यहुन्ना 1
1
वचन मैहणुरै रूपा मझ या
1संसार शुरू भूंणा किना पेहिलै वचन थ्या, वचन परमेश्वरा सेईतै थ्या, जै वचन थ्या सैहै परमेश्वर थ्या। 2ऐहै वचन संसार शुरू भूंणा किना पेहिलै परमेश्वरा सेईतै थ्या। 3संसारेरी हर-अक चीज परमेश्वरै वचने ला बंणाय, जां ऐहिंयो कौ बि चीज ना, जै परमेश्वरै वचने बगैर बंणाय। 4ऐ सैहै वचन आ जैस मझ हर मैहणुरा जीवन थ्या, ऐ सैहै आ जै सभनियांं मैहणुवंनी प्रगड़ु दिईंथ्या। 5सै ज्योति अंधारू मझ चमकती रेय्ही पण अंधारुरै बोलै सै हियोली ना।
6परमेश्वरै अक मैहणु भेईजा। जेसैरू ना यूहन्ना थियु। 7यूहन्ना परमेश्वरै मैहणुवंनी शुणांणनी भेईजौरा थ्या कि सै ज्योतिरी सच्चाईरै बारै मझ मैहणुवंनी शुणाईया, जां सारै मैहणु तेसैरी गवाहि पन विश्वास करिया। 8यूहन्ना ऐपु ता ज्योति ना थ्या, पण ज्योतिरी सच्चाय शुणांणनी यौउरा थ्या। 9सै जै सच्ची ज्योति आ, सै हर-एकि मैहणु अंन्धारू किना प्रगड़ु मझ अंणति, सै ज्योति संसारा मझ ऐईंणारी थी। 10सै संसारा मझ थ्या, संसार तेनी ला पेईदा भुआ, पण संसारेरै मैहणुवें सै परियांणा ना। 11सै अपड़ा मैहणुवां किनि या पण तेसेरै अपड़ै मैहणुवें तेसनी ठौकर मारी दित्ती। 12पण जेत्थरै मैहणुवें सै मनि लिया, तेनी तेन्हांनि परमेश्वरेरी संन्तान भूंणैरा अधिकार दित्ता, मतलब तेन्हांनि जै तैस पन विश्वास कातै। 13सै ना मयि-बबेरी मर्जी ला, ना मैहणुरी मर्जी ला, कि मूंनी आउलाद भुईया, पण परमेश्वरेरी मर्जी मुताबिक पेईदा भुवै।
14जां वचन मैहणुरा शरीर धारण करि-करि मैहणु बंणा, जां अनुग्रह जां सच्चाई ला परिपूर्ण भौ करि असु बिच बसा, जां तेसैरी ऐतेई महिमा थी जेतेई परमेश्वरेरै इकलौतै पुत्रेरी। 15यूहन्ने तेसेरै बारै मझ गवाहि दित्ती, जां हक्कै दी करि बौलु, “ऐ सैहै आ, जेसैरा मीं प्रचार केईथ्या, कि जै मूं किना बाद ऐईंणारा सै मूं किना बधि करि आ, केईनी कि सै मूं किना बि पेहिलै थ्या।” 16केईनी कि तेसेरी भरपूर दयाई ला असुनि अनुग्रह पन अनुग्रह मैआ। 17ऐठणीरै तेईनी कि व्यवस्था ता मूसै दित्ती, पण परमेश्वरै अनुग्रह जां सच्चाई यीशु मसीहरै जरियै लुहाई। 18परमेश्वर कुनि कदि ना लधा, सिर्फ तेसेरै इकलौतै पुत्रै लधौरा, जै असली मझ परमेश्वर आ, जां पिता परमेश्वरा किनि सभनियांं नीड़ सैहै आ, तेनिऐ असुनि लुहाउ कि परमेश्वर केतिया आ।
यूहन्ना बपतिस्मा दींणै बाऐरी गवाहि
(मत्ती 3:1-12; मरकुस. 1:1-8; लूका 3:1-9,15-17)
19यूहन्नेरी गवाहि ऐ आ, कि जेख्णी यहूदी अगुवे यरूशलेम शहरा किना याजक जां लेवी, यूहन्ने किना ऐ पुछणेरै तेईनी भेईजा, “तु केणु आ?” 20ता तेनी सही-सही बोलि दित्तु कि, “आंउ मसीह ना।” 21ता तैन्हैं मैहणुवें यूहन्ने किना पुच्छु, तां फिरी तु केणु आ? “क्या तु ऐलिय्याह भविष्यवक्ता?” तेनी बौलु, “आंउ सै ना!” यहूदियै तैस किना अक गल होरी पुच्छी, “क्या तु सैहै भविष्यवक्ता जै ऐईंणारा! तेनी बौलु, ना।” 22तां तेनी तैस किना पुच्छु “फिरी तु केणु आ? तां कि असै अपड़ै भेईजणै बाऐनी शुणा सकिया। तु अपड़ै बारै मझ कितु बोलता?” 23तेनी बौलु, जिहीं यशायाह भविष्यवक्तै बोलोरू आ, “आंउ बंणा मझ सै शब्द आ, जै हक्कै दी-दी करि बोलता, प्रभुरै तेईनी बत्त बराबर करा।” 24किछ मैहणु फरीसिया मझांं भेईजोरै थ्यै। 25तैन्हैं यूहन्ने किना पुच्छु, “अगर तु ना मसीह आ, जां ना ऐलिय्याह आ, जां ना सै भविष्यवक्ता, ता फिरी तु मैहणुवंनी बपतिस्मा केईनी दींता?” 26यूहन्ने तेन्हांनि उत्तर दिता, “आंउ ता पांणी ला बपतिस्मा दींता। पण असु बिच अक मैहणु खड़ा आ, जैस तुवे ना जांणतै। 27मतलब ऐक्या सैहै आ, जैस मूं किना बाद प्रचार कांना, आंउ ता तेसेरै मुकाबलै किछ बि ना, सै यौउता खास आ कि आंउ तेसेरै बूटा केरै तस्मै खोलणेरै बि लायक ना।” 28ऐ गलै यरदन नदी पार बैतनिय्याह नगरा मझ भुई, जेठि यूहन्ना मैहणुवंनी बपतिस्मा दिईंथ्या।
परमेश्वरेरा मेम्ना
29दुईं धियाड़ी यूहन्ने यीशु ऐपु धेरै ऐईंता तका करि बौलु, “तका, ऐ परमेश्वरेरा मेम्ना आ, जैस संसारेरै मैहणुवां केरै पापा केरा बौझ हरि करि ऐपु पन लींणा। 30ऐ सैहै आ, जेसेरै बारै मझ मीं बोलोरू थियु, कि अक मैहणु जैस मूं किना बाद तुहांनि प्रचार शुणांणा, सै मूं किना बि बडा आ, केईनी कि सै मूं किना बि पेहिलै थ्या। 31मूं ऐपुवै पता ना थ्या कि सै मसीह आ, पण ऐठणीरै तेईनी आंउ इस्राएल देशैरा मैहणुवंनी ऐ शुणाणेरै तेईनी कि सैक्या केणु आ, आंउ पांणी ला बपतिस्मा दींता या।” 32जां यूहन्ने ऐ गवाहि दित्ती, कि “मीं पवित्र आत्मा कबूतरा सैयि सुरगा किना उतरता लधा, जां सै तैस पन बेशि ग्या। 33आंउ ता तैस जांणीथ्या बि ना कि सै मसीह आ, पण जेनि आंउ पाणी ला बपतिस्मा दींणनी भेईजौरा, तेनी मूं सिंउ बोत्थियु, ‘जैस पन तु पवित्र आत्मा उतरतै जां बेशतै तकाला, सैहै पवित्र आत्माय ला बपतिस्मा दींणै वा भूंणा।’ 34जां मीं सै ऐपु तकाउ, ता आंउ तुहां सिंउ सच-सच बोलता कि ऐक्या ऐ परमेश्वरैरा पुत्र आ।”
यीशुरै पेहिलै चैलै
35दुवें रौजै फिरी यूहन्ना जां तेसेरै चैला मझांं दो जंणै फिरी खड़ै भोरै थ्यै, 36जां तेनी यीशु सांमणै गांहथा लधा, जां तैस धेरै तका करि बौलु, “तका, ऐ परमेश्वरैरा मेम्ना आ।” 37तां सै दोईयो चैलै ऐसै गलै शुणि करि यीशु पिचालीं चलि पियै। 38जां जेख्णी यीशु पिचालीं मुड़ि करि तकाउ कि सै पीछै ऐईंतै अत्तै ता तेनी तैन्हांं किना पुच्छु, “तुहां कितु चेहिंथु?” तैन्हैं तेसनी उत्तर दिता, “हे गुरू! तुवे कोठि भूंतै?” 39यीशु तैन्हांं सिंउ बौलु, “ऐईछा जां तका।” फिरी तैन्हैं गहि करि तकाउ कि सै कोठि बेश्ता जां तैस धियाड़ि सै तैस सेईतै बेठै केईनी कि सै टैंम लगभग धियाड़िरै चोउवा बजैरा थ्या। 40जै दो चैलै यूहन्नेरी गल शुणि करि यीशु पिचोरै गियोरै थ्यै, तैन्हांं मझांं अक शमौन पतरसैरा भाई अन्द्रियास थ्या। 41जां तेनी पेहिलै अपड़ै सक्कै भाई शमौना किनि गहि करि तैस सेईतै बौलु, “भाई असुनि मसीह मेयि ग्या।” 42फिरी अन्द्रियास, शमौना यीशु किनि लै या। यीशु तैस धेरै ध्यान सिंउ तका करि बौलु, “तु यूहन्नेरा पुत्र शमौन आ, आज किना बाद मीं तिंडु नाँ कैफा मतलब पतरस रखु, (ऐस नाँईयेरा मतलब आ चट्टान)।”
फिलिप्पुस जां नतनएल शदाईयूंणै
43दुईं धियाड़ि यीशु गलील प्रदेशनी गांहणैरा फैसला केया। तेनी फिलिप्पुसा सिंउ मिलि करि बौलु, “मिन्डै चैलै बंणा।” 44जै फिलिप्पुस थ्या सै अन्द्रियास जां पतरसेरै नगरा बैतसैदा किना थ्या। 45फिलिप्पुसनि नतनएल मैआ, जां तेनी तैस सिंउ बौलु, “जेसेरै बारै मझ मूसेरी व्यवस्थाय मझ जां भविष्यवक्तै बि लिखोरू आ, सै असुनि मेयि ग्या; सै यूसुफैरा पुत्र यीशु आ। जै नासरत नगरा किना आ।” 46नतनएलै तैस किना पुच्छु, “क्या कौ अच्छी चीज नासरत नगरा किना बि निकोहि सकती?” फिलिप्पुसै तेसनी जुबाव दित्ता, “चला जां ऐपुवै तका ल्या।” 47यीशु नतनएलैनि ऐपु धेरै ऐईंतै तका करि तेसेरै बारै मझ बौलु, “ऐ अक सच्चा इस्राएलि वंशज आ, जैस मझ कौ कवट ना।” 48नतनएलै यीशु किना पुच्छु, “तुवे मूं किहीं जांणतै?” यीशु तेसनी उत्तर दिता, “ऐत किना पेहिलै जेख्णी फिलिप्पुसै तु शदा, ता तु अंजीरेरू बुटा हैट थ्या, तेख्णी तु मीं लधथिया।” 49नतनएलै तेसनी उत्तर दिता, “हे गुरू! तु परमेश्वरैरा पुत्र आ, तु इस्राएल देशैरा महाराजा।” 50यीशु तेसनी उत्तर दिता, “मीं ताउ सिंउ बौलु, कि ‘मीं तु अंजीरेरू बुटा हैट लधा।’ क्या तु ऐठणीरै तेईनी विश्वास काता? ताउ हालै ऐठां बि बडै-बडै कम तकांणै।” 51फिरी यीशु तैस सिंउ ऐ बि बौलु, “आंउ ताउ सिंउ सच-सच बोलता, कि ताउ स्वर्ग खुलोरू जां परमेश्वरेरै स्वर्गदूत मैहणुरै पुत्रा मतलब मूं पन उतरतै जां खड़ै गांहथै तकांणै।”
Currently Selected:
यहुन्ना 1: CDJNT
Highlight
Share
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
