Lev%EDtico 22
22
I ketijaw i sipon rajwaxik chi lik je ch'am chwach i Ajwal
1I Ajwal xlapan ru' ma Moisés, xub'ij che:
2Chab'ij che ma Aarón xaq chke rak'al chi lik chki'ana utz che i sipon chi o chila man sujtal chinwach Yin kumal aj Israel, man keje ile kqajsax ti u'ij i lo'laj inb'i. Yin in Ajwal xinb'ij iri.
3Chab'ij chke chi wo'or ni'pa i k-ek, xapachin chke i je ajsujul sipon chkixol i kimuq kixikin, we je ch'am taj are kkisujuj i sipon chinwach chi kik'amom li aj Israel chwe, saq laj tzij lik kwesaj ni che upatan. Yin in Ajwal xinb'ij iri.
4We o jun chke uk'ojol xaq we chke umuq uxikin ma Aarón, we o yob'il che tz'umalil xaq we to' kb'elel chik rijayil, lik utz ti uri kutij i sipon chi sujtal chwach i Ajwal, lik k'a k-on ni ch'am, te'uri utz kutijo.
Jun ajsujul sipon we xuyin jun b'iroxik ch'am taj rumal jun kamnaq, xaq we xuchap jun achi chi b'elelnaq rijayil, 5xaq we kuyin jun chikop chi kjukmay chwach ulew, o xaq we jun achi ch'am taj i kuyin jun chik achi chi ch'am, ku'an uri ch'am taj che, 6pachin kchapaw i achi le k-on tan chik ch'am taj, lik kkanaj ni uri chi ch'am taj k'a kok a'ab', rumali rajwaxik ku'an jun ch'am laj atinem re rawasil chi xu'an ch'am che rib' te'uri utz kutij i ch'am laj b'iroxik chi o u'ij. 7Are kok a'ab' te'uri k-on chik ch'am. Xaq k'a te'uri utz kutij i sipon chi lik ch'am, man ile lik are uwa. 8Lik utz taj kutij i ti'ij re kamnaq chikop xaq we antal ch'aqa taq che rumal jun itzel chikop, man we kutijo kkanaj uri ch'am taj. Yin in Ajwal xinb'ij iri.
9Chab'ij chke i wajpatan chi chki'ana pacha kub'ij in-atb'al tzij xaq memakun chwach i atb'al tzij le, man keje ile kekam taj. Man Yin in Ajwal je wesam re kin-an ch'am chke yab'al ki'ij.
10Mijun winaq we kachalal ti ajsujul sipon kutij i sipon chi lik o u'ij chi xaq lik elsam re i Ajwal, pacha la i rajposar xaq i rajchak i ajsujul sipon.
11Jun ajsujul sipon we kulo' jun winaq chi o pa k'ax pu'ab' i rajaw, i winaq le kutij uri ni'pa i o u'ij. Xaq ni'pa je alaxnaq chi rachoch i ajsujul sipon, utz kkitijo wach kutij ire.
12Jun umi'al ajsujul sipon we k'ulan ru' jun achi chi ajsujul sipon taj, lik utz ti uri kutij i sipon o u'ij chi xwi kya' chke i je ajsujul sipon. 13Xwiri we malkan chik, xaq we jachtalik, xaq we nti rak'al, xaq we x-e chik chi rachoch uqajaw pacha u'onom are k'a utukel, utz uri kutijo wach kutij uqajaw. Xwiri mijun kutijo we kalk'uwal ti ajsujul sipon.
14Jun we xutij i sipon o u'ij xwiri chu'anik taj xu'ano, rajwaxik uri kuya uk'exel che ajsujul sipon ni'pa unimal xutijo xaq kutoj chik juwinaq puwi i jutaq jo'winaq (100). 15Xwiri i je ajsujul sipon rajwaxik chi kkiya ti chke aj Israel chi kkiqajsaj u'ij i sipon o u'ij chi ksujux chwach i Ajwal. 16Man we kuya chke kkitij i sipon chi o u'ij, lik kkeqaj uri kimak. Yin in Ajwal in yawnaq u'ij i sipon le.
Wach rajwaxik are ksujux jun chikop chwach i Ajwal
17I Ajwal xlapan ru' ma Moisés, xub'ij che:
18Chatlapan ru' ma Aarón, ku' rak'al xaq ku' konojel aj Israel, chab'ij iri chke: Jun aj Israel o xaq we aj Israel taj chi je o chkixol, we kusujuj jun chikop chi poroxik re chwach i Ajwal, nti k-ono we ax usujum wi xaq we lik puk'ux kpe wi chi kuya'o, 19rajwaxik chi jun toro, o jun chij ma o xaq we jun chab'at ma chi lik klis taj man keje ile kk'am che rumal i Ajwal. 20Xwiri kkik'am ta li jun chikop we xa klis man kk'am ti chke rumal i Ajwal.
21Xapachin kusujuj jun sipon re riqb'al chomb'al ib' chwach i Ajwal, nti k-ono we ax usujum wi xaq we lik puk'ux kpe wi chi kuya'o, rajwaxik chi jun toro o jun chij, xwiri lik je klis taj man keje ile kk'am che rumal i Ajwal. 22Kkisujuj ti chikop chwach i Ajwal we xa mawach, we xa jetz', we nti jun raqan xaq we nti jun u'ab', we o sal chrij, we xa ch'ak rij, xaq we lik kewoxwat i ch'ak chrij, lik miporoj chwi sujb'al sipon re i Ajwal. 23Jun toro xaq we jun chij jech' raqan utz uri kuya pa re usipon chi lik puk'ux kpe wi, xwiri we lik ax usujum wi chik kk'ami ti uri che. 24Xaq misujuj jun chikop chwach i Ajwal we soktal che usaqmol, xaq we wach'talik o xaq we elsam usaqmol le. Ronojel ni'pa ile lik mi'an chila pitinimit. 25Xaq mik'am jun chikop pacha taq ile che jun winaq aj naj re taq uwa i-Dios yix, man Yin kink'am ti chikop we xa klis.
Wach rajwaxik che i chikop re kkamsaxik chi sujtalik
26I Ajwal xlapan ru' ma Moisés, xub'ij che:
27Are kalax jun ral me', jun ral chij xaq we jun ral chab'at, rajwaxik uri chi kkanaj ru' uchuch wuqub' ij, xwiri che uwajxaq ij ya kk'am chik re sipon chi kporox chwach i Ajwal.
28Mikamsaj jun ati chikop xaq we jun ati chij, xaqjun chi ij ru' rak'al.
29Are kisujuj jun sipon tioxb'al re chwach i Ajwal, chi'ana ni che chi lik kk'am ni chiwe rumal Ire. 30Xwi ta la ile, lik chitija b'i che i ij chi are kisujuj, xaq lik nti kik'ol kanoq re chukab' ij. Yin in Ajwal xinb'ij iri.
31Lik chi'ana pacha kub'ij intzij inpixab'. Yin in Ajwal xinb'ij iri.
32Miqajsaj u'ij i lo'laj inb'i, man keje ile koksax ni in-ij chixol yix chi ix aj Israel. Man Yin in Ajwal in yawnaq i'ij yix. 33Xaq Yin xixwesaj li pa Egipto man lik ki'an ni i-Dios chwe. Yin in Ajwal, xinb'ij iri.
Currently Selected:
Lev%EDtico 22: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala