%C9xodo 32
32
Uk'exwach me' an-o'oj
1I je aj Israel are xkilo chi nti chik uqajik li ma Moisés tzam jyub', are uri xkimol kib' chrij ma Aarón, xkib'ij che:
—Cha'ana jun qa-dios chi knab'ej b'i chqawach chi xaq tol qe, man i ma Moisés chi xojresaj li pa Egipto, qeta'am taj wach xuk'ulmaj —xecha.
2I ma Aarón xub'ij chke:
—Chiwesaj i karit che kixikin, kuwaj xaq i kib'aq re uwi ki'ab' iwixoqil, imi'al xaq ik'ojol, ni'pa ile lik an-o'oj, is ronojel chik'ama li chwe yin —xcha.
3Konojel ixoqib' aj Israel xkesaj i karit chi kikojom che kixikin chi lik an-o'oj, xkik'am b'i che ma Aarón, 4are uri i ma Aarón xuk'am chke, te'uri xu'an ya che i an-o'oj le pa a', are xjorob'ik xuyijb'a ru' tz'uqub' xu'an jun tiox che chi pacha jun me'. Are uri xkib'ij chkiwach:
—Yoj chi oj aj Israel, are qa-dios iri chi xojresaj li pa Egipto —xecha.
5Are xril ma Aarón ile, xuyijb'a jun sujb'al sipon chwach i pacha me' le, xaq xsik'in chub'ixkil chke konojel i winaq:
—¡Chweq kqa'an jun nima'ij kojb'al u'ij qa-dios!
6Chukab' ij we' xewalijik, xkisujuj umuyal uk'ok'al xaq xkiya kisipon re chomb'al ib'. Te'uri xekub'i konojel i winaq chutijawik kiwa xaq chutu'ik kiya', are xkelej wa'im xexajawik xaq lik xekikotik. 7Are uri i Ajwal xub'ij che ma Moisés:
—Jat, chatqaj b'ik man i awinaq chi xeawesaj li pa Egipto, xjech'ab' kinojb'al. 8Ike juntir xko'taj kan i b'e chi inb'im chke chi keb'in che. Xki'an jun tiox pacha me', xkikoj u'ij, xkisujuj kisipon chwach, xaq xkib'ij: “¡Yoj chi oj aj Israel, are qa-dios iri chi xojresaj li pa Egipto!” —Xecha.
9I Ajwal xub'ij chik che ma Moisés
—Yin xwil chik chi i winaq le lik je b'uy. 10Rumali wo'or lik petnaq chik woywal chke, wo'or lik kinchup kiwach, xwiri lik kin-an ni jun nim laj tinimit chke amuq axikin.
11Are uri ma Moisés xutz'onoj utzil che i Ajwal chi u-Dios, ru' i tziji:
—Ajwal ¿B'uchak xpe awoywal chke awinaq, man lik ru' nim laj acho'ab' xaq ru' nimaq taq il xeawesaj li pa Egipto? 12¿B'uchak kaya chke aj Egipto chi kkib'ij i tziji chawij? “I Dios xeresaj b'ik man uch'ob'om kikamsaxik chwi nimaq taq jyub', re chupb'al kiwach chwach i jyub' ta'aj.” Cha'atij awoywal, lik maya taq jun k'ax pkiwi atinimit. 13Chek'un awajchak chak'ux chi mam Abraham, mam Isaac xaq mam Israel; lik yet xab'ij chke chi “ka'an ni chke kimuq kixikin chi lik je k'i na pacha uk'iyal i ch'umil chwa kaj.” Xaq xab'ij chke chi “ronojel ulewi kaya ni chke kimuq kixikin, lik ke ni ike ronojel ij saq.”
14Are uri i Ajwal xumayij i ch'ob'onik le chi ku'an te'eq k'ax chke utinimit. 15Te'uri ma Moisés xel chila tzam jyub' Sinaí, xqaj b'i ku' aj Israel, rok'am b'i keb' perpaq ab'aj pu'ab' chi tz'ib'tal utzij upixab' i Dios chwach k'ulala. 16I perpaq ab'aj le lik are i Dios anawnaq xaq i tz'ib' chi o chwach lik are i Dios tz'ib'awnaq.
17I ma Josué are xuta chi kesik'in i winaq, xub'ij che ma Moisés:
—Kinta yin kesik'in i winaq che i ch'oj chila ipa o wi kik'ijib'al.
18Xwiri ma Moisés xub'ij che:
—I sik' le kinta yin are ti jun sik' re kikotemal xaq are ti sik' re tikilem che jun ch'oj, mitene are taq jun sik' chi xkijam kib' che jun ch'oj, kinta yin lik xa keb'ixanik.
19I ma Moisés are xupon chila ipa je o wi aj Israel xril pan uwach i me', xaq xrilo chi kexajaw chwach, are uri xpe jun nim laj roywal, xuk'aq b'i perpik ab'aj pulew chi o utzij upixab' i Dios chwach, lik ch'aqa taq x-ono. Ile xuk'ulmaj chila xe jyub' Sinaí. 20Are uri x-e chila ipa ketijin wi che i nima'ij, xuk'am pan i me' chi ki'anom, xuk'aq pa a', te'uri xujok'o k'a x-on ni k'ajil che, xuk'aq pa ya, te'uri xeutaq aj Israel chutu'ik i ya le. 21Te'uri ma Moisés xuyaj ma Aarón ru' i tziji:
—¿Wach taq wa xki'an i winaq le chawe, chi xa'an chke xki'an jun nim laj mak atzalal? 22I ma Aarón xub'ij:
—Mpe awoywal nim laj winaq, man yet aweta'am chi konojel winaq le lik kiya'om kik'ux che i mak atzalal. 23Ike xkib'ij chwe: “Lik cha'ana jun qa-dios chi knab'ej ni chqawach, man i ma Moisés chi xojresaj li pa Egipto qeta'am taj wach taq xuk'ulmaj”; xecha. 24Yin xinb'ij chke chi “konojel ni'pa o karit, kuwaj xaq i b'aq re uwi ki'ab' chi an-o'oj kkik'am li chwe”; are uri ike xkiya i an-o'oj chwe, yin xincha'saj pa a', lik che ile xel wi i me' le.
25I ma Moisés are xrilo chi konojel i winaq lik kkita ti chik ub'e, rumal ma Aarón chi xtiki ti chki'atixik lik to' xuya chke xaqmanal xki'ano, xaq xe'eloq chi ketze'ex uri kumal ajch'oj chkij. 26Are uri xtak'i pan pa okb'al, ipa je o wi aj Israel, xub'ij chke:
—Konojel ni'pa kiya'om kiwach ru' i Ajwal chepet waral pintzali.
Are uri konojel je aj Leví xe'e pan putzal ma Moisés.
27Are uri i ma Moisés xub'ij chke:
—I Ajwal chi xaq ki-Dios aj Israel kutaq u'anik iri: “Chijujunal chik'ama b'i ich'ich' pi'ab', jix pa'anem chixsutin chrij ronojel i k'ijib'al chikamsaj xapachin kik'ulaj tupu iwatz icha', iwamiy xaq tupu we je ib'esin.”
28I je aj Leví xki'ano pacha xb'ix chke rumal ma Moisés, che i ij le xekikamsaj kolo lajujwinaq wuqmo' (3,000) je aj Israel. 29Are uri ma Moisés xub'ij chke:
—Wo'or, yix xya' i atb'al tzij pi'ab' rumal i Ajwal, Ire xuya utzil chomal piwi che i iji, man xiya ti iwach ku' iwak'al xaq ku' iwatz icha'.
30Chukab' ij i ma Moisés xub'ij chke aj Israel:
—Yix xi'an jun nim laj mak atzalal. Xwiri wo'or kinel b'i tzam jyub' chuk'ulaxik qib' ru' i Ajwal, man kintz'onoj tob'al iwach che, moqxa kintiki che chi Ire kukuy ni imak.
31Are uri ma Moisés x-e chik che i k'ijib'al ipa o wi i Ajwal, xub'ij che:
—¿Lik nim laj mak atzalal xki'an i winaqi, chi xki'an ki-dios an-o'oj. 32Xwiri yin kintz'onoj chawe chi chakuyu ni kimak i winaq le. Xwiri we keakuy taj ¡Chachupu uri inb'i chupam i wuj ipa atz'ib'am wi!
33I Ajwal xub'ij che ma Moisés:
—Xwi i jun chi kmakun chinwach are kinchup ni ub'i chupam inwuj. 34Yet jat, cheak'ama b'i winaq che i k'ijib'al chi xinb'ij chawe, knab'ej nu b'i in-ángel chawach. Man lik kuriq ni ij chi kinya utojb'alil chke i winaq le rumal i mak atzalal chi xki'ano.
35I Ajwal xuya li jun tojpen pkiwi aj Israel. Rumal xkikoj u'ij i me' chi xu'an ma Aarón.
Currently Selected:
%C9xodo 32: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
