%C9xodo 36

1Rumali ma Bezaleel xaq i ma Aholiab kki'an ni chak chi kajwax pa molb'al ib', chrij pacha ub'im i Ajwal, junam ku' konojel i winaq chi lik o kino'oj chu'anik i jalajuj taq b'iroxik, chi yatal chke rumal i Ajwal, anb'al re ronojel i chak chi kajwax pa lo'laj k'ijib'al re i Dios.

I winaq lik k'i i sipon kuk'am loq

2Are uri ma Moisés xusik'ij ma Bezaleel, ma Aholiab xaq konojel ni'pa i winaq chi lik o kino'oj chu'anik jalajuj taq b'iroxik, chi yatal chke rumal i Ajwal, xaq lik xpe pkik'ux chi kepe chu'anik i chak, 3are uri xjach ronojel i sipon chke rumal ma Moisés, chi kiya'om aj Israel anb'al i chak re i lo'laj k'ijib'al.

Xwiri i je aj Israel lik ij ij kkik'am li kisipon ru' ronojel kik'ux, 4konojel i winaq chi o kino'oj, chi xaq lik latz'ab'naq kiwach chu'anik i chak re i lo'laj k'ijib'al, are xkilo chi je aj Israel xkimayij u'anik i kichak lik kkimayij ti uk'amik li kiqasan, 5are uri xe'e chub'ixkil che ma Moisés, chi lik k'i chik i qasan olik, kuk'is ti chub'i i chak chi utaqom u'anik i Ajwal.

6Are uri ma Moisés xutaq ub'ixkil chke konojel i winaq ipa je o wi: Chi mijun achi xaq mijun ixoq ku'an chik i sipon re i lo'laj k'ijib'al re i Dios. Are u'ankil uri chi je aj Israel xkimayij uk'amik b'i k'iyal taq sipon, 7man lik k'i chik i chakb'al olik.

U'anik i ja re riqb'al ib' ru' i Dios

8Konojel ni'pa ajchakib' chi mas o kino'oj are xe'anaw i ja re riqb'al ib' ru' i Dios, xaq xki'an lajuj kortin ru' chom laj chij lino, kaqxar, kaq xaq i kaqkoj, xaq lik chom ut'isik xki'ano xki'an uk'exwach keb' querubín chwach i kortin. 9Ronojel i kortin lik xaqjun raqan xaq xaqjun uwach, wuqub' xik'ab' ru' nik'aj raqan i jun xik'ab' uwach. 10Xkit'is jo'ob' kortin, xutiq rib' uwach xaq keje xki'an che i jo'ob' chik. 11Te'uri xki'an tel che ronojel uchi', xkikoj k'amsut kaqxar che, xaq keje xki'an che uchi' i julemaj chik, xkit'is uchi' i tel. 12Xki'an lajuj kawinaq (50) tel chuchi' i nab'e lemaj kortin, xaq keje xki'an che i julemaj chik, man keje ile, i tel re i nab'e lemaj kortin kutzub'ala rib' ru' i tel re i ukab' lemaj. 13Xaq xki'an lajuj kawinaq (50) ko'kaq ch'ich' an-o'oj, chapb'al re i julemaj kortin ru' i julemaj chik man keje ile k-on xa jun ja re riqb'al ib' ru' i Dios. 14I ma Bezaleel xukem rismal chab'at, xu'an julajuj kortin re ch'uqb'al uwi i ja re riqb'al ib' ru' i Dios, chi pacha jun mujb'al. 15I julajuj kortin le xaqjun raqan xaq xaqjun uwach, chi xe'eloq wajxaqib' xik'ab' ru' juripaj ab'aj raqan, xaq jun xik'ab' ru' juripaj ab'aj uwach. 16Xkit'is keb' lemaj kortin, o jun jo'ob' xrok'aj wi rib' xki'an che, i jun chik waqib' xrok'aj wi rib'. 17Xki'an lajuj kawinaq (50) ral taq tel chuchi' i julemaj kortin, xaq xki'an chik lajuj kawinaq (50) ral taq tel chuchi' i julemaj chik. 18Xaq xu'an lajuj kawinaq (50) ko'kaq anch'ich' chapb'al rib' i keb' lemaj kortin anb'al re xa jun che.

19I ma Bezaleel xut'is utz'umalil mama'ib' taq chij tz'ajom kaq che, ch'uqb'al uwi i kortin re i molb'al ib' xaq xu'an chik jun kortin chi lik ko re pa rajwal i ja re molb'al ib'. 20Te'uri xeuyijb'a i tz'alam re i ja re riqb'al ib' ru' i Dios, i tz'alam le re uche'lal suj, are xkikoj che i ja le lik suk'ul ukojik xki'ano. 21I tz'alam le kakab' xik'ab' ru' nik'aj kya' che i raqan xaq oxib' ripaj ab'aj uwach. 22Xkijisij b'i nik'aj che upimol uchi' i tz'alam le pa taq uxukut, man keje ile kuchap rib' uchi' ru' i jun chik tz'alam. Keje ile xki'an che ronojel i tz'alam re i ja re riqb'al ib' ru' i Dios. 23Juwinaq tz'alam xu'ano re puwiqab'im i ja re riqb'al ib' ru' i Dios, 24xaq xukoj kawinaq (40) ab'aj saq-o'oj pukub'ib'al i tz'alam, kakab' xukoj chuxe' i jujun tz'alam, man keje ile i uchi' i tz'alam le kkub'i puwi ukub'ib'al. 25Xaq juwinaq pimiq taq tz'alam xkikoj pumoxim i ja re riqb'al ib' ru' i Dios, 26xaq xkikoj kawinaq (40) ab'aj saq-o'oj pukub'ib'al i tz'alam, kakab' x-e chuxe' i jujun tz'alam. 27Xukoj waqib' tz'alam chrij li ja re riqb'al ib' ru' i Dios, chi pusuk' uqajb'al ij. 28Xaq xukoj chik keb' tz'alam pa taq uch'uk i ja re riqb'al ib' ru' i Dios chrij loq, 29i keb' tz'alam le lik je tunb'am, yut'um uwi ru' jun ch'ich', lik keje ile xu'an chke i keb' uch'uk. 30Xkikoj wajxaqib' tz'alam xaq waqlajuj ab'aj saq-o'oj re ukub'ib'al i tz'alam le, keb' kub'ib'al x-e chuxe' chkijujunal i tz'alam.

31I ma Bezaleel xuyijb'a jo'ob' b'alul re che' suj, chapb'al re i tz'alam che juperaj re i ja re riqb'al ib' ru' i Dios, 32xaq jo'ob' b'alul re i juperaj chik i ja re riqb'al ib' ru' i Dios, xaq jo'ob' chik re i juperaj chik chrij i ja re riqb'al ib' ru' i Dios, pusuk' uqajb'al ij: 33I b'alul re pa nik'aj, xu'an che chi xok b'i chuchi' jewa xupon chuchi' k'a jela. 34Xukoj an-o'oj chkij i tz'alam le, xaq xu'an jub'an ral taq sotsaq an-o'oj chke, man re kik'aw i b'alul chupam xaq lik xukoj an-o'oj chkij i b'alul le.

35Xaq xu'an jun kortin ru' i chij xar, kaq, kaqxar xaq i chom laj lino; i kortin le xkit'is jub'an querubín chwach chi lik chom ut'isik xki'ano. 36Xkiyijb'a kajib' aqan re i che' suj, xaq xkikoj b'i an-o'oj chrij, xkikoj ko'kaq ch'ich' an-o'oj che, xaq xkikoj jujun ukub'ib'al saq-o'oj chuxe' i kajib' aqan le.

37Xaq xu'an jun kortin re i okb'al che i ja re riqb'al ib' ru' i Dios, ru' i chij xar, kaqxar, kaq xaq i chom laj lino; i kortin le xt'is rumal jun winaq chi lik are uchak ile. 38Xuyijb'a chik jo'ob' aqan rachi'ilam i ko'kaq ch'ich' xaq i jo'ob' ukub'ib'al anch'ich', xukoj an-o'oj che uwi aqan chkijujunal xaq che i sotsaq ipa kkub'i wi et.

Currently Selected:

%C9xodo 36: ACHICUB

Highlight

Copy

Compare