Lev%EDtico 21
21
Pixb'anik chke i je ajsujul sipon
1I Ajwal xlapan ru' ma Moisés, xub'ij che:
Chatlapan ku' i je ajsujul sipon chi je rak'al ma Aarón, chab'ij chke chi mkichap jun kamnaq we kachalal, man we kkichapo kekanaj uri chi je ch'am taj. 2Xwiri utz kkichap jun kamnaq we lik kachalal, we are kichuch, kiqajaw, kak'al xaq katz kicha', 3xaq i ranab' chi k'a utukel, chi xaq k'a o ku' man k'ulinaq taj; kumal ike le kekanaj uri je ch'am taj. 4Man jun ajsujul sipon utz taj we ktz'itaj rumal uchapik jun rachalal ixoq kamnaq we k'ulinaq chik are xkamik.
5I ajsujul sipon are kkesaj kiwi lik mki'an tz'um che i kijolom, lik mkesaj utzam kismachi' xaq mki'at taq kich'akul. 6Ike lik rajwaxik chi je ch'am chinwach Yin chi in Ajwal, man kkiqajsaj ti u'ij inb'i, man je are ike kesujuw i sipon chi poroxik re xaq i wa re trigo chi kporox chinwach Yin chi in Ajwal Dios, rumali rajwaxik chi lik chki'ana ch'am che kib'.
7Xaq mek'uli ru' jun ixoq chi chwach uch'akul kuch'ak wi umer, mita ru' jun ixoq chi chaptal pa cho'ab' xaq we jachtalik; man je wajpatan Yin, lik je jachtal pin-ab' Yin chi in Dios. 8Lik cheawesaj che i jalajuj taq utz taj, man je are ike kesujuw i wa re trigo chwach a-Dios. Lik je ch'am na chawe yet, man Yin in Ajwal lik in ch'am xaq lik Yin kin-anaw ch'am chiwe yix.
9We umi'al jun ajsujul sipon kuqajsaj u'ij ire utukel, man chwach uch'akul kuch'ak wi umer, lik kuqajsaj uri u'ij uqajaw; rumali lik keje ile k'aslik kjarsax ni pa a'.
10I atz laj ajsujul sipon lik yatal che chi kukoj i k'ul chi jachtal pu'ab' i Ajwal, rumal i lo'laj aceite chi xoksax che ujolom yab'al u'ij; rumali chi utz taj we kukichb'a uwi xaq mita kuraqch'ij taq u'u' k'utb'al re ub'is. 11Xaq utz taj kok ru' jun kamnaq tupu we uqajaw uchuch, man we kok ru', lik kkanaj uri chi ch'am taj. 12Utz taj we kel pa lo'laj k'ijib'al re u-Dios, xaq utz taj kuqajsaj u'ij i lo'laj k'ijib'al re i Dios, man puwi ire kojtal wi i lo'laj aceite re u-Dios. Yin in Ajwal xinb'ij iri.
13Rajwaxik kutzukuj jun rixoqil chi lik nti jun achi uminom rib' ru'. 14Lik kk'uli ti ru' jun malkan xaq ru' jun ixoq jachtalik, xaq we chaptal pa cho'ab' o we chwach uch'akul kuch'ak wi umer; rajwaxik chi rixoqil lik nti jun achi uminom rib' ru' xaq chekeb' junam chi lemajil kepe wi. 15Man keje ile kuqajsaj ti ki'ij umuq uxikin chkixol utinimit, man ire le lik inya'om pin-ab' Yin chi in Ajwal.
Jun achi we klis, utz taj kkanaj pa ajsujul sipon
16I Ajwal xlapan ru' ma Moisés, xub'ij che:
17“Chab'ij che ma Aarón: chi wo'or ni'pa i k-ek, we o taq jun uk'ojol xaq we umuq uxikin klis, utz taj kusujuj i sipon re i lo'laj wa re trigo chwach u-Dios. 18Man konojel achiyab' we xa je klis, utz taj kkisujuj i sipon; tupu we mawach, jetz', we tz'aqat ti uwi u'ab', uwi raqan, uxikin xaq we utzam, 19xaq we patz'tajnaq ra' o xaq we uteleb', 20we nuk'nik rij, we pich' rij, we sutz' puwach, we o ch'ak che uch'akul xaq we kaq klalat uwach jub'i' che uch'akul xaq we o yob'il che i ukowil. 21Mijun chke uk'ojol xaq chke umuq uxikin i ajsujul sipon ma Aarón kusujuj taq i sipon porom chwach i Ajwal we xa klis, rumali utz taj kusujuj i sipon re i lo'laj wa re trigo chwach u-Dios. 22Xwi kya' che chi kutij i lo'laj wa re trigo chi sujtal chwach i Ajwal xaq i jub'an chik sipon chi ch'am, xaq lik o u'ij xaq lik elsam na re i Ajwal, 23xwiri utz taj kok b'i k'a che i k'ijib'al atz u'ij, chi o chrij i kortin xaq utz taj ktejeb' pan ru' i sujb'al sipon, man keje ile kuqajsaj ti u'ij ni'pa o chupam i lo'laj ink'ijib'al ru' taq i k'ax chi o che. Man Yin chi in Ajwal inya'om u'ij uch'amil i k'ijib'al ile.”
24I ma Moisés lik xukamulij ub'ixkil ile che ma Aarón, chke rak'al xaq chke konojel aj Israel.
Currently Selected:
Lev%EDtico 21: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala