kaxa le, kaya wi intzij inpixab' chi kinya ni chawe. 22Kqariq ni qib' awu' chila chkixol i keb' querubín chi je o puwi i kaxa re utrat i Ajwal, chila puwi i ch'uqb'al uwi le, kinb'ij ni chawe ronojel ni'pa i tzij chi kab'ij ni chke aj Israel.
Mexa yab'al wa re trigo re i kuyb'al mak
23Cha'ana jun mexa, che' suj kakoj che, nik'aj xik'ab' raqan kaya che, keb' ripaj ab'aj uwach xaq oxib' ripaj ab'aj unajtil rij. 24Kakoj an-o'oj chrij ronojel xaq chakojo retz'b'alil uchi' chi xaq an-o'oj. 25Xaq kakoj jun uchi', juripaj ab'aj uwach kaya che, kakub'a b'i puwi ronojel uchi' xaq ka'an retz'b'alil ronojel uchi' ru' i an-o'oj. 26Cha'ana kajib' sotsaq ch'ich' an-o'oj, chawoyb'a pa taq kajib' uch'uk ipa o wi raqan. 27I sotsaq ch'ich' le kawoyb'a qaj chuxe' i retz'b'alil uchi' chi an-o'oj, man chila kik'awsax wi i b'alul chi k'amb'al b'i re i mexa xaipa. 28Are i che' suj b'irb'aq katzukuj ka'an b'alul che xaq kakoj an-o'oj chrij. 29Xaq ni'pa i laq, lochb'al, xar xaq i tu'b'al ya, ronojel ile lik rajwaxik chi lik an-o'oj. 30Lik arewi kaya i lo'laj wa re trigo puwi i mexa, are i wa re trigo chi ksujux chinwach Yin; xcha i Dios.
I tzuk'b'al an-o'oj
31Xwi ta la ile, xaq ka'an jun tzuk'b'al lik an-o'oj, ru' ch'ayb'al kayijb'a: Ukub'ib'al, raqan, pacha ral taq xar, ukotz'ijal xaq i wonwaq re i raqan is ru' ch'ayb'al kayijb'a wi. 32Kakoj waqib' u'ab' i tzuk'b'al le: Oxib' putzal jewa xaq oxib' chik putzal jela. 33Kakoj oxib' pacha ral taq xar che u'ab', ka'an jun won che xaq jun ukotz'ijal; xaq kakoj oxib' pacha ral taq xar che jun chik u'ab', jun won xaq jun ukotz'ijal; keje ile ka'an che waqib' u'ab' i tzuk'b'al. 34Xwiri che raqan i tzuk'b'al le kakoj kajib' pacha ral taq xar, rachi'ilam i wonwaq xaq i ukotz'ijal. 35Ka'an jun won che raqan i tzuk'b'al chuxe' i keb' u'ab', ka'an jun chik won chuxe' i keb' chik u'ab' xaq ka'an jun chik won chuxe' i k'isb'al keb' u'ab'; xaq keje ile ka'an che i waqib' u'ab'. 36I wonwaq xaq i u'ab' xaqjun kawesaj wi ru' raqan i tzuk'b'al, ronojel ile rajwaxik lik chom laj an-o'oj kakoj che, ru' ch'ayb'al kayijb'a wi. 37Xaq cha'ana wuqub' u'ab' i tzuk'b'al, man k-on saq che chrij chwach. 38Xaq cha'ana uxiter, xaq ral taq ulaq chi lik are i chom laj an-o'oj. 39Waqib' oxwinaq (66) ral taq k'ox an-o'oj kuk'am b'i ronojel i tzuk'b'al le, xaq ru' ile kel wi ni'pa i rajwaxik che i tzuk'b'al. 40Ta pe', lik chrij pacha xink'ut chawe chila tzam jyub', keje ile ka'an che.
Xcha.
Currently Selected:
%C9xodo 25: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
