G%E9nesis 27
27
I mam Isaac xuya utzil chomal puwi ma Jacob xaq ma Esaú
1I mam Isaac are xrijab'ik xpotz'ir ub'a'wach rumali ktzun ti chik. O juyak xusik'ij uk'ojol atz, chi ma Esaú, xub'ij che: —Ink'ojol.
Ma Esaú xub'ij:
—In o chi tat.
2Are uri mam Isaac xub'ij che uk'ojol chi ma Esaú:
—Yet lik kawilo chi yin lik in rij chik xa junpa la iri kinkam anoq. 3Rumali chak'ama b'i uri k'aqb'al ch'ab' xaq i k'iyal taq ch'ab' chi jutz utzam, jat pa taq es chatzukuj li jun inti' chwe. 4Are katk'unik, kayijb'a la uti'b'alil inwa, pacha mer kwaj yin; are yij chik kak'am li chwe man kintijo, te'uri kinya ni utzil chomal pawi chuxe'el inkamik —xcha.
5I tit Rebeca xuta ronojel wach xub'ij mam Isaac che ma Esaú chi uk'ojol. Te'uri i ma Esaú x-e la pa'anem pa taq es chutzukuxik uti' uqajaw. 6Xwiri tit Rebeca x-alab' ti chub'ixkil che i ralab' cha'xel chi ma Jacob, xub'ij che:
—Chata pe', yin xinta chi aqajaw xutaq b'i awatz 7pa taq es chutzukuxik uti', xub'ij che chi kuyijb'a uti' le pacha mer kraj ire xaq xub'ij che chi kuya ni utzil chomal puwi pub'i i Ajwal chuxe'el ukamik. 8Wo'or, walab', chakojo retalil wach kinb'ij chawe, xaq cha'ana wach katintaq che. 9Jak'ama keb' ral taq chab'at chi lik je chomiq, man kinyijb'a che aqajaw pacha mer kraj ire, 10te'uri kak'am nu b'i che aqajaw, man kutijo, keje ile kuya ni utzil chomal pawi chuxe'el ukamik —xcha.
11Xwiri ma Jacob xub'ij che uchuch chi tit Rebeca: —I watz ma Esaú lik nimaq rismal, xwiri yin nti wismal. 12Moqxa kinuchapcha taq inqajaw kunab'ej uri chi xa kwaj ut'orik, xa k'oq uri kweqaj, utzil chomal taj —xcha.
13I tit Rebeca xub'ij che i ralab':
—I k'oqb'al le chtzaq ni pinwi yin; yet cha'ana pacha kinb'ij chawe chak'ama li ral taq chab'at chwe —xcha.
14Are uri x-e ma Jacob chkik'amik i ral taq chab'at le, te'uri xeuya che uchuch, i uchuch le xuyijb'a uti'b'alil mam Isaac chi rachijil pacha mer kraj ire. 15Te'uri tit Rebeca xresaj li chomiq taq u'u' ma Esaú chi ralab' atz xukoj b'i chrij ralab' cha'xel chi ma Jacob. 16Xaq xupasij b'i uqul taq u'ab' ru' kitz'umalil ral taq chab'at xaq xupasij b'i rij uqul ipa nti wi rismal; 17te'uri xuya b'i i ti'b'alil che ma Jacob xaq i wa chi xuyijb'a.
18Are uri ma Jacob le x-e ru' uqajaw, xub'ij che:
—Xink'unik tat.
I mam Isaac xutz'onoj che:
—¿At pachin yet wak'al?
I ma Jacob xub'ij che uqajaw:
19—Yin in ma Esaú, chi nab'e ak'ojol; ya xin-an ronojel ni'pa xatz'onoj chwe, wo'or chatwalijoq, xaq chatkul chutijawik ati' chi xintzukuj li chawe pa taq es, keje ile kaya ni utzil chomal pinwi —xcha.
20Xwiri mam Isaac xutz'onoj che uk'ojol:
—¿Wach u'anik ile ala chi su' we' xariq la loq? I ma Jacob xub'ij che uqajaw:
—Are i Ajwal chi a-Dios xinuto rumali we' xinriq loq —xcha.
21Are uri mam Isaac xub'ij che:
—Chattejeb' pe loq ala, man katinchapcha na we lik yet at ma Esaú, moqxa yet taj —xcha.
22Are uri xtejeb' pan ma Jacob ru' uqajaw chi mam Isaac man kchapchaxik, are uri xub'ij uqajaw: “Uch'awb'al lik are uch'awb'al ma Jacob, xwiri u'ab', are u'ab' ma Esaú.” 23Rumali xretamaj taj chi are ma Jacob, man u'ab' lik pacha u'ab' ma Esaú chi lik nimaq rismal; xwiri are ya kuya utzil chomal puwi, 24xukamulij chik utz'onoxik che:
—¿Lik yet nawi at ma Esaú?
I ma Jacob xub'ij:
—Qatzij tat, lik yin —xcha.
25Are uri xub'ij che:
—Chatejeb'saj li uti'b'alil inwa chwe chi xatzukuj li pa taq es man kintijo, te'uri kinya ni utzil chomal pawi —xcha.
Are uri ma Jacob xutejeb'saj pan uti'b'alil uwa uqajaw chwach xaq xuk'am b'i uya' ru'; i mam Isaac le xutijo xaq xutu' uya' chi uwa'al uva muqb'am; 26te'uri xub'ij che:
—Chattejeb' loq ink'ojol, chatz'ub'aj inchi' —xcha.
27Are uri ma Jacob xtejeb' pan ru' uqajaw, xaq xutz'ub'aj uchi'. I mam Isaac le are xusiq ruxlab' u'u' uk'ojol, are uri xuya utzil chomal puwi ru' i tziji:
“I ruxlab' rij ink'ojol,
keje pacha ruxlab' i es pa taq es,
chi uya'om utzil chomal i Ajwal puwi.
28I Dios chuya na li jab' puwi atikon,
xaq chuya ni b'eyomal chawe re uwach ulew,
chi are k'iyal taq trigo xaq k'iyal taq uva.
29Chki'ana ni kipatan i winaq chawij,
xaq chexuki ni chawach.
Cha'ata ni tzij puwi atinimit,
xaq i jub'an chik tinimit chki'aja ni kib' chawach.
Ni'pa i katkik'oqoj kkeqaj ni k'oq, xaq ni'pa i kkitz'onoj utzil chomal pawi,
kya' ni utzil chomal pkiwi.”
30Are xutzin mam Isaac chuya'ik utzil chomal puwi ma Jacob, xaq k'atene xel b'i ma Jacob le, are uri xaqte'et xupon pan ma Esaú upetik pa taq es chutzukuxik uti' uqajaw. 31Xaq ire le xuyijb'a uti'b'alil uqajaw te'uri, xuk'am b'i che, xub'ij:
—Chatwalijoq tat, chatija iri, chi xupon awak'al chuk'amik pa taq es, man keje ile kaya ni utzil chomal pinwi —xcha.
32Xwiri mam Isaac xutz'onoj che:
—¿At pachin yet?
Ire xub'ij:
—Yin in ma Esaú chi nab'e ak'ojol —xcha.
33Are uri mam Isaac lik xok il xaq lik xkaykat chub'ixkil i tziji:
—¿Pachin taq uri xk'un jo'taj tan chuya'ik uti'b'alil inwa chi xutzukuj li chwe pa taq es? Yin xintij b'i ronojel ni'pa taq xuk'am li chwe, lik k'ate ne welem wa'im are xatk'unik xaq xinya utzil chomal puwi, rumali lik kya' ni utzil chomal che —xcha.
34I ma Esaú are xuta wach taq xub'ij uqajaw, lik xsik'inik rumal k'ax xuna uk'ux, xub'ij:
—¡Tat, xaq chaya ni utzil chomal pinwi yin! —Xcha.
35Xwiri mam Isaac xub'ij che:
—Xk'un acha' jo'taj tan xinut'oro rumali xinya b'i utzil chomal puwi chi awe yet te'eq.
36I ma Esaú xub'ij:
—Nechari chi ma Jacob ub'i, man are ukamul iri chi kinut'oro: Nab'e xumaj in-atzil, wo'or xaq xumaj chik utzil chomal chwe: ¿Xatab'a nti chik jun utzil chomal awu' re kaya chwe yin? —Xcha.
37I mam Isaac xub'ij che:
—¿Wach chik kinya chawe yet wo'or wak'al? Man ronojel utzil chomal chi awe yet te'eq inya'om chik che acha', inya'om chik che chi krajawin ni pawi, xaq konojel i rachalal je umokom na, xaq inya'om chik i b'eyomal pu'ab' re i trigo xaq i uva.
38I ma Esaú x-on chik pen utz'onoxik utzil chomal che uqajaw, xub'ij:
—Tat, ¿Xatab'a xa jun utzil chomal o awu'? Lik chaya ni utzil chomal pinwi yin —xcha.
Are xb'itaj ile rumal, xsik'in che o'ej.
39Are uri uqajaw xub'ij che:
“Lik naj na katk'iji wi che i b'eyomal re uwach ulew,
xaq naj na katk'iji wi che i jab'.
40Rumal ach'ich' chi k'ulala o uware katk'asi na,
xaq at ajchak na chrij acha';
xwiri are kkowir awach xaq are o chik acho'ab'
kawesaj ni awib' uri pu'ab'.”
U'anmajik ma Jacob chwach ma Esaú
41Are xuk'ulmaj ile i ma Esaú xuk'aq b'i u'ij ucha', man xumaj utzil chomal chi re ire te'eq rumal uqajaw, rumali xub'ij: “Xa keb' oxib' chik ij k'as inqajaw, are kkamik te'uri kinkamsaj ma Jacob.” Xcha.
42Are xretamaj tit Rebeca wach ktijin ma Esaú chuch'ob'ik chrij ma Jacob, are uri xutaq usik'ixik ma Jacob le, xub'ij che:
—Chata pe', i awatz ma Esaú kuch'ob' akamsaxik man lik petnaq roywal. 43Rumali walab', chakojo wach kinb'ij chawe: Chayijb'a awib', lik chab'isoj, jat pa Harán chi rachoch inxib'al ma Labán, 44chatjeqel chila ru', keb' oxib' ij panoq, k'a kqaj ni roywal awatz. 45Are paktajnaq chik roywal awatz xaq sachnaq chik chuk'ux ni'pa i xa'an che, te'uri kintaq ak'amik, man kwaj taj chi ksach iwach chixkeb' xa jun chi ij —Keje ile xub'ij che ma Jacob.
46Are uri tit Rebeca xub'ij che mam Isaac:
—Yin o jun k'ax pink'ux chi kwaj kinb'ij chawe, i ixoqib' aj Het rixnaq chik ink'ux chke, lik kwaj ti chik in o ku', we xk'uli tan chik ma Jacob ru' jun ali aj Het chi je jeqel waral che i tinimiti, lik utz uri su' chinkamoq —xcha.
Currently Selected:
G%E9nesis 27: ACHICUB
Highlight
Share
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
