N%FAmeros 11
11
I Ajwal xub'ij chi kuya ti'ij chke aj Israel
1Xuk'ulmaj jun ij chi aj Israel k'ax xech'aw chrij i Ajwal rumal uyej chi je o chupam chila. I Ajwal are xeuta lik xpe roywal chke, rumali xutaq li a' pkiwi chi xtoqow pan chkij chkiwach. 2Are uri aj Israel xesik'in chutz'onoxik kitob'al che ma Moisés, rumali i ma Moisés le xutz'onoj tob'al ke che i Ajwal. Are uri juntir xchup i a' le. 3Rumali i k'ijib'al le xya' pub'i Tabera, man chila xtoqow wi a' re i Ajwal chkij ike.
4Chkixol aj Israel le je o k'iyal taq kiwach winaq, rumali utz ti ki'anoj man xwi kkich'ob' wa'im. Xaq aj Israel xkiya kiwach ku', xe'ok taq che o'ej xaq xkib'ij: “¡Wetene o taq ti'ij waral, kqatij neri! 5¡Lik kk'un chqak'ux are kqatij te'eq i kar chila pa Egipto chi lik kqalo' taj! Xaq are kqatij te'eq i pepino, melón, puerros, sib'oy xaq i axux. 6Xwiri wo'or lik ya kojkam rumal numik, lik rixnaq chik qak'ux chutijawik i maná, man nti chik jun b'iroxik olik, xwi ile”; xecha.
7I maná le lik laj keje unimal pacha ub'a' i kulantr xwiri an-o'oj ktzunik pacha i uwa'al kab', 8i ujelal i maná le laj keje pacha i chok'ok' chi susam aceite chrij. I aj Israel ke'el chumolik, kkijok'o we ntaj kkiwach'wa te'uri kkicha'saj pacha ucha'saxik i wa re trigo kki'an che. 9Are kqaj uxaq k'aj cha'ab' puwi i k'ijib'al ipa je o wi aj Israel le, xaq are uri kqaj i maná.
10I ma Moisés xuta chi aj Israel xaq i kalk'uwal ke'o' xol taq uchija re i kachoch. Are uri i Ajwal lik xpe roywal chke; xaq i ma Moisés lik utz taj xrilo. 11Rumali xub'ij che i Ajwal:
—¿B'uchak in aya'om pa k'ax man yin awajchak? ¿Wach awoywal o chwe chi aya'om jun nim laj eqani chinqul chi je are konojel i winaqi? 12¿Xatab'a yin in kiqajaw xaq in kichuch man kinataq taq che chi kein-aluj b'ik pacha taq je ak'alab' chi k'a ketz'umanik, man keinya k'a chwach ulew chi asujum chke i katit kimam? 13¿Ipa taq wa kink'ama wi yin k'iyal taq ti'ij re kinya chke konojel i winaq le? Man ike lik ke'o' chutz'onoxik chwe yin, kkib'ij: “Chaya qati' re kqatijo”; kecha. 14Yin intukel kintiki ti chik chrok'axik utzam chke konojel i winaq le; ile lik jun nim laj eqan chwe yin chi kinch'ij ti chik rok'axik. 15We keje ile ka'an chwe ni'pa k-ek, su' chawesaji ink'aslemal, we lik qatzij chi k'ax kinana'o. Man keje ile kintij ti chik i jalajuj taq uyej ku' i winaq le; xcha.
16Xwiri i Ajwal xub'ij che ma Moisés:
—Chamolo kichi' lajuj oxwinaq (70) nimaq taq winaq chkixol aj Israel, chi aweta'am yet ketiki chrok'axik utzam chke jutzob'aj winaq, cheak'ama li che i k'ijib'al ipa o wi i ja re riqb'al ib' ru' i Dios xaq chkoy-ej ni chila awu'. 17Man Yin kinqaj nu b'i che i lapanik awu', xaq kink'am ni jub'i' intewal chi inya'om chawe re kinya ni chke ike man chkich'ija jub'i' ke awu' pacha ach'ijom yet ku' i winaq, keje uri ile atukel taj at olik. 18Te'uri keataq i winaq chu'anik ch'am che kib' re chweq, man kkitij ni ti'ij. Intom chik chi ke'o' chub'ixkil iri: “¡Wetene o taq ti'ij waral kqatij neri! ¡Lik utz te'eq qa'anom chila pa Egipto!” Xecha. Rumali yin kinya ni ti'ij chke re kkitijo. 19Xwiri xa jun ij taj, xa keb' ij taj, xa jo'ob' ij taj, xa lajuj ij taj xaq xa juwinaq (20) ij taj. 20Lik jun ik' na ti'ij kkitijo, k'a are to' kel chal pkitzam xaq are to' kmuluw chik kik'ux che, man xinkixutuj Yin chi in Kajwal chi in o chkixol, xaq xe'o' chub'ixkil chinwach: “¿Wach uchak xojel li pa Egipto?” Xecha. Xub'ij i Ajwal che ma Moisés.
21Are uri ma Moisés xub'ij che i Ajwal:
—I winaq chi je petnaq wu' chaqan je jo'lajujchiy oxt'ub' (600,000) achiyab', ¿I yet kab'ij chi jun ik' kaya i ti'ij chqe re kqatijo? 22¿Ipa taq wa je o wi k'iyal taq chij xaq k'iyal taq chikop re kekamsax chke man keje ile Ke'on konojel? Xaq tupu kya' konojel i kar chke chi je o pa mar, ¿Ke'on taj?
23Are uri i Ajwal xub'ij che ma Moisés: ¿Kach'ob' yet chi xa pich' incho'ab'? Wo'or ut kawilo we k-antajik xaq we k-antaj taj pacha xinb'ij le; xcha.
Lajuj oxwinaq (70) nimaq taq winaq kelapanik pacha je profeta
24I ma Moisés x-e chub'ixkil chke i winaq ronojel ni'pa xb'ix che rumal i Ajwal; are uri xumol kichi' lajuj oxwinaq (70) nimaq taq winaq chkixol aj Israel, xeutus chrij chwach i ja re i molb'al ib'. 25Are uri i Ajwal xqaj pa sutz', xlapan ru' ma Moisés; are uri xuk'am jub'i' che utewal chi o puwi ma Moisés xuya pkiwi i lajuj oxwinaq (70) nimaq taq winaq le. Are xyataj tan jub'i' tewal chke i nimaq taq winaq, su' xkijeq lapanik pacha je profeta; xwiri ile xuk'ulmaj ti chik.
26Keb' chke achiyab' chi je kachi'il i lajuj oxwinaq (70) chi je chatalik xe'e ti ku' kachi'il chi xetus chrij chwach i ja re i molb'al ib', ike xekanaj kan pa k'ijib'al ipa je o wi, ike le je are: Ma Eldad xaq i ma Medad, xwiri xaq xqaj i tewal pkiwi ike, xaq su' xkijeq lapanik pacha je profeta chila ipa je o wi. 27Are uri jun ala x-e la pa'anem chub'ixkil che ma Moisés:
—¡I ma Eldad xaq ma Medad ketijin che i lapanik pacha je profeta chila pa k'ijib'al ipa je o wi! —Xcha.
28Are uri ma Josué, chi uk'ojol ma Nun, chi lik chi rak'alil loq ujeqom uto'ik ma Moisés, xub'ij:
—¡Nim laj winaq ma Moisés, chea'atij chu'anik ile! —Xcha.
29Xwiri ma Moisés xub'ij che:
—¿Kpe awoywal yet che ile, chi yin ti kin-anawik? ¡Kwaj ne yin wetene i Ajwal kuya utewal chke konojel utinimit xaq konojel keu'on profeta! —Xcha.
30Are uri ma Moisés xaq konojel i nimaq taq winaq aj Israel xetzalij chik pa kik'ijib'al ipa je o wi te'eq.
Kitaqik li kokox rumal i Ajwal
31I Ajwal xupetsaj jun nim laj tew chwi mar chi xuk'am li k'iyal taq kokox, chi xetzaq chila che i k'ijib'al ipa je o wi aj Israel xaq chkij chkiwach, chi xnoj uwach ulew chi jun ij b'e unajtil xtani wi kichi' i kokox chrij chwach i k'ijib'al le, chi xaq nik'aj xik'ab' ru' juripaj ab'aj kipimol chwach ulew. 32Keb' ij xaq jun a'ab' xkich'ij i winaq chkimolik i kokox le. I jujun chi xa jub'i' xkimolo, lajuj t'ub'aj kokox xetiki chumolik, are uri xkisa chwa ij chrij chwach i k'ijib'al ipa je o wi. 33Lik k'atene ketijin chutijawik i ti'ij kokox are uri i Ajwal xpe jun nim laj roywal chke, rumali xuya utojb'alil chke ru' jun yob'il chi lik k'i xukamsaj chke. 34Rumali xya' pub'i i k'ijib'al le Kibrot-hataava, man chila xemuq wi i winaq chi xwi xkich'ob' utzuqik kib'.
35Xe'el chila che i Kibrot-hataava, xkimaj chub'i kib'e xeupon k'a Hazerot, chila xek'iji wi.
Currently Selected:
N%FAmeros 11: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala