G%E9nesis 38
38
Ma Judá xaq i al Tamar
1Xuk'ulmaj iri che taq kan i ij le chi xel a Judá ku' i ratz ucha', x-e chi rachoch jun achi aj Adulam chi ma Hira ub'i. 2I a Judá le xril uwach jun ali chila, umi'al jun aj Canaán chi ma Súa ub'i, ire xk'uli ru', are xumin rib' ru', 3i ali le xk'aqtajik, are uri xalax jun ralab', xuya pub'i a Er. 4Xk'aqtaj chik ukamul, are uri xalax tan chik jun ralab' xuya pub'i a Onán. 5Xaq xk'aqtaj chik uroxmul, xaq ala tan chik rak'al xalaxik, xuya pub'i a Sela; i ma Judá o chila Quezib are xalax a Sela le.
6Te'uri ma Judá xutzukuj rixoqil i uk'ojol atz chi a Er, i rixoqil a Er le al Tamar ub'i. 7Xwiri i a Er utz ti uk'aslemal chwach i Ajwal, rumali i Ajwal xresaj uk'aslemal che. 8Are uri ma Judá xub'ij che a Onán:
—Chatk'ulan ru' rixoqil kan etz awatz, chiwok'aj iwib' ru', man keje ile kepe rak'al xaq umuq uxikin i etz awatz awumal yet —xcha.
9I a Onán xretamaj chi kealax rak'al ru' ati Tamar chi rixoqil kan i etz ratz, xwiri je re taj, rumali are kumin rib' ru' ati Tamar xa pulew kujam wi b'ik, man kraj taj chi kk'aqtajik. 10I Ajwal lik xpe roywal che i ku'an a Onán le, rumali xresaj uk'aslemal. 11Are uri ma Judá xub'ij che i ralib' chi ati Tamar:
—Wo'or utz kattzalij chi rachoch aqajaw, chatkanaj ni keje ile atmalkan chila k'a kk'iy ni ink'ojol a Sela.
Keje ile xub'ij che i ralib' man xuch'ob' ma Judá moqxa kkam tan chik a Sela pacha xki'an i ratz, rumali i ati Tamar le x-e chi rachoch uqajaw.
12Are ik'awnaq chik keb' oxib' junab' uk'ulmaxik ni'pa taq ile, are uri xkam i rixoqil ma Judá chi umi'al ma Súa. Are xik'aw ub'is ma Judá xpaqi b'i pa tinimit Timnat chila ku' aj-elsanel kismal uchij; junam ru' i ramiy chi ma Hira chi aj Adulam. 13Are xretamaj ati Tamar: Chi uqajaw ralib' xpaqi b'i pa tinimit Timnat chuk'upixik kismal uchij. 14Xresaj u'u' re malkanil chi ukojom, xuch'uq b'i upalaj ru' jun k'ul xax xaq xulik' b'i jun k'ul chrij man kraj taj chi k-etamax uwach. Te'uri x-ekub'i chila xukut b'e pa okb'al b'ik re i tinimit Enaim, chi o pa b'e chi k-e pa tinimit Timnat, xu'an ile man rilom chi k'iynaq chik a Sela, xwiri lik kuk'am ti ati Tamar le re rixoqil.
15I ma Judá are xril ixoq le chi uch'uqum upalaj, xuch'ob'o chi ile are jun ixoq chi chwach uch'akul kuch'ak wi umer. 16Are uri x-e pan ru' man reta'am taj we are i ralib', xaq xel uchi' che, xub'ij:
—Chaya chwe chi kinmin wib' awu' —xcha.
I ixoq le xub'ij che:
—¿Wach kaya chwe we kinb'ij utz chawe?
17I ma Judá xub'ij che:
—Kintaq li jun ral achab'at chke i je o wu'.
Are uri ixoq xub'ij:
—Utzi', xwiri chaya kan jun b'iroxik chwe tz'aqat kataq li chab'at le —xcha.
18Rumali ma Judá xutz'onoj che:
—¿Wach kawaj kinya kan chawe?
I ati Tamar xub'ij:
—Chaya kan ab'aq chwe, alaso xaq i ach'amiy chi awok'am pa'ab' le.
I ma Judá xuya'o wach i xtz'onox che, te'uri xumin rib' ru'; ixoq le lik xk'aqtaj kanoq. 19Te'uri ati Tamar le x-e ru' ja; are xuponik xresaj chik i k'ul xax chi uch'uqb'em upalaj, te'uri xukoj chik u'u' chi re malkanil.
20I ma Judá xutaq li ramiy chi aj Adulam chuya'ik i ral chab'at che ixoq chi xumin rib' ru', xaq kuk'amb'ej b'i te'eq re wach uya'om kan ire che; xwiri ixoq le xriqtaj ti chik, 21rumali i achi le xutz'onoj chke i rach-achiyab' chi je aj chila che i k'ijib'al le:
—¿Ipa o wi ixoq chi chwach uch'akul kuch'ak wi umer, chi o te'eq xukut b'e re i tinimit Enaim? —Xcha.
I achiyab' xkib'ij che:
—Waral lik k'ijinaq ti jun ixoq chi chwach uch'akul kuch'ak wi umer —xecha.
22Are uri i ramiy ma Judá le xtzalij b'ik, are xupon ru' ma Judá xub'ij che:
—Xinriq ti ixoq xaq i achiyab' je aj chila xkib'ij chwe chi chila k'ijinaq ti jun ixoq chi chwach uch'akul kuch'ak wi umer —xcha.
23I ma Judá xub'ij:
—Chkanaj ni kani ru' ni'pa i xinya che, man keje ile kojyo'yax taj, man yin lik xatintaq b'i chuya'ik i ral chab'at che, xwiri yet xariq taj —xcha.
24Kolo moq oxib' ik' chik uk'ulmaxik ile, are uri xb'ix che ma Judá:
—I awalib' chi ati Tamar x-on che rib' chi chwach uch'akul kuch'ak wi umer; rumal i xaqmanal xu'ano le, wo'or rax winaq chik —xecha.
Are uri ma Judá xsik'in chub'ixkil:
—¡Chiwesaj li chisaq, chinak'a a' che! —Xcha.
25Xwiri are ketijin li chrelsaxik i ati Tamar le, xutaq ub'ixkil che uqajaw ralib': “Are rajaw i b'iroxiki x-anaw raxwinaq chwe, wo'or chiwila ub'e pachin rajaw i b'aq, laso xaq i ch'amiy.” Xcha. 26I ma Judá are xril ub'e chi re ire i b'iroxik le, xub'ij: “Lik utz laj winaq ixoq le chinwach yin, man yin xinya ti che chi k-e pa rixoqil a Sela chi ink'ojol.” Xcha. I ma Judá le lik xumin ti chik rib' ru' i ralib'.
27Are xuriq i ij chi xalax rak'al ati Tamar, lik je yox xeuya'o. 28Xwiri are ktijin kalaxik i ak'alab' le, jun chke xresaj li u'ab', are uri i ati ilol aj tuj xuyut' la jun chij kaq che u'ab', xaq xub'ij: “Are iri xk'un nab'e.” 29Xwiri i ak'al xujek' la chub'i u'ab', rumali chi are i jun chik xalax nab'e; rumali ati ilol aj tuj, xuya pub'i Fares, man xub'ij: “¡Wach ujaqik li ab'e xa'ano!”. 30Te'uri xalax i jun chik ak'al chi yut'um i chij kaq che u'ab', ire xkiya pub'i a Zara.
Currently Selected:
G%E9nesis 38: ACHICUB
Highlight
Share
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
