मरकुस 16
16
यीशुरू दुबारे जींतियुंणु
(मत्ती 28:1-8; लूका 24:1-12; यूह. 20:1-10)
1जेख्णी आरामेरी धियाड़ि बिरती गैई, तां मगदल ग्राँईयेरी मरियम, जां याकूबेरी माँ मरियम, जां सलोमी खुशबूदार मसालै खरीदी लियै कि अईछी करि लासी पनि मईया। 2हफ्तेरी पेहिली धियाड़ि पिचारी सिंउ जेख्णी दीह निकोथियु, सै कब्रि पन यैई, 3जां ऐपु मझ बोलणा लगी, “असेड़ै तेईनी कब्रिरू द्वारा पना घौड़ कोस घैना?” 4जेख्णी तैन्हैं कब्रि धेरै तकाउ तैन्हैं घौड़ कब्रि किना घिरौरा तका, सै घौड़ बड़ा बडा थ्या। 5कब्रि अंतर गहि करि तैन्हैं अक जुवांन हच्छै लिकड़ै लाउरै देहिणै पासै बेठौरा लधा, जां बड़ी हैरान भुई। 6तेनी तैन्हांं सिंउ बौलु, “हैरान मेईं भुआ, तुवे यीशु नासरी, जै क्रूसा पन चाढ़ौरा थ्या, तैस ऐठि तोपती अत्ति। सै जींति गियौरा, ऐठि ना, तका ऐकेई ऐ सै जगा आ, जेठि सै रखौरा थ्या। 7पण तुवे गहा, जां तेसेरै चैलानि जां पतरसानि बोला कि तैस तुहां किना पेहिलै गलील प्रदेशनी गांहणु। जिहीं तेनी तुहांनि बोलोरू थियु, तुहां तैठि सै तकांणा।” 8जां सै निकई करि कब्रि किना नशि गेई; केईनी कि सै डरेरै मारै बड़ी घबराय थी गियोरी, जां कंपति थी जां तैन्हैं कोस सिंउ किछ ना बौलु, केईनी कि सै डरोरी थी।
मरियम मगदलीनी यीशु हैरा
(मत्ती 28:9,10; यूह. 20:11-18)
9ऐईत्वारेरी धियाड़ि भियग भूंतै यीशु जेख्णी मौरा मझांं जींति करि सभनियांं पेहिलै मरियमे लधा जै मदगल ग्राँईयां किना थी, जैस मझांं तेनी सत्त बुरी आत्माय कढोरी थी। 10तेसै गहि करि यीशुरै सउगियानि जै शौका मझ डुबोरै थ्यै, जां जै रूंतै थ्यै, तेन्हांनि ऐ खबर शुणाय। 11जां चैलै ऐ शुणि करि कि यीशु जींता, जां मरियमें सै लधा, विश्वास ना केया।
दुवें चैलै यीशु लधा
(लूका 24:13-35)
12ऐत किना बाद यीशु होरै रूपा मझ तैन्हैं मझांं दुवें चैलै लधा, जेख्णी सै ग्राँईयां धेरै गांहथै थ्यै। 13तैन्हैं वापस यरूशलेम शहरा मझ गहि करि होरनियांनि ऐ खबर शुणाय, पण तैन्हैं बि तेन्हैरा विश्वास ना केया।
ग्याहरै चैलै यीशु लधा
(मत्ती 28:16-20; लूका 24:36-49; यूह. 20:19-23; प्रेरि. 1:6-8)
14फिरी यीशु तैन्हांं ग्याराह चैलानि दर्शन दित्ता, जेख्णी सै रोटी खांणा बेठोरै थ्यै, जां यीशु मैहणुवां केरै लगातार अविश्वासेरी वजहि सिंउ जां मंनेरै कारण कठोर भूंणेरै तेईनी तांना मारा, केईनी कि जैन्हैं सै मुड़दा मझांं जींतियुंणा किना बाद बि लधौरा थ्या, तैन्हैं बि तैस पनि विश्वास ना केया। 15जां यीशु अपड़ा चैला सेईतै बौलु, “तुवे सारै संसारा मझ गहि करि सारी सृष्टिरै मैहणुवंनी खुशखबरिरा प्रचार करा। 16जै विश्वास करिया जां बपतिस्मा लिया तेसैरा ऐ उद्धार भूंणा, पण जै विश्वास ना करैला सै दोषी समझियुंणा। 17जां खुशखबरी पन विश्वास कांनारा मझ ऐक्यै चिन्ह भूंणै कि तैन्हांं मिंडै नाईंयें ला बुरी आत्माय कढणी, नवीं-नवीं भाषाय बौलणी, 18अगर तुवे कीड़ा चुकि लैलै जां अगर जेहर बि पी लैलै, तां बि तुवाड़ा कौ नुकसान ना भूंणा; तुवे बिमारा पन हत्थ लालै ता सै ठीक भौ गांहणैं।”
यीशुरू स्वर्गानि गांहणु
(लूका 24:50-53; प्रेरि. 1:9-11)
19तैन्हांं सेईतै गल्लै लांणा किना बाद परमेश्वर प्रभु यीशु स्वर्गानि लेई ग्या, जां अपड़ै सिंघासनेरै देहिणै पासै बिठाय दिता। 20जां चैलै यरूशलेम शहरा किना निकोहि करि हर ठाहरी प्रचार केया, जां प्रभु तैन्हांं सेईतै कम काता रिय्हा, जां चमत्कारी चिन्ह लुहाय करि तेनी मैहणुवंनी साबित कियु कि परमेश्वरैरा वचन सच्चा। आमीन।
Currently Selected:
मरकुस 16: CDJNT
Highlight
Share
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
