G%E9nesis 44
44
I tu'b'al uya' a José
1Chrijil chik ile, a José xutaq i kaj-atzil i rajchak chi kkinojsaj b'i kikoxtal achiyab' le xaq kkiya chub'i kimer chupam chkijujunal chi xkitojb'ej re ki-trigo. 2Xaq kaya b'i tu'b'al inya' chi saq-o'oj chupam ukoxtal i ch'ip, junam ru' i mer chi xutojb'ej te'eq re u-trigo; xcha.
I aj-atzil ke i mokom keje ile xu'ano pacha xb'ix che rumal a José. 3We' tan chukab' ij, i a José xeutaq i ratz ucha' chi kkiya b'i keqan chkij ki'axna man ketzalij b'i chi kachoch. 4K'amaja ne ke'e pan naj che i tinimit, are uri a José xub'ij che aj-atzil ke i mokom:
—Jat, jeamaja i achiyab' chi k'a te xe'ek, are keamaja pa b'e, chab'ij i tziji chke: “¿B'uchak chi xi'an jun utz taj chwe chwach jun utz chi xin-an yin chiwe? 5¿B'uchak chi xiwel-aj li tu'b'al uya' rajaw inchak? Man are ile kukojo re k-on i nanik xaq re kutu' uya'. I xi'ano le lik utz taj; katcha chke.” Xcha a José che kaj-atzil i mokom.
6I aj-atzil ke i mokom are xeumaja lik keje ile xub'ij chke pacha xb'ix che rumal a José. 7Xwiri ike xkib'ij:
—¿B'uchak kab'ij ile chqe, nim laj winaq? Yoj lik kqa'an ti ile. 8Man yoj are xojpe chila Canaán xqak'am chali i mer chi xqariq chupam qakoxtal chi xqatojb'ej te'eq qa-trigo xaq xqajacho, wach taq uchak ile chqe yoj we kqel-aj taq li i an-o'oj xaq i saq-o'oj che i rajaw achak chi rachoch. 9We xariq i tu'b'al ya le ru' jun chqe yoj chkamsax ni uri, xaq yoj lik kojkanaj uri chi oj amokom na ru' rajaw achak —xecha.
10I aj-atzil ke i mokom xub'ij: —Utzi', k-antaj na pacha xib'ij le, xwiri xwi i jun chi kriqtaj i tu'b'al ya ru', kkanaj uri inmokom na, i jub'an chik kekanajik nti kimak —xcha.
11Are uri juntir konojel xkiqajsaj kikoxtal chwach ulew xaq xkijaq uchi'. 12I aj-atzil ke i mokom xujeq b'i usolixik upam ukoxtal i atz xuk'isa usolixik upam ukoxtal i ch'ip. I tu'b'al ya xriqtaj chupam ukoxtal i ch'ip chi a Benjamín. 13Are uri ike le, xkiraqch'ij ki'u' k'utb'al re kib'is, te'uri chkijujunal xki'ansaj chub'i keqan chrij ki'axna, i xetzalij chub'i pa tinimit. 14K'a o a José chi rachoch are xe'ok b'i ma Judá junam ku' i ratz ucha', are uri xexuki chwach, xkiqajsaj kipalaj k'a chwach ulew. 15Are uri xub'ij a José chke:
—¿Wach usuk' xi'ano le? ¿Iweta'am ti b'ari chi jun achi pacha yin lik knanik?
16Are uri xub'ij ma Judá:
—¿Kqariq taj wach kqab'ij chawe, nim laj winaq? ¿Wach uk'utik kqa'ano chi nti qamak? Man i Dios xu'aljinsaj qamak. Wo'or lik oj awajchak na junam ru' i jun chi xriqtaj i tu'b'al ya ru' —xcha.
17I a José xub'ij:
—Yin lik kin-an ti ile chiwe iwonojel. Lik xwi i jun chi xriqtaj i tu'b'al ya ru', lik inmokom na, xwiri yix, mixb'isonik, utz chixtzalij b'i chi rachoch iqajaw —xcha.
Ma Judá kutz'onoj utzil puwi a Benjamín
18Are uri ma Judá xtejeb' pan ru' a José, xub'ij che:
—Nim laj winaq, mpe awoywal chwe, kwaj yin kinlapan jub'i' awu' qatukel. Yet chwe yin lik at keje pacha ma faraón chi lik o a'ij. 19Yet xatz'onoj chqe we k'a k'as qaqajaw xaq we k'a o jun chik qacha', 20yoj xqab'ij chawe chi k'a k'as qaqajaw chi lik rij chik, xaq o jun qacha' chi xalax purijal qaqajaw. I qaqajaw le lik k'ax kuna i uch'ip le man xwi chik ire le k'aslik, i jun kamnaq chik chi xaqjun kichuch ru'. 21Xwiri yet lik xa'an pen chqe chi kqak'am li qacha' le man lik kawaj kawetamaj uwach. 22Yoj xqab'ij chawe chi ala le lik kro'taj ti uqajaw, man we kro'taj, saq laj tzij uri uqajaw kkamik. 23Xwiri, yet lik xasaqij chqe chi we kqak'am ta li qacha' ch'ip qu', lik kojak'ulaj ti chik uri awu'.
24Are xojupon ru' qaqajaw chila ru' ja, xqab'ij che ronojel ni'pa xab'ij yet chqe. 25Are xel keb' oxib' ik', i qaqajaw xub'ij chik chqe, jix chik chulo'ik jub'i' chik qa-trigo; xcha. 26Yoj xqab'ij che: “Koj-e taj we k-e ti qacha' ch'ip qu' man xb'ix chqe chi kojuponpa ti chik we kqak'am tu b'i qacha' qu'.” Xojcha. 27Are uri i qaqajaw xub'ij chqe: “Yix iweta'am chi xa keb' wak'al ru' wixoqil ati Raquel; 28jun nti chik wu' xaq wilom ti chik uwach, kinch'ob' yin lik x-ani ch'aqa taq che kumal itzel taq chikop. 29Wo'or we kik'am chub'i ucha' le, we o tan chik xuk'ulmaj, lik imak yix uri we xinkam yin rumal inb'is.” Xcha chqe.
30“Rumali are kojupon ru' qaqajaw chi awajchak, we qachi'ilam tu b'i ala le chi lik k'ax kuna'o, 31saq laj tzij uri i qaqajaw lik rij chik we kril ti uwach ala le lik kkamik, ke'el uri chi lik qamak yoj we kkam qaqajaw le rumal ub'is. 32Nim laj winaq, yin inya'om wib' chrilik i ala le, man xinb'ij che inqajaw we kink'am ti chali ala chawe, lik yin uri in ajmak chawach ronojel ij saq re ink'aslemal, xincha che. 33Rumali kintz'onoj jun utzil chawe, chi kinkanaj kan yin puk'exel i ala le, ire ya che chi chtzalij b'i ku' i ratz, 34man ¿Wach wuponik yin ru' inqajaw we wok'am tu b'i incha'? Man yin kinch'ij ti rilik i k'ax chi kutij inqajaw.” Xcha.
Currently Selected:
G%E9nesis 44: ACHICUB
Highlight
Share
Compare
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
