मरकुस 14
14
यीशु मांनेरै तेईनी साजिश
(मत्ती 26:1-5; लूका 22:1,2; यूह. 11:45-53)
1दुवां धियाड़िया किना बाद मैहणु फसह जां अखमीरिरी रोटिरा त्यौव्हार मंनाणनी तियार थ्यै। तैन्हांं धियाड़िया प्रधानयाजक जां यहूदी शास्त्री ऐसै गलेरी तलाशी मझ थ्यै कि, यीशु किहीं धोखै सिंउ पकड़ी करि मारी सुटियो; 2पण सै योकिया सिंउ बोलतै थ्यै, “असु त्यौव्हारेरी धियाड़ि ऐ कांनु ठीक ना,” केईनी कि अगर असै ऐहीं करेलै ता, “मैहणुवां असु पनि बड़ा गुस्सा कांना जां दंगा जादा ना भौ गहिया।”
बैतनिय्याह मझ यीशुरा स्वागत
(मत्ती 26:6-13; यूह. 12:1-8)
3जेख्णी यीशु बैतनिय्याह ग्राँ मझ शमौन कोढ़िरै जै यीशु कोढ़ा किना ठीक क्यौरा थ्या, तेसेरै घरै रोटी खांणा बेठौरा थ्या, तां अक जनानि संगमरमरैरू बोत्लू मझ जटामांसिरा बड़ा कीमति शुद्ध खुशबूदार तैल लै करि यैई; जां बोत्लू भंनि करि तैल तेसैरू शिरा पन मयि दिता। 4पण जेत्थरै मैहणु तैठि बेठोरै थ्यै तैहां मझियें किछ मैहणु गुस्सै भौ ग्यै जां हौरा मैहणुवां सिंउ बोलणा लगै, “तेनी ऐ खुशबूदार तैल खराब केईनी केया? 5केईनी कि ऐ तैल त्रा शाउ सिक्का (एकि साला किना जादी मजूरी) मझ बैचि करि तैन्हांं पेईंसा गरीबा मझ बंडि सकींथ्यै।” ऐठणीरै तेईनी सै तेसनी बड़ी जादा झिड़खै दींणा लगै। 6यीशु बौलु, “ऐसै छडि दिया” “ऐस केईनी अत्तै सतांतै? ऐनि ता मूं सिंउ खरू क्यौरू आ। 7गरीब हमेशा तुहां सेईतै बेश्तै जां तुवे जेख्णी चहिया ता तैन्हांं सिंउ खरू करि सकतै; पण आंउ हमेशा तुहां सेईतै ना रींहणा। 8जै किछ तेसेरै बोलै भूंतु थियु, तेसै कियु; तेनी मिंडै दबणेरी तियारी कांना किना पेहिलै मिंडै शरीरा पन खुशबूदार तैल मयि दिता। 9आंउ तुहांनि सच बोलता कि सारै संसारा मझ जेठि-कोठि मसीहरी खुशखबरिरा प्रचार भौला, तैठि तेसेरै ऐस कंमेरी चर्चा बि ऐस जनानिरी यादि मझ भूंणी।”
यहूदैरा यीशु सेईतै विश्वासघात
(मत्ती 26:14-16; लूका 22:3-6)
10फिरी यहूदा इस्करियोती जै बाराह चैला मझ अक थ्या, तेनी प्रधानयाजका किनि गहि करि बौलु कि यीशु पकड़वांणा मझ आंउ तुवाड़ी मजत करैला। 11सै ऐक्यु शुणि करि खुश भुवै, जां यहूदेनि ऐसेरै बदलै पेईंसै दींणैरा वायदा केया; जां यहूदा यीशु पकड़वाणैरे तेईनी तैस पन नजर रखणा लगा।
चैला सेईतै फसहैरी लाष्ट धाम
(मत्ती 26:17-25; लूका 22:7-14; लूका 22:21-23; यूह. 13:21-30)
12अखमीरी रोटिरै त्यौव्हारेरी पेहिली धियाड़ि, जैत मझ सै फसहैरा बलिदांन करींथ्यै, तेसेरै चैलै तैस किना पुच्छु, “तु कोठि चांहथा कि असै तिंडै तेईनी फसहैरी धाम खांणैरी तियारी करिया?” 13तेनी अपड़ै चैला मझां दुवांनि ऐक्यु बोलि करि भेईजै, “यरूशलेम शहरा मझ गहा, जां अक मैहणु जेनि पांणिरा घड़ा चुकोरा भूंणा तुहांनि मेईंणा, तैस पिचालीं गांहणु; 14जां सै मैहणु जैस घरा मझ गहिया, तैस घरेरै मालका सिंउ बोलणु, ‘असैड़ा गुरू बोलता, कि मेहमाना केरा कमरा कोठि आ, जेठि आंउ अपड़ा चैला सेईतै फसहैरी धाम खऊं?’ 15घरेरै मालका तुहांनि अक सजा-सजाउरा जां तियार क्यौरा प्रनियां कमरा लुहाई दींणा, जां तैठि असेड़ै तेईनी तियारी करै।”
16फिरी दो चैलै निकोहि करि शहरा मझ यै, जिहीं यीशु तैन्हांं सिंउ बोलोरू थियु, तिहियें भूं; जां फसहैरी धाम तियार केयि। 17जेख्णी संन्हैरा भुआ, ता यीशु बाराह चैला सेईतै या। 18जेख्णी सै रोटी खांतै थ्यै, तां यीशु बौलु, “आंउ तुहां सिंउ सच-सच बोलता, कि तुहां मझियां एकि जै मूं सिंउ रोटी खांतै अत्तै, आंउ दुशमणा केरै हत्था पकडवांणा।” 19चैला पन उदासी छा गैई जां सै अक-अक करि यीशु किना पुछणा लगै, “क्या सै आंउ आ?”
20यीशु चैला सिंउ बौलु, “सै बाराह चैला मझांं अक आ, जै मूं सेईतै कटोरै मझ रोटी डुबांता। 21केईनी कि मैहणुरा पुत्र मतलब आंउ ता मरनारा जिहीं पवित्र शास्त्रा मझ भविष्यवक्तै मिंडै बारै मझ शुणाउरू आ, पण तैस मैहणुनी बड़ी भयानक सजा मेईंणी जैस मैहणुरा पुत्र मतलब आंउ पकडवांणा! अगर तैस मैहणुरा जन्म ना भूंता भौरा, ता तेसेरै तेईनी बधिया थियु।”
चैला सेईतै प्रभु भोज
(मत्ती 26:26-30; लूका 22:14-20; 1 कुरि. 11:23-25)
22जां जेख्णी सै खांतै थ्यै, यीशु रोटी लैई, जां परमेश्वरैरा धन्यवाद केया, फिरी तेनी रोटिरै टुकड़ै करि-करि अपड़ा चैलानि दित्तै जां तेन्हांनि बौलु, “ऐ रोटी लिया खा, ऐ मिंडा शरीर आ।” 23फिरी तेनी अंगूरा केरै रसैरा कटौरा लै करि परमेश्वरैरा धन्यवाद केया, जां कटौरा तेन्हांनि दिता; जां तैन्हैं सभनियें तेत मझांं पितु। 24तेनी चैला सिंउ बौलु, “ऐ अंगूरा केरा रस वायदेरा मिंडा खून आ, जै मता मैहणुवां केरै तेईनी बहायोउरा। 25आंउ तुहां सिंउ सच बोलता, कि अंगूरेरा रस तैस धियाड़ी तेईनी ऐहीं फिरी कदि ना पीला; जेख्णी तेईनी कि आंउ परमेश्वरेरै राज्य मझ नवाँ अंगूरेरा रस ना पियूं।” 26तां यींशु जां तेसेरै चैलै परमेश्वरेरी स्तुति की जां यरूशलेम शहरा किना भेईर चलि गियै जां जैतूनेरै पहाड़ा पनि ग्यै जै कि तैठि सेईतै थ्या।
पतरसेरी मुकरी गांहणैरी भविष्यवाणी
(मत्ती 26:31-35; लूका 22:31-34; यूह. 13:36-38)
27जेख्णी सै जैतून पहाड़ा पनि चलोरै थ्यै, तां यीशु चैला सिंउ बौलु, “तुहां सारा मूं छडि करि नशि गांहणु, केईनी कि पवित्र शास्त्रा मझ लिखोरू आ: कि मूं सैक्या मैहणु, मारी छडणा जै मिंडै मैहणुवां केरी पुव्हाला सैयि देखभाल, काता, जां सै भ्रैडा सैयि तित्तर-भित्तर भौ गांहणै। 28पण परमेश्वरा आंउ मुड़दा मझांं जीतेंना तेठां किना बाद मूं तुहां किना पेहिलै गलील प्रदेशनी चलि गांहणु।” 29पतरसै तैस सिंउ बौलु “अगर सारै ताउ छडि करि चलि बि गाहलै, पण आंउ ना छडि सकता।” 30यीशु पतरसा सिंउ बौलु, “आंउ तुहां सिंउ सच बोलता, कि आज ऐ ऐसै राती कुखडै़री दो बार बांगै दींणा किना पेहिलै, तांउ त्रा बारी मूं किना मुकरी गांहणु।” 31पण तेनी होरू बि जौर दी करि बौलु, “अगर मूं ताउ सेईतै मरनुं बि पुईया तां बि आंउ तिंडा नमां कदि ना करैला।” होरनियें सभनियें बि ऐहीं बौलु।
गतसमनी मझ यीशुरी प्रार्थना
(मत्ती 26:36-46; लूका 22:39-46)
32फिरी यीशु जां तेसेरै चैलै गतसमनी नाँईयेरै बगीचै मझ यै जां तेनी अपड़ा चैलानि बौलु, “ऐठिऐ बेशि रिय्हा, ज्यो तेईनी आंउ प्रार्थना काता।” 33जां सै पतरसा, याकूबा, जां यूहन्ने ऐपु सेईतै लै ग्या; जां सै बड़ा परेशान भूंणा लगा, 34जां तेन्हांनि बौलु, “मिंडा मंन बडा उदास आ, ऐहीं आ लगतु जिहीं मिंडै प्रांण चलि गांहणै, तुवे ऐठि रुका, जां बियुझै रिय्हा।” 35फिरी सै दिक तिया आघै गहि करि धरती पनि जेणुवां केरै भारा बेशि करि प्रार्थना कांना लगा, हे पिता अगर भौ सकिया ता ऐ दुखेरी घड़ि मूं किना टयि गहिया, 36जां बौलु, “हे अब्बा, हे पिता, ताउ किना सभ किछ भौ सकतु। ऐस दुखा किना मूं बचा लै जैस आंउ भोगणै वा, तां बि जिहीं आंउ चांहथा तिहीं ना, पण जै तु चांहथा तिहीं भुईया।” 37फिरी यीशु वापस या जां तैन्हांं त्रईयोआ झुलोरै तका करि शमौन पतरसनि बौलु, “हे शमौन तु झुलोरा? क्या तु अक घंटा बियुझा ना बेशि सकींथ्या? 38बियुझै जां प्रार्थना कातै रिहा कि तुवे परीक्षाईरा सांमना करि सकिया। मंन ता तियार आ, पण शरीर कमजौर आ।”
39फिरी यीशु चलि ग्या, जां गहि करि सैकेई ऐ प्रार्थना की 40जां फिरी अईछी करि तेनी त्रईयो चैलै झुलोरै तकाय, केईनी कि तेन्हैरै टीरा मझ निंदर योउती जादा थी कि तेन्हैरै टीरै ना थ्यै खुल्ते जां ना थियु बुझियूंतु कि तेसनी कितु जुबाव दींणा चेहिंथा। 41फिरी सै त्रीं बारी प्रार्थना कांननी ग्या जां वापस अईछी करि बौलु, तुवे अबै बि झुलि करि आराम अतै कातै? बस! टैंम अईछी गियौरा! तका, मैहणुरा पुत्र मतलब आंउ पापिया केरै हत्था पकड़ायूंणा। 42उठा, चला! तका, मूं पकड़वाणै वा नीड़ अईछी ग्या।
यीशु धोखै सेईतै पकड़वा (मत्ती 26:47-56; लूका 22:47-53; यूह. 18:3-12)
43यीशु ऐहीं बोलताऐ थ्या कि यहूदा जै बाराह चैला मझांं अक थ्या, ऐपु सेईतै प्रधानयाजका जां यहूदी वुजुर्गा जां यहूदी शास्त्रिया केरी अक बड़ी बडी भीड़ लै करि तेसै टैंमा अईछी पुज्जा, जै तलवार जां शोठै लैई करि यौउरै थ्यै। 44तैस पकड़वांणारै तेन्हांनि शुणा दितोरू थियु कि जै मूं गये प्यारिये लांणा सैहै यीशु भूंणा, तैस पकड़ी करि सावधानी सेईतै लैई गहि। 45जेख्णी यहूदिया जां मैहणुवां केरी भीड़ तैस किनि पुज्जी, तां यहूदा इकदम यीशु किनि गिया जां बौलु, “हे गुरू!” जां सै गये प्यारिये ला। 46तां तैन्हैं यीशु घैरी करि पकड़ी लिया। 47तैन्हैं मझियें जै चैलै तैस सेईतै खड़ै थ्यै, एकि तलवार कढि करि महायाजकेरै दासा पन चला दित्ती, जां तेसैरा कंन बढि दिता। 48यीशु तैन्हांं सेईतै बौलु, “क्या तुवे डाकु समझि करि मूं पकड़नेरै तेईनी तलवार जां शोठै लै करि यौउरै अत्तै? 49आंउ ता रौज मंदरेरै आंगणा मझ तुहां सेईतै बेशि करि उपदेश दिईंथ्या, जां तुहैं तेख्णी आंउ ना पकड़ा पण ऐक्यु ऐठणीरै तेईनी भूं कि पवित्र शास्त्रा मझ जै किछ लिखोरू आ सै पूरू भुईया।” 50ऐत पन सारै चैलै तैस छडि करि नशि ग्यै। 51अक जुवांन सिर्फ चादर लपैटि करि तैस पिचालीं- पिचालीं चलौरा थ्या; जेख्णी मैहणुवें सै पकड़ा। 52पण सै चादर छडि करि नग्गा नशि ग्या।
यीशु महासभाईरै सांमणै
(मत्ती 26:47-56; लूका 22:47-53; यूह. 18:3-12)
53फिरी सै यीशु महायाजकेरै घरेनी लै गियै; जां सारै प्रधानयाजक जां यहूदी वुजुर्ग जां यहूदी शास्त्री तैस किनि किठै भौ ग्यै। 54पतरस दूरांऐ किना तैस पिचालीं-पिचालीं महायाजकेरै आंगणा अंतर तेईनी ग्या, जां पेहरेदारा सेईतै बेशि करि आग सैकणा लगा। 55प्रधानयाजक जां सारी महांसभा यीशु मांनेरै तेईनी तेसेरै विरोधा मझ गवाहि तोपतै थ्यै, पण कौ गवाहि ना मेईं। 56केईनी कि बड़ै सारै तेसेरै खिलाफ झूठी गवाहि दींतै थ्यै, पण तेन्हैरी गवाहि अक जेतेई ना थी। 57तां किछ मैहणुवें उठिकरि तेसेरै खिलाफ ऐकेयि झूठी गवाहि दित्ती, 58“असुवें ऐक्या ऐक्यु बोलता शुणौरा, ‘मूं ऐ हत्थै ला बणाउरा मंदर छिढायि दींणा, जां त्रियां धियाड़िया मझ हौरा बणांणा, जै हत्थै ला ना भूंणा बणाउरा।’ ” 59ऐत पन बि तैन्हांं केरी गवाहि अक जेतेई ना निकोत्थी।
60तां महायाजकै बिच मझ खड़ै उठिकरि यीशु किना पुच्छु; “ऐ मैहणु तिंडै बारै मझ कितु गवाहि अत्तै दींतै? तु कोई जुबाव ना दींता?” 61पण सै चुप-चाप रिय्हा, जां किछ जुबाव ना दिता। महायाजकै तैस किना फिरी पुच्छु, “क्या तु महामहिम परमेश्वरैरा पुत्र मसीह आ?” 62प्रभु यीशु बौलु, “आंउ आ, जां तुहां मैहणुरा पुत्र मतलब आंउ सर्वशक्तिशालि परमेश्वरेरै देहिणै बेठोरै, जां सुरगेरै बदआ पन ऐईंता तकांणा।” 63तां महायाजकै गुस्सै मझ अपड़ा कौट छैकि करि बौलु, “अबै असु कोसक्यै होरै गवाहिरी कितु जरूरत आ?” 64केईनी कि तुहैं शुणियें लियौरू आ कि ऐनि परमेश्वरेरै खिलाफ निंदा केयि। ऐठणीरै तेईनी तुवाड़ा कितु फैसला? तैन्हैं सभनियें बौलु, यीशु दोषी थ्या जां मांनेरै काबिल आ। 65तां किछ मैहणु यीशु पन थुकणा लगै, कौ तेसैरू मुँह ढकणा लगै जां मुक्क माना लगै, किछ तैस सेईतै बोलणा लगै, “अगर तु अक भविष्यवक्ता, ता असुनि शुणा कि तु कुनि मारा!” जां सिपाहिये जैन्हैं सै पकड़ोरा थ्या, तैस पनि पकड़ी करि थप्पड़ मारै।
पतरसेरू मुकरियूंणु जां रूंणु
(मत्ती 26:69-75; लूका 22:56-62; यूह. 18:15-18,25-27)
66जेख्णी पतरस महायाजकेरै घरा किना भेईर आंगणा मझ थ्या ता महायाजकेरै घरा मझ कम कानारी अक दासी तैस किनि यैई, 67जां पतरसा आग सैकतै तका करि, तैस धेरै घूंरी करि तकाउ जां बोलणा लगी, “तु बि ता तैस नासरी यीशु सेईतै थ्या।” 68पण सै मुकरी ग्या जां बौलु, “आंउ ना जांणता जां ना संमझता कि तु कितु आ बोलती।” फिरी सै भेईर गयि मझ चलि ग्या; जां कुखड़ै बांग दित्ती। 69सै दासी तैस तका करि तैन्हांं सिंउ जै सेईतै खड़ै थ्यै, फिरी बोलणा लगी, “ऐक्या तैन्हांं मझियां अक आ।” 70पण सै फिरी मुकरी ग्या। थोड़े टैंमा बाद तैन्हैं जै तैस किनि नीड़ खड़ै थ्यै फिरी पतरसनि बौलु, “पक्का तु बि तैन्हांं मझांं अक आ; केईनी कि तु गलीली बि आ।” 71पण सै अपड़ै आपानि कोसणा जां कसम खांणा लगा, कि आंउ तैस मैहणु ना जांणता जेसेरै बारै मझ तुवे बोलतै अत्तै। केईनी कि परमेश्वर जांणता कि आंउ सच बोलता, अगर ऐस मझ थोड़ु बि झूठ आ ता परमेश्वर मूनी सजा दिया। 72तां तेसै टैंमा कुख्ड़ै दुबारी बांग दित्ती। पतरसा यीशुरी बोलोरी सै गल याद यैई, कि “कुख्ड़ेरी दो बारी बांग दींणा किना पेहिलै तांउ त्रा बारी मिंडा नमां कांना।” सैक्या ऐसै गलै सौचि करि दुखा मझ रूंणा लगा।
Currently Selected:
मरकुस 14: CDJNT
Highlight
Share
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
