N%FAmeros 9
9
I nima'ij re i Pascua
1Are xel jun junab' kelik li aj Israel pa Egipto, che i nab'e ik' re ukab' junab', i Ajwal xlapan ru' ma Moisés chila pa tz'inilik jyub' chaqij Sinaí, xub'ij che:
2“I aj Israel rajwaxik chi kki'an i nima'ij chi Pascua ub'i, che i ij chi xch'ikik, 3chi are i ij kajlajuj re i ik'i che uqajb'al ij, lik ki'an ni nima'ij le chrij pacha kub'ij i atb'al tzij chi inya'om chiwe; keje ile xub'ij i Ajwal che ma Moisés.” 4Are uri ma Moisés xeutaq aj Israel chu'anik i nima'ij re i Pascua. 5I aj Israel xki'an i nima'ij le che uqajb'al ij, che i ij kajlajuj re i nab'e ik' chila pa tz'inilik jyub' chaqij Sinaí, chrij pacha xub'ij i Ajwal che ma Moisés.
6Xwiri je o jujun achiyab' chi xeupon ti pa nima'ij che i ij le, man je ch'am taj rumal kichapom jun kamnaq. Ike xe'e ku' ma Moisés xaq i ma Aarón, 7xkib'ij che ma Moisés:
—Yoj qachapom jun kamnaq, rumali oj ch'am taj. ¿Xatab'a rumal ile utz taj kqasujuj qasipon chwach i Ajwal che i ij chi ch'iktalik, junam ku' i qach aj Israel? —Xecha.
8Are uri ma Moisés xub'ij chke:
—Chiwoy-ej na man kinta na wach kixutaq i Ajwal chu'anik.
9I Ajwal xlapan ru' ma Moisés, xub'ij che:
Chab'ij chke aj Israel: 10Iwonojel yix xaq konojel imuq ixikin rajwaxik ki'an ni nima'ij re i Pascua kojb'al re u'ij i Ajwal. Konojel ni'pa je ch'am taj rumal kichapom jun kamnaq, xaq konojel ni'pa naj je enaq wi che i ij le, 11ike le kki'an ni nima'ij che uqajb'al ij, che i ij kajlajuj che ukab' ik' kkitij ni ti'ij chij, lejom wa re trigo chi nti kunb'al ru' xaq i k'a laj ichaj, 12ronojel ni'pa i tijawik re, lik nti kkikanaj re chukab' ij, xaq utz taj kkipatz' taq jun ub'aqil i chij: Kki'an ni nima'ij re i Pascua le chrij pacha xub'ij i Ajwal. 13Xwiri pachin jun ku'an ti nima'ij le, chi lik ch'am u'anom che rib' xaq enaq ti naj, kelsax b'i uri chkixol uwinaq man xusujuj ti usipon che i ij chi ch'iktalik, xaq lik kya' ni uri utojb'alil che rumal umak.
14Xaq i aj naj chi je jeqel chixol, xaq ike le kki'an ni nima'ij re i Pascua, kojb'al re u'ij i Ajwal chrij pacha ub'im chiwe. I atb'al tzij le lik iwe ni yix chi ix aj Israel xaq ke ni aj naj chi je jeqel chixol.
I sutz' chi xk'iji puwi i ja wu'wik re i trat
15Che i ij are xyijb'ax i ja re riqb'al ib' ru' i Dios, i sutz' xuch'uq uwi i ja re riqb'al ib' ru' i Dios, xaq are xqaj ij, i sutz' le pacha taq a' x-ono, lik keje ile u'anom are xsaqirik chukab' ij. 16Arewi keje ile x-ono: Are pa'ij, jutzob'aj sutz' kk'iji puwi i ja re riqb'al ib' ru' i Dios, xwiri are cha'ab' pacha taq a' kk'iji puwi i ja le. 17Are kwalij b'i sutz' puwi i ja re i molb'al ib' are uri aj Israel kkimaj b'i kib'e, keterej b'i chrij i sutz', k'a ipa ktak'i wi i sutz' le xaq chila uri ke'uxlan wi ike. 18Are i Ajwal kb'in chke aj Israel we kkimaj b'i kib'e xaq are i Ajwal kb'in chke we ke'uxlanik. We tak'al i sutz' puwi i lo'laj k'ijib'al re i Dios, xaq je uxlannaq uri aj Israel chila. 19Ike nti ke che we i sutz' le kkanaj k'iyal ij puwi i lo'laj k'ijib'al re i Dios, man aj Israel kki'ano pacha ketaq che rumal i Ajwal xaq lik kekanaj che i k'ijib'al ipa je o wi. 20Xwiri i sutz' we xa keb' oxib' ij ktak'i puwi i ja re riqb'al ib' ru' i Dios, chrij pacha i taqanik re i Ajwal xaq xa keb' oxib' ij uri ke'uxlan aj Israel; are kb'ix chke chi ke'ek, are uri kkimaj chub'i kib'e. 21Olik xa jun a'ab' ktak'i i sutz' puwi i ja re i molb'al ib', chukab' ij kwalij chub'ik, are uri i aj Israel kkimaj b'i kib'e. I sutz' we ktak'i ti chkiwach chipa'ij chicha'ab' xaq ike kkimayij ti uri kib'e. 22I sutz' we kk'iji puwi i lo'laj k'ijib'al re i Dios keb' ij, jun ik', xaq we jun junab', i aj Israel lik kkiyin ti kib' uri che i k'ijib'al ipa je o wi. Xwiri we i sutz' kwalij b'i chkiwach xaq ike kkimaj chub'i uri kib'e. 23We i Ajwal kub'ij chke chi ke'uxlanik, ike ke'uxlanik; we i Ajwal kub'ij chke chi keb'inik, ike keb'inik. Lik arewi kki'ano chrij pacha utaqanik i Ajwal chi ub'im che ma Moisés.
Currently Selected:
N%FAmeros 9: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala