G%E9nesis 43
43
Uk'amik b'i a Benjamín pa Egipto
1I wa'jal lik ktijin unimarik chila Canaán. 2Are ma Jacob xaq i rak'al xkik'is i trigo chi xeupon chulo'ik chila pa Egipto, are uri ma Jacob xub'ij chke uk'ojol:
—Jix chik chulo'ik jub'i' qa-trigo chila pa Egipto.
3Xwiri ma Judá xukuxtaj che uqajaw:
—I achi chi o puwi ulew Egipto lik xub'ij keje iri chqe: We kik'am ta li icha', lik mixk'unk'a chik uri chwilik —xcha. 4Yet we kaya chqe chi kqak'am b'i qacha' qu', koj-e uri chulo'ik i trigo. 5Xwiri we kaya tu b'i chqe chi k-e qacha' qu', koj-e ti uri yoj man i achi lik xub'ij chqe: We kik'am ta li icha' lik mixk'unk'a chik uri chwilik —xcha.
6Are uri xub'ij ma Israel chke:
—¿B'uchak chi lik ipetsam i k'ax pinwi? ¿Xaq b'uchak chi xib'ij che achi chi k'a o jun chik icha'?
7Ike xkib'ij:
—Xqab'iji man i achi le lik keje iri xutz'onoj chqe ¿K'a k'as iqajaw? ¿K'a o jun chik icha'? Yoj xwi xqala' uwach che wach xutz'onoj ire chqe. ¿Xatab'a qeta'am yoj we kub'ij chqe chi kqak'am b'i qacha'?
8I ma Judá le xub'ij chik che uqajaw, chi ma Israel:
—We kqaj kojkam ti rumal numik chaya b'i uri ala le chinqul man su' koj-e la, man keje ile katkam ti yet, kojkam ti yoj xaq kekam ti qak'al. 9Yin lik kwil i ala le chawe, xwiri we xink'am ti chaloq, lik yin uri in ajmak chawach ronojel ij saq. 10Man mataji to' qachapom taq qib' che i tzij puwi ile, oj enaq te chiki, xaq kamul tene chiki oj k'unnaq —xcha.
11Are uri ma Israel chi kiqajaw xub'ij chke:
—Nti kin-an uri che, chik'ama b'i ri icha' le, xwiri chi'ana iri: Chik'ama b'i jalajuj taq sipon chomiq chupam ikoxtal chiya che i achi le, chik'ama b'i jub'i' bálsamo, jub'i' uwa'al kab', jub'i' kunb'al muy, jub'i' mirra, jub'i' nuez xaq jub'i' almendra. 12Chik'ama chub'i i mer chi xtzalijsax li chiwe chupam ikoxtal; xaq chiya chub'i jub'an chik puwi pacha xtzalix li chiwe man ile lik xa xesach che. 13Chik'ama b'i icha', jix chik ru' i achi le. 14I lo'laj Ajwal chu'ana ni che i achi le chi kril tob'al iwach keje ile kro'taj na li a Simeón xaq i a Benjamín man ketzalij chali iwu', xwiri we ketzalij ti chaloq, nti kin-an uri che, lik kintij ni uyej uri —xcha.
15Rumali i je uk'ojol ma Israel le xkik'am b'i jalajuj taq sipon, xkik'am b'i mer chrij pacha rajwaxik chke, xaq xkik'am b'i a Benjamín; te'uri xkimaj b'i kib'e, xe'e pa Egipto; xeupon chila ipa o wi a José. 16I a José le are xril a Benjamín chi xupon ku' i ratz xub'ij che i kaj-atzil ajchakib' chi je o prachoch:
—Cheak'ama b'i achiyab' le ru' ja xaq chakamsaj jun chikop re kqatijo man konojel achiyab' le kkitij wa wu' wo'or pa'ij —xcha.
17I kaj-atzil ajchakib' xu'ano pacha xtaq che rumal a José, xeuk'am b'i achiyab' chi rachoch a José. 18Ike are xkilo chi xek'am b'i chi rachoch a José lik xe'ok il man xkib'ij chkiwach:
—Wo'or kojk'am b'i chi rachoch rumal i mer chi xtzalijsax b'i chqe chupam qakoxtal are xojk'un nab'e mul, ile k-ab'ax ni chqij kb'ix ni chqe chi oj ili'om xaq kki'an kitaqon chqe junam ku' i qa'axna —xecha.
19Are xeupon xol uchija re i rachoch a José, xetejeb' pan ru' i kaj-atzil ajchakib', xkib'ij che:
20—Chakuyu qamak ta, yoj are xojk'un nab'e mul, lik saq laj tzij xojk'un chulo'ik qa-trigo. 21Xwiri are xojupon chila ipa o wi i warb'al, xqajaq uchi' qakoxtal, are uri xqilo chi chqajujunal o i qamer chupam i qakoxtal. Wo'or xqak'am chaloq man kqatzalij chiwe xaq lik tz'aqat. 22Man qeta'am taj pachin xyaw b'i chupam qakoxtal xaq xqak'am chali jub'an chik mer chrij pacha rajwaxik re lo'b'al chub'i qa-trigo.
23Are uri i aj-atzil ke i rajchakib' a José xub'ij chke:
—Mixij iwib', ile are i-Dios yix chi xaq ki-Dios iqajaw ichuch xyaw i mer le chupam ikoxtal; yin weta'am chi xink'am kan i mer chiwe chi xitojb'ej re i trigo —xcha.
Te'uri i aj-atzil ke i rajchakib' a José xuk'am b'i a Simeón ku'. 24Te'uri xeuk'am b'i chi rachoch a José; xuya kiya' re ch'ajb'al kaqan xaq xuya ki'es i axna. 25Tz'aqat ike xkiyijb'a i sipon chi kkiya che a José, man xkita chi tik'il ij kupon chutijawik uwa ku'.
26Are xupon a José chi rachoch, xkiya i sipon che chi kik'amom b'ik, te'uri xexuki chwach xaq xkiqajsaj kipalaj k'a chwach ulew. 27Are uri a José xuya rutzil kiwach xaq xutz'onoj chke wach ki'anom ike xaq wach u'onom kiqajaw, xub'ij:
—I nim laj winaq chi iqajaw ¿K'a k'aslik? ¿Wach u'onom, to' utz uwach?
28Ike xkib'ij:
—I awajchak chi qaqajaw yoj, ire k'a k'aslik xaq to' utz uwach.
—Are uri xki'aj kib' chwach a José kojb'al u'ij. 29I a José xuk'am kitaqexik konojel, are uri xrilo chi o ucha' chkixol chi a Benjamín, chi xaqjun chi tz'um kitijom ru', are uri xutz'onoj chke:
—¿Are, icha' ile chi xilap chwe? —Are xecha ike.
Te'uri xub'ij che a Benjamín:
—I Dios chuya ni utzil chomal pawi loy —xcha.
30Are uri a José juntir xel ku', man lik xuch'ij ti chik ro'ej rumal i k'axnab'al uk'ux che ucha', rumali xok b'i puwarb'al, chila xok wi che o'ej. 31Te'uri xuch'aj upalaj, xaq are ik'awnaq chik ro'ej xel loq, xub'ij chke umokom: “¡Chiyijb'a qawa!”.
32X-on rib' a José chutijawik uwa, xki'an kib' i ratz ucha' xaq xki'an kib' aj Egipto. Man i aj Egipto kkitij ti kiwa ku' aj Hebreo man kkich'ob' ike chi lik ch'am ti ile. 33I ratz ucha' a José xekub'i pan chwach ire, nab'e xkub'i i atz te'uri xekub'i i cha'xelab' chrij pacha alaxik ki'anom, lik je oknaq il, to' kkitaqej kib' chkiwach. 34Ronojel ni'pa i tijawik re xya' chwi umexa a José, te'uri a José le xujach chke i ratz ucha', xwiri re a Benjamín lik mas k'i chwach ke i jub'an, konojel lik xewa'ik, xkitu' uwa'al uva xaq lik xekikot junam ru' a José.
Currently Selected:
G%E9nesis 43: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
