%C9xodo 38

U'anik i porb'al sipon anch'ich'

1Ma Bezaleel xu'an i porb'al sipon, che' suj xukoj che, jun xik'ab' ru' keb' ripaj ab'aj xuya che raqan xaq keje ile xuya che uwach, jun mejelik ch'uk xuya che unajtil rij. 2Xaq xuyijb'a kajib' rok'a' puwi pa taq uch'uk; lik xrok'aj b'i rib' ru' i porb'al sipon xu'an che, xaq xukoj anch'ich' chrij ronojel i porb'al sipon le. 3Xu'an ni'pa i chapb'al re i sujb'al sipon, yab'al chaj, jub'an pala, nimaq taq laq jub'an chapb'al ti'ij, xaq yab'al a'al; ronojel ni'pa ile lik is anch'ich'. 4Xu'an jun k'ark'ar anch'ich', xukoj rekem qaj uchi' i porb'al sipon chi ke'eloq pa nik'aj qajoq che i porb'al sipon. 5Xaq xu'an kajib' sotsaq ch'ich' re i kajib' uch'uk i k'ark'ar ch'ich', man krik'awsaj i b'alul chupam. 6Xu'an i b'alul le lik ru' i che' suj, xukoj anch'ich' chrij. 7I b'alul le xkik'awsaj chupam i sotsaq ch'ich', lik xkiwoyb'a kan jujun b'alul k'ulala che i porb'al sipon, man k'amb'al b'i re xaipa. I porb'al sipon le xu'an towtik upam che xaq tz'alam xukoj che.

U'anik i yab'al re anch'ich'

8Xwi ta la ile, xaq xutz'onoj i taqb'al kib' ixoqib' chke chi anch'ich', je are ixoqib' chi kechakun chila pa okb'al re i ja re riqb'al ib' ru' i Dios; i anch'ich' le chi xutz'onoj chke ixoqib' xu'an jun ch'ajb'al ab'aj che xaq xu'an i raqan ru'.

U'anik uwaja re i ja re riqb'al ib' ru' i Dios

9Ma Bezaleel xu'an uwaja re i molb'al ib', puwiqab'im xuya jo'ob' juwinaq (25) xik'ab' che i raqan, xaq xukoj chom laj kortin lino che. 10Xukoj juwinaq (20) aqan che xaq juwinaq (20) ukub'ib'al chi lik anch'ich', ni'pa i ko'kaq ch'ich', i sotsaq xaq lik saq-o'oj. 11Xaq keje pumoxim, jo'ob' juwinaq (25) xik'ab' xuya che i raqan uwaja, rachi'ilam juwinaq (20) aqan xaq juwinaq (20) ukub'ib'al chi lik anch'ich'; i ko'kaq ch'ich' re i aqan le xaq i sotsaq lik saq-o'oj. 12I unimal uwach uwaja puqajb'al ij, kab'lajuj xik'ab' ru' nik'aj raqan xaq xukoj chom laj kortin che; lajuj aqan xukoj che xaq lajuj ukub'ib'al, i ko'kaq ch'ich' re i aqan le xaq i sotsaq lik saq-o'oj. 13Xaq i unimal uwach uwaja prelb'al ij, kab'lajuj xik'ab' ru' nik'aj raqan i kortin. 14I kortin re puxukut, oxib' xik'ab' ru' nik'aj xuya che i raqan xaq oxib' aqan, rachi'ilam oxib' ukub'ib'al. 15I juperaj chik ke'eloq chi chekeb' peraj re i okb'al re i lo'laj molb'al ib' o jun kortin chi oxib' xik'ab' ru' nik'aj xuya che raqan, rachi'ilam oxib' aqan xaq oxib' ukub'ib'al. 16Ronojel i kortin chi kusutij rij uwaja lik chom laj lino xukoj che. 17I ukub'ib'al i aqan lik anch'ich', xaq ni'pa i ko'kaq ch'ich' xaq i sotsaq xaq i retz'b'alil uchi' lik saq-o'oj, xaq i paqb'al re i et xkikoj b'i saq-o'oj chrij, ronojel i aqan re i uwaja lik saq-o'oj, xaq sotsaq ch'ich' xkikoj che.

18I kortin re okb'al che uwaja lik chij lana xkikoj che, xkitz'aj ru' kaq, kaqxar xaq i kaqkoj xaq ru' i chom laj lino xaq lik chom ut'isik xki'an che. Jo'ob' xik'ab' ru' juripaj ab'aj i raqan xaq jun xik'ab' ru' oxib' ripaj ab'aj unajtil rij, pacha i kortin re i uwaja, 19kajib' aqan xkikoj che xaq kajib' ukub'ib'al lik anch'ich'. I ko'kaq ch'ich', sotsaq ch'ich', lik saq-o'oj xaq i uwi i aqan le xkikoj saq-o'oj chrij. 20Ronojel i estaka chi re chapb'al k'ul re i ja re riqb'al ib' ru' i Dios xaq i chapb'al k'ul chi sutinnaq chrij i uwaja lik anch'ich'.

Ch'ich' chi xechapb'exik re i ja re riqb'al ib' ru' i Dios

21Are i taqanik iri xuya i ma Moisés xaq i ma Itamar chi rak'al i ma Aarón chi ajsujul sipon, xub'ij chke i aj Leví chi kkajlaj ni'pa i ch'ich' chi xoksax che i ja re riqb'al ib' ru' i Dios.

22I ma Bezaleel chi uk'ojol ma Uri, ri umam mam Hur chi are jun chke ulemajil ma Judá, xu'an ronojel ni'pa xub'ij i Dios che ma Moisés. 23I ma Aholiab chi uk'ojol ma Ahisamac xuto ma Bezaleel; i ma Aholiab le are jun chke ulemajil ma Dan chi ajch'ayol, ajjitz'ol k'ul xaq ajt'is, ru' i chij kaqxar, kaq, xaq i kaqkoj xaq kt'isan ru' i chom laj lino.

24I uk'iyal i an-o'oj chi xya'ik re i sipon chi xkikoj che i lo'laj k'ijib'al re i Dios, xmoltaj juwinaq (20) tintal. Chrij pacha i pajb'al re i lo'laj k'ijib'al re i Dios.

25I saq-o'oj chi xmoltaj che taq i ij are xtz'ib'ax kib'i i winaq pa komon lajuj oxwinaq (70) tintal ronojel, chrij pacha i pajb'al re i lo'laj k'ijib'al re i Dios. 26Konojel ni'pa o chik juwinaq junab' (20) chke je lajuj wuqlajujwinaq wajxaqmo' jo'lajujchiy oxt'ub' (603,550) xaq konojel xkiya jo'ob' saq-o'oj chrij pacha i pajb'al re i lo'laj k'ijib'al re i Dios. 27Waqib' oxwinaq (66) tintal saq-o'oj man xyayursaxik re xoksax pukub'ib'al i lo'laj k'ijib'al re i Dios, chi xaq ipa xkub'i wi aqan re i kortin. I jujun ukub'ib'al le xoksax waqib' oxwinaq (66) ral taq k'ox saq-o'oj che. 28Ru' i saq-o'oj le chi xmoltaj ku' i winaq pa komon i ma Bezaleel xu'an i ko'kaq ch'ich' re i aqan, xkikoj chrij i paqb'al et xaq are xkikoj che i sotsaq ch'ich'.

29Lajuj kawinaq (50) tintal anch'ich' xmoltajik chi xkiya'o re kisipon; 30ronojel ile xoksax pukub'ib'al i okb'al b'ik che i ja re riqb'al ib' ru' i Dios, xaq are xki'anb'ej i sujb'al sipon re i porb'al, junam ru' k'ark'ar ch'ich' xaq ni'pa i kajwax che; 31xaq xkikoj che i ukub'ib'al xaq che i estaka chi ch'uqb'al uwi i ja re riqb'al ib' ru' i Dios, xaq xkikoj che ukub'ib'al i uchija re i uwaja.

Currently Selected:

%C9xodo 38: ACHICUB

Highlight

Copy

Compare