G%E9nesis 35
35
I Dios xuya utzil chomal puwi ma Jacob pa Bet-el
1I Dios xub'ij che ma Jacob: “Chayijb'a awib', man kat-ejeqi pa Bet-el. Chk'un chak'ux chi Yin xink'ut wib' chawe chila pa Bet-el are xat-anmaj chwach awatz ma Esaú, rumali cha'ana jun sujb'al sipon chila we Yin.” Xcha. 2Are uri ma Jacob xub'ij chke i ralk'uwal xaq chke konojel ni'pa je o ru':
—Chiwesaj b'i konojel i jalajuj taq tiox chi je ik'olom iwu', chijos-ij iwib' xaq chijalwachij i'u', 3jo pa Bet-el, man kin-an jun sujb'al sipon chila re i Dios chi xinuto are in o te'eq chwach i kamik, man xaipa lik in rachnimam che inb'e —xcha.
4Are u'ankil uri chi xkijach ronojel ni'pa i jalajuj taq tiox che ma Jacob xaq i arit chi o che kixikin, te'uri ma Jacob le x-e chumuqik chuxe' jun sik'al chi o naqaj che i Siquem. 5Are xe'el ike chila, mijun chke i winaq xterej b'i chu'anik ch'oj chkij i rak'al ma Jacob, man i Dios xu'an chke i winaq chi je o chwach i tinimit le lik xkixij kib'.
6Keje ruponik ma Jacob ile chila pa Luz chi xaq Bet-el ub'i, chi o chwach ulew Canaán, xaq konojel i winaq chi je o ru' lik junam xeuponik. 7Are xeupon chila i ma Jacob xuyijb'a jun sujb'al sipon xaq xuya pub'i i k'ijib'al le, El-Bet-el. Man chila xuk'ut wi rib' i Dios che are x-anmaj chwach i ratz chi ma Esaú. 8Che taq i ij le xkam ati Débora, chi k'itsawnaq tit Rebeca, xkimuq kan chila chuxe' i Sik'al chi o naqaj che i Bet-el, rumali ma Jacob xuya pub'i i k'ijib'al le: “Sik'al re o'ej.”
9Are xtzalij b'i ma Jacob chila Padan-aram, I Dios xuk'ut chik rib' che xaq xuya utzil chomal puwi ru' i tziji:
10“Yet ma Jacob ab'i,
xwiri wo'or keje ti chik kb'ix ile chawe,
wo'or ma Israel kb'ix ni chawe.”
Lik are ub'i ile xya' che rumal i Dios. 11Are uri i Dios xub'ij chik che:
“Yin in Dios chi lik ronojel kintiki che,
chatk'uwalinoq xaq chek'iyar ni amuq axikin.
Lik chawe yet kel ni jun nim laj tinimit xaq k'iyal taq tinimit,
xaq chkixol i amuq axikin le ke'el ni k'iyal taq ajawinelab'.
12I ulew chi xinya che mam Abraham xaq che uk'ojol chi a Isaac,
xaq kinya chawe yet, keje ile
xaq kinya ni chke amuq axikin chawijil chik yet.”
13Are xb'itaj ile rumal i Dios, are uri xel chila che i k'ijib'al le ipa xlapan wi ru' ma Jacob. 14I ma Jacob xutik jun ab'aj, xutak'b'a uwach pacha jun aqan, chila che i k'ijib'al le ipa xlapan wi i Dios ru', te'uri xukitzka uwa'al uva muqb'am xaq xujam aceite puwi yab'al u'ij. 15I ma Jacob xuya pub'i i k'ijib'al le ipa xlapan wi Dios ru', Bet-el.
Ukamik ati Raquel
16Te'uri xe'el chik chila pa Bet-el, xe'e pa Efrata, are k'amaja keuponik xchaptaj ati Raquel pa b'e man ire rax winaq, chila xalax wi rak'al, lik k'ax utzirik xu'ano. 17Are o chik chupam i k'ax i ati ilol ajtujab' xub'ij che: “Maxij awib', man xalax chik jun awalab'.” 18Xwiri ire ktijin chik ukamik, lik xaqpachalo chik xuya kan pub'i i ralab' a Benoni, xwiri ma Jacob chi uqajaw i ak'al le xuya pub'i a Benjamín.
19Keje ukamik ati Raquel ile, xmuq kan chila pa b'e chi k-e pa Efrata chi wo'or are i Belén. 20I ma Jacob xutik jun tak'tik ab'aj, chila puwi i etz rixoqil xutak'b'a uwach pacha jun aqan, i ab'aj le k'a o chila wo'or, ilb'al re ipa xmuq wi ati Raquel.
21Te'uri ma Israel xumaj chub'i ub'e, xek'iji k'a jela chwach i Migdal-edar. 22Are je o chik chila che i k'ijib'al le i ma Rubén xumin rib' ru' ati Bilha chi qas ti mer rixoqil uqajaw; i ma Israel are xretamaj lik xpe roywal. I ma Israel xeuk'uwalij kab'lajuj rak'al.
I je rak'al ma Jacob
23I nab'e rak'al ru' ati Lea are a Rubén, te'uri a Simeón, a Leví, a Judá, a Isacar xaq i a Zabulón. 24I rak'al ru' ati Raquel je are: A José xaq i a Benjamín. 25I rak'al ati Bilha, chi rajke'el ati Raquel je are: A Dan xaq i a Neftalí. 26I rak'al ru' ati Zilpa, chi rajke'el ati Lea je are: A Gad xaq a Aser. Iri je are rak'al ma Jacob chi xealax chila Padan-aram.
Ukamik mam Isaac
27I ma Jacob x-e chusolixik uqajaw chi mam Isaac chila Mamre, chila naqaj che i Quiriat-Arba, chi are Hebrón chi xaq ipa xjeqi wi mam Abraham junam ru' uk'ojol chi ma Isaac. 28I mam Isaac xk'asi b'elejwinaq (180) junab' te'uri xkamik. 29Ire lik rij chik rumali xkamik, x-e pa uxlanem ku' i ratit umam chi je kamnaq chik, xmuq kumal i keb' uk'ojol chi ma Esaú xaq i ma Jacob.
Currently Selected:
G%E9nesis 35: ACHICUB
Highlight
Share
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
