N%FAmeros 17
17
Upetik utux uch'amiy ma Aarón
1I Ajwal xlapan ru' ma Moisés, xub'ij che:
2“Chab'ij chke aj Israel chi chkijujunal aj-atzil ke i jutaq tzob'aj chkik'ama li jujun kich'amiy, chi ke'eloq kab'lajuj ch'amiy ronojel. Yet katz'ib'aj ni kib'i che i kich'amiy. 3I ch'amiy re utzob'ajil ma Leví katz'ib'aj ni ub'i ma Aarón che, man rajwaxik chi i je aj-atzil ke i jutaq tzob'aj o ni jujun kich'amiy. 4Kaya ni pa ja re riqb'al ib' ru' i Dios, chila chwach pan i kaxa re utrat i Ajwal chi o intrat chupam, chila ipa kqariq wi qib' iwu'. 5Yin kin-an ni che uch'amiy i wajpatan chi in-ulum chi kpe ni utux, man keje ile k'ax ti chik kech'aw aj Israel chiwe yix chinwach yin.”
6Xaq keje ub'ixkil ile xu'an ma Moisés chke aj Israel, konojel aj-atzil ke i jutaq tzob'aj xkik'am li jun kich'amiy, xkiya che ma Moisés, chi xyiji kab'lajuj ch'amiy ronojel. Xaq o uch'amiy ma Aarón chuxol i kab'lajuj le. 7I ma Moisés xuya i ch'amiy le chwach i Ajwal chila pa ja re riqb'al ib' ru' i Dios. 8Chukab' ij are xupon chrilik chila pa ja re riqb'al ib' ru' i Dios are uri xrilo chi uch'amiy ma Aarón chi ke utzob'ajil ma Leví petnaq chik utux, sijannaq chik xaq o ne chik an che uwach chi almendra ub'i. 9Are uri ma Moisés xresaj li ronojel ni'pa i ch'amiy chi uya'om kan chila chwach i Ajwal, xuk'ut chke konojel aj Israel; are xkilo, xe'e chuk'amik kich'amiy chkijujunal.
10Are uri i Ajwal xub'ij che ma Moisés: “Jaya'a chik uch'amiy ma Aarón chwach i kaxa re utrat i Ajwal chi o intrat chupam, xaq chak'olo chila k'utb'al re chke i qelqel laj taq winaq le. Keje ile kkimayij ub'ixkil k'ax laj taq tzij chinwach Yin xaq keje ile kekam taj.”
11I ma Moisés xu'an ronojel ni'pa xutaq u'anik i Ajwal, 12xwiri aj Israel xkib'ij che ma Moisés: “¡Wo'or lik ya xqariq ru' man qonojel kojkamik! 13Man konojel ni'pa ketejeb' pa ja re riqb'al ib' ru' i Dios, kekamik. ¿Xatab'a kojkam b'i qonojel?” Xecha.
Currently Selected:
N%FAmeros 17: ACHICUB
Highlight
Copy
Compare
Share
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala