YAM JAH 28
28
1Khaix an Icak kok ka Yakop mai nawb bwan piang nawh ah nin, “Maix tak ang pon teei ti moeng ka bun ceu pui Khanan heue. 2Kaoh, hu ka haktiex Padan-aram nyiex Betoelax pa mawh keeing ka miex maix, teei maix moeng kawn bun Laban pre miex maix tix kaux kaux heue. 3Kieh Siyiex pa ting sibrawm nawb bwan ka maix mai kieh maix haok hwan mai pre haoh hun mai Kieh maix mawh ceu pui ting daux ceu pui khawmuik. 4Kieh Nawh Cao tawx bwanson Abraham#Jah 17:4-8 ka maix mai ka ru maix, sonsang yaox maix tix pon sinngao ka haktiex dee hoik mawh maix nyo sinie pa hoik tawx Siyiex ka Abraham heue.” 5Mawh kheu nan, Icak ploi Yakop hu dee singai mai nawh hu ka haktiex Padan-aram ka Laban kawn simex Betoelax ceu pui Shurix. Laban mawh prie Rebekkax miex Yakop mai Esaw heue.
Esaw Teei Moeng Mahalax
6Esaw hoik yaox Icak nawb bwan ka Yakop mai ploi nawh hu ka Padan-aram, sonsang teei nawh ti koe moeng tan mai yam nawb Icak bwan ka Yakop mai tawm lox ka nawh sonsang ang nawh teei ti moeng ka bun Khanan khankix heue. 7Yakop hoik cu nghiet ka lox miex keeing tix mai lih hu ka haktiex Padan-aram heue. 8Esaw tawng ka ang keeing kix Icak khaw rhawm ka bun Khanan khankix heue. 9Mawh kheu nan, Esaw lih hu ka Ishamelax mai teei ti moeng ka Mahalax pux Nabayok kawn bun Ishamelax, Ishamelax mawh kawn simex Abraham heue.
Camaox Yakop
10Yakop lih hu khaing Bereshabax mai hu plak meung Haran heue. 11Nawh hoek tix dah mai nawh ot tan leeing sawm, mawh kheu hoik klip singaix heue. Nawh teei simaox tix lon khaing tan, sonsang gaong yam it tix heue. 12Nawh camaox, jhak heue, bawng tix mu jung ti tom cux toh ti ka raoma, kawncau Siyiex khankix lih lih haok haok piang bawng an heue.#Yo 1:51 13Jhak heue, Simiang Siyiex cung piang toh bawng dee lhaong ah nin, “Aux mawh Simiang Siyiex keeing maix Abraham mai Siyiex Icak, haktiex pa it maix in, Aux tak tawx ka maix, khawm doeh ru maix heue.#Jah 13:14-15 14“Doeh ru maix tak nie awm phawng tiex mai to tah hu khawm pon caong daog raoma, jah ka plak lih singaix, plak klip singaix, plak caong ma seh, tom hoek ka plak caong ma laong, tokaux maix khawm doeh ru maix khankix, tak lih mawh nyiex ma pa pon bwanson piang haktiex in heue.#Jah 12:3, 22:18 15Jhak heue, Aux ot tau mai priex ka maix ka can dee hu maix kudah dee mai deeh viex maix hoek ka haktiex in, mawh kheu Aux tak ang tik vud ka maix, tom sidah hoik yuh Aux, can ceu pa hoik krai Aux ka maix heue.” 16Khaix an Yakop siduad khaing it tix ah nin, “Simiang Siyiex ot ka dee in tete, mai aux ang tawng ka heue.” 17Nawh lhat graung ah nin, “Dee in mawh dee koe krax lhat graung ka miex ding, ka dee in ang awm tang dah, mawh nyiex bwan Siyiex mai siviex raoma heue.” 18Yakop kaoh caocao yam ponngawb mai teei simaox gaong nawh kaing tix mai sum mawh rong mai groi bee ka toh rong an heue. 19Nawh kok ceu kaux dee an mawh Betelax, viang mawh nan, ceu kaux veng an hoik dawg mawh Luza heue. 20Yam an Yakop yuh sijax mukheu ah nin, “Phan Siyiex ot tau mai aux, Nawh tak priex aux ka can dee hu aux kudah mai tawx pa ih sonsang ih aux mai kraung ceep pa sang ceep aux ka, 21mawh kheu nan aux tak deeh hoek ka nyiex keeing aux ka daux pa nhim mhawm mhawm, Simiang Siyiex mawh Siyiex aux. 22Simaox sum aux pa mawh rong in, tak mawh nyiex bwan Siyiex, can ceu pa tawx Maix ka aux khawmuik aux tak deeh tan kao son tix son Maix heue.”
Currently Selected:
YAM JAH 28: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
