लूका 1
1
भैत पछियांण
1आदरणीय थीयुफिलुस जी, बड़ै सारै मैहणुवें तैन्हांं गला केरा ब्यौरा लिखणैरी मैहनत की जै असेड़ै बिच भुई। 2जैन्हैं मैहणुवें ऐ लिखि तेन्हांनि ऐ जानकारी तैन्हांं मैहणुवां किना मेयि जैन्हैं अपड़ै टीरै यीशुरी सेवकाय शुरूवाति किना तकाउरी थी जां ऐहै मैहणु बाद मझ परमेश्वरेरै वचनेरै सेवक बंणी गियोरै थ्यै। 3ऐठणीरै तेईनी आदरणीय थियुफिलुस मीं बि ऐन्हां गला केरी शुरू किना बड़ै ध्यान सिंउ परख की, जां मूं बि ऐ अच्छु लगु कि मीं तुवाड़ै तेईनी ऐकेई गलै बारी-बारी लिखि। 4आंउ ऐ ऐठणीरै तेईनी काता ताकि तुहां हर-तैस गलेरी पूरी सच्चाईरा पता लगिया जै होरै मैहणुवें तुहांनि शुणाउरी अत्ति।
यूहन्नेरै जन्मेरी घोषणा
5जेख्णी यहूदिया प्रदेशा मझ हेरोदेस राजैरा राज थ्या, तैठि जकर्याह नांईऐरा अक याजक थ्या, सै अब्बियाह केरै याजका केरी मंडली मझ थ्या, जां तेसैरी लाड़िरू नाँ इलीशिबा थियु, जां सै बि इस्राएलेरै पेहिलै याजका हारूनेरै वंशा मझांं थी। 6जकर्याह जां इलीशिबा ऐ दोईयो जंणै परमेश्वरेरै सांमणै धर्मी थ्यै, सै बड़ै ध्यान सिंउ प्रभुरी जां परमेश्वरेरी सभनियांं आज्ञाईया जां नियमा पन चलणार थ्यै। 7पण तेन्हैरा कोई बाल-बच्चा ना थ्या, केईनी कि इलीशिबा बच्चा पेईदा कांना मझ आसमर्थ थी, जां अबै सै दोईयो जंणै बुढै भौ गियोरै थ्यै।
स्वर्गदूतेरै जरियै यूहन्नेरै जन्मेरी भविष्यवाणी
8अक धियाड़ी जेख्णी जकर्याह अपड़ै याजका केरी मंडलिरी बारी पनि येरुशलेमेरै मंदरा मझ परमेश्वरेरै सांमणै याजकैरा कंम काता थ्या, 9तां याजका केरी रीति-रिवाजेरै अनुसार तेसेरै नाँ पन चिट्ठी निकोत्थी, कि परमेश्वरेरै मंदरा मझ गहि करि धूप जाईया। 10धूप जानेरै टैंमा सारा मैहणुवां केरी सारी मंडली भेईर मंदरेरै आंगणा मझ किट्ठै भौ करि प्रार्थना काति थी। 11तां अचानक तैस टैंमा परमेश्वरैरा अक स्वर्गदूत धूपेरी वेदिरै देहिणै पासै खड़ा भौरा तैस लाधी या। 12जकर्याहै तैस स्वर्गदूता तका करि उझकर लगी, सै बड़ा जादा डरि ग्या। 13पण स्वर्गदूतै तैस सिंउ बौलु, “हे जकर्याह, डरै मेईं, केईनी कि परमेश्वरै तिंडि प्रार्थना शुणि लियौरी आ; जां तिंडि लाड़ि इलीशिबा किना तिंडै तेईनी अक पुत्र पेईदा भूंणा, जां तु तेसैरू नाँ यूहन्ना रखै। 14तु आनंदित जां खुश भूंणा, जां बड़ै सारै मैहणु तेसैरा जन्म भूंणै ला आनंदित भूंणै। 15केईनी कि सै परमेश्वरेरै सांमणै बड़ा महांन भूंणा, जां तैस मदिरा जां ऐतेई नशीली चीजै कदि पीणियैं ना, जां अपड़ि मयिरू पैटा किना ऐ पवित्र आत्माय किना भरी गांहणा। 16जां सै मोटी गांहणा तेख्णी तैस अपड़ै प्रचारै ला बड़ै सारै इस्राएलि मैहणु तेन्हैरै प्रभु परमेश्वरा धेरै वापस लै ऐईणै। 17यूहन्ना ऐलिय्याहेरी आत्माय जां सामर्थी सेईतै भूंणा तैस प्रभुरी बत्त तियार कांनी, कि मयि-बबेरा मंन अपड़ा बाल-बच्चा धेरै फैराणा जां आज्ञा ना मनणारा मैहणुवंनी परमेश्वरैरा ज्ञान अपनाणनि बोलणु। जां प्रभुरै तेईनी अक काबिल प्रजा तियार करिया।”
18जकर्याहै स्वर्गदूता किना पुच्छु, ऐ मूंनी किहीं पता लगणा? केईनी कि आंउ ता बुढा आ जां मिंडी लाड़ी बि बुढी गियोरी। 19स्वर्गदूतै तेसनी जुबाव दिता, आंउ जिब्राईल आ, जै परमेश्वरेरै सांमणै खड़ा रींहथा; जां आंउ ताउ सिंउ गलै कांना जां ताउनि ऐकेई खुशखबरी शुणांणेरै तेईनी भेईजौरा। 20जां तका, जैस धियाड़ि तेईनी ऐकेई गलै पूरी ना भौ गाहली, तैस धियाड़ि तेईनी तिंडि जुबान चलि गांहणी, जां तिंडै बोलै बिचारियुणु ना, केईनी कि तीं मिंडिया गला पन विश्वास ना केया, जै अपड़ै सही टैंमा पनि पूरी भूंणी। 21ऐस दौराना मैहणु जकर्याहैरा भेईर इंतजार कातै थ्यै, जां हैरान भूंणा लगै कि तैस मंदरा मझ योउती अटक केईनी लगी। 22जेख्णी सै भेईनि या ता, तेसेरै बोलै मैहणुवां सिंउ किछ ना बोलियु। ऐठणीरै तेईनी सै बुझि गियै कि मंदरा मझ तेसनी कोई दर्शन भुआ। सै तेन्हांनि इशारै काता रिय्हा, सै गुंगा रैहि ग्या। 23जेख्णी मन्दरा मझ एकि याजकेरै रूपा मझ तेसैरी सेवायरी धियाड़ि पुरी गैई, तां सै यरूशलेम किना अपड़ै घरेनी चलि ग्या। 24किछ धियाड़िये किना बाद तेसैरी लाड़ी इलीशिबा दुपरांणी भुई, जां पंजा महीना तेईनी तेनी कोसनि बि पता ना लगणा दिता। 25तेनी बौलु, “प्रभु मूंनी संतान पेईदा कांननी मजत क्यौरी आ, तेनी मूं पन अनुग्रह क्यौरा जां मैहणुवां केरै सांमणै मिंडा बांझपन दूर क्यौरा।”
यीशुरै जन्मेरी घोषणा
26जेख्णी इलीशिबाय छी महीने दुप्रांणी भोरै भुवै, तां परमेश्वरै अक स्वर्गदूत जिब्राईल गलील प्रदेशा किना नासरत नगरा मझ, 27एकि कुंवारी किनि भेईजा, जेसैरी मंगणि राजै दाऊदेरै वंशेरै यूसुफ नाँईयेरै एकि मड़दा सिंउ भोरी थी: तैस कुंवारिरू नाँ मरियम थियु। 28जां स्वर्गदूतै तैस किनि नीड़ अईछी करि बौलु, “आनंद जां जय तिंडि भुईया, परमेश्वरै ताउ पन दया क्यौरी आ प्रभु तांउ सेईतै आ!”
29जेख्णी तेसै सैकेई गलै शुणि ता सै बड़ी डरि गैई, जां मंना मझ सौचणा लगी कि ऐस गलैरा कितु मतलब आ! 30स्वर्गदूतै तेसै सिंउ बौलु, “हे मरियम; डरै मेईं, केईनी कि परमेश्वरै ताउ पन दया क्यौरी आ। 31तका, तु दुप्रांणी भूंणी, जां तिंडै अक पुत्र पेईदा भूंणा; तु तेसैरू नाँ यीशु रखै। 32सै सभनियांं मझ महान भूंणा, जां सै परमप्रधानेरा पुत्र कहलाईयुंणा; जां प्रभु परमेश्वरा सै तेसेरै पूर्वजा केरा राजा दाऊदेरै समान राजा बणांणा। 33जां सै इस्राएलि मैहणुवां केरा राजा हमेशा भूंणा। जां तैस हमेशा तेईनी राजैरै रूपा मझ तैन्हांं पन राज्य कांना।”
34मरियमै स्वर्गदूता सिंउ बौलु, “आंउ ता कुंवारी आ ऐ किहीं भूंणु। मिंडा ता ब्याह बि ना भौरा।” 35ऐस गलै पन स्वर्गदूतै तेसनी जुबाव दिता, “पवित्र आत्मा ताउ पन उतरना, जां परमप्रधानेरी सामर्थ ताउ पन भूंणी। ऐठणीरै तेईनी ताउ किना जै बच्चा पेईदा भूंणा सै पवित्र भूंणा जां परमेश्वरैरा पुत्र कहलायुंणा। 36शुण, अक गल होरी शुणांता तिंडि रिश्तेदार इलीशिबा बि बुढापै मझ दुप्रांणी भुई, मैहणु तेसनी बांझ बोलींथ्यै, पण तैस दुप्रांणी भोरी छी महीने भुवै। 37तु हैरान मेईं भूंती केईनी कि परमेश्वर सभ किछ करि सकता।” 38ऐस गलै पन मरियमै बौलु, “आंउ ता प्रभुरी दासी आ जिहीं तीं बौलु तिहियें मूं सिंउ भुईया।” तां फिरी स्वर्गदूत तेसै किना चलि ग्या।
मरियमेरू इलीशिबाय सिंउ मिलणनी गांहणु
39फिरी किछ धियाड़िया किना बाद मरियम तियार भौ करि उठि जां इकदम पहाड़ी इलाके मझ यहूदियारै प्रदेशेरै एकि नगरा मझ गैई। 40जां जकर्याहैरै घरा मझ गहि करि इलीशिबायनि नमस्कार कियु। 41ऐहीं भूं कि जिहीयें इलीशिबाय मरियमेरू नमस्कार शुंणु, तिहियें बच्चा तेसैरू पैटा मझ हिलणा लगा, जां इलीशिबा पवित्र आत्माय ला भरी गैई। 42जां सै खुश भौ करि जौरै मरियम सिंउ बोलती, “परमेश्वरै तु सारिया जनेनियां मझ धन्य केयि जां सै बच्चा जैसनि ताउ जन्म दींणा सै बि धन्य आ।” 43ऐ क्यौति बडी इजतिरी गल आ कि मिंडै प्रभुरी माँ मूं किनि मिलणनी यौउरी आ। 44तका, जिहीयें तीं मूंनी नमस्कार कियुं, तिहियें तिंडि आवाज शुणि करि मिंडै पैटा मझ बच्चा खुश भौ करि हिलणा लगा। 45धन्य आ तु केईनी कि तीं प्रभुरी बोलोरिया गल्ला केरा पूरी भूंणैरा विश्वास केया!
मरियमेरा स्तुति-गीत
46तां मरियमै बौलु, “आंउ अपड़ै मंना किना प्रभुरी तारीफ काति। 47जां मिंडी आत्मा मिंडै बचांणारै परमेश्वरा किना खुश आ। 48केईनी कि तेनी मूं अपड़ि दासिरी दींनताय पन कृपा दृष्टि क्यौरी आ। अबै किना सारिया पीढ़िया मूंनी धन्य बोलणु। 49केईनी कि तैस सर्व शाक्तिमान परमेश्वरेरू नाँ पवित्र आ। जेनि मिंडै तेईनी बड़ै-बड़ै कम क्यौरै अत्तै। 50तेसैरी दया तैन्हांं सभनियांं पन जै तेसैरा डर मंनतै पीढ़ी किना पीढ़ी तेईनी बणि रींहथी। 51परमेश्वर अपड़ि शक्तिशाली सामर्थी ला बडै-बडै कम काता! तका, जै मैहणु अपड़ि समझि पन घमंड करींथ्यै परमेश्वरै सैक्यै हारियांणी छडै। 52परमेश्वरै, राजै तेन्हैरै अधिकारेरै सिंघासना किना थल्लै उतारी दित्तै जां गरीब मैहणु ऊंचै सिंघासना पन विशाय करि तेन्हांनि आदर दित्ता। 53तेनी भ्रुख्णै मैहणु अच्छी चीजै ला संतुष्ट कियै जां धनवान खाली हत्थै कढि लाय। 54परमेश्वरै इस्राएलिया केरी मजत केयि केईनी कि तेनी अपड़ा वायदा याद केया, 55जिहीं परमेश्वरै असेड़ै पूर्वजा यानि अब्राहमा जां तेसेरै वंशा सेईतै वायदा क्यौरा थ्या।” 56मरियम लगभग त्रा महीने इलीशिबाय सेईतै रैही, तेठां किना बाद सै अपड़ै घरेनी वापस चलि गैयि।
यूहन्ना बपतिस्मा दींणै बाऐरा जन्म
57तां इलीशिबायरा बच्चा पेईदा कानेंरा टैंम पूरा भुआ, जां तेसै पुत्रानि जन्म दित्ता। 58तेसेरै ग्रांवालै जां परिवार बाऐ ऐक्यु शुणि करि बौलु कि परमेश्वरै तैस पन बड़ी दया केयि, जां सैक्यै तेसै सेईतै खुश भुवै। 59अठवीं धियाड़ि सै बच्चैरा खतना कांना यै। सै तेसैरू नाँ तेसेरै बाबेरै नाँ पन जकर्याह रखणा चांहथै थ्यै। 60पण इलीशिबाय ऐतियु नाँ रखणा किना नमां केया जां बौलु, “ऐस छोकरुरू नाँ यूहन्ना रखा।” 61जां तैन्हैं तेसै सिंउ बौलु, “तिंडै परिवारा मझ ऐनि नाँईयें बा कौ बि ना।” 62फिरी तैन्हैं तैस छोकरूरै बाबै किना इशारा करि पुच्छु कि “तु ऐसेरू नाँ कितु रखणां चांहथा?” 63तेनी लिखणेरै तेईनी पट्टि मगि जां सभ मैहणु हैरान भौ ग्यै जां तेनी लिखु, “ऐस छोकरुरू नाँ यूहन्ना आ।” 64तैस टैमां जकर्याह फिरी दुबारे साफ-साफ जिभै ला बोलणा लगा, जां सै परमेश्वरैरा गुणगान कांना लगा। 65तेसेरै आसै-पासै रींहणारा मझ डर पेईदा भौ ग्या जां तैन्हांं सभनियांं गला केरी चर्चा यहूदिया प्रदेशेरै सारै पहाड़ी इलाके मझ फैली गैई, 66जां सभनियें शुणनै बाऐ अपड़ै-अपड़ै मंना मझ विचार करि-करि बौलु, “ऐक्या बच्चा केतिया भूंणा?” केईनी कि ऐ पक्की गल आ कि प्रभुरी सामर्थ तैस छोकरू पन थी।
जकर्याहैरा स्तुति गीत
67यूहन्नेरा बाबा जकर्याह पवित्र आत्माय ला भरी ग्या, जां तेनी ऐ बोलि करि भविष्यवाणी केयि; 68“इस्राएलेरै प्रभु परमेश्वरेरी स्तुति भुईया, केईनी कि सै अपड़ा मैहणुवां किनि या जां तेन्हैरा उद्धार केया, 69जां अपड़ै सेवक दाऊदेरै वंशा मझ असेड़ै तेईनी अक महान उद्धारकर्ता भेईजौरा। 70जिहीं ऐ तेनी बड़ै पेहिलै किना अपड़ै पवित्र भविष्य बौलणारा सिंउ बोलोरू थियु, 71कि तैस असै असैड़ा दुशमणा किना जां तैन्हांं सभनियांं बेइरिया केरी शक्ति किना बचाणै जै असु सिंउ नफरत कातै; 72कि सै असैड़ा पूर्वजा पन दया करि-करि अपड़ै पवित्र वायदै याद करिया। 73जै वायदा तैन्हैं असेड़ै पूर्वजा अब्राहमा सेईतै क्यौरा थ्या, 74-75कि सै असु असैड़ा दुशमणा किना बचाला, कि असै तेसेरै सांमणै पवित्राताय सेईतै प्रभुरी मर्जी सिंउ जिन्दगी भर निडर भौ करि तेसैरी सेवा कातै रिहा। 76जां तु हे बालक, परमप्रधानैरी भविष्यवाणी बोलणार भूंणा, केईनी कि तु प्रभुरै आघै-आघै चलैला जां तेसेरै ऐईंणेरै तेईनी मैहणुवां तियार करैला। 77तु परमेश्वरेरी प्रजायनि शिख्राला कि किहीं सै तेन्हैरा उद्धार कांनेरै तेईनी तेन्हैरै पाप माफ काता। 78जां परमेश्वरेरी दयाई ला, जिहीं दीह असुनि प्रगड़ु दींणैरै तेईनी चमकतु तीहिंयैं मसीह बि असु किनि स्वर्गा किना ऐईंणु। 79ताकि जै मैहणु पापा मझ जींतै, जां हमेशा मोउतिरै डरा मझ अत्तै, तेन्हांनि प्रकाश मेयि सकिया; ऐ प्रकाश असुनि तैस जीवना मझ अगुवाय करैला जै असुनि परमेश्वरा सिंउ शांति प्रदान काता।” 80जां सै बच्चा यूहन्ना कद-काठी मझ जां आत्मायरी शक्ति मझ मजबूत भूंता ग्या, जां मोटियूंणा किना बाद ज्यो तेईनी तेनी इस्राएलेरै मैहणुवां मझ अपड़ि सेवा शुरू ना केयि त्यो तेईनी सै बंणा मझ रिय्हा।
Currently Selected:
लूका 1: CDJNT
Highlight
Share
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
