%C9xodo 30
30
Sujb'al sipon re porb'al pom
1Cha'ana jun sujb'al sipon re porb'al pom, are uche'lal suj kakoj che. 2Xaqjun uwach ru' i raqan ka'an che, keb' ripaj ab'aj ru' oxib' uwi ab'aj uwach xaq keb' ripaj ab'aj ru' oxib' uwi ab'aj raqan, xaq i unajtil rij nik'aj xik'ab' ru' nik'aj ripaj ab'aj; i pacha taq rok'a' xaq lik che uche'lal suj kel wi. 3Kakoj b'i an-o'oj puwi, che i kajib' uxukut xaq kakoj che i pacha rok'a'; xaq chakojo jun retz'b'alil uchi' lik an-o'oj. 4Xaq chakojo keb' sotsaq ch'ich' an-o'oj pa taq uxukut, chuxe' qaj i retz'b'alil uchi', re rik'awb'al i che' chi k'amb'al b'i re xaipa. 5Chayijb'a keb' che' suj, xaq kakoj an-o'oj chrij. 6Chaya pan i sujb'al sipon chi re porb'al pom chwach i kortin, chi o li chwach i kaxa re utrat i Ajwal, chi xaq ke'eloq chwach i ch'uqb'al chi are ch'uqb'al uwi i kaxa le, ipa kqariq wi qib' awu'. 7Ronojel usaqirb'al are kuyijb'a i wuqub' u'ab' i tzuk'b'al ma Aarón, kuporoj ni pom chi lik muy puwi i sujb'al sipon, 8xaq are kqaj ij te'uri kutzij i wuqub' u'ab' i tzuk'b'al le xaq kuporoj chik i pom; ile rajwaxik chi lik kkimayij ti u'anik chwach i Ajwal ronojel ij saq. 9Kaporoj ti jun chik pom puwi i sujb'al sipon le, mitene umuyal uk'ok'al, mijun chik sipon ch'irajil xaq kajam ti uwa'al uva muqb'am puwi. 10Jumul jun junab' i ma Aarón kusujuj ni ukik'el i sipon re tz'onb'al kuyb'al mak, kusu chrij i pacha rok'a' i sujb'al sipon. I sujb'al sipon le lik ultalik we Yin chi in Ajwal; xcha.
I tob'al re i k'aslemal
11I Ajwal xub'ij che ma Moisés:
12Are keawajlaj konojel aj Israel, rajwaxik chi chkijujunal kkiya ni jun sipon chinwach Yin chi in Ajwal, tob'al re kik'aslemal, man keje ile nti jun k'ax laj yob'il kpe pkiwi xaq kekam taj are ktijin kajlaxik. 13Chkijujunal ni'pa ke'ajlaxik, rajwaxik chi kkiya nik'aj ons saqpwaq chinwach Yin, chi in Ajwal, chrij pacha i pajb'al re i ja re molb'al ib'. 14Xwiri, xwi je nimaq chik chi je ik'awnaq chik che i juwinaq junab' rajwaxik chi kkiya kisipon chwe. 15Are kkiya i sipon re tob'al re kik'aslemal, i b'eyom kuya ti k'i xaq i nib'a', pich' taj kuya'o, lik nik'aj ons kkiya chkijujunal. 16Lik yet katk'amaw ni i pwaq chke aj Israel, xaq kajach ni pa ja re riqb'al ib' wu' man ile ku'an na chi kek'un ni aj Israel chink'ux xaq kinkoj ni pajil chi aj Israel xkiya kisipon tob'al re kik'aslemal.
I yab'al ch'ajb'al ab'aj anch'ich'
17I Ajwal xub'ij che ma Moisés:
18Cha'ana jun ch'ajb'al ab'aj anch'ich', xaq cha'ana jun raqan anch'ich' xaq chaya chila pa nik'aj che i ja re i riqb'al ib' wu' ru' i sujb'al sipon, te'uri chanojsaj che ya. 19I ma Aarón xaq i je rak'al chila kkesaj wi kiya' ch'ajb'al ki'ab' xaq kaqan. 20Are ke'ok pa ja re i riqb'al ib' wu' xaq are ketejeb' ru' i sujb'al sipon chusujuxik kisipon porom chinwach Yin chi in Ajwal, rajwaxik chi arewi kkich'aj ki'ab' xaq i kaqan are ke'ok chinwach man keje ile kekam taj. 21Lik rajwaxik chi kkich'aj ki'ab' xaq i kaqan ru' ya, man keje ile kekam taj. Ile are jun atb'al tzij chi lik ronojel ij saq uwach che ma Aarón xaq chke konojel umuq uxikin.
I aceite re i ulunik
22I Ajwal xub'ij chik che ma Moisés:
23Cha'ulu i utz laj taq es muy, keje uyijb'axik iri ka'an che: Jun almul mirra, nik'aj almul canela, xaq nik'aj almul ajij muy, 24jun almul jomet re i che' muy xaq lajuj ral taq k'ox aceite oliva chrij pacha koksax pa lo'laj k'ijib'al. 25Ru' ronojel i mololem le kayijb'a i lo'laj aceite, lik jun aceite k'iyal uwach umuyal pacha kki'an aj-anol kunb'al muy. Ile are ni lo'laj aceite re koksax chrij i jalajuj taq b'iroxik jachb'al re pin-ab'. 26I lo'laj aceite le, are koksax che i ja re i riqb'al ib' wu', xaq che i kaxa re utrat i Dios, 27che i mexa xaq che ronojel ni'pa i chapb'al chila pa ja re i molb'al ib', che i tzuk'b'al xaq che ronojel ni'pa o che i tzuk'b'al le, xaq che i sujb'al sipon re porb'al pom, 28che i sujb'al sipon re umuyal uk'ok'al, ronojel ni'pa o che i sujb'al sipon xaq i ch'ajb'al ab'aj rachi'ilam i raqan. 29Keje ile ka'an che jachb'al re pin-ab' Yin chi in Ajwal Dios, ronojel ile kkanajik chi lik o u'ij; xab'iroxik kyinaw ni'pa ile lik kkanaj uri chi jachtal pin-ab'; xaq lik we Yin uri ultalik.
30Chakojo i aceite che ujolom ma Aarón xaq che kijolom rak'al jachb'al ke pin-ab', man ike le je are i kki'an kipatan chi ajsujul sipon chinwach. 31Chab'ij ni iri chke aj Israel: Wo'or are ni lo'laj aceite ile re jachb'al re i b'iroxik pin-ab' ronojel ij saq koksaxik. 32I aceite le to' mikoj taq chkij i to' winaq xaq mitij taq uyijb'axik iwe yix, pacha uyijb'axik xin-an Yin che. Ile are jun aceite chi lik jachtal pin-ab' Yin chi In Ajwal. 33We o jun kuyijb'a taq jun aceite pacha ile, xaq we kukoj taq chrij jun chik winaq, lik saq laj tzij kkam na, katcha chke, xcha.
I pom
34Are uri xub'ij chik i Ajwal che ma Moisés: Junam unimaqil i kunb'al muy kak'amo: Chak'ama i pacha ol, jun ixtok' muy, gálbano xaq i rutzil pom, ronojel is xaqjun unimaqil kakojo, 35ronojel ile xa jun cha'ana che, man kiji jun pom lik muy, lik utz u'anik cha'ana che pacha u'anik kki'an aj-anol kunb'al muy che are kki'an i kikunb'al muy. 36Chajok'o jub'i' che i mololem le, te'uri keaya chwach i kaxa re intrat chila pa ja re riqb'al ib' wu'. I pom le lik are jachtal pin-ab' Yin. 37Rumali miyijb'a ile we to' iwe yix pacha uyijb'axik xinb'ij Yin chiwe, man ile xwi we Yin, ile chawe yet lik are jun b'iroxik chi jachtal pin-ab' Yin. 38Xapachin kuyijb'a jun pom re kuqusij umuyal lik kelsax b'i uri putinimit.
Xcha.
Currently Selected:
%C9xodo 30: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
