%C9xodo 35
35
Atb'al tzij re i ij sábado
1I ma Moisés xumol kichi' konojel aj Israel, xub'ij chke: “Iri are kixutaq i Ajwal che chi ki'ano. 2Waqib' ij kixchakunik, xwiri are kuriqa i uwuq ij kixuxlan na, man lik are jun ij ile chi xin-ulu re kojb'al in-ij Yin. Jun winaq we kchakun che i ij le, saq laj tzij lik kkam na. 3Xa'ipa ix o wi lik mijun kunuk' a' prachoch che i ij sábado.”
Sipon re i ja re riqb'al ib' ru' i Dios
4I ma Moisés xub'ij chke konojel aj Israel: Iri are kixutaq i Ajwal chu'anik: 5Konojel ni'pa o rutzil kik'ux chkimolo kisipon i chkik'ama li che i Ajwal, chuxol ni'pa ub'itaq ke: An-o'oj, saq-o'oj xaq i anch'ich'; 6k'ul kaqxar, k'ul kaqkoj, k'ul kaq, chom laj k'ul lino, rismal chab'at, 7utz'umalil i chij chi antal kaq che, chom xaq ko laj tz'um, che' re suj, 8aceite re i tzuk'b'al kunb'al muy chi kkoj ru' i aceite chi kkojik are kya' u'ij jun winaq chwach i Ajwal, xaq i pom muy, 9ab'aj ónice xaq i chomiq taq ab'aj chi koksax che i efod#35.9 Iri are pacha jun chaleco jurjik chi kukoj i atz laj ajsujul sipon., xaq che i perpaq chi k-e chwach uk'ux i atz laj ajsujul sipon.
I chapb'al re i ja re riqb'al ib' ru' i Dios
10Konojel ni'pa keta'am u'anik i jalajuj taq chak, rajwaxik kepetik man kki'an ni ronojel pacha xub'ij i Ajwal. 11Ronojel ni'pa i rajwaxik k-anik are iri: Jun ja re riqb'al ib' ru' i Dios, jun ja re k'ul, jun ch'uqb'al uwi pacha jun mujb'al, ko'kaq ch'ich', tz'alam, b'alul, aqan, xaq i ukub'ib'al; 12i kaxa re utrat i Dios xaq i kib'alul, xaq i ch'uqb'al uwi, xaq i kortin chi koksax chwach i kaxa; 13mexa xaq i kib'alul, xaq ronojel ni'pa i kajwax puwi i mexa le, xaq i wa re trigo chi elsam re ksujux chwach i Ajwal; 14i tzuk'b'al re i tzunb'al xaq ni'pa i kajwax che i tzuk'b'al xaq i aceite re i wuqub' u'ab' i tzuk'b'al man ktzunik. 15I sujb'al sipon re i pom chi lik muy xaq i kib'alul, aceite chi kkojik are kya' u'ij jun winaq chwach i Ajwal, pom chi lik muy, kortin re tz'apb'al uchi' i okb'al re i ja re riqb'al ib' ru' i Dios, 16sujb'al sipon re porb'al re i sipon re umuyal uk'ok'al, rachi'ilam uqejlal chi lik anch'ich', i kib'alul xaq ronojel ni'pa i kajwax che, ch'ajb'al ab'aj chi lik anch'ich' rachi'ilam i raqan, 17kortin re uwaja, rachi'ilam i aqan xaq i ukub'ib'al, kortin re i okb'al b'ik che uwaja, 18staka re i k'ul pim, chi sutb'al rij uwaja i ja re riqb'al ib' ru' i Dios, rachi'ilam ni'pa i laso chapb'al re i aqan; 19xaq i k'ul jitz'om chi kkikoj b'i ajsujul sipon are ke'ok chu'anik kipatan chupam i lo'laj k'ijib'al, xaq i k'ul chi o u'ij chi kukoj b'i ma Aarón chi xaq kkikoj b'i rak'al.
I tinimit kuk'am li sipon
20Te'uri konojel aj Israel xe'el chwach ma Moisés, 21konojel ni'pa xkina pkik'ux chi lik rajwaxik ni'pa xb'ixik, xkik'am b'i uri i sipon re i Ajwal anb'al re i ja re riqb'al ib' ru' i Dios, re i jalajuj taq rajwaxik xaq re i anb'al ki'u' i ajsujul sipon. 22Ronojel ni'pa xalax pkik'ux, achiyab' che ixoqib' xkik'am b'i jalajuj taq b'iroxik chi lik an-o'oj re kisipon: Karena, arit, b'aq re uwi ab'aj xaq i sotsaq re uqul ab'aj xaq ronojel i jalajuj taq b'iroxik chi an-o'oj. Konojel aj Israel xkijach i sipon pu'ab' i Ajwal, 23xaq o jujun xkik'am b'i k'ul lana kaqxar, kaq xaq i kaqkoj xaq i chom laj lino, rismal chab'at, kitz'umal i mama'ib' taq chij chi antal kaq che, xaq i tz'umalil chi lik chom xaq ko, kuk'am loq. 24Xaq ni'pa i je aj Israel chi o saq-o'oj ku' xaq we anch'ich', xkijach pu'ab' i Ajwal re kisipon, xaq keje ike chi o i che' suj ku' xkik'am loq, xkijach pu'ab' i Ajwal, anb'al re i ja re i molb'al ib'. 25Ixoqib' chi lik o kino'oj chu'anik i jalajuj taq chak jitz'om ru' ki'ab', xkik'am li kichij lana kaqxar, kaq, xaq i kaqkoj, xaq chom laj lino. 26O jub'an chik ixoqib' chi kkiriq b'arunik, xaq lik xkina pkik'ux chi lik rajwaxik kki'ano pacha xb'ixik, are u'ankil uri chi ike xkiya kib' chub'aruxik rismal i chab'at. 27I kaj-atzil aj Israel xkik'am b'i ab'aj ónice xaq i jub'an chik ko xaq chomiq laj taq ab'aj, man kkimin chupam uwach uk'ux i efod xaq chwach i perpik re uwach uk'ux i atz laj ajsujul sipon. 28Xaq xkik'am b'i jalajuj taq b'iroxik: Aceite re i tzunb'al, aceite chi kkojik are kya' u'ij jun winaq chwach i Ajwal, xaq i pom chi lik muy.
29Konojel aj Israel chi xkina pkik'ux chi rajwaxik kki'ano pacha xb'ixik, che achiyab', che ixoqib', anb'al re ronojel i chak chi xub'ij ma Moisés chrij pacha taqtal che rumal i Ajwal.
I ajjitz'ol k'ul re i ja re riqb'al ib' ru' i Dios
30I ma Moisés xub'ij chke aj Israel: Chikojo pajil chi i Ajwal lik xu'ul ma Bezaleel, chi uk'ojol ma Uri, ri umam mam Hur, ke utzob'ajil ma Judá, 31lik xunojsaj ru' utewal Ire, ru' nojb'al, ru' b'iwil xaq ru' tikilem chunojixik k'ak' taq anik, 32chu'anik i chak re i umajik usuk' u'anik i an-o'oj, saq-o'oj xaq i anch'ich', 33uchomaxik xaq relsaxik chomiq taq ab'aj xaq uchomaxik i retz'b'alil i che', xaq chu'anik jalajuj taq chak chi je nawnaq che. 34I Ajwal xuya i nawik re k'utunik che i ma Bezaleel, xaq i ma Aholiab chi uk'ojol ma Ahisamac, chi ulemajil ma Dan. 35Rumali xunojsaj kijolom che i nojb'al, chu'anik ronojel jalajuj taq b'iroxik re uch'ob'ik wach taq u'anik k-ani che jun chak, ut'isik i k'ul kaqxar, kaq xaq i kaqkoj xaq i chom laj lino. Ike lik o kino'oj chukemik i k'ul xaq lik ketiki chu'anik jalajuj taq k'exwach chwach i k'ul.
Currently Selected:
%C9xodo 35: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
