G%E9nesis 34
34
U'anik uk'exel rumal uqajsaxik u'ij al Dina
1O juyak, i al Dina chi umi'al ma Jacob ru' ati Lea, x-e pa malkatik pa tinimit Siquem chkilik i altom chi je aj chila. 2I a Siquem chi uk'ojol ma Hamor chi aj Jiw ire le are aj-atzil re i tinimit, are xril uwach al Dina xuchap pa cho'ab' rumali xuqajsaj u'ij, 3xwiri xaq lik x-e uk'ux che, rumali xutzukuj wach rokik utzij puk'ux i ali le. 4Are uri xub'ij a Siquem che uqajaw chi ma Hamor:
—Ta, kwaj yin kakoj intzij chwach uqajaw al Dina man kwaj kin-an wixoqil che —xcha. 5I ma Jacob xretamaj chi xchap umi'al pa cho'ab' rumal a Siquem, xwiri nti tan xub'ij man je nti uk'ojol ru' ja, je enaq tan chkiyu'uxik i jalajuj taq chikop pa taq es k'a xek'un na. 6Tz'aqat, i ma Hamor le chi uqajaw a Siquem, x-e chi rachoch ma Jacob chukojik utzij uk'ojol.
7Are xek'un uk'ojol ma Jacob chkiyu'uxik i jalajuj taq chikop, are uri xketamaj wach xuk'ulmaj i kanab', lik k'ax xuna kik'ux xaq lik xpe koywal. I a Siquem le lik nim i makunik xu'an chke aj Israel man xuchap umi'al ma Jacob pa cho'ab'; i anik le lik kmajaw taj chi xk'ulmaxik. 8Xwiri ma Hamor xub'ij chke uk'ojol ma Jacob:
—Ink'ojol chi a Siquem lik enaq uk'ux che iwanab' yix; rumali kintz'onoj utzil chiwe, chi chiya ni che kk'uli ru'. 9Chqa'ana alal che qib' iwu', chiya chke imi'al yix chi kek'uli ku' qak'ojol yoj, xaq yoj kqaya chke qami'al chi kek'uli ku' ik'ojol yix. 10Keje ile chixjeqel ni chqaxol yoj, i tinimit o chiwach, chixjeqel chwach, utz kixlo'onik xaq utz kixk'ayinik xaq chilo'o iwulew —xcha.
11A Siquem xub'ij che uqajaw al Dina xaq chke uxib'al:
—We ki'an utzil chwe, kinya chiwe wach i kitz'onoj. 12Chitz'onoj ni'pa kiwaj, nti k-ono tupu we lik mas paqalik chwach pacha i rajil, xaq lik chitz'onoj k'iyal taq sipon, xwiri chiya chwe chi kk'uli i ali wu' —xcha.
13Xwiri, rumal umak a Siquem xu'ano chi xuqajsaj u'ij al Dina, i uxib'al al Dina le xa ru' t'oronik xkila' uwach che a Siquem xaq che uqajaw chi ma Hamor. 14Xkib'ij chke:
—Yoj kqaya ti qanab' che jun achi chi antal ti circuncisión che, man ile lik nim laj k'ixb'alil chqe yoj. 15Kqaya b'i qanab' chiwe xwiri we ki'ano pacha kqab'ij chiwe ri: Chi konojel achiyab' chi je o chixol choksax ni circuncisión chke, man ke'on na pacha qa'anom yoj. 16We ki'an ile kqaya uri chke qami'al chi kek'uli ku' ik'ojol, xaq imi'al yix kek'uli uri ku' qak'ojol yoj xaq kojjeqi uri chixol yix, lik koj-on ni uri xa jun chi tinimit. 17Xwiri we ki'an taj pacha kqab'ij chiwe le chi ki'an i circuncisión, yoj kojel uri chi xaq lik kqak'am b'i qanab' qu' —xecha.
18I ma Hamor xaq i uk'ojol chi a Siquem utz xkita wach xb'ix chke. 19I a Siquem le lik enaq uk'ux che umi'al ma Jacob rumali lik x-alab' ti chu'anik i circuncisión, man i a Siquem le lik are mas o u'ij chkixol i alk'uwal re uqajaw; 20rumali x-achnimax b'i rumal uqajaw k'a pa okb'al re i tinimit, chila xelapan wi ku' konojel i winaq xkib'ij chke:
21—I achiyab'i lik je utz laj taq winaq qu', chiya chke chi kejeqi pqatinimit man lik nim i ulew, rumali lik o kek'iji wi, chek'ayinoq xaq chelo'onoq. Xwi ta la ile i qak'ojol yoj kek'uli ku' kimi'al ike xaq i kik'ojol ike kek'uli ni ku' qami'al yoj. 22Ike kkaj kejeqi qu' xaq koj-on xa jun chi tinimit xwiri we kqa'an iri: Chi konojel achiyab' chi je o chqaxol kki'an i circuncisión pacha kki'an ike. 23Chqa'ana pacha kkib'ij chqe man keje ile kejeqi ni chqaxol yoj, konojel i jalajuj taq kichikop xaq i ub'itaq ke lik qe yoj na —xecha.
24Konojel i winaq chi kimolom kib' pa okb'al re i tinimit, xkiya kiwach che pacha xub'ij ma Hamor xaq i uk'ojol chi a Siquem, are u'ankil uri chi konojel achiyab' x-an circuncisión chke. 25Churox ij are k'a k'ax je o konojel achiyab' rumal u'anik i circuncisión chke, are uri keb' chke uk'ojol ma Jacob, a Simeón xaq i a Leví chi je uxib'al al Dina, xkik'am b'i kich'ich' xe'e chkikamsaxik konojel achiyab' chila ipa je o wi pa tinimit, are lik nti kkich'ob' che. 26Lik ru' uware ch'ich' xkikamsaj ma Hamor junam ru' uk'ojol chi a Siquem, te'uri xkesaj li kanab' al Dina prachoch a Siquem, xkik'am b'ik. 27Are uri i jub'an chik uk'ojol ma Jacob juntir xe'e la pa tinimit, xeik'aw pkiwi i kamnaq xkik'am b'i ronojel ni'pa o pa tinimit, elsab'al koywal man rumal xqajsax u'ij i kanab'. 28Lik xki'an ke chke i chij, chikop, axna xaq ronojel ni'pa i o pa tinimit xaq ronojel ni'pa o pa taq es. 29Xkel-aj b'i ronojel ub'itaq ke ru' taq ja, xaq ak'alab', ixoqib' lik xekik'am b'i chke. 30Are xril ma Jacob chi xeupon uk'ojol chi a Simeón xaq i a Leví kok'am b'i jalajuj taq chikop, ixoqib' xaq i ak'alab' are uri xub'ij chke:
—Yix xinimin chupam jun nim laj ch'oj, wo'or i aj Canaán xaq i aj Ferez chi je jeqel waral kpe ni titat kipam chwe. We xkimol li kib' ike chwij re kamsab'al we, lik kinkikamsaj ni uri yin xaq konojel i walk'uwal, man yin je k'i ti inwinaq —xcha.
31Xwiri ike xkib'ij:
—¿Xatab'a to' keje ile kqa'an che man ire xu'an che i qanab' chi pacha taq jun ixoq chi chwach uch'akul kuch'ak wi umer? —Xecha.
Currently Selected:
G%E9nesis 34: ACHICUB
Highlight
Share
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
