LUKAX 3

Lox Sidiex Yohan

(Mat 3:1-12; Mak 1:3-8; Yo 1:19-28)

1Simiang Kesa Tiberix yam hoik giex kaing kao phwan num, Pungtix Pilat mawh simiang giex kaing meung Yudax mai Herut mawh simiang meung Galilie, Philipux pux nawh mawh simiang haktiex Iture mai Tarakhawnit mai Lusanix mawh simiang haktiex Abilenix. 2Ka daux bawg yam, Annax mai Kayaphax mawh cao giex kaing li pa ting, lox Siyiex hoek ka Yohan kawn Zakharix, ka daux tiagtu heue. 3Nawh hu daux haktiex rawb rim rawm Yawdan kudah kudee, sidiex gau been krax tawx cubcom, pa doh keud ka phimap tom pon luan khaing daux phimap heue. 4Awm hoik tiiem daux phuk lai Cao jhai Isayax, gumlox pa ah nin, “Lox pa kok yo daux tiagtu, cox krax Siyiex lengju, yuh krax Nawh rahsee heue. 5Klawk ku klawk tak sang kieh naog, gawng ku gawng mai ton ku ton tak sang kieh tiem. Pa kawk pa vawk tak sang kieh see. Krax khluk khlek tak sang kieh plang. 6Pui khawmuik tak sang yaox krax taoh Siyiex heue.#Isa 40:3-5 7Mawh kheu nan nawh tom ah nin ka cub pui hun pa hoek ti cubcom mai nawh, “Ceu siuing pa cai eue,#Mat 12:34, 23:33 mawx nhie pex to, sonsang luan khaing pa song rhawm pa tak sang hoek?” 8Kieh plix plix pa keung pa doh keud ka phimap tokaux tix, paw jah ti ah ka daux tokaux tix Abraham mawh keeing ex,#Yo 8:33 aux krai ka pex, Siyiex teei simaox in khankix yuh mawh kawn Abraham ka chix heue. 9Yam in kawx moe hoik koe ka dex riah num khaox mai khaox pa ang plix plix pa mhawm khankix khawmuik, sang kid ti taing sau daux ngu heue.#Mat 7:19 10Cub pui hun chawk nawh ah nin, “Phan mawh nan ex tak sang yuh ka mawx?” 11Nawh deeh pawk ah nin ka kix, “Kieh pui pa koe sibex ra pheen tawx ka pa ang koe khankix mai pui pa koe priex preem kieh yuh awm an heue.” 12Pui koh mau khankix kawx hoek sonsang cubcom#Luk 7:29 mai nawh. Kix chawk ah nin ka nawh, “Sara cao gau eue, ex tak sang yuh ka mawx?” 13Nawh deeh ah nin ka kix, “Paw vi teei nie lheu khaing pa hoik nhie pex koh heue.” 14Pui naing khankix kawx hoek mai chawk nawh ah nin, “ ex tak sang yuh ka mawx?” Nawh ah nin ka kix, “Paw vi khin ti teei khaing pui tix kaux kawx. Paw vi deuh phimap pa ang mawh ang meh ka piang pui mai kieh rhawm pex fah ka mau riang pa pon pex heue.” 15Yam pui khankix keud jun pot mai pui khawmuik keud daux rhawm tix grawh grawng Yohan, mawh nawh Cao Khrit lie, ang mawh lie. 16Yohan baox deeh ah nin ka kix, “Aux cubcom pex ka daux rawm tete, viang mawh nan khaix in tak sang hoek tix kaux, pa nie ting khaing aux, pie maox kiep Nawh ang aux keung ti kah, Kaw an tak sang cubcom pex ka daux Khuan Singax Singeh mai daux ngu heue. 17Ka daux tawm taix Nawh koe bya yib mai Nawh tak kieh nghox ca pa pah tix singax mai Nawh tak sau nghox ca cie Nawh daux krao mai Nawh tak teei grhip gleeing daux ngu pa ang chix yeet heue.” 18Nawh teei lox tang ceu tom nie sidiex gau lox bwan gaux rhawm ka pui khankix. 19Viang mawh nan, kheu ah Yohan ka simiang Herut, grawng pa teei nawh Herodi moeng pux tix mai grawng ceu pa ang khaw pa caox caig pa hoik yuh Herut khawmuik. 20Nawh baox deeh yuh pa ang khaw, pa nie lheu ting khaing an khawmuik, pa mawh, pa sau nawh Yohan daux thawng heue.#Mat 14:3-4; Mak 6:17-18

Yesux Hoek Ti Com Rawm

(Mat 3:13-17; Mak 1:9-11)

21Khaix pui khawmuik hoik cubcom tix ka rawm, Yesux kawx hoik cubcom mai rawg bwan, raoma baoh, 22mai Khuan Singax Singeh lih ka daux riang tokaux, pa awm sikaux, ka piang Nawh mai lox lih khaing raoma, “Maix mawh Kawn pa moh Aux, pa khaw caw rhawm Aux heue.#Isa 42:1; Mat 12:18, 17:5; Mak 9:7; Luk 9:35

Doeh Ru Yesux

(Mat 1:1-17)

23Yam jah tokaux Yesux ti sidiex gau, Nawh dex sang koe tixngoe num. Pui ce Nawh mawh kawn Yosiep, pa mawh kawn Elix. 24Pa mawh kawn Mathat, pa mawh kawn Lewix, pa mawh kawn Melakhix, pa mawh kawn Yannax, pa mawh kawn Yosiep. 25Pa mawh kawn Mattalix, pa mawh kawn Amox, pa mawh kawn Nahum, pa mawh kawn Esalix, pa mawh kawn Nakge. 26Pa mawh kawn Maat, pa mawh kawn Mattalix, pa mawh kawn Semex, pa mawh kawn Yosiep, pa mawh kawn Yudax. 27Pa mawh kawn Yohannax, pa mawh kawn Resax, pa mawh kawn Zerubabelax, pa mawh kawn Salutilax pa mawh kawn Merix. 28Pa mawh kawn Melakhix, pa mawh kawn Atdix, pa mawh kawn Kosam, pa mawh kawn Elamodam, pa mawh kawn Erax. 29Pa mawh kawn Yosiep, pa mawh kawn Eliyaza, pa mawh kawn Yorim, pa mawh kawn Mathat, pa mawh kawn Lewix. 30Pa mawh kawn Simeon, pa mawh kawn Yudax, pa mawh kawn Yosiep, pa mawh kawn Yanam, pa mawh kawn Eliakhim. 31Pa mawh kawn Mele, pa mawh kawn Menan, pa mawh kawn Matathax, pa mawh kawn Natan, pa mawh kawn Davit. 32Pa mawh kawn Yessie, pa mawh kawn Obet, pa mawh kawn Bawzax, pa mawh kawn Salamon, pa mawh kawn Nashon. 33Pa mawh kawn Acoidap, pa mawh kawn Aram, pa mawh kawn Hezaron, pa mawh kawn Pherit, pa mawh kawn Yudax. 34Pa mawh kawn Yakop, pa mawh kawn Icak, pa mawh kawn Abraham, pa mawh kawn Terax, pa mawh kawn Nakhaw. 35Pa mawh kawn Cerawk, pa mawh kawn Ragau, pa mawh kawn Phalek, pa mawh kawn Hebax, pa mawh kawn Salax. 36Pa mawh kawn Kainan, pa mawh kawn Aphakcat, pa mawh kawn Semax, pa mawh kawn Noax, pa mawh kawn Lamek. 37Pa mawh kawn Mathusalax, pa mawh kawn Enawk, pa mawh kawn Zarit, pa mawh kawn Mahalalelax, pa mawh kawn Kainan. 38Pa mawh kawn Enot, pa mawh kawn Sethax, pa mawh kawn Adam, pa mawh kawn Siyiex heue.

Currently Selected:

LUKAX 3: WCL

Highlight

Copy