YAM JAH 29
29
Yakop Hoek Ka Laban
1Yam an Yakop hu krax mai hoek ka haktiex dee ot ceu pui plak lih singaix heue. 2Nawh jhak mai yaox ka rawm daux tix mu daux tiag tan, koe phung yung loe cub pa it praok rawm daux heue. Yung khankix nyaux rawm plak praix tan, piang moing rawm daux an, koe simaox ting tix mu, 3cao liang yung khankix khrawm yung cie kix tan mai gah simaox ting an khaing moing rawm daux, khaix hoik kin kix ti tawx yung khankix nyaux rawm, kix deeh tawb moing rawm daux an ka simaox heue. 4Yakop chawk ah nin ka kix, “Puxaik khankix eue, kaoh pex khaing dee mawx?” Kix deeh ah nin, “Yix kaoh khaing veng Haran heue.” 5Nawh baox chawk ah nin ka kix, “Tawng pex Laban, kawn simex Nakhaw lie?” Kix ah nin, “Yix tawng nawh heue.” 6Nawh baox chawk kix ah nin, “Nyawm ot nawh lie?” Mai kix deeh ah nin, “Nawh nyawm ot, jhak heue, kawn bun nawh Rakhelax hoek tau mai phung yung nawh heue.” 7Nawh ah nin, “Yam in kawn mawh yam jung singaix, ang nyang mawh bawg yam khrawm ka tobrie, tawx yung nyaux rawm mai deeh hu liang kix ha.” 8Viang mawh nan kix ah nin, “Yix ang nyang pon tawx phung yung nyaux rawm sivoe ang tix nyang gah simaox khaing moing rawm daux heue.” 9Yam kawn sikah nawh tau mai kix, Rakhelax hoek tau mai phung yung keeing nawh, kheu mawh nawh cao liang yung heue. 10Yam yaox Yakop ka Rakhelax kawn bun Laban, pre miex nawh, Yakop gah simaox khaing rawm daux an mai nawh kin ti tawx phung yung Laban, pre miex nawh nyaux rawm heue. 11Khaix an Yakop ngheet ka Rakhelax nawh yo lox tix mai yiiem heue. 12Yakop krai ka mawh tix paox nyiex ma keeing nawh mai mawh kawn simex Rebekkax, mawh kheu nan, Rakhelax to ti ing krai ka keeing tix heue. 13Yam mhong Laban hoek kawn nan tix Yakop, nawh to ti hu rieb nawh, kawm nawh mai ngheet nawh, kok nawh ing ka nyiex tix heue. Yakop krai grawng tix khawmuik ka Laban heue. 14Laban ah nin ka nawh, “Maix mawh si-ang aux mai nex nham aux.” Mai nawh ot tau mai Laban tix khix heue.
Yakop Yuh Kaing Son Leax Mai Rakhelax
15Khaix an Laban ah nin ka Yakop, “Mawh kheu mawh maix kawn pha aux maix ang chix pon ti yuh kaing giex going. Krai ngawh riang pa simie maix tix pon ka aux miex ding?” 16Laban koe kawn bun ra kaux, Ceu kaux kawn Yex mawh Leax mai ceu kaux kawn I mawh Rakhelax heue. 17Leax awn kawn ngai, viang mawh nan, Rakhelax kied mhawm grang mai nyawm tix jhak heue. 18Yakop moh ka Rakhelax mai nawh ah nin, “Aux tak yuh kaing son maix aliah num sonsang yaox aux ti cie kawn bun iak maix Rakhelax heue.” 19Laban ah nin, “Nie mhawm sonsang tawx aux ka maix, khaing tawx aux ka pui tang kaux, ot tau mai aux heue.” 20Mawh kheu nan, Yakop yuh kaing aliah num, sonsang pon ka Rakhelax. Kheu kied moh nawh Rakhelax, nawh keud singaix sawm an awm ngie tivud khaing heue. 21Khaix an Yakop ah nin ka Laban, “Mawh kheu hoik naog singaix, tawx moeng aux ka aux, sonsang ot tau aux mai nawh heue.” 22Laban kraix khrawm pui baoh an mai yuh krax khan kheu heue. 23Yam hoek plak bo, Laban viex kawn bun tix Leax hoek ka Yakop mai laig ot tau mai nawh heue. 24Laban ap kawncau bun tix Zilapa ka Leax sonsang kia ngien ka nawh heue. 25Yam hoek plak ponngawb, jhak heue, bun an mawh Leax mai Yakop ah nin ka Laban, “Kheu maix lai yuh nin ka aux? Aux hoik yuh kaing son maix, jao Rakhelax ang mawh lie? Mawh kheu jao patix maix pie lhen ka aux lie?” 26Laban ah nin, “Daux haktiex yix tin, yix ang sax koe been ti tawx pux koe mex sivoe puxke tix heue.” 27“Pau tom naog aliah singaix ha, khaix hoik baox yuh maix kaing son aux aliah num, yix tak deeh tawx Rakhelax ka maix heue.” 28Yakop rieb awm pa ah kix, yam naog aliah singaix, Laban baox tawx kawn bun tix Rakhelax sonsang mawh moeng nawh heue. 29Laban ap kawncau bun tix Bilaha ka Rakhelax, sonsang kia ngien ka nawh heue. 30Yakop ot tau mai Rakhelax mai nawh moh Rakhelax lheu khaing Leax mai nawh baox yuh kaing son Laban aliah num heue.
Grawng Kawn Yakop
31Yam yaox Simiang Siyiex koeng nawh ka Leax, Nawh Cao kieh nawh koe kawn mai kieh Rakhelax neh heue. 32Leax koe kaux mai keh kawn simex tix kaux mai kok ceu kaux nawh mawh Rubin mai Leax ah nin, “Simiang Siyiex hoik yaox ka krax kha aux rhawm tix tete, mawh kheu nan mex aux tak moh ka aux phao heue.” 33Nawh baox koe kaux mai keh kawn simex ah nin, “Mawh kheu mhong Simiang Siyiex krax pa koeng nawh ka aux, Nawh Cao baox tawx kawn simex in ka aux, ” mai kok ceu kaux nawh mawh Simion heue. 34Nawh baox koe kaux mai keh kawn simex tix kaux ah nin, “Mawh kheu hoik keh aux kawn simex loe kaux son nawh, yam in, mex aux tak nie lheu moh ka aux phao, ” kiex tom kok ceu kaux nawh mawh Lewix heue. 35Nawh baox koe kaux mai keh kawn simex tix kaux ah nin, “Yam in aux tak sang yaogyaw ka Simiang Siyiex, ” mawh kheu nan, kiex tom kok ceu kaux nawh mawh Yudax. Khaix an kiex ang lai koe kawn heue.
Currently Selected:
YAM JAH 29: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
