%C9xodo 31
31
I ajjitz'ol k'ul re i ja re riqb'al ib' ru' i Dios
1I Ajwal xusik'ij ma Moisés xub'ij che:
2Chakojo pajil chi Yin xin-ul ma Bezaleel chi uk'ojol ma Uri, ri umam mam Hur, ke utzob'ajil ma Judá. 3Lik innojsam che utewal i Dios, che i nojb'al, che i b'iwil xaq che i tikilem chunojixik k'ak' taq anik, 4pacha la chu'anik chak re i an-o'oj, saq-o'oj xaq i anch'ich'. 5Xaq uchomaxik chomiq taq ab'aj, relsaxik pa nik'aj xaq chu'anik retz'b'alil i che', xaq chu'anik jalajuj chomiq taq chak. 6Xaq inkojom jun tol re chi are ma Aholiab chi uk'ojol mam Ahisamac, chi re i jutzob'aj re ma Dan, xaq lik inya'om i nojb'al chke konojel i o kinojb'al chu'anik ronojel ni'pa at intaqom che, are iri: 7Ja re i riqb'al ib' wu', kaxa re utrat i Dios, i ch'uqb'al uwi i kaxa re utrat i Dios, xaq i jub'an chik chi kuriq uchak chila pa ja re riqb'al ib' wu'. 8Mexa xaq ni'pa i kajwax puwi, tikb'al tzuk'b'al chi lik an-o'oj xaq ronojel ni'pa kajwax che i sujb'al sipon re porb'al pom, 9sujb'al sipon porom re umuyal uk'ok'al, ch'ajb'al re i yab'al, ch'ajb'al ab'aj xaq i raqan i ch'ajb'al ab'aj le; 10ronojel ni'pa i k'ul jitz'om, chi re lo'laj u'u' i ajsujul sipon chi ma Aarón xaq ki'u' i rak'al chi kkikojo are kki'an kipatan chi ajsujul sipon. 11Rachi'ilam i lo'laj aceite chi koksaxik xaq i pom chi lik muy re i lo'laj k'ijib'al. Ronojel ni'pa xinb'ij chawe le lik rajwaxik chi k-ani na.
I sábado
12I Ajwal xub'ij che ma Moisés:
13Chab'ij chke konojel aj Israel chi rajwaxik msach i ij sábado chkik'ux, man i sábado le lik are jun ij chi kuk'utb'ej re chi Yin in Ajwal, yix xaq i lemajil re k-on panoq kketamaj na chi yix ix intinimit chi kikoj in-ij. 14I sábado are jun ij chi lik elsam re i Ajwal rumali lik o u'ij chiwe yix, rumali rajwaxik msach chik'ux. Jun we kukoj ti u'ij i lo'laj ij le xaq we kchakun che i ij le lik saq laj tzij kkam na. 15Waqib' ij kixchakun na xwiri are kuriqa i wuqub' ij kixuxlan na, man i ij le lik are jun ij chi xin-ul Yin re kojb'al in-ij. Jun winaq we kchakun che i ij sábado le saq laj tzij lik kkam na. 16I yix aj Israel lik msach ukojik u'ij i ij sábado chik'ux, man are jun trat ile chi k-e ij saq chrij, chke konojel i lemajil chi kek'un chiwij yix. 17Man are jun ilb'al re chi k-e ij saq chrij chqaxol junam ku' aj Israel.
Man i Ajwal waqib' ij xnajtin chu'anik i kaj xaq i ulew, xwiri che uwuq ij lik xuxlanik. Xcha.
18 I Ajwal are xumayij lapanik ru' ma Moisés chila che i jyub' Sinaí, xujach keb' perpaq ab'aj che chi utz'ib'am utzij upixab' chwach ru' uwi u'ab'.
Currently Selected:
%C9xodo 31: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
