Lev%EDtico 26
26
Utzil chomal pkiwi i kekojonik
1Mi'an taq i-dios che jun b'iroxik xaq mi'an taq uk'exwach jun b'iroxik che jun ab'aj miyak nimaq taq ab'aj pitinimit chi o u'ij iwumal, lik mixxuki taq chkiwach ile man Yin in Iwajwal Dios. 2Lik chiya u'ij i lo'laj ink'ijib'al, xaq i ij re uxlanb'al lik chikojo ni uri u'ij i Dios. Yin in Ajwal xinb'ij ile chiwe.
3We kixkojon che ronojel in-atb'al tzij xaq we lik ki'ano pacha kub'ij intzij inpixab', 4Yin kintaq na li uri i jab' chiwe pu'ijlal man keje ile i ulew xaq i jalajuj taq che' lik kewachin na. 5Xaq are ketijin chutikik i trigo, are kel chali uwach i uva xaq are ketijin tan chik chutikik i uva, are kel chali uwach i trigo; lik nti numik kitijo, lik kitij ni iwa k'a kixnoj na, rumali lik utz ni kitij yix pik'aslemal pitinimit. 6Kin-an ni chiwe chi utz kixk'iji pitinimit xaq lik utz waram ki'ano, man lik nti taq kixij iwib' che man Yin kewesaj nu b'i itzel taq chikop chwach ulew xaq kin-atij ni ch'oj. 7Yix kiwoqtaj nu b'i i je ajch'oj chiwij xaq kixtiki ni chkikamsaxik ru' ch'ich'. 8Jo'ob' chiwe yix kkoqtaj nu b'i je jo'winaq winaq xaq jo'winaq chiwe yix kkoqtaj nu b'i i je jo'mo' juchiy (10,000) winaq, keje ile kixtiki ni chkikamsaxik i je ajch'oj chiwij ru' ch'ich'. 9Yin lik kink'ut ni rutzil ink'ux chiwe xaq lik kin-an ni chiwe chi kixk'iyarik xaq lik kin-an na wach insujum chiwe. 10Lik are ni trigo kitijo chi ax ik'olom wi, xaq kiwesaj ne b'i puk'ijib'al rumal i k'ak' chi kik'ol tan chik.
11Yin lik kink'iji ni chixol xaq lik krix ti ink'ux chiwe; 12Yin lik arewi kin-e ni iwu', lik Yin in i-Dios xaq yix ix intinimit. 13Yin in Iwajwal Dios chi xixwesaj li pki'ab' aj Egipto chi ix o te'eq pa k'ax kumal xaq xwesaj i yuku rij iqul chi lik al te'eq kina'o xaq xin-an chiwe chi to' ti kilukukej ipalaj kixb'inik.
Atb'al tzij chke i je qelqel
14Xwiri we yix kixkojon ti chwe xaq kin-an taj pacha kub'ij ronojel intzij inpixab', 15we xa kixutuj xaq we xa kiqajsaj u'ij in-atb'al tzij xaq intaqanik i we ki'an taj pacha kub'ij intzij inpixab', xaq kiqel ronojel intrat. 16Yin kin-an uri iri chiwe yix: Kintaq na li jun nim laj xib'rikil piwi xaq ich'akul kutij ni jalajuj k'ax laj taq yob'il, a' tew, yob'il wachij, ch'akulaj chi to' kt'ub'ub'ik; lik nti kuya re chiwe chi kixtikanik man are i je ajch'oj chiwij ketijaw b'i uwach i tikon. 17Yin kin-an ni che wib' in ajch'oj chiwij xaq k-an ni tikilem chiwe kumal i je ajch'oj chiwij, lik kqajsax ni i'ij kumal ike chi ktitat kipam chiwe, xaq lik kix-anmaj na tupu nti jun kix-oqtawik.
18Xwiri we lik ru' ronojel ni'pa ile, lik xinikoj taj, lik ki'an ni uri chiwe chi wuqmul kinya chik utojb'alil imak chiwe. 19Lik kinqajsaj ni i'ij chi lik ki'an taq nim che iwib', kin-an ni che i kaj chi kuya ti chal i jab' piwi, xaq keje i ulew kuya ti chik ucho'ab' che itikon. 20Lik nti kuya re chiwe tupu kik'is taq icho'ab' pa chak, man i ulew lik nti kuya chiwe xaq i uche'lal echa' kuya ti chik uwach.
21Xaq we lik kinikoj taj, kimayij ti ile chi ki'an taj wach i kinb'ij chiwe yix chi xa kixqelanik, Yin kinya chik wuqmul utojb'alil imak piwi chrij wach taq imak i'anom. 22Keinkoj nu b'i itzel taq chikop chixol chi kkitij nu b'i iwak'al, kki'an ni ch'aqa taq chke ichikop xaq lik laj kixkik'is ni yix xaq lik nti jun winaq chi to' kb'in chik pa taq b'e.
23Xwiri we kixsuk'i ti ru' ronojel ni'pa kin-an ni chiwe le, xaq kita ti ub'e wach kinb'ij Yin chiwe, lik arewi kinikoj taj, 24Xaq keje uri Yin kinch'ojin ni chiwij, xaq kinya chik uri wuqmul utojb'alil imak piwi. 25Yin kin-an ni chke i je ajch'oj chiwij chi kixkikamsaj ni ru' ch'ich' rumal xiqel intrat. Are uri yix kix-anmaj b'i pitinimit chuto'ik iwib', are uri Yin kinya na li jun yob'il piwi man keje ile kixtzaq ni pki'ab' i je ajch'oj chiwij.
26Xaq kin-an ni chiwe chi kixu'on ti wach i kitijo, man lajuj ixoqib' kkicha'saj ni i wa re trigo chupam jun orno, xaq kkiya ni iwe yix xwiri lik kixnoj taj.
27Xaq we lik kinikoj ti ru' ronojel ni'pa xinb'ij chiwe chi kin-ano le, xaq lik arewi kinikoj taj, 28xaq keje Yin kinch'ojin ni chiwij, xaq ru' ni woywal kinya chik wuqmul utojb'alil imak piwi. 29Xwi ta la ile, xaq lik kitij nu b'i kiti'lal iwak'al alab'om xaq altom. 30Yin kinwulijsaj ni lo'laj k'ijib'al ke itiox ipa kimol wi iwib' xaq kinmut ni sujb'al isipon re pom pa nik'aj, kint'ub'a ni ronojel ich'akul pkiwi itiox chi nti kik'aslemal, xaq lik kink'ut ni chiwe chi tzel kixwilo, 31kinwulijsaj ni itinimit, xaq kinwulijsaj ni lo'laj k'ijib'al ke i tiox man tzel kinsiq ruxlab' isipon.
32Lik kin-an ni che itinimit pacha jun tz'inilik jyub' chaqij, i je ajch'oj chiwij are kek'un pa jeqelem chwach, lik ke'ok ni il are kkil ile. 33Kixinkichersaj nu b'i chkixol i jalajuj taq tinimit, xaq ru' ch'ich' kixwoqtaj na, ronojel ulew re i tinimit kkanaj na pacha jun tz'inilik jyub' chaqij xaq ni'pa taq itinimit ksach ni uri uwach. 34Man keje ile i ulew kkikot na man kuxlan ni ronojel i junab' chi nti winaq chwach, tz'aqat yix ix o pkitinimit i winaq chi je ajch'oj chiwij; keje ile kuxlan ni ulew xaq kkikot na man lik uxlannaq taj.
35Ronojel i junab' are lik tz'inil i ulew le lik kuxlan na. Man yix are ix o te'eq chwach, lik uxlannaq taj.
36I jub'an chi kek'asi kan chixol, lik nim ni xib'rikil kinpetsaj pkiwi chi je o pa jalajuj taq tinimit ke je ajch'oj chkij, lik ke'anmaj ne xa rumal jun uxaq che' chi ktzaq li rumal i tew. Lik ke'anmaj na pacha taq je oqtam ru' ch'ich' xaq kejab' laj ni pa taq ulew tupu nti ke'oqtawik, 37Kixa' ni iwib' chiwach pacha taq kix-anmaj chwach jun nim laj ch'oj tupu nti jun kix-oqtawik; mijun chiwe yix kutak'b'a rib' chkiwach je ajch'oj chiwij. 38Lik ksachsax ni iwach pa nimaq taq tinimit, konojel ni'pa i kiwinaq i je ajch'oj chiwij lik kixkikamsaj na. 39Xwiri i jub'an chi k'a xek'asi kanoq, rumal ni kimak ike, xaq rumal kimak kiqajaw kichuch kekam ni pkitinimit i je ajch'oj chkij.
40Yix tupu kiya iwib' chupam imak xaq tupu kiwuwaj ti uwach kimak iqajaw ichuch, xaq tupu kiya iwib' chupam chi ix qelqel xaq tupu kiya iwib' chupam chi kixch'ojin chwij, 41Yin lik kinch'ojin ni chiwij yix, kixink'am nu b'i pkitinimit i winaq chi je ajch'oj chiwij, are ix o chik chila i ch'am ti laj inojb'al le lik kqajsax ni u'ij xaq kitoj ni ronojel imak, 42are uri kk'un ni intrat chink'ux chi xin-an ru' mam Jacob, ru' mam Isaac, ru' mam Abraham, xaq kk'un ni ulew uri chink'ux, 43i ulew lik kkanaj ni utukel iwumal yix xaq lik kkikot na, kuxlanik tz'aqat ix nti tan yix chwach. Xwiri yix lik kitoj ni imak man xiqel intaqanik, xaq iwanima yix xuqel in-atb'al tzij.
44Tupu ix o pkitinimit, i je ajch'oj chiwij, kixwo'taj taj xaq tzel ti kixwilo, kinchup ti iwach xaq kinramtaj ti che i trat chi xin-an ku' iwatit imam, man Yin in Iwajwal Dios. 45Are kin-ano kk'un ni i trat chink'ux chi xin-an ku' iwatit imam, are xewesaj li pa Egipto xin-an ile chkiwach nimaq taq tinimit man kki'an ki-Dios chwe. Yin in Ajwal Dios xinb'ij iri.
46Are i atb'al tzij ile, taqanik xaq i k'utunik chi xuya i Ajwal che ma Moisés chila tzam jyub' Sinaí, chi lik are jun trat xu'an i Dios ku' aj Israel.
Currently Selected:
Lev%EDtico 26: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala