%C9xodo 39

U'anik i ki'u' i ajsujul sipon

1I k'ul jitz'om chi kkikoj i ajsujul sipon are ke'ok chu'anik kipatan chupam i lo'laj k'ijib'al, x-ani ru' chij kaqxar, ru' chij kaqkoj xaq i chij kaq. Xaq xki'an u'u' ma Aarón chi o u'ij pacha u'anik xtaqi ma Moisés che rumal i Ajwal.

2I chaleco are ma Bezaleel x-anawik, xukoj b'i an-o'oj che, xaq i k'ul kaqxar, kaq, kaqkoj xaq i chom laj lino. 3Xkich'aych'a i an-o'oj pacha jun wuj xki'an che, te'uri xkik'upij rab'raq xki'an che xaq te'uri xkipach'uj chupam i k'ul kaqxar, kaq, kaqkoj xaq i chom laj lino; i chak le lik chom u'anik x-ani che. 4Xukoj keb' b'ukb'aq puwi uteleb' i chaleco le. 5Xt'is i yut'b'al upam i ajsujul sipon, chi xaqjun xoksax che pacha xok che i efod: An-o'oj, k'ul kaqxar, kaq, kaqkoj xaq i chom laj lino; chrij pacha xub'ij i Ajwal che ma Moisés.

6Xok kib'i i rak'al ma Israel chwach i keb' ab'aj ónice pacha jun sello, i ab'aj le xoksax chupam i an-o'oj. 7Te'uri ma Bezaleel xukoj i keb' ab'aj le puwi i b'ukb'aq che i chaleco re kuxtab'al kib'i rak'al ma Israel, chrij pacha xub'ij i Ajwal che ma Moisés.

8I xu'an i perpik re uwach uk'ux i ajsujul sipon, xut'is ru' chij an-o'oj, kaqkoj, kaqxar, kaq xaq ru' chom laj lino, lik utz u'anik xu'an che, pacha xu'an che i chaleco. 9Xaqjun uwach ru' i raqan xu'an che, xaq xutunb'a uwach, juripaj ab'aj uwach xaq juripaj ab'aj raqan. 10Xukoj chomiq taq ab'aj chwach, kajib' cholaj xu'an che. I nab'e cholaj xukoj b'i jun ab'aj rubí, jun ab'aj crisólito xaq jun esmeralda; 11i ukab' cholaj xukoj b'i jun ab'aj granate, jun ab'aj zafiro xaq jun raxab'aj; 12I urox cholaj xukoj b'i jun ab'aj jacinto, jun ágata xaq jun amatista; 13i ukaj cholaj xukoj b'i jun ab'aj topacio, jun ab'aj cornalina xaq jun ab'aj jaspe; ronojel ile xt'is ru' chij an-o'oj. 14Kab'lajuj ab'aj xukoj che ronojel, rumal kab'lajuj b'iyaj ke i rak'al ma Israel, chkijujunal i ab'aj le xutz'ib'aj kib'i chwach pacha jun sello.

15Xaq xki'an jub'an ral taq karena pach'um an-o'oj, re ral taq perpaq chi k-e chwach uk'ux. 16Xaq xki'an keb' chapb'al an-o'oj xaq keb' sotsaq ch'ich' an-o'oj, jujun k'ulala che i perpik, chi re uwach uk'ux i ajsujul sipon. 17Xuwoyb'a keb' karena pach'um an-o'oj che i sotsaq ch'ich', chi xukoj k'ulala che i perpik chi k-e chwach uk'ux i ajsujul sipon. 18I utzam i keb' karena le xuwoyb'a an che uchi' i wokwaq chi o chwi uteleb' i ajsujul sipon, lik ukanajb'al chila chwach i chaleco. 19Xki'an chik keb' sotsaq ch'ich' an-o'oj, xkiwoyb'a chuchi' i perpik ikem, chi re uwach uk'ux i ajsujul sipon. 20Xki'an chik keb' sotsaq ch'ich' an-o'oj, re xkiwoyb'a chwach i chaleco chuxe' qaj uteleb', naqaj che i t'is chi x-e rajsik an ximb'al upam. 21I sotsaq ch'ich' le chi re i perpik chi k-e chwach uk'ux i ajsujul sipon, xkiwoyb'a che i sotsaq ch'ich' re i chaleco ru' jun k'amsut chi xar utzunb'alil, xumin chuxe' i yut'b'al upam man i perpaq le xaq i chaleco krok'aj rib', chrij pacha xub'ij i Ajwal che ma Moisés.

22X-an ronojel i k'ul jurjik, kaqxar utzunb'alil xkoj che. 23X-an jun tel punik'ajal re rokb'al jolomaj, xukoj t'is chi taq uchi' re ukowil, man kraqch'ij taj. 24Ronojel uchi' i jurjaq k'ul ikem xutzayb'a wonwaq k'ul kaqxar, kaq xaq i kaqkoj che, xaq i k'ul chi chom laj lino. 25Xaq xukoj ch'inch'in an-o'oj che i jurjik k'ul, nab'e xukoj jun ch'inch'in te'uri xukoj chub'i jun wonwik k'ul, keje ile xu'an che ronojel uchi'. 26Xukoj jun ch'inch'in xaq xukoj jun wonwik keje ile xu'an che ronojel uchi' i jurjik k'ul; i jurjik k'ul le lik rajwaxik kukoj b'i ajsujul sipon are k-e chusujuxik i sipon chwach i Dios chila prachoch, chrij pacha xub'ij i Ajwal che ma Moisés.

27Xki'an chomiq taq jurjaq k'ul ru' chom laj lino, re kikoj chrij ki'u' ma Aarón xaq ke i rak'al; 28i k'ul re jolomaj, yut'b'al re ujolom, xaq upam u'u' lik ru' i k'ul chi chom laj lino xki'an wi. 29I pas re paqb'al upam, ru' i k'ul kaqxar, kaq, kaqkoj xaq ru' chom laj lino; ronojel lik chom ut'isik xki'an che chrij pacha xtaq ma Moisés che rumal i Ajwal.

30Xaq xki'an i perpik an-o'oj pacha jun sello, xaq xukoj i tziji chwach: Jachom pu'ab' i Ajwal. 31Che i perpik ch'ich' le xkikoj jun k'amsut che chi kaqxar utzunb'alil, yut'b'al re chwach ukrusil chrij pacha xub'ij i Ajwal che ma Moisés.

Xutzin uyijb'axik i ja re riqb'al ib' ru' i Dios

32I je aj Israel xeutzin chuyijb'axik i ja re riqb'al ib' ru' i Dios, ike xki'an ronojel chrij pacha xub'ij Ajwal che ma Moisés. 33Are uri xkik'am b'i ma Moisés xaq ronojel ni'pa i chak chi xeutzin chuyijb'axik: Ja re riqb'al ib' ru' i Dios, ja re k'ul re riqb'al ib' ru' i Dios xaq ronojel ni'pa xajwax che; ko'kaq ch'ich' an-o'oj, pimiq taq tz'alam, b'alul, aqan xaq i ab'aj, 34xaq xkit'is utz'umalil mama'ib' chij chi tz'ajom kaq che, ch'uqb'al uwi i molb'al ib' xaq i jun chik kortin chi o utz'umalil i chikop lik ko che, xaq i kortin ch'uqb'al uwi i kaxa. 35I kaxa re utrat i Dios xaq i keb' b'alul chi k'amb'al b'i re, tz'onb'al kuyb'al mak, tz'apb'al uwi, 36mexa xaq ronojel ni'pa i kajwax puwi i mexa le, xaq i wa re trigo chi ksujux chinwach yin; 37i tzuk'b'al an-o'oj, ronojel ni'pa uk'oxal, ronojel ni'pa i kajwaxik xaq i aceite re wuqub' u'ab' i tzuk'b'al; 38sujb'al sipon an-o'oj, lo'laj aceite re mub'al jolomaj, pom chi lik muy xaq i kortin re i okb'al che i ja re riqb'al ib' ru' i Dios, 39sujb'al sipon anch'ich', xaq ronojel ni'pa uchi' lik anch'ich' i ub'alul chi k'amb'al b'i re xaipa, ronojel ni'pa i kajwaxik, ch'ajb'al ab'aj, rachi'ilam i raqan, ronojel ile lik anch'ich', 40kortin re uwaja rachi'ilam i aqan xaq i ukub'ib'al, kortin re i okb'al b'ik che uwaja, laso xaq i estaka chi chapb'al re i k'ul chi naj raqan re uwaja; xaq ronojel i kajwax pa ja re riqb'al ib' ru' i Dios; 41k'ul jitz'om chi re kkikoj i ajsujul sipon are ke'ok chu'anik kipatan chupam i lo'laj k'ijib'al re i Dios, u'u' ma Aarón chi ajsujul sipon chi lik o u'ij xaq i ki'u' rak'al chi je ajsujul sipon.

42I je aj Israel xki'an ronojel chrij pacha xub'ij i Ajwal che ma Moisés. 43Are xril ma Moisés chi konojel aj Israel xki'an keje ile che, are uri xuya utzil chomal pkiwi.

Currently Selected:

%C9xodo 39: ACHICUB

Highlight

Copy

Compare