%C9xodo 33

I Ajwal kuya i taqanik chi kkimayij ti kib'e

1I Ajwal xub'ij che ma Moisés:

—Jat, chatel che i k'ijib'ali, junam ku' i winaq chi xeawesaj li pa Egipto, jix chila che ulew chi xinsujuj che ma Abraham, che ma Isaac xaq che ma Jacob, chi kinya chke kimuq kixikin, 2Yin kinnab'saj b'i jun ángel chawach, xaq kewesaj b'i aj Canaán, aj Hamor, aj Het, aj Ferez, aj Jiw xaq i je aj Jebús che i nim laj tinimit. 3Jix che ulew ipa lik ni' ti chawaj che i leche xaq che uwa'al kab'. Xwiri Yin kin-e ti chixol yix, man lik ix chikop laj taq winaq moqxa kixinkamsaj pa taq b'e.

4I je aj Israel are xkita ile chi lik ko kichapik x-anik, xkijeq o'ej, mijun xukoj chik ub'aq re uwi u'ab', rarit, xaq i uwaj, 5man i Ajwal ub'im che ma Moisés:

—Chab'ij chke aj Israel chi “lik je chikop laj taq winaq, man we kink'iji jub'i' ku' su' kink'is neri uchupik kiwach, chab'ij chke chi chkesaj i b'aq re uwi ki'ab', karit xaq i kuwaj man Yin la kwilo wach kin-an chke i winaq le.”

6Rumali i je aj Israel chila che i jyub' Horeb xkimayij wi ukojik i b'aq re uwi ki'ab', sotsaq re uqul ki'ab', karit, kuwaj xaq i pacha b'aq chi kkiwoyb'a pkitzam.

I ja wu'wik re riqb'al ib' ru' i Dios

7I ma Moisés xutor b'i ja re k'ul xuyijb'a chik k'a naj panoq che i k'ijib'al ipa je o wi aj Israel. Xuya pub'i: Ja re riqb'al ib' ru' i Dios. We o jun kraj klapan ru' i Dios, rajwaxik kel b'i che i k'ijib'al ipa o wi, k-e uri k'a chila ipa o wi i ja re riqb'al ib' ru' i Dios. 8Lik arewi, are k-e ma Moisés chila ipa o wi i ja re riqb'al ib' ru' i Dios, konojel aj Israel ketak'i li xol uchija re kimujb'al, kkiterejsaj b'i kib'a'wach chrij ma Moisés, k'a kok nu b'i chupam i ja re riqb'al ib' ru' i Dios. 9Are kok b'i ma Moisés chupam i ja re riqb'al ib' ru' i Dios, kqaj li jurab'aj sutz', xaq kkanaj chila pa okb'al re i ja re riqb'al ib' ru' i Dios, tz'aqat klapan i Ajwal ru' ma Moisés. 10I je aj Israel are kkil i jurab'aj sutz' chi kkanaj che i okb'al re i ja re riqb'al ib' ru' i Dios, konojel ike kexuki chila xol uchija re kachoch, kojb'al u'ij i Ajwal.

11I Ajwal klapan ru' ma Moisés, lik kkitzub'ala kib' pacha k-on jun winaq chi klapan ru' jun ramiy. Are kutzin kilapanik, te'uri ktzalij chub'i ma Moisés che i k'ijib'al ipa je o wi aj Israel; xwiri i ma Josué uk'ojol ma Nun chi lik teren chuto'ik ma Moisés, kel ti chila chupam i ja re riqb'al ib' ru' i Dios.

I Ajwal kuk'ut uchomal che ma Moisés

12I ma Moisés xub'ij che i Ajwal:

—Yet lik ka'an pen chwe chi kewok'aj i tinimit, xwiri ab'im ti chwe pachin kataq b'i wu'; xaq ab'im chwe chi lik in awamiy xaq ab'im chwe chi kawil tob'al inwach. 13We keje ile, chab'ij uri chwe wach kin-ano, man kwetamaj we kawil tob'al inwach. Chk'un chak'ux chi i je aj Israel lik je atinimit.

14I Ajwal xub'ij che ma Moisés:

—Lik Yin kin-e awu' xaq kinya ni uxlanem chawe.

15Are uri ma Moisés xub'ij chik che i Ajwal:

—Utzi' we kat-e qu', man we kat-e taj xaq mojawesaj b'i uri waral. 16Yet we kojawachnimaj taj ¿Wach retamaxik kin-an yin che xaq wach retamaxik kki'an awinaq we kawil tob'al qawach? Xwi keje ile, yin xaq i awinaq koj-iltaj uri chi oj junwi chkiwach i jub'an chik winaq chwach i jyub' ta'aj.

17—Utzi', kin-an na pacha xatz'onoj chwe, man kwil tob'al awach xaq lik at wamiy —xcha i Ajwal che ma Moisés.

18Are uri ma Moisés xub'ij chik che i Ajwal:

—Chaya chwe chi kwil ronojel a'ij achomal.

19Xwiri i Ajwal xub'ij che: Kinya ni ilb'al re rutzil ink'ux che i jun chi o rutzil uk'ux, xaq chawach yet kinb'ij ni inb'i. Kawil na chi kwil tob'al uwach i jun chi kril tob'al uwach i rach lok'anij. 20Xwiri lik kinsaqij chawe chi kawil ti inwach, man mijun winaq kril inwach we o jun xril inwach lik saq laj tzij kkamik.

21I Ajwal xub'ij chik che ma Moisés:

—Chawila pe', chi pintzal o jun k'ijib'al, chattak'i puwi i nim laj ab'aj. 22Are kinik'aw Yin ru' ronojel in-ij inchomal, katinya ni chuxe' i pek re i ab'aj, katinch'uq ni ru' in-ab' k'a kinik'aw na. 23Te'uri kwesaj in-ab', keje ile kawil ni uchel wij, xwiri kawil ti inwach.

Currently Selected:

%C9xodo 33: ACHICUB

Highlight

Copy

Compare