%C9xodo 7
7
1I Ajwal xub'ij che ma Moisés:
—Chakojo retalil iri, Yin kin-an ni chawe chi pacha taq at dios chwach ma faraón, xaq i awatz chi ma Aarón are ire k-atsaw atzij chwach ma faraón chi ajawinel. 2Yet chab'ij che awatz ma Aarón, ronojel ni'pa i kinb'ij ni chawe, are ire kub'ij ni che ma faraón chi kuya b'i chke aj Israel ke'ek. 3Yin kin-an ni ko che uk'ux ma faraón, tupu kin-an ni nimaq taq k'utb'al re xaq nimaq taq anik, lik chila uri pa Egipto, 4xwiri ma faraón kkojon ti chiwe. Xwiri Yin kink'ut ni incho'ab' chke aj Egipto, elsab'al b'i ke aj Israel chi lik je intinimit, xwiri lik ru' atb'al tzij suk'ulik kin-an ile. 5Are ink'utum chik incho'ab' pa Egipto xaq are kewesaj b'i aj Israel chila, kketamaj ni uri aj Egipto chi Yin in Ajwal.
Keje ile xub'ij i Dios che ma Moisés.
6I ma Moisés xaq i ma Aarón xki'ano pacha xetaq chu'anik rumal i Ajwal. 7I Ma Moisés o kajwinaq (80) junab' che, i ma Aarón o oxib' kajwinaq (83) junab' che are xelapan ru' ma faraón.
Uch'amiy ma Aarón
8I Ajwal xub'ij che ma Moisés xaq che ma Aarón:
9—I ma faraón are kub'ij chiwe: Chi'ana jun nim laj il, are uri yet kab'ij ni che ma Aarón chi kuk'aq b'i uch'amiy chwach ulew chila chwach ma faraón; man i ch'amiy le k-on ni jun kumatz.
10Are uri ma Moisés xaq ma Aarón xe'e chwach ma faraón, xki'ano pacha xb'ix chke rumal i Ajwal. I ma Aarón xuk'aq b'i uch'amiy chwach ulew chila chwach ma faraón xaq chkiwach i je raqan u'ab', are uri i ch'amiy le x-on jun kumatz. 11Xwiri ma faraón xeusik'ij ni'pa o kino'oj xaq ni'pa i je aj-ij chi je aj Egipto, xaq ike le xki'ano pacha xki'an ma Moisés xaq ma Aarón; 12chkijujunal ike le xkik'aq b'i kich'amiy chwach ulew, xaq xeyiji che i kumatz; xwiri i uch'amiy ma Aarón xeub'i' b'i kich'amiy aj-ij chi xe'on kumatz. 13Xwiri ma faraón lik x-on ko che uk'ux, xaq lik xkojon ti che ma Aarón xaq che ma Moisés che ronojel ni'pa i tzij chi xub'ij i Ajwal chke.
I k'axk'olil re kik'
14Are uri i Ajwal xub'ij che ma Moisés:
—I ma faraón lik ko uk'ux man kuya ti chke aj Israel chi ke'ek. 15Rumali chweq we' jat chik ru', chawoy-ej are kqaj chila chi raqana Nilo. Xwiri msach chak'ux kak'am b'i ach'amiy chi xyiji che i kumatz. 16Chab'ij che ma faraón: “I Kajwal Dios aj Hebreo xinutaq li chub'ixkil chawe: chi chaya b'i che intinimit ke'e pa nima'ij chukojik in-ij pa tz'inilik jyub' chaqij, xwiri lik k'a are o wi wo'or at kojonnaq ti che. 17Rumali i Ajwal kub'ij: Wo'or lik kawetamaj na chi Yin in Ajwal. Man ru' i ch'amiy chi o pin-ab'i kinyin ni i raqana Nilo, te'uri ronojel i raqana le lik k-on ni kik'. 18Konojel i kar chi je o pa ya kekam na; xaq i ya kchuyerik, i je aj Egipto lik kmuluw ni kik'ux chutu'ik.”
19I Dios xub'ij chik che ma Moisés:
—Chab'ij che ma Aarón chi chuyaka uteleb' puwi i ya, k'utb'al re uch'amiy puwi ronojel i ya chi o chila pa Egipto, puwi i ralaxb'al ya, puwi i raqana, puwi i k'otom xaq puwi ronojel i yab'al taq ya, man lik ronojel k-on kik'. Keje ile lik o ni kik' chwach ronojel ulew Egipto, xaq is kik' chik kriqtaj chupam i yab'al ya tupu we che' xaq we ab'aj.
20I ma Moisés xaq i ma Aarón xki'ano pacha xb'ix chke rumal i Ajwal, i ma Aarón xuyak an uch'amiy chikaj xaq xuyin uchi' i ya re raqana Nilo yojb'al uwach chwach ma faraón xaq chkiwach i raqan u'ab'. Are uri ronojel i ya chi o pa raqana x-on kik'. 21Konojel i kar chi je o pa ya xekamik, rumali i raqana xchuyir upam, i aj Egipto lik kkich'ij ti chik utu'ik. ¡Is kik' chik kriqtaj chwach ronojel ulew Egipto!
22Xwiri i je aj-ij xaq keje xki'an ike ile, rumali ma faraón lik x-on chik ko che uk'ux, xkojon ti che ma Moisés xaq che ma Aarón che ronojel ni'pa i tzij chi ub'im li Ajwal chke. 23I ma faraón xukoj ti retalil i anik le, rumali xupiskilij b'i rib', x-e pa nim laj rachoch. 24Konojel aj Egipto xki'an kik'otom chuchi' i raqana Nilo re kkesaj li ch'am laj ya, man lik ch'am ti ya pa raqana re kkitu'u.
K'axk'olil kumal K'iyal taq ixtutz'
25Chrijil chik i wuqub' ij re u'anik kik' che uwach i ya rumal i Ajwal.
Currently Selected:
%C9xodo 7: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
