मरकुस 15
15
पिलातुसा सांमणै यीशु
(मत्ती 27:1-2,11-14; लूका 23:1-5; यूह. 18:28-38)
1भियगै पिचारी प्रधानयाजक जां यहूदी वुजुर्ग जां यहूदी शास्त्रियै जां सारी महासभाय सलाह करि-करि यीशु बंन्ही दिता, जां तैन्हैं सै लैई करि राज्यपाल पिलातुसेरै हत्था सोंपी दिता। 2तां पिलातुसै तैस किना पुच्छु, “क्या तु यहूदिया केरा राजा?” तेनी तेसनी जुबाव दिता, “तु ऐपु ऐ ता बोलता।” 3प्रधानयाजक तैस पन बड़ी सारिया गला केरा दोष लांतै थ्यै। 4ऐठणीरै तेईनी राज्यपाल पिलातुसै यीशु किना फिरी पुच्छु, “तका, ऐ ताउ पन केथ्रिया गला केरा दोष लांतै अत्तै, क्या तु कौ जुबाव ना दींता?” 5यीशु फिरी कौ जुबाव ना दिता; ऐनि वजहि पिलातुस बड़ा हैरान भुआ।
यीशुनि मृत्यु दण्डैरी आज्ञा
(मत्ती 27:15-26; लूका 23:13-25; यूह. 18:39; यूह. 19:16)
6हर साल फसहेरै त्यौव्हारेरै टैंमा ऐ रिवाज थ्या कि तैस धियाड़ी राज्यपाल पिलातुस कोसक्यै एकि केईदी जैस मैहणु चहींथ्यै तैस छडि दिईंथ्या। 7तैस टैंमा बरअब्बा नांईंऐरा अक मैहणु थ्या, जै कुछ होर्नियां विद्रोहिया सेईतै जैल्ही मझ थ्या, जैन्हैं रोमी सरकारिरै खिलाफ विद्रोहा मझ कुछ मैहणु मारी थ्यै छडोरै। 8जां भीड़ पिलातुसा किनि गहि करि तैस सिंउ प्रार्थना कांना लगी, कि जिहीं तु हमेशा असेड़ै तेईनी काता या तिहियें कर। 9पिलातुसै तेन्हांनि जुबाव दिता कि, “क्या तुवे चांहथै कि आंउ तुवाड़ै तेईनी यहूदिया केरै राजै छडि दियुं?” 10केईनी कि तैस पता थ्या कि प्रधानयाजक तैस सिंउ जलन करींथ्या तां सै पकड़ाउरा थ्या। 11पण प्रधानयाजके मैहणु भड़काय कि सै पिलातुसा किना यीशुरै बदलै बरअब्बै छडि दिया। 12ऐक्यु शुणि करि पिलातुसै तैन्हांं किना फिरी पुच्छु, “ता जैसनि तुवे यहूदिया केरा राजा बोलतै, तेसनी आंउ कितु करूं?” 13पण सै हौर जौरै-जौरै बोलणा लगै, “ऐस क्रूसा पन कीलै मारी करि चाढ़ी दिया!” 14पिलातुसै तैन्हांं सिंउ बौलु, केईनी, यीशु तुवाड़ु कितु बुरू आ क्यौरू? पण सै हौर जौरै-जौरै बोलणा लगै, “ऐस क्रूसा पन कीलै मारी करि चाढ़ी दिया!” 15तां पिलातुसै भीड़ि खुश कांनेरै तेईनी, बरअब्बा तेन्हैरै तेईनी छडि दिता, जां सिपाहियै यीशुनि कोड़ै लाय; तेठां बाद राज्यपालै पिलातुसै तेन्हांनि बौलु ऐस लैई गहा जां क्रूसा पन चाढ़ी दिया।
यीशुरा अपमान
(मत्ती 27:27-31; यूह. 19:2,3)
16फिरी पिलातुसेरै सिपाहियै यीशु किलै मझ (जेठि राज्यपाल पिलातुसैरा मुख्यालय आ) लै ग्यै, जां तैन्हैं सैनिका केरी अक बडी पलटन किट्ठी शदाय। 17तां तैन्हैं तेसैरा मजाक उडांणैरै तेईनी तैस पन बैंगनी रंगैरा कपड़ा लुवा जां कंडा केरू मुकट बंणाकरी तेसेरै शिरा पन लुवाउ, 18जां ऐक्यु बोलि करि तेसनी नमस्कार कांना लगै, “हे यहूदिया केरै राजा नमस्कार!” सै तेसैरू शिरा पन बांसेरै शोठै ला बांहथै थ्यै, जां तैन्हैं तेसैरी बेजती कांनेरै तेईनी तैस पन थुक्कु, जां जैंणु टंकि करि तेसनी नमस्कार कातै रिय्है। 19सै तेसैरू मुंडका पन शोठै बांहथै थ्यै, जां तैस पन थुकतै थ्यै, जां तेसनी आदर दींणैरा नाटक कातै तैस अघ्रियालीं झुकणा लगै। 20जेख्णी सै तेसैरा मजाक बंणा बेठै, ता तैस पंना बैंगनी लिकड़ै उतारी करि तेसेरै लिकड़ै लुवाय; जां फिरी सिपाहि यीशु क्रूसा पन चाढ़नेरै तेईनी नगरा किना भेईर लै ग्यै।
यीशु क्रूसा पन चाढ़ना
(मत्ती 27:32-44; लूका 23:26-43; यूह. 19:17-27)
21जेख्णी सै शहरा किना भेईनि गांहथै थ्यै, ता शमौन नाँईयेरा अक मैहणु, आस-पासेरै ग्राँईयां किना यरूशलेम शहरा मझ ऐईंता थ्या, सै कुरेनी शहरेरा थ्या जै उत्तर अफ्रीका मझ थ्या, ऐ मैहणु यहूदी समूँह मझांं थ्या जां भौ सकता फसहैरा त्यौव्हार मंनाणैरे तेईनी यरूशलेम शहरा मझ यौउरा थ्या। जां सै सिकन्दरेरा जां रूफुसेरा बब थ्या। सिपाहियै सै मजबूर केया कि सै क्रूस चुकि करि तैस जगायनी लै गहिया जेठि यीशु क्रूसा पन चाढ़ना। 22सिपाहि फिरी यीशु गुलगुत्ता नाँईयेरी जगाय पन जेसैरा मतलब खोपड़िरी जगा, तैस जगायनी लैई यै। 23फिरी सिपाहि यीशुनि मुर्र नामक दवा अंगूरेरै रसा मझ मिला करि दींणा लगै, जेनि ला सै दर्द ना महसूस करिया, पण तेनी सै रस ना पित्ता। 24तां फिरी तैन्हैं सै क्रूसा पन चाढ़ा जां तेसेरै लिकड़ा केरै तेईनी पर्ची सुट्टी, कि कोसनि कितु मेईया, जां सैकेई बंडि लियै।
25तैस टैंमा लगभग भियागेरै नाउ थ्यै बजौरै, जेख्णी यीशु क्रूसा पन चाढ़ा। 26सिपाहियै यीशुरै शिरा किना प्रंन क्रूसा पन अक फट्टी ला दित्ती। तैस पन यीशुरी क्रूसा पन चाढ़नेरी वजह लिखोरी थी जां सै ऐक्यु थियु लिखोरू; “यहूदिया केरा राजा।” 27तैन्हैं तैस सेईतै दो डाकु, अक तेसेरै देहिणै जां अक तेसेरै बाऐं पासै क्रूसा पन चाहढ़ै। 28ऐहीं-चारै पवित्र शास्त्रैरा वचन सच भौ ग्या जै मसीहरै बारै बोलींथ्या, “सै एकि अपराधी सैयि गिणियूंणा।” सै पूरा भुआ।
29जां बत्तै मझ गांहणारै शिर हिलाय-हिलाय करि तेसैरा अपमान जां निंदा की, “वाह! मंदर छिढांणे बाऐ, जां त्रियां धियाड़िया मझ बणांणै बाऐ! 30क्रूसा पना उतरि करि अपांणा बचा लै।” 31ऐनियैं हिसाबै प्रधानयाजक बि, यहूदी शास्त्रिया समैत, योकिया मझ तेसैरा मजाक उड़ा करि बोलतै थ्यै; ऐंनि होरै बचाय, पण अपांणा ना बचाईया। 32ऐ मैहणु जै इस्राएलेरा मसीह जां राजा भूंणैरा दावा करींथ्या अबै क्रूसा पना उतरि ऐईछिया, ताकि असै तैस तका करि विश्वास करि सकिया कि ऐ असैड़ा राजा आ। जां जै तैस सेईतै क्रूसा पन चाढ़ौरै थ्यै सै बि तेसैरी निंदा कातै थ्यै।
यीशुरै श्वांस गांहणै
(मत्ती 27:45-56; लूका 23:44-49; यूह. 19:28-30)
33धियाड़ि बारैह बजै सारा देशा मझ अंधारू भौ गियु, जै अंधारू लगभग धियाड़िरै त्रियें बजै तेईनी रिहु। 34त्रियें बजै आस-पास यीशु बड़ै जौरै हक दी करि बौलु, “इलोई, इलोई, लमा शब्कतनी?” जेसैरा मतलब ऐक्या आ, हे मिंडै परमेश्वर, हे मिंडै परमेश्वर, तीं आंउ केईनी छडि दिता? 35तैन्हांं मैहणुवां मझांं कुछ जै तैस नीड़ खड़ै थ्यै, तैन्हैं शुणु पण तैन्हांं तेठणिरी समझ ना यैई जां तैन्हैं योकिया सिंउ बौलु, “शुणा, सै भविष्यवक्तै ऐलिय्याहै स्वर्गा किना अपड़ि मजत कांनेरै तेईनी शदांता!” 36जां तैन्हांं मैहणुवां मझांं अक मैहणु खिट दी करि या, जां अक सपंज सिरकै मझ डुबा, जां बांसेरै शोठै पन रखि करि तेसनी चूसा जां बौलु, “ठैहरी लिया, तकांतै ऐलिय्याह ऐस उतांनैरै तेईनी ऐईंता कि ना।” 37तां यीशु जौरै चिंड दी करि मरि ग्या। 38जां सै मौट्टा पड़दा जै मंदरा मझ लटकौरा थ्या, जै सभनियांं परमेश्वरेरी उपस्थिति मझ ऐईंणा किना रोकींथ्या, सै प्रंना किना लै करि थल्लै तेईनी दुवां टुकड़ा मझ फटि ग्या। 39जै सूबेदार यीशुरै सांमणै खड़ा थ्या, जेख्णी तेनी ऐहीं-चारै तेसैरी चिंड शुणि जां तकाउ कि किहीं मरि ग्या, ता तेनी बौलु, “सचै ऐक्या मैहणु परमेश्वरैरा पुत्र थ्या।” 40केही जनेनी बि दूरां किना तकेंती थी, तैन्हांं मझ मरियम जै मगदेला नाँईयेरै शहरा किना थी, जां सलोमी जां मरियम जै हल्कै याकूबेरी जां योसेसैरी माँ थी। 41जेख्णी सै गलील प्रदेशा मझ थ्या, तां सै तैस पिचालीं चलींथी, जां तेसैरी सेवा-टैहल काति रिहींथी, जां होरी बड़ी जनेनी थी, जै तैस सिंउ यरूशलेम मझ यौउरी थी जां संन्हैरा भुआ ता ऐठणीरै तेईनी कि तियारिरी धियाड़ि थी, जै तैस सेईतै यरूशलेमा मझ यौउरी थी। सै बि दूरां किना तकांती थी।
यीशु कब्रि मझ दबि छडा
(मत्ती 27:57-61; लूका 23:50-56; यूह. 19:38-42)
42जैस धियाड़ि यीशु क्रूसा पन चाढ़ा, सै तियारिरी धियाड़ि थी, जेसैरा मतलब आ आरामेरी धियाड़ि किना पेहिलेरी अक धियाड़ि, यहूदी रिवाजेरै अनुसार संन्हैरा टैंम भूंतै कम ना करि सकतै। ऐठणीरै तेईनी जेख्णी दीह बुडि गियु, ता 43अरिमतियाहेरा रींहणार यूसुफ या, जै महासभायरै इज्जतदार ओहधै पन थ्या, जां ऐपु बि परमेश्वरानि तेसेरै राज्य मझ एकि राजै समान तकांणेरै इन्तजारा मझ थ्या। सै हिम्मत करि-करि पिलातुसा किनि ग्या जां यीशुरी लास मगि। 44पिलातुसनि हैरानी भुई कि सै योउतै छुईं मरि ग्या; जां तेनी सूबेदार शदा करि पुच्छा, “क्या यीशु सच मझ मरि ग्या?” 45जेख्णी तेनी सूबेदारा किना सारा पता करि लिया, तां लास यूसुफनी दिवा दित्ती। 46तां यूसुफै मलमलैरी अक चादर खरीदी, जां लास उतारी करि तैस चादरी मझ लपैटि, जां एकि कब्रि मझ जै चट्टानी मझ खणौरी थी तेत मझ रखि, जां कब्रिरै दुवारा पनि अक बड़ा बडा घौड़ रखि दिता। 47मगदल ग्राँईंयेरी मरियम जां योसेसैरी माँ मरियम तकेंती थी कि सै लास कोठि आ रखौरी।
Currently Selected:
मरकुस 15: CDJNT
Highlight
Share
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
