लूका 3
3
यूहन्ना बपतिस्मा दींणै बाऐरा संदेश
1रोम देशेरै सम्राट तिबिरियुसेरै राज्यरा पन्द्रुहां साल थ्या, पुंन्तियुस पिलातुस यहूदिया प्रदेशेरा राज्यपाल थ्या, हेरोदेस गलील प्रदेशेरा राजा जां तेसैरा भाई फिलिप्पुस इतूरैया जां त्रखोनीतिस इलाकेरा राजा जां लिसानियास अबिलैने इलाकेरा राजा थ्या। 2तैन्हांं धियाड़िया मझ हन्ना जां कैफा मुख्य याजक थ्यै, ता तैस टैंमा परमेश्वरैरा सन्देश सुनसान जगाय मझ जकर्याहैरै पुत्रा यूहन्ना किनि पुज्जा। 3जां सै यरदन नदिरै आस-पासेरै सुनसान इलाके मझ ऐईछी करि पापा केरी माफिरै तेईनी, मंन फैरनेरै बपतिस्मेरा प्रचार कांना लगा। 4जिहीं यशायाह भविष्यावक्तै यूहन्ना बपतिस्मा दींणाणैरै बारै मझ बड़ै पेहिलै ऐ सभ किछ बोलि छडोरू थियु कि, “सुनसान जगाय किना अक हक दींणारै मैहणुरी आवाज शुणीति आ, कि प्रभुरा स्वागत कांनेरै तेईनी अपड़ै आपा तुवे तियार करा। जिहीं मैहणु कोसक्यै खास मैहणुरै तेईनी बत्तेरी साफ-सफाई कातै। 5हर-अक गढा भरियूंणा, जां हर-अक पहाड़ जां उथड़ि जगाय पधरी करियूंणी जां जै त्रेढि-बाउरी जगाय जां उथड़ि-नीठी बत्तै अत्ति सै खुलि-बिल्ही जां सिधि बणायुंणी। 6जां सभनियांं मैहणुवां परमेश्वरैरा उद्धार तकाणां।”
7जै बडी भीड़ तैस किना बपतिस्मा लींणैरै तेईनी अईछींथी, तैन्हांं सिंउ सै बोलींथ्या, “तुवे मैहणु जेहरीला कीड़ा सैयि बुरै अत्तै, तुवाड़ु ऐ सौचणु बेकार आ कि सिर्फ बपतिस्मा लींणै ला ऐ तुवे अपड़ै पापा केरै तेईनी परमेश्वरेरी सजाय किना बचि गांहणै। 8अगर तु सही मझ अपड़ै पापा किना मंन फैरता, ता अपड़ै अच्छै कमैं ला तैन्हांं लुहा; ऐस गलतफहमी मझ मेईं रिय्है कि अब्राहम असैड़ा पूर्वज आ; केईनी कि आंउ तुहां सिंउ बोलता, कि परमेश्वर ऐन्हां घौड़ा किना अब्राहमेरै तेईनी वंश पेईदा करि सकता। 9जां जिहीं अक मैहणु अपड़ि कुराहड़ी ला जैस बुटा पन ऐयिड़ै फल लगतै, तैस बढि करि आगी मझ फुकणनि तियार आ, ठीक तिहियें परमेश्वर बि तुहां तुवाड़ै पापा केरै तेईनी सजा दींणनी तियार आ।”
10तां मैहणुवें तैस किना पुच्छु, फिरी असुवां परमेश्वरेरी सजाय किना बचणेरै तेईनी कितु कांनु चेहिंथु? 11यूहन्ने तेन्हांनि जुबाव दिता, “जैस किनि दो कुरतै अत्तै, सै अक कुरता तेसनी दी दिया जैस किनि अक बि कुरता ना, जां जैस किनि रोटी आ, सै बि होरै सिंउ जैस किनि ना तैस सिंउ बंडि करि खईया।” 12जां चुंगी लींणै बाऐ बि बपतिस्मा लींणा यै, जां तैस किना पुच्छु, “हे गुरू! असु कितु कांनु?” 13तेनी तैन्हांं सिंउ बौलु, “जै तुवाड़ै तेईनी सरकारी शुणाउरू आ, तेत किना ज्यादा कर मेईं लिया।” 14जां सिपाहियै बि तैस किना ऐ पुच्छु, “असु कितु कांनु?” तेनी तैन्हांं सिंउ बौलु, “कोस बि डरा-धमका मेईं, ना कोसक्यै पन झूठा दोष लांतै, जां अपड़ि तन्खाई मझ खुश रेय्ही।”
15जेख्णी मैहणु मसीह ऐईंणेरी भायि बेठोरै थ्यै, ता तैन्हांं मझांं किछ मैहणु अपड़ै-अपड़ै मंना मझ यूहन्नेरै बारै मझ सौचणा लगै कि सै मसीहा भौ सकता। 16तां यूहन्ने तैन्हांं सभनियांं सिंउ बौलु, कि “आंउ ता तुहांनि पाणी ला बपतिस्मा दींता, पण जै मूं किना बाद प्रचार कांनेरै तेईनी ऐईंणार आ, सै मूं किना बड़ा शाक्तिशाली आ; आंउ ता ऐठणीरै बि काबिल ना कि तेसेरै बूटा केरै तस्मै खोलि सकूँ, तैस तुहांनि पवित्र आत्माय जां आगी ला बपतिस्मा दींणा। 17यीशु तैस मैहणु सैयि आ जेसेरै हत्था मझ शुप आ, जां जेनि ला सै दांणै पलाला किना अलग काता, जां अपड़ै खलिआंना किना साफ क्यौरू सारू अनाज किठु करि-करि तूणियां मझ भरतै जां पलाल आगी मझ फुकि दींतै, तिहियें परमेश्वरा बि धर्मी मैहणु अधर्मियां किना अलग करि-करि स्वर्गनि लै गांहणै जां अधर्मी पलाला सैयि तैस आगी मझ सुटणै जै आग कदि ना बुझणी।” 18जां सै बड़ी सारी गलै शुणा करि मैहणुवंनी खुशखबरी शुणांता रिय्हा।
हेरोदेसेरै जरियै यूहन्ना जैल्ही मझ सुटणा
(मत्ती 3:13-17; मरकुस. 1:9-11)
19पण जेख्णी यूहन्ने गलील प्रदेशेरै इलाकेरै राजै हेरोदेसानि तेसेरै भाई फिलिप्पुसेरी लाड़ी हेरोदियासैरै बारै जां सभ कुकर्मा केरै बारै जै तेनी क्यौरै थ्यै, तेसनी शुणांउणी की, 20ऐठणीरै तेईनी हेरोदेस राजै ऐन्हां सभनियांं किना बडा कुकर्म बि केया कि तेनी यूहन्ना पकड़वा करि जैल्ही मझ सुटि दित्ता।
यीशुरा बपतिस्मा
21जेख्णी सभनियें मैहणुवें बपतिस्मा ल्या जां यीशु बि बपतिस्मा लै करि प्रार्थना काता थ्या, ता सुरग खुलि गियु। 22जां पवित्र आत्मा शरीरेरै रूपा मझ कबूतरा सैयि तैस पन उतरा, जां सुरगा किना ऐ आवाज यैई कि “तु मिंडा प्यारा पुत्र आ, जां आंउ ताउ किना बड़ा खुश आ।”
यीशुरी वंशावली
(मत्ती 1:1-17)
23जेख्णी यीशु ऐपु उपदेश कांना लगा, ता तैस टैंमा लगभग सै तिहा सालैरा थ्या जां मैहणु तैस (जिहीं मंनतै) यूसुफैरा पुत्र मंनीथ्ये, जां यूसुफ ऐलिरा पुत्र थ्या। 24एली मतातैरा पुत्र थ्या, जां मतात लेविरा पुत्र थ्या, जां लेवी मलकीरा पुत्र थ्या, मलकी यन्नाऐरा पुत्र थ्या, जां यन्ना यूसुफैरा पुत्र थ्या। 25यूसुफ मतित्याहैरा पुत्र थ्या, जां मतित्याह अमोसैरा पुत्र थ्या, जां आमोस नहूमैरा पुत्र थ्या, जां नहूम असल्याहैरा पुत्र थ्या, जां असल्याह नग्गईरा पुत्र थ्या 26नग्गई मातैरा, जां मात मतित्याहैरा पुत्र थ्या, जां मतित्याह शिमिरा पुत्र थ्या, जां शिमि योसेखैरा पुत्र थ्या, जां योसेख योदाहैरा पुत्र थ्या। 27योदाह यूहन्नेरा पुत्र थ्या, जां यूहन्ना रेसाऐरा पुत्र थ्या, जां रेसा जरूब्बाबेलेरा पुत्र थ्या, जां जरुब्बाबेल शालतियेलैरा पुत्र थ्या, जां शालतियेल नेरीरा पुत्र थ्या, 28जां नेरी मलकीरा पुत्र थ्या, जां मलकी अद्दीरा पुत्र थ्या, जां अद्दी कोसामैरा पुत्र थ्या, जां कोसाम एल्मदामैरा पुत्र थ्या, जां एल्मदाम एरैरा पुत्र थ्या। 29एर यीशुरा पुत्र थ्या, जां यीशु एलीएजेरैरा पुत्र थ्या, जां एलीएजेर योरीमैरा पुत्र थ्या, जां योरीम मतातैरा पुत्र थ्या जां मतात लेविरा पुत्र थ्या।
30लेवी शमौनैरा पुत्र थ्या, जां शमौन यहूदैरा पुत्र थ्या, जां यहूदा यूसुफैरा पुत्र थ्या, जां यूसुफ योनानैरा पुत्र थ्या, जां योनान एल्याकीमैरा पुत्र थ्या, 31जां एल्याकीम मलेआहेरा पुत्र थ्या, जां मलेआह मनाहैरा पुत्र थ्या जां मिन्नाह मत्तताहैरा पुत्र थ्या जां मत्तता नातानैरा पुत्र थ्या जां नातान दाऊदेरा पुत्र थ्या। 32दाऊद यिशैरा, जां यिशै ओबैदैरा पुत्र थ्या, जां ओबेद बोअजैरा पुत्र थ्या, जां बोअज सलमोनैरा पुत्र थ्या, जां सलमोन नहशोनेरा पुत्र थ्या 33जां नहशोन अम्मीनादाबेरा पुत्र थ्या, जां अम्मीनादाब अरनीरा पुत्र थ्या, जां अरनी हिस्रोनेरा पुत्र थ्या, जां हिस्रोन फिरिसैरा पुत्र थ्या जां फिरिस यहूदैरा पुत्र थ्या। 34यहूदा याकूबेरा पुत्र थ्या, जां याकूब इसहाकैरा पुत्र थ्या, जां इसहाक अब्राहमेरा पुत्र थ्या, जां अब्राहम तेरहैरा पुत्र थ्या, जां तेरह नाहोरैरा पुत्र थ्या।
35नाहोर सरूगैरा पुत्र थ्या, जां सरूग रऊऐरा पुत्र थ्या, जां रऊ फिलिगैरा पुत्र थ्या, जां फिलिग एबेरैरा पुत्र थ्या, जां एबेर शिलहैरा पुत्र थ्या, 36जां शिलह केनानेरा पुत्र थ्या, जां केनान अरफक्षदैरा पुत्र थ्या, जां अरफक्षद शेमैरा पुत्र थ्या, जा शेम नुहैरा पुत्र थ्या, जा नूह लेमेकैरा पुत्र थ्या। 37लेमेक मथूशिलहेरा पुत्र थ्या, जां मथूशिलह हनोकैरा पुत्र थ्या, जां हनोक यिरिदेरा पुत्र थ्या, जा यिरिद महललेलेरा पुत्र थ्या, जां महललेल केनानेरा पुत्र थ्या, 38जां केनान एनोशैरा पुत्र थ्या, जां एनोश शेतैरा पुत्र थ्या, जां शेत आदमैरा, जां आदम परमेश्वरैरा पुत्र थ्या।
Currently Selected:
लूका 3: CDJNT
Highlight
Share
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
