LUKAX 2
2
Grawng Keh Yesux
(Mat 1:18-25)
1Ka daux bawg yam singaix an khankix, Simiang Kesa Awgutux tawx lox kieh pawd kieh teei ceu kaux pui pa ot ka daux haktiex khawmuik. 2Yam Kurine mawh simiang giex kaing ka daux meung Surix, in mawh bawg yam teei ceu kaux bawg phao ka tix bawg heue. 3Pui khawmuik deeh ka daux yaong daux veng pui mawx pui an, sonsang tawx sang kieh pawd ceu kaux tix heue. 4Yosiep kawx, kaoh khaing daux veng Nazariet meung Galilie mai haok ka meung Yudax, ka veng Davit pa kok mawh Bieliehiem, kheu mawh nawh doeh ru Davit. 5Sonsang sau ceu kaux tokaux tix mai Marix, pa hoik chawk nawh, pa hoik koe kaux mai dex sang naog bawg yam sang keh heue. 6Yam kiex ot tan, bawg yam singaix sang keh nawh uik naog, 7nawh keh Kawn Ai tix mai pua nawh daux leem, daux man mai een ka daux dawng mawie, kheu ang dee ot koe son kix daux nyiex nyo heue.
Cao Liang Yung mai Kawncau
8Ka daux meung an koe cao liang yung tix blah pa pau cub yung kix daux yam pon sawm heue. 9Kawncau Siyiex tix kaux hoek ti cung dex kix mai min plakngai Simiang jhan riang vung viang kix mai kix die lhat kah heue. 10Kawncau Siyiex an ah nin ka kix, “Paw lhat paw graung, jhak heue, Aux viex lox ceu pa mhawm, pa kied ting gaux rhawm, pa sang mawh son pui khawm mu khawm miang. 11Mawh kheu singaix in, daux veng Davit, Cao Taoh hoik keh son pex tix kaux pa mawh Khrit Simiang heue. 12In tak mawh mhai ruk son pex. Pex tak yaox Kawn ngie pa hoik pua ka leem ka man mai it ka daux dawng mawie heue.” 13Dom mawx dom an cub kawncau raoma kied haoh hun, hoek ti ot tau mai kawncau Siyiex an mai yaogyaw Siyiex ah nin, 14“Kieh yaog min plakngai Siyiex, ka dee kied lhaong khaing paox tix mai ka piang haktiex kieh pa nhim koe ka kawn pui, pa khaw caw rhawm Nawh heue.” 15Khaix hoik deeh ing kawncau Siyiex khankix ka meung raoma, cao liang yung khankix ah nin ka paox tix, “Ex hu ka veng Bieliehiem mai jhak ti yaox ceu pa hoik mawh in, pa hoik kieh Simiang ex tawng heue.” 16Kix nied ti hu tau, yaox Marix mai Yosiep mai Kawn ngie pa it ka daux dawng mawie. 17Yam hoik yaox kix, kix krai grawng lox pa hoik krai ka kix, grawng Kawn nyawm in ku dah ku dee heue. 18Pa mhong khawmuik daox deng ka grawh grawng ceu pa krai cao liang yung khankix, ka kix heue. 19Viang mawh nan Marix een ti tawng, lox ceu in khawmuik mai keud grawh grawng khankix daux rhawm tix heue. 20Cao liang yung khankix deeh ing mai yaogyaw min plakngai Siyiex, kheu ceu pa hoik yaox hoik mhong kix khawmuik, jiet awm lox pa hoik krai ka kix heue.
Tawx Yesux Daux Nyiex Bwan
21Yam hoik naog daix ngaix, yam uik caw bawg yam sang pat hak Nawh,#Krub 12:3 kok ceu kaux Nawh mawh Yesux, awm pa hoik grux kok kawncau Siyiex,#Luk 1:31 ka ang nyang bax nghe Nawh daux vaig heue. 22Khaix hoik naog bawg yam singaix pa kieh kix singax khankix, awm pa koe daux lox been Mose, kiex viex Nawh haok ka veng Yerusaliem, sonsang tawx Nawh ka Simiang. 23Awm hoik tiiem daux lox lai been Siyiex lengju, “Kawn Ai plix num ku kaux tak sang kok mawh pa singax son Siyiex lengju heue.”#Lih 13:2, 12 24Kiex yuh pa tan, awm pa hoik nhie yuh ka daux lai been Siyiex lengju, “Sikaux tix brawm, phan ang mawh nan keukie awn tix brawm”#Krub 12:6-8 heue.
Simeon Yaox Cao Khrit
25Jhak heue, ka daux veng Yerusaliem koe pui pa kaux Simeon tix kaux, pa mawh pui rahsee pa chix nab yam yungyi mai krox jun son bawg yam sang teem kieh Isarelax mhawm mai Khuan Singax Singeh koe ka piang nawh heue. 26Khuan Singax Singeh hoik kieh doh ka nawh, grawng nawh tak ang nyang yum, ka ang tix bax yaox Cao Khrit cie Siyiex lengju heue. 27Khuan Cao uk nawh hu ka daux nyiex bwan, miex keeing Nawh Cao viex kawn nyawm Yesux hu tan, sonsang yuh son Nawh awm koe lox lai beenli. 28Nawh teei ti teem Nawh Cao ka daux tawm taix tix mai yaogyaw bwanson Siyiex ah nin, 29“Siyiex eue, phao in kieh kawncau Maix koi hu mhawm mhawm, awm hoik koe gumlox Maix. 30Kheu hoik yaox ngai aux krax taoh Maix, 31pa hoik cox Maix sivoe pakngai ceu pui khawmuik heue. 32Pa mawh pa riang pa sang kieh doh ka pui tang ceu khankix #Isa 42:6, 49:6 mai pa tak sang yaog min plakngai pui Maix Isarelax heue.” 33Miex keeing Nawh Cao daox deng ka lox pa krai grawng Nawh heue. 34Simeon nawb bwan ka kiex, ah nin ka Marix miex Nawh Cao, “Jhak heue, kawn nyawm in tak mawh pa sang kieh pui Isarelax tom nie goh mai deeh kaoh heue. Tak sang mawh mhai pa salao pui kah heue. 35Lheu khaing an rhawm maix kawx tak suat ka vaid, sonsang plak kieh doh pa keud pa sawn rhawm rhi pui tom nie heue.”
Mhai rug Grawng Cao Taoh
36Yam an koe yiex jhai tix kaux pa kaux Anax. Nawh mawh kawn bun Phanwelax, pa mawh ceu Asha. Nawh uik kied kuad mai yam awn ju nawh hoik ot mai mex tix aliah num. 37Nawh uik mawh miexmai tidaix pon num, nawh ang lih khaing nyiex bwan, nawh ot tan rawg bwan mai twah pa ih, krub ka Siyiex ku ngaix heue. 38Daux bawg yam nari an nawh hoek mai yaogyaw bwanson Siyiex, krai grawh grawng kawn nyawm an ka kix khawmuik pa krox jun son bawg yam sang taoh veng Yerusaliem heue.
Yesux Deeh Ing
39Khaix an miex keeing Nawh yuh awm pa hoik nhie lox been Siyiex lengju, kuceu khawmuik, kix deeh ing ka daux meung Galilie, ka veng tokaux tix Nazariet heue.#Mat 2:23 40Kawn nyawm an haok hwan mai ting riang ting rao mai naog krax tawng yung, pingnya cuyi mai bwanson Siyiex ot ka piang Nawh heue.
Yesux Ot Daux Nyiex Bwan
41Miex keeing Nawh Cao hu ka veng Yerusaliem, ku num, ka pawie Pasakha heue.#Lih 12:1-27; Pi 16:1-8 42Yam hoik koe ju Yesux kao ra num, kix haok awm hoik sax koe been pawie. 43Khaix hoik luan ngaix pawie khankix, kiex deeh ing mai kawn nyawm simex pa mawh Yesux, kawn ot plak khaix ka daux veng Yerusaliem mai miex keeing Nawh ang tawng grawng an heue. 44Viang mawh nan kiex ce Nawh ot ka daux cub pui pa ing kix tau mai kiex ing tix ngaix krax. Khaix an kiex sawg Nawh ka sinax puxaik paox ceu mai sinax pui paox meed tawng kiex, 45kheu ang kiex yaox Nawh, kiex deeh hu sawg Nawh ka veng Yerusaliem heue. 46Khaix an loe ngaix kiex yaox Nawh ka daux nyiex bwan, ngawm sinax sara cao gau, nghiet lox kix mai chawk lox ka kix heue. 47Kix pa mhong lox Nawh khawmuik daox deng ka pa kied tawng Nawh mai lox pa deeh chix pawk Nawh heue. 48Yam yaox kiex Nawh, kiex daox deng ka mai miex Nawh ah nin ka Nawh, “Kawn eue, yuh ka mawx Maix lai yuh nin ka yiex? Jhak heue, keeing Maix mai aux hoik sawg Maix mai khi rhawm tix heue.” 49Nawh Cao ah nin ka kiex, “Kheu pax lai sawg Aux? Ang pax tawng grawng tak lai ot Aux ka daux nyiex Keeing Aux lie?” 50Kiex ang tawng dee bleeh lox pa krai Nawh ka kiex heue.
Yesux Haok Hwan
51Nawh lih hu tau mai kiex, hoek ka veng Nazariet, Nawh Cao nghiet lox kiex heue. Miex Nawh een ti tawng grawng ceu in khankix ka daux rhawm tix heue. 52Tokaux Yesux baox haok baox hwan, baox ting pingnya mai baox nie khaw rhawm Siyiex mai kawn pui heue.#1Sa 2:26; Kab 3:4
Lox Sidiex Yohan Cao Cubcom
(Mat 3:1-12; Mak 1:3-8; Yo 1:19-28)
Currently Selected:
LUKAX 2: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012
