G%E9nesis 42
42
Ki'enam i ratz a José pa Egipto
1I ma Jacob are xretamaj chi o i trigo pa Egipto, are uri xub'ij chke i rak'al: “¿B'uchak chi to' ix o b'i chi xaq to' kitaqej iwib' chiwach? 2Yin xwetamaj chi o i trigo pa Egipto; jix chulo'ik qe chila, man keje ile kojkam ti rumal numik.”
3Are uri xe'e lajuj chke i ratz a José chulo'ik trigo pa Egipto. 4Xwiri i ma Jacob xutaq tu b'i a Benjamín ku' i ratz, chi ucha' a José, man xuch'ob'o chi moqxa o taq keuk'ulmaj pa taq b'e. 5Are uri xe'e uk'ojol ma Israel chkixol ni'pa i winaq chi ktijin ki'enam pa lo'onik pa Egipto, man lik o i wa'jal chila Canaán.
6Are xeupon i ratz a José chila pa Egipto chulo'ik i trigo xexuki chwach, xkiqajsaj kipalaj k'a chwach ulew man are ire o puwi i tinimit, xaq are ire kk'ayiw i trigo chke konojel i winaq chwach ronojel i jyub' ta'aj. 7Are xeuponik, i a José xril ub'e chi je are i ratz; xwiri ire xu'an che rib' chi pacha taq reta'am ti kiwach, rumali lik ko ki'ijlaxik xu'ano, xub'ij chke:
—¿Ipa kixpe wi yix?
Ike xkib'ij:
—Oj petnaq Canaán chulo'ik qa-trigo waral —xecha.
8Tupu a José xril ub'e chi je are i ratz, xwiri ike xkil ti ub'e chi are kicha'. 9Are uri a José xk'un chuk'ux wach i achik' chi u'anom chke, rumali xub'ij chke:
—Saq laj tzij yix lik ix k'ak'alinel; xa xixk'un chutaqexik wach okik ki'an pa tinimit.
10Ike xkib'ij:
—Oj k'ak'alinel taj, nim laj winaq, xa xojk'un chulo'ik qa-trigo. 11Yoj qonojel xaqjun qaqajaw, xwi ta la ile, xaq lik oj utz laj taq winaq; yoj lik oj k'ak'alinel taj —xecha.
12Xwiri a José xub'ij chik chke:
—Qatzij ti kib'ij le, yix lik xixk'un chutaqexik wach taq okik ki'an pa tinimit.
13Xwiri ike xkib'ij chik:
—Yoj oj kab'lajuj qonojel, xaq qatz qacha' qib', man xaqjun qaqajaw, i qaqajaw le o chila Canaán. I cha'xel xkanaj kan ru', i jun chik nti chik qu'.
14Xwiri i a José ko tan chik ki'ijlaxik xu'ano, xub'ij chke:
—Lik saq laj tzij pacha xinb'ij chiwe, yix lik ix k'ak'alinel. 15Ru' iri kink'amb'ej ipam we qatzij kib'ij: Lik pub'i ma faraón kinb'ij chiwe, chi lik kixkamik we kik'am ta li icha' ch'ip. 16Chitaqa b'i jun chiwe chuk'amik icha', ni'pa i jub'an kekanaj kan prexil. Keje ile kqetamaj we qatzij kib'ij, we qatzij taj lik pub'i ma faraón kinb'ij chiwe chi ¡Lik ix k'ak'alinel! —Xcha.
17Are uri a José xeuya oxib' ij prexil. 18Churox ij xub'ij a José chke i ratz:
—Yin kinxij wib' che i Dios rumali lik kinkojon che; chi'ana iri, man keje ile kixk'asi na; 19we saq laj tzij chi lik ix utz laj taq winaq, chikanaj kan jun chiwe prexil, tz'aqat i jub'an kkik'am b'i trigo re kiwa iwalk'uwal chi je o kan ru' ja. 20Xwiri chik'ama li icha' chwe; man kwilb'ej re we qatzij kib'ij, keje ile kixkam taj —Keje ile xub'ij a José chke i ratz.
Ike xki'ano pacha xb'ix chke. 21Are uri xkib'ij chkiwach:
—Saq laj tzij, yoj kojtijin chutojik ni'pa xqa'an che qacha', tupu xqilo chi lik xutij uyej xaq lik xutz'onoj utzil chqe chi kqil tob'al uwach, xwiri yoj lik xqakoj ti retalil che wach xub'ij; rumali wo'or oj o chutojik —xecha.
22Are uri a Rubén xub'ij chke:
—Yin xinb'ij ile chiwe chi to' xaqmanal mi'an che i ala, xwiri xixkojon ti chwe; rumali wo'or oj o chutojik ukamik —xcha.
23Ike keta'am taj chi a José le kuta wach kkib'ij, man a José o jun aj-atsal utzij chkiwach pkich'ab'al aj Heber. 24Are uri xel a José chkixol, xok che o'ej, are xik'aw i ro'ej xaq kuch'ij chik lapanik, x-e chik ku', xresaj a Simeón chkixol, xutaq uyut'ik chkiwach ike.
25A José xutaq unojsaxik kikoxtal i ratz che i trigo, xaq kya' b'i kimer chupam kikoxtal chkijujunal chi xkitojb'ej re i trigo xaq kya' b'i kiwa re kkitij pa taq b'e. Lik keje ile x-anik. 26Are uri ike xkiya b'i ki-trigo chrij ki'axna, te'uri xetzalij b'i chi kachoch.
27Are xeupon pa warb'al ipa kewar wi kan che a'ab' le, jun chke xujaq uchi' ukoxtal, kuyab'ej jub'i' u-trigo u'axna, are uri xrilo chi o umer puwi i trigo. 28Are uri xub'ij chke i ratz ucha':
—¡Chiwila pe', xkitzalij li inmer, o chupam inkoxtali! —Xcha.
I jub'an are xkita ile lik laj xel kik'ux, keb'arb'atik xkib'ij chkiwach:
—¿Wach usuk' ile chi xu'an i Dios chqe? —Xecha.
29Are xeupon Canaán ipa o wi kiqajaw chi mam Jacob, xkilap che ronojel ni'pa xkik'ulmaj, xkib'ij:
30—I achi chi o puwi i tinimit Egipto, lik ko qa'ijlaxik xu'ano, xub'ij chqe chi oj k'ak'alinel. 31Xwiri yoj xqab'ij che chi oj utz laj taq winaq, oj k'ak'alinel taj. 32Xaq xqab'ij che chi yoj oj kab'lajuj, chi xaqjun qaqajaw; o jun chi nti chik qu', i cha'xel o kan ru' qaqajaw chila Canaán, xojcha che. 33Are uri i achi chi o puwi i tinimit le, xub'ij chqe: Ru' iri kwilb'ej re we lik ix utz laj taq winaq: Chikanaj kan jun chiwe waral, tz'aqat yix kik'am b'i trigo re kiwa iwalk'uwal chi je o kan ru' ja. 34Xwiri are kixtzalij loq, chik'ama li icha' chwe, man keje ile kwetamaj na we ix k'ak'alinel taj, lik saq laj tzij uri chi ix utz laj taq winaq; te'uri kinya nu b'i iwatz chiwe, xaq kinya ni chiwe chi kixlo'onik xaq kixk'ayin che i tinimiti; keje ile xub'ij chqe —xecha.
35Are xkitor uchi' kikoxtal, xaqte'et xkilo chi o kimer puwi ki-trigo; rumali junam ru' kiqajaw lik xe'ok il. 36Are uri ma Jacob xub'ij chke i rak'al:
—Yix kixtijin b'i chkik'isik iwatz icha': A José xaq i a Simeón je nti chik qu', ¡Wo'or kiwaj kik'am chub'i a Benjamín! Ronojel is utz ti kin-el ru' —xcha kiqajaw.
37Xwiri ma Rubén xub'ij che uqajaw:
Tat, yin kinya wib' chuk'amik li a Benjamín chawe. We xink'am ti chaloq, cheakamsaj uri i keb' ink'ojol —xcha.
38Xwiri mam Jacob xub'ij chik:
—Ink'ojol a Benjamín k-e ti iwu', man i ratz chi a José kamnaq chik, wo'or xwi chik ire le o wu'; we o tan chik keuk'ulmaj iwu' ipa kix-e wi, imak yix uri we kinukamsaj b'i b'is —xcha i kiqajaw.
Currently Selected:
G%E9nesis 42: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
