G%E9nesis 41

A José kub'ij usuk' i rach'ik' ma faraón

1Keb' junab' chrijil chik u'atik tzij rumal ma faraón pkiwi i ajchakib' re ire, are uri ma faraón le xu'an jun achik', xrachik'aj chi tak'al chuchi' i raqana chi Nilo ub'i, 2are uri xaqte'et xe'el li wuqub' b'akib' chupam i raqana le lik je chomiq xaq lik je ti'ojib', xe'ok chwa'im pa taq rax es. 3Chkijil chik i wuqub' chomiq taq b'akib' le, xe'el chali wuqub' b'akib' chi lik tzel ketzunik xaq lik je b'aq, xetak'i chuchi' i raqana le junam ku' i jub'an chi xe'el li nab'e. 4I b'akib' le chi lik tzel ketzunik chi xaq lik je b'aq, xekitij b'i wuqub' b'akib' chi lik je chomiq chi xaq lik je ti'ojib'.

Are uri xk'un saq chwach ma faraón. 5Xwiri xok chali uwaram, xaq xu'an chik jun achik' xrachik'aj chi o jun raqan trigo ktijin li ralaxik wuqub' uwach nimaq xaq lik chomiq. 6Chrijil chik i wuqub' le xe'el chali wuqub' uwach i trigo chi lik maratz', xaq lik porpor rumal i k'atan laj tew xaq lik kuchaqijsaj i tikon, i tew le kpe prelb'al ij; 7i wuqub' uwach i trigo chi lik maratz' le, xekitij b'i wuqub' chi lik nimaq xaq lik chomiq.

Are uri xk'un saq chwach ma faraón, xaq xunab'ej chi xa kachik'ik. 8Are xsaqirik xwalij loq, lik k'achirnaq rumal i rachik' le chi xu'ano, rumali xutaq kisik'ixik konojel aj-ij xaq konojel i o kino'oj chi je o chila pa Egipto. Are uri xulap i keb' rachik' le chke, xwiri mijun xtiki chusaqixik wach ke'el usuk' i keb' rachik' le. 9Are uri i kaj-atzil i je ajya'ol uwa'al uva muqb'am xub'ij che ma faraón:

—Wo'or xk'un chink'ux, chi in-anom jalajuj taq inmak. 10Man are xpe awoywal chwe yin xaq che i kaj-atzil ajya'ol wa, xojamin b'i prexil chi rachoch i kaj-atzil achiyab' chi je yij che i ch'oj ke i chajal, 11o jun a'ab' i kaj-atzil ajya'ol wa xaq yin xqa'an jun achik' chqajujunal, i qachik' le is junwi ke'eloq. 12Chila prexil le o jun k'ojol ala aj Hebreo rajchak i kaj-atzil i achiyab' chi je yij che i ch'oj ke i chajal, xqalap i qachik' che, chqajujunal xub'ij usuk' chqe wach ke'eloq. 13Xaq ronojel is are xe'eloq pacha xub'ij chqe: Yin xaya chik inchak xaq i aj-atzil ke ajya'ol wa xataq ujitz'axik —Keje xub'ij ajya'ol uwa'al uva muqb'am ile che ma faraón.

14Are uri ma faraón xutaq usik'ixik a José rumali juntir xkesaj li prexil. I a José le xresaj uwi, xujalwachij li u'u' te'uri xpe chwach ma faraón. 15I ma faraón xub'ij che:

—Yin xin-an jun achik', xwiri mijun tikinaq chusaqixik chwe wach usuk' ke'eloq. Xwiri xwetamaj chi yet are kata jun achik' lik kattiki chusaqixik wach usuk' ke'eloq —xcha.

16Are uri a José xub'ij che:

—Yin taj kintiki chusaqixik, are i Dios ksaqiw chawe wach ke'el usuk' awachik' le —xcha. 17I ma faraón xulap che a José wach xrachik'aj, xub'ij:

—Xwachik'aj chi in tak'al chuchi' i raqana chi Nilo ub'i. 18Xaqte'et xe'el li wuqub' b'akib' pa ya chi lik je ti'oj xaq lik je chomiq, xe'ok chwa'im pa taq rax es. 19Chkijil chik i wuqub' chomiq taq b'akib' le xe'el chali wuqub' b'akib' chi lik tzel ketzunik xaq lik je b'aq, i b'akib' le lik wilom ti pich' kiwach chwach ronojel ulew waral pa Egipto. 20Are uri i wuqub' b'akib' chi lik tzel ketzunik le, chi xaq lik je b'aq xekitij b'i wuqub' b'akib' chi lik je chomiq xaq lik je ti'ojib'. 21Xwiri are xtijtaj b'i kumal, lik x-aljin ti pich' chke we o taq xkitijo, man lik k'a wach wi pok'paq kipam.

Are uri xk'un saq chinwach. 22Xwiri xok chali inwaram, xaq xin-an chik jun achik' xwachik'aj chi o jun raqan trigo ktijin ralaxik wuqub' uwach nimaq xaq lik chomiq. 23Chrijil chik i wuqub' le xe'el chali wuqub' uwach trigo chi lik je maratz' xaq lik porpor rumal i tew chi kpe prelb'al ij; 24i wuqub' uwach i trigo chi lik maratz' le, xekitij b'i wuqub' chi lik nimaq xaq lik chomiq; ronojel ni'pa ile xinlap chke aj-ij, xwiri lik mijun chke ike xusaqij chwe wach usuk' ke'eloq —xcha.

25Are uri a José xub'ij che ma faraón:

—Saq laj tzij i keb' awachik' le xa jun ke'eloq, i Dios xub'ij chawe wach kraj u'anik. 26I wuqub' b'akib' chi lik je chomiq xaq i wuqub' uwach trigo chi lik chomiq, ile ke'eloq xa jun, chi xaq ke'eloq wuqub' junab'. 27I wuqub' chik b'akib' chi lik je b'aq chi xaq lik tzel ketzunik, ile xaqjun ke'el ru' i wuqub' uwach trigo chi lik maratz' xaq lik porpor rumal i tew chi kpe pa relb'al ij, ile ke'eloq wuqub' junab'; xwiri wuqub' junab' wa'jal kub'ij. 28Lik pacha xinb'ij chawe ma faraón, i Dios ktijin chub'ixkil chawe wach kraj u'anik. 29I usuk' are iri: Ya knaqajab' uk'unik wuqub' junab' chi lik k-on utz uwach i tikon chwach ronojel ulew pa Egipto. 30Te'uri kjeqan chub'i wuqub' junab' wa'jal are kuk'ulmaj ile lik mijun chik kk'un chuk'ux i junab' chi lik xu'on utz uwach i tikon, i wa'jal le kusach ni kiwach konojel aj Egipto. 31Man ronojel ni'pa k-on utz lik ksach ni uwach rumal i nim laj wa'jal le. 32Yet kamul xatachik'ik, man i Dios lik uch'ob'om u'anik ile xaq lik juntir ku'an na.

33Rumali yet lik rajwaxik katzukuj jun achi chi lik b'iw xaq lik o uno'oj, man kaya puwi i tinimit Egipto. 34Xwi ta la ile xaq rajwaxik keakoj aj-ok'al utzam pa taq tinimit re ronojel Egipto, man kkesaj jun koxtal che i jo'ob' koxtal re kimolonik i winaq chkijujunal are k-on utz uwach i tikon che i wuqub' junab' chi lik k-on utz. 35Yet keataq aj-ok'al utzam le chumolik uchi' uwach i tikon che i wuqub' junab' chi k-on utz, xaq kak'ol pa taq tinimit man keje ile o i wa k'olanik. 36I wa chi k'olanik le kuriq ni uchak chke aj Egipto che i wuqub' junab' wa'jal chi kpetik, man keje ile i winaq re i tinimit kekam ti rumal i wa'jal —Keje xub'ij a José ile che ma faraón.

A José aj-ok'al utzam i tinimit Egipto

37I ma faraón xaq i je rajpatanib' lik utz xkita wach xub'ij a José. 38Are uri ma faraón xutz'onoj chke i rajpatanib':

—¿Kqariq nawi jun winaq keje pacha ire le chi o utewal i Dios ru'?

39Te'uri xub'ij che a José:

—Nti jun chik chi lik o uno'oj chawach yet, man are i Dios x-on chawe chi xasaqij ronojel wach ke'el usuk' i wachik'. 40Kkanaj ni i nim laj ja re i ajawinel pa'ab' xaq konojel i winaq kekojon ni chawe, xwi yin atz in-ij chawach yet man yin in ajawinel —xcha. 41Rumali i ma faraón xub'ij che a José:

—Yin katinya kan pukab' atol tzij puwi ronojel ulew Egipto —xcha. 42Are uri ma faraón xresaj ub'aq che uwi u'ab', xukoj che uwi u'ab' a José; te'uri xutaq ukojik u'u' chi lik paqal rajil, xaq xutaq ukojik jun ruwaj an-o'oj. 43Are uri xub'ij che chi k-an chupam i ch'ich' chi yijilik re ukab' atol tzij, xaq xeunab'saj b'i raqan u'ab' chi ko kesik'in chub'ixkil i tziji chke i winaq: “¡Kojik'aw pich' chixol xaq chikojo u'ij i k'ak' atol tziji!” Keje ukanajik a José ile puwi ulew Egipto rumal ma faraón.

44Are uri ma faraón xub'ij che a José:

—Tupu yin o i atb'al tzij pin-ab' xwiri mijun chke aj Egipto to' kki'an taq kib' chu'anik pacha kkaj ike we ab'im ti yet chke —xcha.

45Are uri ma faraón xujalwachij ub'i a José xuya pub'i a Zafnat-panea; xaq xutzukuj jun rixoqil chi al Asenat ub'i, umi'al ma Potifera, chi ajsujul sipon chwach jun chik dios chila pa tinimit On. Keje ukanajik a José ile pukab' atol tzij puwi ulew Egipto. 46I a José o chik lajuj juwinaq (30) junab' che are xujeq chak ru' ma faraón chi ajawinel re i tinimit Egipto.

Are xutzin uya'ik upatan a José le, are uri xu'ijla kan ma faraón te'uri su' xujeq usolixik ronojel ulew Egipto. 47Xaq che i wuqub' junab' le lik x-on utz uwach i tikon chwach ronojel ulew Egipto. 48Rumali a José xutaq umolik uchi' ronojel i jalajuj taq mutzaj chi x-on utz chila pa taq tinimit Egipto che i nab'e wuqub' junab' le, xaq xeuk'ol chila ipa xmol wi pa taq tinimit. 49Xumol uchi' i trigo, lik pacha chik umolik i seneb' chuchi' i ya, lik k'i xkimol uchi' rumali xkimayij upajik man ketiki ti chik che.

50Chuxe'el i nab'e junab' wa'jal, i a José xuk'uwalij keb' rak'al ru' rixoqil chi al Asenat. 51I nab'e rak'al a José le xuya pub'i a Manasés, man xub'ij: I Dios xu'an chwe chi xsach chink'ux ni'pa uyej chi xinik'aw wi, xaq xesach i wachalal chink'ux chi je o kan chi rachoch inqajaw. 52I ukab' rak'al xuya pub'i a Efraín, man xub'ij: “I Dios xu'an chwe chi xink'uwalin chwach i jyub' ta'aj ipa intijom wi uyej.” Xcha.

53Are xik'aw wuqub' junab' chi lik x-on utz uwach i trigo chila pa Egipto, 54are uri xjeqan wuqub' junab' wa'jal, lik pacha xub'ij a José. Xpe jun nim laj numik chwach ronojel uwach i jyub' ta'aj, xwiri chila pa Egipto nti numik man kik'olom kan i trigo. 55Xaq are xjeqan i wa'jal chila pa Egipto konojel i winaq xe'e chutz'onoxik ki-trigo che ma faraón. Are uri ma faraón xub'ij chke konojel i winaq aj Egipto: “Jix ru' a José xaq chi'ana pacha kub'ij ire chiwe.” Xcha.

56Are lik o chik i wa'jal chwach ronojel i jyub' ta'aj, are uri a José xujaq i k'olb'al trigo, k'ayb'al re chke aj Egipto. 57Xwi ta la ile, konojel i winaq chwach i jyub' ta'aj xeupon chulo'ik i trigo che a José chila Egipto, man lik mijun tinimit re uwach i jyub' ta'aj o ktijawik.

Currently Selected:

G%E9nesis 41: ACHICUB

Highlight

Compare

Copy