%C9xodo 26
26
I ja re riqb'al ib' ru' i Dios
1Ka'an i ja re i riqb'al ib' wu', ru' lajuj chom laj kortin re lino, katz'aj ru' i tz'ajb'al akoj, kaqxar xaq i kaq, kat'is keb' uk'exwach i querubín chwach i kortin. 2Ronojel i kortin le rajwaxik chi xaqjun raqan xaq xaqjun uwach ka'an che, wuqub' xik'ab' ru' nik'aj kaya che i raqan, jun xik'ab' uwach. 3Chat'isa jo'ob' kortin kutiq rib' uwach ka'an che xaq keje ka'an che i jo'ob' chik. 4Cha'ana tel chi taq uchi' i nab'e lemaj kortin, xaq chat'isa uchi' i tel le ru' i chij kaqxar xaq keje cha'ana che i julemaj chik. 5Cha'ana lajuj kawinaq (50) tel chuchi' i nab'e lemaj kortin, xaq keje cha'ana che i julemaj chik, man keje ile, i tel re i nab'e lemaj kortin kutzub'ala rib' ru' i tel re i ukab' lemaj. 6Xaq cha'ana lajuj kawinaq (50) ko'kaq ch'ich' an-o'oj chapb'al re i julemaj kortin ru' i julemaj chik man keje ile k-on jun ja re riqb'al ib' wu'.
7Xaq cha'ana julajuj kortin ru' rismal chab'at re jun mujb'al chi kuch'uq uwi i ja re riqb'al ib' wu'. 8Ronojel i kortin le rajwaxik chi xaqjun raqan xaq xaqjun uwach wuqub' xik'ab' ru' jun mejelik ch'uk kaya che raqan, jun xik'ab' ru' juripaj ab'aj kaya che uwach. 9Chat'isa jo'ob' kortin kutiq rib' uwach ka'an che xaq keje ka'an che i waqib' chik, i uwaq kortin kkanajik re uchija re i ja re riqb'al ib' wu'. 10Cha'ana lajuj kawinaq (50) tel chuchi' i nab'e lemaj kortin xaq keje cha'ana che i julemaj chik. 11Xaq cha'ana lajuj kawinaq (50) ko'kaq ch'ich' anch'ich', chapb'al re i julemaj kortin ru' i julemaj chik, man keje ile k-on xaqjun. 12I kortin re i mujb'al lik naj raqan, rumali kb'or an nik'aj chuqul ja re i riqb'al ib' wu'. 13Keje ile kch'uqtaj uwi i ja re i riqb'al ib' wu' rumal i kortin naj raqan chi kk'is taj are i keb' ripaj ab'aj ru' nik'aj che pa taq utzal.
14Cha'ana re i mujb'al le jun ch'uqb'al uwi xaq katz'aj ru' tz'ajb'al kaq, xaq ka'an jun chik ch'uqb'al ru' utz'umalil chikop chi lik ko re kok li pa rajwal.
15Cha'ana jub'an pimiq taq tz'alam re aqan, re i ja chi re riqb'al ib' wu', i pimiq taq tz'alam le lik che i che' suj kelsax wi xaq lik suk'ul ukojik cha'ana. 16I pimiq taq tz'alam le is kakab' xik'ab' ru' nik'aj kya' che raqan xaq oxib' ripaj ab'aj uwach. 17Kajisij b'i nik'aj che upimol uchi' i pimiq taq tz'alam pa taq uxukut, man keje ile kuchap rib' uchi' ru' i jun chik tz'alam. Keje ile k-ani che ronojel i pimiq taq tz'alam re i ja re riqb'al ib' wu'. 18Juwinaq (20) pimiq taq tz'alam kakoj puwiqab' i ja re riqb'al ib' wu'. 19Xaq kakoj kawinaq (40) kub'ib'al re saq-o'oj chuxe' i tz'alam, kakab' kub'ib'al k-e chuxe' i jujun, man keje ile i uchi' i tz'alam kkub'i puwi ukub'ib'al.
20Xaq juwinaq pimiq taq tz'alam kakoj pusuk' b'i moxab' che i ja re riqb'al ib' wu', 21xaq kakoj kawinaq (40) ab'aj saq-o'oj chi yijb'am pukub'ib'al i tz'alam; kakab' k-e chuxe' i jujun tz'alam. 22Kakoj waqib' pimiq taq tz'alam chrij li ja re riqb'al ib' wu', chi pusuk' b'i uqajb'al ij. 23Xaq kakoj chik keb' pimiq taq tz'alam pa taq uch'uk chila chrij i ja re riqb'al ib' wu', 24i keb' pimiq taq tz'alam le rajwaxik chi lik kale upimol ka'an che, kayut' uwi ru' jun ch'ich' xaq keje ile ka'an che jun chik uch'uk. 25Rajwaxik wajxaqib' pimiq taq tz'alam xaq waqlajuj ab'aj saq-o'oj re ukub'ib'al i pimiq taq tz'alam, keb' kub'ib'al k-e chuxe' jun tz'alam.
26Xaq katzukuj jo'ob' che' suj, re b'alul chapb'al re i tz'alam che juperaj che i ja re i riqb'al ib' wu'. 27Jo'ob' b'alul re i juperaj chik xaq jo'ob' chik re chrij i riqb'al ib' wu', pusuk' i uqajb'al ij. 28I b'alul re pa nik'aj, kik'aw punik'ajal i tz'alam kok b'i chuchi' jewa kupon k'a chuchi' jela. 29Te'uri kakoj an-o'oj chrij i pimiq taq tz'alam, ka'an jub'an ral taq sotsaq an-o'oj man kik'aw i b'alul chupam, xaq kakoj an-o'oj chrij. 30I ja re i riqb'al ib' wu' lik ka'an ni che chrij pacha xk'ut chawe chila tzam jyub'.
31Xaq cha'ana jun kortin xar, kaq, kaqxar xaq i chom laj lino; i kortin le kt'is querubín chwach, chi lik chom k-ani che. 32Kayijb'a kajib' aqan xwiri are i che' suj, re i ja re i molb'al ib', xaq kakoj b'i an-o'oj chrij, kakoj ko'kaq ch'ich' an-o'oj che xaq kakoj jujun ukub'ib'al saq-o'oj chuxe' i kajib' aqan le. 33Katzayb'a i kortin che i chapb'al re chi an-o'oj. Chrij i kortin le kaya wi i kaxa re utrat i Dios; xaq i kortin kuriq uchak chiwe yix man ku'at uxol i Lo'laj K'ijib'al re i Dios ru' i Lik Lo'laj K'ijib'al re i Dios. 34Kakoj i ch'uqb'al uwi i kaxa re utrat i Ajwal chila che i lik Lo'laj K'ijib'al re i Dios. 35Chaya li mexa chwach i kortin chila puwiqab'im i ja re riqb'al ib' wu', xaq i tzuk'b'al kaya li chwach i mexa chila pumoxim i ja re molb'al ib'.
36Cha'ana jun kortin re i okb'al che i ja re riqb'al ib' wu', ru' i chij xar, ru' chij kaqxar, ru' chij kaq xaq ru' i chij chi chom laj lino, i kortin le kt'is rumal jun winaq chi lik are uchak ile. 37Kayijb'a jo'ob' aqan re i ja re i molb'al ib' chi are i che' suj, kakoj an-o'oj chrij xaq i chapb'al re i kortin lik an-o'oj; xaq i jo'ob' aqan le kakoj jo'ob' ukub'ib'al chuxe' chi anch'ich'.
Keje ile xub'ij i Dios che ma Moisés.
Currently Selected:
%C9xodo 26: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
