N%FAmeros 10
10
Trompeta saq-o'oj
1I Ajwal xlapan ru' ma Moisés, xub'ij che:
2Cha'ana keb' trompeta chi lik saq-o'oj, ru' ch'ayb'al kayijb'a wi, man kuriq uchak chawe re kaxut'ij molb'al ke i winaq, xaq kuriq uchak chawe are kimaj chub'i ib'e. 3Are kxut'ix i keb' trompeta, rajwaxik chi konojel i winaq kkimol ni kib' chawach chila pa okb'al che i ja re riqb'al ib' ru' i Dios. 4Xwiri are xa jun trompeta kxut'ixik xwi i aj-atzil uri ke i jalajuj taq tzob'aj aj Israel, kkimol ni kib' awu'. 5Are kxut'ix i trompeta xaq rachnimam ko laj taq sik', are k'utb'al re uri chi konojel aj Israel chi je o prelb'al ij kkimaj chub'i kib'e. 6Are kxut'ix i trompeta ukamul, are uri kkimaj chub'i kib'e ni'pa je o pa wiqab'. Are kxut'ix i trompeta chi xaq lik ko kesik'in ru' are k'utb'al re uri chi kewalij b'i konojel i winaq. 7Are xwi jun xut' k-ani che i trompeta are k'utb'al re uri chi konojel i winaq kkimol ni kib'. 8Je are uk'ojol ma Aarón chi ajsujul sipon kexut'iw i trompeta le. Ile lik are jun atb'al tzij chi ronojel ij saq uwach chiwe yix xaq chke imuq ixikin.
9Are kek'un ajch'oj chu'anik ch'oj chiwij chwach iwulew, rajwaxik uri chi yix ki'an ni ch'oj chkij ike le. Xwiri rajwaxik chi kixut'ij i trompeta xaq ko chixsik'inoq man keje ile, Yin chi in i-Dios yix kixk'un ni chink'ux, kixinto na xaq kixwesaj ni pki'ab' ajch'oj chiwij. 10Xaq kixut'ij i trompeta are ki'an i nima'ij chi inch'ikom, xaq kixut'ij i trompeta are kiporoj i sipon, xaq are kisujuj i sipon re chomb'al ib' chinwach Yin xaq are muqul ik', man keje ile kixk'un ni chink'ux. Yin in Ajwal xinb'ij ile chiwe.
Kelik aj Israel chila Sinaí
11Che i ij juwinaq (20) re ukab' ik' che ukab' junab' xwalij i sutz' puwi i ja re riqb'al ib' ru' i Dios. 12Are uri aj Israel xe'el chila pa tz'inilik jyub' chaqij Sinaí, xkimaj chub'i kib'e xe'e pa tz'inilik jyub' chaqij Parán, man chila xtak'i wi i sutz'. 13Lik pacha xub'ij i Ajwal che ma Moisés. 14Xenab'ej b'i achiyab' chi je yij che i ch'oj chi je o chuxe' i k'ul chi kuk'ut ki'ij i tzob'aj re ma Judá. I kaj-atzil ike le are ma Naasón, chi uk'ojol ma Aminadab. 15Are ma Natanael, chi uk'ojol ma Zuar, nab'e chkiwach i achiyab' chi je yij che i ch'oj re utzob'ajil ma Isacar. 16Are ma Eliab, chi uk'ojol ma Helón, nab'e chkiwach i achiyab' chi je yij che i ch'oj re utzob'ajil ma Zabulón. 17Are tortal chik i lo'laj k'ijib'al re i Dios, are uri i je uk'ojol ma Gersón xaq i je uk'ojol ma Merari chi je are ike o chkiqul uk'amik b'i ronojel ile, xkik'am b'ik xaq xkimaj b'i kib'e.
18Te'uri xeterej b'i achiyab' chi je yij che i ch'oj chi je o chuxe' i k'ul chi kuk'ut ki'ij i utzob'aj ma Rubén, i kaj-atzil ike le are ma Elisur chi uk'ojol ma Sedeur. 19Are ma Selumiel, chi uk'ojol ma Zurisadai, nab'e chkiwach i achiyab' chi je yij che i ch'oj re utzob'ajil ma Simeón. 20Are ma Eliasaf, chi uk'ojol ma Deuel, nab'e chkiwach i achiyab' chi je yij che i ch'oj re utzob'ajil ma Gad. 21Chkij chik ike le je teren b'i rak'al ma Coat chi je k'amawnaq b'i jalajuj taq chapb'al chi o u'ij. Are keupon i rak'al ma Coat le, lik yij chik i lo'laj k'ijib'al re i Dios.
22Te'uri xeterej b'i achiyab' chi je yij che i ch'oj chi je o chuxe' i k'ul chi kuk'ut ki'ij i utzob'aj ma Efraín. I kaj-atzil ike le are ma Elisama, chi uk'ojol ma Amiud. 23Are ma Gamaliel, chi uk'ojol ma Pedasur, nab'e chkiwach i achiyab' chi je yij che i ch'oj re utzob'ajil ma Manasés. 24Are ma Abidán, chi uk'ojol ma Gedeoni, nab'e chkiwach i achiyab' chi je yij che i ch'oj re utzob'ajil ma Benjamín.
25Pa k'isb'al re xeterej chub'i jub'an achiyab' chi je yij che i ch'oj chi je o chuxe' i k'ul chi kuk'ut ki'ij i utzob'aj ma Dan. I kaj-atzil ike le are ma Ahiezer, chi uk'ojol ma Amisadai. 26Are ma Pagiel chi uk'ojol ma Ocrán nab'e chkiwach i achiyab' chi je yij che i ch'oj re utzob'ajil ma Aser. 27Are ma Ahira, chi uk'ojol ma Enán, nab'e chkiwach i achiyab' chi je yij che i ch'oj re utzob'ajil ma Neftalí.
28Keje kicholik aj Israel ile x-anik chi are i achiyab' chi je yij che i ch'oj are kkimaj b'i kib'e.
Ma Moisés kusik'ij b'i ub'aluk ku'
29O jun ij chi ma Moisés xub'ij che ub'aluk chi are ma Hobab, chi uk'ojol ma Ragüel aj Madián:
—Yoj koj-e chwach ulew chi usujum i Ajwal chqe. Jo' qu', yoj lik k'ax ni katqana'o man i Ajwal ub'im chi lik k'ax keuna aj Israel.
30I ma Hobab xub'ij che ma Moisés:
—Kin-e taj, man kwaj kintzalij chik chwach wulew ipa je o wi walk'uwal.
31I ma Moisés xub'ij chik che:
—Kuyu inmak ta, mojawo'taj kanoq, man Yet lik aweta'am upam i tz'inilik jyub' chaqij ipa kojuxlan wi. Lik Yet neri katk'amaw b'e chqawach. 32We kat-e qu' yoj, kqajach uri chqawach ronojel i utz chi kuya i Ajwal chqe —xcha.
33I aj Israel xe'el chila tzam jyub' re i Ajwal, xkimaj b'i kib'e, oxib' ij xeb'inik, nab'e i kaxa re utrat i Ajwal chkiwach, kutzukuj ipa ke'uxlan wi. 34Are pa'ij xaq are k'ate kkijeq i b'e, i sutz' re i Ajwal o pkiwi aj Israel are keb'inik. 35Arewi are kwalij b'i ukaxa i Ajwal, i ma Moisés kub'ij i tziji:
“¡Chatwalijoq, Ajwal!
¡Chekicher nu b'i i ajch'oj chawij!
¡Che'anmaj ni chawach ni'pa ktitat kipam chawe are kkil awach!”
36Xwiri are ktak'i ukaxa i Ajwal, i ma Moisés kub'ij i tziji:
“¡Ajwal, chattzalij chal
chkixol i k'iyal taq aj Israel!”
Currently Selected:
N%FAmeros 10: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala