N%FAmeros 1
1
Kajlaxik aj Israel chila Sinaí
1I Ajwal xlapan ru' ma Moisés pa ja re riqb'al ib' ru' i Dios chila pa tz'inilik jyub' chaqij Sinaí, che i nab'e ij re ukab' ik' re ukab' junab', chrijil chik i kelik li aj Israel pa Egipto. Xub'ij che:
2Cheiwajlaj konojel aj Israel pa taq tzob'ajil xaq pa taq alk'uwalil man keje ile ketamaxik wach kib'i xaq ketamaxik je ni'pa achiyab' konojel. 3Chab'ij che ma Aarón chi katuto chkajlaxik xaq chutz'ib'axik kib'i konojel i achiyab', chi o chik juwinaq junab' chke chi je yij che i ch'oj. 4Rajwaxik chi o ni jun aj-atzil chke i alk'uwalil, keje ile chke konojel i tzob'ajil aj Israel. 5Are kib'i aj-atzil iri chi rajwaxik kixkito na:
Ma Elisur chi uk'ojol ma Sedeur ke utzob'ajil ma Rubén.
6Ma Selumiel chi uk'ojol ma Zurisadai ke utzob'ajil ma Simeón.
7Ma Naasón chi uk'ojol ma Aminadab ke utzob'ajil ma Judá.
8Ma Natanael chi uk'ojol ma Zuar ke utzob'ajil ma Isacar.
9Ma Eliab chi uk'ojol ma Helón ke utzob'ajil ma Zabulón.
10Ma Elisama chi uk'ojol ma Amiud ke utzob'ajil ma Efraín chi uk'ojol ma José; ma Gamaliel chi uk'ojol ma Pedasur ke utzob'ajil ma Manasés.
11Ma Abidán chi uk'ojol ma Gedeoni ke utzob'ajil ma Benjamín.
12Ma Ahiezer chi uk'ojol ma Amisadai ke utzob'ajil ma Dan.
13Ma Pagiel chi uk'ojol ma Ocrán ke utzob'ajil ma Aser.
14Ma Eliasaf chi uk'ojol ma Deuel ke utzob'ajil ma Gad.
15Ma Ahira chi uk'ojol ma Enán ke utzob'ajil ma Neftalí.
16Are aj-atzil ile chke i jutaq tzob'aj chi xe'ul chkixol aj Israel man chkijujunal kkok'aj utzam kitzob'ajil. 17-18Che i nab'e ij re ukab' ik' re i junab' le, i ma Moisés xaq i ma Aarón xkimol kichi' achiyab' chi xe'ul rumal i Dios chkixol aj Israel, chkijujunal pa taq tzob'ajil xaq pa taq alk'uwalil xtz'ib'ax kib'i man keje ile ketamaxik je ni'pa achiyab' chi o chik juwinaq (20) junab' chke. 19I ajlanik le x-an chila che i tz'inilik jyub' chaqij chi Sinaí ub'i, chrij pacha xub'ij i Ajwal che ma Moisés.
20-21Are xutzin u'anik i ajlanik pa taq lemajil, pa taq tzob'ajil, pa taq alk'uwalil, pa taq jujunal xtz'ib'ax kib'i, konojel achiyab' chi o chik juwinaq (20) junab' chke, uk'iyal xe'eloq are iri:
Che ulemajil ma Rubén chi nab'e rak'al ma Israel, je jo'winaq waqlajujmo' jo'chiy (46,500) achiyab' chi je utz chik re i ch'oj.
22-23Che ulemajil ma Simeón xe'ajlax, jo'winaq wajxaqmo' wuqchiy (59,300) achiyab'.
24-25Che ulemajil ma Gad xe'ajlax, lajuj kawinaq kajlajujmo' jo'chiy (45,650) achiyab'.
26-27Che ulemajil ma Judá xe'ajlax, lajujwinaq waqmo' b'elejchiy (74,600) achiyab'.
28-29Che ulemajil ma Isacar xe'ajlax, waqlajujmo' waqchiy (54,400) achiyab'.
30-31Che ulemajil ma Zabulón xe'ajlax, lajujwinaq oxmo' wuqchiy (57,400) achiyab'.
32-35Che ulemajil ma José xe'ajlax jo'winaq jumo' jo'chiy (40,500) achiyab' chi je re ulemajil ma Efraín, xaq xe'ajlax lajujwinaq kajchiy (32,200) achiyab' re ulemajil ma Manasés.
36-37Che ulemajil ma Benjamín xe'ajlax lajujwinaq wajxaqmo' kajchiy (35,400) achiyab'.
38-39Che ulemajil ma Dan xe'ajlax jo'lajujwinaq waqlajujmo' wuqchiy (62,700) achiyab'.
40-41Che ulemajil ma Aser xe'ajlax jo'lajujwinaq oxmo' jo'chiy (41,500) achiyab'.
42-43Che ulemajil ma Neftalí xe'ajlax lajujwinaq oxlajujmo' waqchiy (53,400) achiyab'.
44Are xetamax ile are xe'ajlax konojel aj Israel rumal ma Moisés xaq rumal ma Aarón, xaq kumal i kab'lajuj kaj-atzil aj Israel chi je are ike keok'aw utzam chke kitzob'ajil xaq i kalk'uwal. 45Konojel i achiyab' chi o chik juwinaq (20) junab' chke chi je utz chik che i ch'oj, 46i kik'iyal i winaq xe'eloq konojel, je lajuj wuqlajujwinaq wajxaqmo' jo'lajujchiy oxt'ub' (603,550)
Uya'ik Kipatan aj Leví
47I aj Leví xe'ajlax ti chkixol i lemajil ke i katit kimam, 48Man i Ajwal ub'im che ma Moisés: 49Are keawajlaj konojel aj Israel keawajlaj tu b'i ulemajil ma Leví. 50I aj Leví rajwaxik kaya chkiqul u'anik i chak pa ja re riqb'al ib' ru' i Dios chila ipa o wi intrat, xaq are ike o chkiqul ronojel ni'pa i chapb'al chi o chila pa lo'laj k'ijib'al re i Dios. Xaq je are ike ke'atsaw i ja re riqb'al ib' ru' i Dios, xaq je are kek'amaw nu b'i ronojel ni'pa o chila pa ja le, kki'an ni kimujb'al chrij chwach i ja re riqb'al ib' ru' i Dios. 51Are ke'e chik che jun k'ijib'al, are ike uri ketorow b'i i ja re riqb'al ib' ru' i Dios xaq are ike keyijb'aw chik are keupon che i k'ijib'al le. Jun winaq chi aj Leví taj, we ktejeb' ru' i ja re riqb'al ib' ru' i Dios le, saq laj tzij, lik kkam na. 52I jub'an chik aj Israel kkok'aj ni kib' pa taq tzob'ajil, pacha kki'an achiyab' chi je yij che i ch'oj, chkijujunal chila pa kik'ijib'al, chuxe' i k'ul chi kuk'ut u'ij jun tzob'aj. 53Konojel aj Leví kki'an ni kimujb'al chrij chwach i ja re riqb'al ib' ru' i Dios re intrat xaq re chajb'al re, man keje ile i Ajwal kpe ti roywal chke aj Israel.
54I aj Israel xki'an ronojel chrij pacha xub'ij i Ajwal che ma Moisés.
Currently Selected:
N%FAmeros 1: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala