Lev%EDtico 27
27
B'iroxik chi je jachtal pu'ab' i Dios
1I Ajwal xlapan ru' ma Moisés, xub'ij che:
2Chab'ij iri chke aj Israel: Jun we ku'an usujunik chwach i Dios, lik kutoj ni uri chrij pacha rajil jun winaq, 3keje u'anik iri k-an che: Jun achi we o juwinaq (20) junab' che kupon k'a che oxwinaq (60) junab' ktoj ni uri lajuj kawinaq (50) saqpwaq, chrij pacha i pajb'al chi o pa lo'laj k'ijib'al re i Dios. 4Xwiri we ixoq chi xaq keje ujunab' ile xa lajuj juwinaq (30) saqpwaq uri ktojik. 5Jun ala we o chik jo'ob' junab' che kupon k'a che i juwinaq junab' ktoj ni uri juwinaq (20) saqpwaq, xwiri we i ali chi xaq keje ujunab' ile xa lajuj saqpwaq uri ktojik. 6Jun ral ala we o chik jun ik' che kupon k'a che jo'ob' junab' ktoj ni uri jo'ob' saqpwaq, xwiri we ral ali xa oxib' saqpwaq uri ktojik. 7Jun mam we ik'awnaq chik oxwinaq (60) junab' che ktoj ni uri jo'lajuj saqpwaq xwiri we tit chi xaq ik'awnaq chik oxwinaq (60) junab' xa lajuj saqpwaq uri ktojik. 8Xwiri we nib'a' i winaq lik ktiki ti chutojik i rajil chi b'italik, kk'am b'i uri chwach i ajsujul sipon man ire kuqajsaj li uri i rajil uk'as chrij ni'pa ktiki i nib'a' chutojik.
9Wo'or we chikop ksujuxik, ronojel ni'pa chikop chi ksujux uri chwach i Ajwal lik ke'eloq uri chi jachtal che Ire, 10lik kjalwachix ti chik uri chwach jun chik chikop tupu lik chom xaq we chom taj. Xwiri we xjalwachix i chikop chi sujtalik xaq i jun chik chi xya' puk'exel, lik chekeb' uri jachtal pu'ab' i Dios.
11Xwiri we jun ch'am ti laj chikop chi utz taj ksujux chwach i Ajwal kk'am b'i uri chwach i ajsujul sipon, 12man are ire kb'iw na ni'pa taq rajil i chikop le chrij uchomal. I rajil chi kub'ij i ajsujul sipon le lik are ni rajil ile kkanajik. 13We rajaw i chikop le kraj kuk'am chik uchikop, kutoj juwinaq puwi i jutaq jo'winaq (100) chrij pacha i rajil.
14Jun we kujach rachoch pu'ab' i Ajwal, are i ajsujul sipon kukoj rajil uri chrij pacha uchomal i ja, i rajil i ja chi kukoj ajsujul sipon lik are rajil uri ile kkanajik. 15Xwiri i rajaw i ja le we kraj kuk'am chik, kutoj juwinaq puwi i jutaq jo'winaq (100) chrij pacha i rajil chi xub'ij i ajpatan, i ja ku'an chik re ire.
16Jun we kujach jub'i' rulew pu'ab' i Ajwal, i ulew le koksax jun rajil chrij ni'pa kuya'o, lajuj kawinaq (50) saqpwaq kutoj che i 660 ral taq k'ox cebada chi olik. 17Jun we kujach rulew pu'ab' i Ajwal che i junab' re i o'tanik, kutoj uri rajil chrij pacha b'italik. 18Xwiri we kujach pu'ab' i Ajwal chrijil chik i junab' re i o'tanik, i ajsujul sipon kub'ij uri ni'pa rajil kutojo chrij ni'pa junab' chi k'amaja kuriqa i junab' re i o'tanik lik kuqajsaj li rajil.
19I jun chi xujach rulew pu'ab' i Ajwal xwiri we kraj kuk'am tan chik, kutoj juwinaq puwi i jutaq jo'winaq (100) chrij pacha i rajil chi xub'ij i ajpatan, i ulew ku'an chik re ire. 20Xwiri we xtiki ti chik chuk'amik xaq i ulew we xk'ayix che jun chik winaq, we k'a kraj tan chik ulo'ik, kya'ix ti chik uri che. 21Are kuriqa tan chik i junab' re i o'tanik; i ulew le lik kjach uri pu'ab' i Ajwal xaq kkanaj uri pu'ab' i ajsujul sipon.
22We o jun kujach rulew pu'ab' i Ajwal chi ulo'om ru' umer, chi yatal ti che kumal uqajaw uchuch, 23i ajsujul sipon kub'ij ni uri ni'pa rajil i ulew le kutojo chrij ni'pa junab' k'amaja kuriqa i junab' re i o'tanik, i lok'anij lik che i ij le kutoj i rajil ulew le chi xub'ij ajsujul sipon, te'uri kujach i mer le pu'ab' i Ajwal. 24Are kuriqa i junab' re i o'tanik i ulew ktzalij chik uri pu'ab' i xk'ayiwik, ke'eloq chi lik kkanaj chik pu'ab' i mer rajaw.
25Ronojel ni'pa i rajil chi ktojik rajwaxik chrij pacha i pajb'al chi o pa lo'laj k'ijib'al re i Dios, chi julajuj gramo o che jun saqpwaq.
26Konojel i nab'e taq kak'al i chikop, lik je re i Ajwal, rumali rajwaxik ti chik kejach pu'ab', tupu we chij xaq we chikop. 27Xwiri we are jun chikop chi ch'am taj, k-ani uri tikilem che kik'am b'ik chrij pacha i rajil chi kb'ixik, kutoj juwinaq puwi i jutaq jo'winaq (100) chrij pacha i rajil chi xub'ij i ajsujul sipon, xwiri we kik'am taj, kk'ayix uri che i rajil chi b'italik.
28Jun we kujach ub'itaq re pu'ab' i Ajwal, nti k-ono we winaq, chikop xaq we ulew chi yatal kan che kumal uqajaw uchuch, ronojel ni'pa sujtal pu'ab' i Dios utz taj kk'ayixik xaq we kk'am chik, man ronojel ni'pa jachtal pu'ab' i Dios lik are jun b'iroxik chi lik ch'am chi lik jachtal che Ire. 29Xaq mijun winaq chi k'oqtal chik re i kamik, k-ani taq tikilem che chi kelsax chwach i kamik.
30Ronojel ni'pa kuya i ulew are kpe uwach ija ch'irajil, are kpe uwach i che' re i echa', kelsax jun che i lajuj, kjach ni pu'ab' i Ajwal man lik re ire. 31Jun we kraj kuk'am chik jub'i' che i lajuj mutzaj chi xuya che i Ajwal, kutoj juwinaq puwi i jutaq jo'winaq (100) chrij pacha i rajil.
32Kk'am jujun chke i lajuj taq chikop, xab'i chi chikopil lik kejach ni pu'ab' i Ajwal, pacha sipon lajuj. 33Lik k-uli ti kipam i chikop tupu je chomiq xaq we je chomiq taj, xaq mijun chikop kjalwachix chwach jun chik chikop we ya xsujuxik, we kuk'ulmaj i jalwachinik le chekeb' chikop uri, kekanaj kan pu'ab' i Ajwal, rumali kya' ti chik we ke'elsax li chekeb'.
34Are utzij upixab' i Ajwal ile chi xuya che ma Moisés chila puwi i jyub' Sinaí, ke aj Israel.
Currently Selected:
Lev%EDtico 27: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala