G%E9nesis 36
36
I je umuq uxikin mam Esaú
1Iri je are umuq uxikin mam Esaú chi xaq mam Edom kb'ix che. 2I mam Esaú xk'uli ku' ixoqib' aj Canaán: Ru' ati Ada chi umi'al mam Elón aj Het; ru' ati Aholibama, chi umi'al mam Aná chi xaq ri umam mam Zibeón aj Jiw; 3xaq ru' ati Basemat chi umi'al ma Ismael, chi ranab' a Nebaiot. 4I mam Esaú le xuk'uwalij rak'al ku' i rixoqil: Xuk'uwalij jun rak'al ru' ati Ada chi a Elifaz ub'i, xuk'uwalij jun rak'al ru' ati Basemat chi a Reuel ub'i; 5xaq xuk'uwalij oxib' rak'al ru' ati Aholibama chi a Jeús, a Jaalam xaq i a Coré. Ike le je are rak'al mam Esaú chi xealax chila Canaán.
6X-on panoq mam Esaú xeuk'am b'i rixoqil, je uk'ojol, je umi'al, konojel i winaq chi je o ru' chi rachoch, xeuk'am b'i jalajuj taq chikop xaq ronojel ub'itaq re chi xuch'ak chila Canaán x-e jeqi che jun chik tinimit jek'b'al rib' ru' ucha' chi ma Jacob, 7man ike chekeb' lik k'i ub'itaq ke, rumali chi kumaj taj chi kek'iji junam rumali xkijach kiwach man i ulew ipa je o wi te'eq ke'on ti chik i es re kichikop. 8Rumali mam Esaú chi xaq mam Edom kb'ix che, x-e jeqi che i jyub' Seir.
9Iri je are umuq uxikin mam Esaú chi kiqajaw i aj Edom chi xejeqi che i jyub' Seir. 10I kib'i i rak'al je are iri: A Elifaz chi ralab' ati Ada rixoqil mam Esaú; a Reuel chi ralab' ati Basemat chi xaq rixoqil mam Esaú. 11I rak'al ma Elifaz je are a Temán, a Omar, a Zefo, a Gatam xaq a Cenaz. 12Xaq i jun rak'al ru' qas ti mer rixoqil chi ati Timna a Amalec ub'i; ike le je ri umam ati Ada chi rixoqil mam Esaú. 13I rak'al ma Reuel je are iri: A Nahat, a Zera, a Sama xaq i a Miza; ike le je are ri umam ati Basemat, chi rixoqil mam Esaú. 14I rak'al mam Esaú ru' jun chik ixoq chi ati Aholibama chi umi'al ma Aná chi xaq ri umam ma Zibeón je are iri: A Jeús, a Jaalam xaq i a Coré.
15Ike ri are je aj-atzil chkixol i je umuq uxikin mam Esaú: I je aj-atzil chke i rak'al ma Elifaz chi nab'e uk'ojol mam Esaú are: Ma Temán, ma Omar, ma Zefo, ma Cenaz, 16ma Coré, ma Gatam xaq i ma Amalec; konojel ike le je are aj-atzil chke uk'ojol ma Elifaz chila che i ulew Edom, konojel ike le je ri umam ati Ada. 17I je aj-atzil chke i rak'al ma Reuel chi uk'ojol mam Esaú are: A Nahat, a Zera, a Sama xaq i a Miza, konojel ike le je are aj-atzil chkixol uk'ojol ma Reuel chila che i ulew Edom, je ri umam ati Basemat chi rixoqil mam Esaú. 18I je aj-atzil chke i rak'al ati Aholibama, chi rixoqil mam Esaú are: A Jeús, a Jaalam xaq i a Coré; i ati Aholibama le umi'al ma Aná. 19Konojel ike le je umuq uxikin mam Esaú chi xaq ma Edom kb'ix che, je are ike le je aj-atzil chke kitzob'ajil.
20I jub'an chiki je are umuq uxikin ma Seir chi aj Hor, chi je jeqel chila che i ulew le: Ma Lotán, ma Sobal, ma Zibeón, ma Aná, 21ma Disón, ma Ezer xaq ma Disán. Ike le je are uwi ujolom chke aj Hor, chila chwach ulew Edom, chi je rak'al ma Seir. 22I rak'al ma Lotán je are iri: A Hori xaq i a Hemam. I ati Timna are ranab' ma Lotán. 23I rak'al ma Sobal je are iri: A Alván, a Manahat, a Ebal, a Sefo xaq i a Onam. 24I jub'an chiki je are rak'al ma Zibeón: A Aja xaq i a Aná. I a Aná le are xriqaw i ralaxb'al ya pa tz'inilik jyub' chaqij are keuyu'uj u'axna uqajaw, chi ma Zibeón. 25I ma Aná le xuk'uwalij jun uk'ojol chi a Disón ub'i xaq xuk'uwalij jun umi'al chi Aholibama ub'i. 26I rak'al ma Disón je are iri: A Hemdán, a Esbán, a Itrán xaq i a Querán. 27I rak'al ma Ezer je are iri: A Bilhán, a Zaaván xaq i Acán. 28I rak'al ma Disán je are iri: A Uz xaq i Arán.
29I jub'an chiki je are uwi ujolom chke aj Hor: Ma Lotán, ma Sobal, ma Zibeón, ma Aná, 30ma Disón, ma Ezer xaq i ma Disán. Je are uwi ujolom ike le ke i aj Hor pa taq kitzob'ajil chila che ulew Seir. 31Are k'amaja kok jun chke i aj Israel pa ajawinik, i xe'ajawin pkiwi i winaq chila che ulew Edom je are iri: 32Ma Bela chi uk'ojol mam Beor, are ire xrajawin pkiwi i winaq chila che ulew Edom, i ub'i utinimit Dinaba. 33Are xkam ma Bela xkanaj ma Jobab puk'exel, ire le are uk'ojol ma Zera aj pa tinimit Bosra. 34Are xkam ma Jobab, xkanaj ma Husam puk'exel chu'atik tzij, i ma Husam le aj Temán. 35Are xkam ma Husam, xkanaj ma Hadad puk'exel chu'atik tzij; ma Hadad le uk'ojol ma Bedad, chi xtiki chuch'akik ma Madián che i ch'oj chila che ulew Moab, ub'i utinimit le Avit. 36Are xkam ma Hadad, xkanaj ma Samla puk'exel chi aj Masreca. 37Are xkam ma Samla, xkanaj ma Saúl puk'exel chi aj Rehobot; i tinimit Rehobot le o chuchi' i raqana. 38Are xkam ma Saúl, xkanaj ma Baal-hanán puk'exel; ma Baal-hanán le uk'ojol mam Acbor. 39Are xkam ma Baal-hanán, chi uk'ojol ma Acbor, xkanaj ma Hadar puk'exel, ub'i i nim laj utinimit le Pau, xaq i rixoqil le ati Mehetabel ub'i, umi'al ma Matred ri umam ma Mezaab.
40Are kib'i konojel i je uwi ujolom chke i rak'al mam Esaú pa taq kalk'uwalil, pa taq kik'ijib'al xaq chrij taq kib'i: I ati Timna, ma Alva, ma Jetet, 41ati Aholibama, ma Ela, ma Pinón, 42ma Cenaz, ma Temán, ma Mibzar, 43ma Magdiel xaq i ma Iram. Ike le je are uwi ujolom chke i rak'al ma Edom, chrij taq kik'ijib'al ipa xejeqi wi chwach ulew. I ma Edom le are mam Esaú, chi kiqajaw konojel aj Edom.
Currently Selected:
G%E9nesis 36: ACHICUB
Highlight
Share
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
