G%E9nesis 26
26
U'enam ma Isaac pa Gerar
1Che taq i ij le, xpe jun nim laj wa'jal chwach ulew, chrijil chik i nab'e wa'jal chi xik'awik are k'a k'as mam Abraham. Rumali x-e ma Isaac chila pa Gerar ru' mam Abimelec, chi ajawinel ke aj Filistea. 2Xaq chila xuk'ut wi rib' i Ajwal che ma Isaac, xaq xub'ij che: “Mat-e pa Egipto; man katjeqi ni chwach ulew chi k'ate kinb'ij chawe. 3Chatjeqel ni chwach ulew le ipa at o wi wo'or, Yin katwo'taj taj, xaq kinya ni utzil chomal pawi, man chawe yet, xaq chke amuq axikin kinya wi ronojel ulew le, lik kin-an na pacha inb'im che mam Abraham chi etz aqajaw. 4Keink'iyarsaj ni amuq axikin pacha uk'iyal i ch'umil chwa taq kaj, xaq ronojel ulew le kinya ni chke. Xwi ta la ile, kumal i amuq axikin le kinya ni utzil chomal pkiwi konojel i tinimit chwach i jyub' ta'aj. 5Man i mam Abraham lik xkojon chwe xaq xu'ano pacha intaqanik, intzij inpixab', in-atb'al tzij xaq ink'utunik.” Keje ile xub'ij i Ajwal che ma Isaac.
6I Ma Isaac xjeqi pa Gerar. 7I achiyab' chi je aj Gerar, are xkitz'onoj che ma Isaac wach chux ati Rebeca che, ire xub'ij chke chi ranab'. Man ati Rebeca le lik chom laj ixoq, rumali ma Isaac xuxij rib' chusaqixik chi rixoqil; man ire xuch'ob'o chi moqxa kkamsaxik.
8Are k'iyal ij chik ujeqelem ma Isaac chila pa Gerar, o jun ij chi mam Abimelec chi ajawinel ke aj Filistea ktaqen b'i pa wantana, are uri xril pan ma Isaac chi kutz'ulej xaq kutz'ub'aj uchi' i rixoqil chi ati Rebeca. 9Are uri mam Abimelec le xutaq usik'ixik ma Isaac, xub'ij che:
—Awixoqil b'ari ixoq le. ¿B'uchak ut xab'ij chqe chi xa awanab'?
Are uri ma Isaac xub'ij:
—Xinb'iji man xinch'ob' yin moqxa kinkamsax rumal uchomal i wixoqil —xcha.
10Are uri xub'ij mam Abimelec che:
—¿B'uchak xa'an ile chqe? Xa ru' jub'i' chik laj xumin rib' jun chqe yoj ru' awixoqil, lik awumal yet chi laj xojmakunik —xcha.
11Rumali mam Abimelec xutaq ub'ixkil i tziji chke konojel i winaq:
—We o jun kuch'ich'a ma Isaac, junam ru' i rixoqil, lik kkamsax na.
12I ma Isaac xtikan chila chwach ulew Gerar xaq che i junab' le lik x-on utz i tikon, man i Ajwal lik xuya utzil chomal puwi. 13Keje u'anik uri ile chi ma Isaac kok'ilal xumol rib' ub'itaq re k'a x-on ni jun nim laj b'eyom. 14Rumali i je aj Filistea xpe titat kipam che man ire xek'iyar uchij, uchikop, xaq xek'iyar umokom. 15Xwi ta la ile, i aj Filistea xkinojsaj upam ronojel i k'otom che ulew chi kiworom umokom mam Abraham are k'a k'aslik. 16Xaq i mam Abimelec xub'ij che ma Isaac:
—Utz kat-ek, man lik at tz'intz'ik laj b'eyom chik chqawach yoj —xcha.
17Are uri xel ma Isaac chila, x-ek, xqaj chila chwa ta'aj Gerar. 18I ma Isaac le xujok chik upam i k'otom chi xkinojsaj aj Filistea che ulew are kamnaq chik uqajaw mam Abraham, i k'otom le kiworom kan umokom uqajaw ire are k'a k'aslik, rumali xuya chik pkib'i pacha kib'i uya'om kan etz uqajaw che. 19O juyak are ketijin umokom ma Isaac chu'anik jun k'otom chila chwa ta'aj, are uri xkiriqa li ya chi lik kb'olb'atik, 20xwiri i ajyu'ul chij chi je aj Gerar xkichap kib' chitzij puwi i ya le ku' ajyu'ul uchij ma Isaac. Rumali ma Isaac xuya pub'i i k'otom le “Esek”, man xki'an ch'oj puwi. 21Te'uri i umokom ma Isaac xki'an chik jun k'otom, xaq xki'an chik ch'oj puwi, rumali ma Isaac xuya pub'i i k'otom le Sitna.
22Are uri xel ma Isaac chila x-e naj xaq xu'an chik jun k'otom, xaq nti chik jun x-anaw ch'oj chkij, rumali xuya pub'i i k'otom le Rehobot xaq xub'ij: I Ajwal xuya jun k'ijib'al chqe, man kojk'iyar ni chwach ulewi xaq kqatij ni utz chwach; xcha.
23X-on panoq i ma Isaac le x-e pa Beerseba. 24Che a'ab' le are x-e pa Beerseba i Ajwal xuk'ut rib' che chila xaq xub'ij che:
“Yin in u-Dios mam Abraham chi etz aqajaw.
Maxij awib' man Yin in o awu',
rumal k'axnab'al re etz wajchak chi mam Abraham chi aqajaw
kinya ni utzil chomal pawi, xaq keink'iyarsaj ni amuq axikin.”
Xcha.
25I ma Isaac xuyijb'a jun sujb'al sipon chila, i xukuxtaj xaq xunataj ub'i i Ajwal. Xuyijb'a umujb'al chila xaq i umokom xki'an chik jun k'otom chila.
Mam Abimelec xu'an jun trat ru' ma Isaac
26Xuriqa jun ij chi mam Abimelec upetik chila pa Gerar xk'un ru' ma Isaac re klapan ru', rachi'ilam li upixb'anel chi ma Ahuzat xaq ma Ficol chi kaj-atzil i uwinaq chi je yij che i ch'oj. 27I ma Isaac xub'ij chke:
—Wach kolitzukuj wu' man lik ktitat ipam chwe, xaq xiniwesaj li chwach iwulew —xcha.
28Are uri ike xkib'ij che:
—Yoj qilom chi Ajwal o awu', rumali xqach'ob'o chi yet xaq i yoj rajwaxik kqa'an jun trat chqawach, chi are iri: 29Ma'an taq jun utz taj chqe, man yoj nti jun utz taj qa'anom chawe, lik xwi i utz qa'anom chawe man lik utz petik xa'ano, rumali utz a'ijlaxik xqa'an b'ik, xwiri wo'or i utzil chomal re i Ajwal pawi yet o wi —xecha.
30Are uri ma Isaac xuyijb'a jun nim laj wa'im chke, junam xkitij kiwa xaq xkitu' uwa'al uva muqb'am. 31Chukab' ij we' xewalijik, are uri lik xkib'ij chkiwach chi xwi i utz kki'ano, i ma Isaac xeu'ijla b'ik, xaq keje ike lik pa utz xki'ijla kanoq.
32Xaq che i ij le, xek'un umokom ma Isaac chub'ixkil che: Yoj xqariq i ya chupam i k'otom chi xqak'oto; xecha. 33I ma Isaac xuya pub'i i k'otom le Seba, rumali Beerseba ub'i i tinimit le, xaq k'a are kb'ix che wo'or.
34I a Esaú o kawinaq (40) junab' che are xk'uli ru' al Judit chi umi'al ma Beeri aj Het xaq xk'uli ru' al Basemat chi umi'al ma Elón chi xaq aj Het. 35I keb' ixoqib' le lik xkiya i b'is puk'ux ma Isaac xaq xkiya b'is puk'ux ati Rebeca.
Currently Selected:
G%E9nesis 26: ACHICUB
Highlight
Share
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
