Lev%EDtico 15
15
Atb'al tzij chrij jujun taq ch'am taj che jun achi
1I Ajwal xub'ij che ma Moisés xaq che ma Aarón:
2Chib'ij iri chke aj Israel: Jun achi are to' kb'elel chali rijayil utukel, lik ch'am ti chik uri. 3Are ch'am ti iri che jun achi: We lik to' kb'elel li rijayil utukel; xaq we kel ti chaloq, rumali ile lik ch'am ti chik i achi le.
4Xaipa kkotz'i wi achi le we xb'elel li rijayil, lik ch'am ti uri, xaq xa pachike b'iroxik kkub'i puwi, lik k-on kan uri ch'am taj che.
5Xaq xapachin kchapaw i k'ijib'al ipa kkotz'i wi achi le, lik rajwaxik uri chi kuch'aj u'u' xaq ku'an jun ch'am laj atinem re rawasil chi xu'an ch'am che rib', xwiri kkanaj na chi ch'am taj k'a kok a'ab'.
6Xaq pachin kkub'i che i kub'ib'al ipa xkub'i wi achi le, rajwaxik uri chi kuch'aj u'u' xaq ku'an jun ch'am laj atinem re rawasil chi xu'an ch'am che rib', xwiri kkanaj na ch'am taj k'a kok a'ab'.
7Xaq pachin kuchap i achi le, rajwaxik uri chi kuch'aj u'u' xaq ku'an jun ch'am laj atinem re rawasil chi xu'an ch'am che rib', xwiri kkanaj na ch'am taj k'a kok a'ab'.
8Achi le chi to' kb'elel i rijayil utukel, we xuk'aq uk'axaj chrij jun winaq chi ch'am, i winaq le rajwaxik uri chi kuch'aj u'u' xaq ku'an jun ch'am laj atinem re rawasil chi xu'an ch'am che rib', xwiri kkanaj na ch'am taj k'a kok a'ab'.
9I achi chi to' kb'elel i rijayil utukel, we x-an chrij jun kaway, i aparej chi kkub'i chrij le, lik kkanaj uri ch'am taj.
10Xapachin kuyin jun b'iroxik chi kub'inaq achi puwi chi to' kb'elel i rijayil utukel, kkanaj na chi ch'am taj k'a kok a'ab'.
Xaq xapachin kuk'am b'i jun b'iroxik chi k'ijinaq i achi puwi, rajwaxik uri chi kuch'aj u'u' xaq ku'an jun ch'am laj atinem re rawasil chi xu'an ch'am che rib', xwiri kkanaj na ch'am taj k'a kok a'ab'.
11Achi chi to' kb'elel i rijayil utukel, we uch'ajom ti u'ab' are kuchap jun chik winaq, i winaq le chi xchapik, rajwaxik uri chi kuch'aj u'u' xaq ku'an jun ch'am laj atinem re rawasil chi xu'an ch'am che rib', xwiri kkanaj na chi ch'am taj k'a kok a'ab'.
12I achi le we kuchap jun ulew b'oj, rajwaxik uri kpaxix i b'oj le, xaq we jun b'iroxik re tz'alam xuchapo, rajwaxik uri kch'ajik.
13We kutzir i achi le, kutikb'a ktani kb'elel rijayil, rajwaxik uri kuch'aj u'u' xaq ku'an jun ch'am laj atinem chuchi' jun ralaxb'al ya re rawasil chi xu'an ch'am che rib'; xwiri k'a kel wuqub' ij, te'uri k-on chik ch'am. 14Che uwajxaq ij kuk'am nu b'i keb' ixkuku o keb' ral taq palomax chila pa okb'al b'ik che i ja re riqb'al ib' ru' i Dios, re kujach ni che ajsujul sipon chila chwach i Ajwal. 15I ajsujul sipon kusujuj ni jun ral palomax re riqb'al kuyb'al mak, i jun chik re ni sipon chi poroxik re; keje ile i ajsujul sipon kusujuj ni chwach i Ajwal anb'al ch'am che i achi chi to' kb'elel te'eq rijayil utukel.
16Jun achi we xaqte'et xel li b'elel rijayil utukel, rajwaxik uri chi ku'an jun ch'am laj atinem re rawasil chi xu'an ch'am che rib' xwiri kkanaj na ch'am taj k'a kok a'ab'.
17Xab'i chi k'ulil o xaq we tz'um ipa ktzaq wi jub'i' rijayil achi le, rajwaxik uri chi na'al kch'ajik, xwiri kkanaj na chi ch'am taj k'a kok a'ab'.
18Jun achi we xumin rib' ru' jun ixoq, chekeb' le rajwaxik uri kki'an jun ch'am laj atinem re rawasil chi xki'an ch'am che kib' xwiri kekanaj na je ch'am taj k'a kok a'ab'.
Atb'al tzij chrij jujun taq ch'am taj che ixoq
19Jun ixoq are o prik'il lik wuqub' ij ch'am ti uri.
Xapachin kuchap ixoq le kkanaj uri ch'am taj k'a kok a'ab'.
20Xab'iroxik chi kkotz'i ixoq le puwi, we o prik'il lik kkanaj uri i b'iroxik le ch'am taj.
Xaq xab'iroxik kkub'i puwi, lik kkanaj uri ch'am taj.
21Xaq xapachin kchapaw ukotz'ib'al ixoq le, lik rajwaxik uri chi kuch'aj u'u' xaq ku'an jun ch'am laj atinem re rawasil chi xu'an ch'am che rib', xwiri kkanaj na chi ch'am taj k'a kok a'ab'.
22Xaq xapachin kchapaw jun b'iroxik chi kub'inaq ixoq le puwi, rajwaxik uri chi kuch'aj u'u' xaq ku'an jun ch'am laj atinem re rawasil chi xu'an ch'am che rib', xwiri kkanaj na chi ch'am taj k'a kok a'ab'. 23Tupu are ukotz'ib'al xaq we are ukub'ib'al xuchapo, i winaq le lik kkanaj ni uri ch'am taj k'a kok a'ab'.
24Jun achi we xumin rib' ru' ixoq le lik xtz'itaj uri, i achi le kkanaj uri ch'am taj wuqub' ij; xaq xaipa kkotz'i wi lik kkanaj uri i k'ijib'al le ch'am taj.
25Xaq we jun ixoq ktortaj li rik'il pu'ijlal taj xaq we lik k'iyal ij kuch'ij che, xwi ta la ile, xaq we k'iyal ij kuch'ij rik'il che, are kpe che pu'ijlal, lik ch'am ti laj ixoq uri chrij ni'pa taq ij kuch'ij rik'il le che.
26Xaipa kwar wi xaq xaipa kkub'i wi ixoq le, we tortajnaq li rik'il lik kkanaj ni uri i k'ijib'al le ch'am taj, lik keje pacha are o jik laj rik'il.
27Xaq xapachin kchapaw i b'iroxik le, lik kkanaj uri ch'am taj, i winaq le rajwaxik uri chi kuch'aj u'u' xaq ku'an jun ch'am laj atinem re rawasil chi xu'an ch'am che rib', xwiri kkanaj na ch'am taj k'a kok a'ab'. 28Are ktani rik'il i ixoq le, k'a wuqub' ij uri chrijil te'uri k-on chik ch'am. 29Che uwajxaq ij kuk'am b'i keb' ixkuku o keb' ral taq palomax pa okb'al b'ik che i ja re riqb'al ib' ru' i Dios, kujach che i ajsujul sipon chila chwach Ajwal. 30I ajsujul sipon kusujuj ni jun chke ral taq palomax re riqb'al kuyb'al mak, i jun chik re ni sipon chi poroxik re; keje ile i ajsujul sipon kusujuj ni chwach i Ajwal anb'al ch'am che ixoq chi xril k'i rik'il. 31Keje ile, yet ma Moisés xaq yet ma Aarón ki'an ni ch'am chke i aj Israel we kiwesaj chkixol i ch'am taj man keje ile kekam taj; man we kkitz'ij i ja we Yin re riqb'al ib' wu', lik kekam na. Keje ile xub'ij i Dios chke.
32Are i atb'al tzij ile chrij rijayil achi chi to' kb'elel utukel, chi are k-anaw che chi ch'am taj; 33xaq chrij rik'il jun ixoq, xaq chrij rijayil jun achi chi to' kb'elel utukel, xaq chrij jun achi are kumin rib' ru' jun ixoq chi o prik'il.
Currently Selected:
Lev%EDtico 15: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala