लूका 4
4
यीशुरी परीक्षा
1फिरी यीशु पवित्र आत्माय ला भरी करि यरदन नदिरै किनारै किना वापस या: तां पवित्र आत्मा तैस सुनसान जगाय मझनि लै ग्या जां चाहिया धियाड़िया चाहिया रातिया तेईनी शैतानें तैठि तेसैरी परीक्षा की; 2शैतान तेसैरी परीक्षा काता रिय्हा तैन्हांं धियाड़िया तेईनी तेनी भ्रुख्णै-त्रिशणै बेशि करि उपवास केया जां जेख्णी सै धियाड़ि पुरी गेई तां तैस भ्रुख लगी। 3ता फिरी शैतानें नीड़ अईछी करि तेसनी बौलु, “अगर तु परमेश्वरैरा पुत्र आ ता, ऐन्हां घौड़ानि हुक्म दी करि साबित कर कि ऐ रोटी बणि गहिया, ताकि तु खा सकिया।” 4यीशु तेसनी जुबाव दिता, पवित्र शास्त्रा मझ लिखोरू आ, कि “मैहणु सिर्फ रोटी ला ऐ ना जींता रींहणा।” 5तां शैतानै सै लै न्या जां तेसनी इकदम संसारेरी सारी धन दौलत लुहाय करि 6जां तैस सिंउ बौलु, आंउ ऐक्या सारा अधिकार, जां ऐठणीरी धन-दौलत ताउनि दैला, केईनी कि सै मूंनी दितोरू आ, जां आंउ जैसनि चांहथा तेसनी दी सकता। 7ऐठणीरै तेईनी अगर तु मूंनी प्रणाम करैला, ता ऐ सभ तिंडु भौ गांहणु। 8यीशु तेसनी जुबाव दिता, “पवित्र शास्त्रा मझ लिखोरू आ तु अपड़ै परमेश्वरानि प्रणाम कर जां सिर्फ तेसैरीऐ सेवा कर।” 9तां तेनी यीशु यरूशलेम शहरा मझ नीं करि मंदरेरी छत्ति पन खड़ा केया, जां शैतानै यीशुनि बौलु, “अगर तु परमेश्वरैरा पुत्र आ ता अपड़ै आपानि ऐठां किना हैट छिढाहि दै।” 10केईनी कि पवित्र शास्त्रा मझ लिखोरू आ, कि “तैस तिंडै बारै मझ अपड़ै स्वर्गदूतनी आज्ञा दींणी, कि सै तिंडि रक्षा करिया 11जां तैन्हांं तु थल्लै पूंणा किना पेहिलै हत्था मझ उछुई लींणा, ऐतियु ना भुईया कि तिंडै पैयिड़ानि घौड़ै ला ठौकर लगिया।” 12यीशु तेसनी जुबाव दिता, “ऐक्यु बि पवित्र शास्त्रा मझ बोलोरू आ: तुहां अपड़ा परमेश्वर परखणा ना चेंहिथा।” 13जेख्णी शैतान सारी परीक्षा करि बेठा, तां थोड़े तियै टैंमेरै तेईनी तैस छडि करि चलि ग्या।
यीशुरै सेवा बाऐ कंमा केरी शुरूवात
(मत्ती 4:12-17; मरकुस. 1:14-15)
14फिरी यीशु पवित्र आत्मायरी सामर्थी ला भरी करि गलील प्रदेशनी वापस चलि ग्या। जां तेसैरी चर्चा आस-पासेरै सारै इलाके मझ फैली गैई। 15जां सै तेन्हैरै यहूदी सभा घरा मझ गहि करि उपदेश काता रिहा, जां सारै तैसेरी बडियाई कातै थ्यै।
नासरता मझ यीशुरा निरादर
(मत्ती 13:53-58; मरकुस. 6:1-6)
16फिरी यीशु नासरत नगरा मझ वापस या, जेठि सै पाऔरा-पोसियौउरा थ्या जां अपड़ै नियमा केरै अनुसार आरामेरी धियाड़ि तेनी यहूदी सभा घरा मझ गहि करि पवित्र शास्त्रा मझां पढ़नेरै तेईनी खड़ा भुआ। 17जां तेसनी यशायाह भविष्यवक्तेरी किताब पढ़नेरै तेईनी दित्ती, जां तेनी किताब खोलि करि तैस ठाहरी किना पढ़नु शुरू कियु जेठि ऐ लिखोरू थियु, 18“प्रभुरा आत्मा मूं पनि आ, केईनी कि तेनी गरीबनी खुशखबरी शुणाणेरै तेईनी मिंडा अभिषेक क्यौरा। तेनी आंउ भेईजौरा कि आंउ तैन्हांं जै शैतानेरी केईदी मझ अत्तै तेन्हांनि छुटकारा, जां कांणनी तकांणैरी खुशखबरी प्रचार करूं जां दुखा-तख्लीफिया मझ पियौरा मैहणुवां छडाउं, 19जां प्रभुरै खुश रींहणैरै सालैरा प्रचार करूं।”
20तां तेनी किताब बंद करि-करि सेवकेरै हत्था मझ दी दित्ती जां बेशि ग्या जां यहूदी सभा घरेरै सभ मैहणु इकधियानें भौ करि यीशु तकांतै थ्यै। 21तां सै तैन्हांं सिंउ बोलणा लगा, “आज ऐ शास्त्रा मझ लिखोरू तुवाड़ै सांमणै पूरू भूं।” 22सभनियें तेसैरी तारीफ की, जां जै अनुग्रहरी गलै तेसैरू मुहां किना निकोईंथी, तैन्हांं किना हैरान भुवै जां बोलणा लगै, “क्या ऐक्या यूसुफैरा पुत्र ना?”
23यीशु भीड़ि सिंउ बौलु, “तुहां मूं पन ऐकेई कहावत जरूर बौलणी कि, हे बेईदा! अपांणा सुधार! जै किछ असुवें शुणु कि कफरनहूम ग्राँ मझ तीं क्यौरू आ, तैस ऐठि अपड़ै इलाके मझ बि कर।” 24जां तेनी बौलु, आंउ तुहां सिंउ सच बोलता, कोस बि भविष्यवक्तैरा मान-सम्मान अपड़ै इलाके मझ ना भूंता। 25मिंडी गल शुणा, आंउ तुहां सिंउ सच बोलता कि भविष्यवक्ता ऐलिय्याहेरी धियाड़िया मझ जेख्णी साडै त्रियां साला तेईनी सुरगा किना झड़ी ना यैई, यौ तेईनी कि पूरै इस्राएलेरै देशा मझ बड़ा बडा अकाल पेया, ता पूरै इस्राएलिया मझ होरिया जातिया बाई ऐतेई बड़ी जरूरतमंद विधवायी बि थी। 26पण भविष्यवक्ता ऐलिय्याह इस्राएल देशा मझ कोस बि विधवाय किनि ना भेईजा, सिर्फ सीदोन शहरा नीड़ सारफतैरे इलाके मझ एकि होरी जातिरी विधवाय किनि ग्या। 27जां एलीशा भविष्यवक्तेरै टैंमा इस्राएल देशा मझ बड़ै कोढ़ी मैहणु थ्यै जैन्हां ठीक भूंणैरी जरूरत थी, पण नामान नाँईयेरा अक कोढ़ी जै सीरिया देशैरा थ्या, तैस छडि करि तैन्हांं मझांं हौरा कौ बि ठीक ना केया।
28जेख्णी यहूदी सभा घरा मझ बेठोरै मैहणुवें ऐकेई गलै शुणि ता तैन्हांं बड़ा गुस्सा या, 29जां तैन्हैं खड़ै भौ करि यीशुनि धक्कै दी करि नगरा किना भेईर कढि दिता, जां तैस ध्रीड़ी करि पहाड़ेरी चोटि पन लै ग्यै जैत पन सै नगर बसोरू थियु कि तेसनी तेठां किना ढक्का दी करि थलैनि छिढ़ाहि करि मारी छडियो। 30पण यीशु तेन्हैरै बिच किना निकोहि करि चलि ग्या
दुष्टआत्मा ग्रस्त मैहणु ठीक कांना
(मरकुस. 1:21-28)
31फिरी यीशु गलील प्रदेशेरै कफरनहूम नगरा मझ या जां आरामेरी धियाड़ि मैहणुवंनी उपदेश दींणा लगा। 32सै तेसेरै उपदेश शुणि करि हैरान भौ गियै, केईनी कि सै हक जता करि बोलींथ्या। 33यहूदी सभा घरा मझ अक मैहणु थ्या, जैस मझ बुरी आत्मा थी, सै जौरै चिन्डै दींणा लगा, 34“हे नासरतेरै यीशु! असु ताउ सिंउ कितु कम आ? क्या तु असु नष्ट कांना यौउरा आ? आंउ ताउ जांणता कि, तु केणु आ? तु परमेश्वरैरा पवित्र जन आ!” 35यीशु बुरी आत्मायनी झिड़खाय करि बौलु, “चुप बेश! जां तैस मझांं निकोहि गा।” तां बुरी आत्मा तैस मिरौड़ी करि बिना नुकसान करि जां बड़ै जौरै चिंडै दी करि तैस मझां निकोहि गैई। 36ऐत पन सभ मैहणु बड़ै हैरान भुवै, जां सै योकिया मझ बोलणा लगै, “ऐ केतिया वचन आ? केईनी कि सै अपड़ै अधिकारै जां सामर्थी ला बुरी आत्माईयानि आज्ञा दींता, जां सै निकोहि गांहथी।” 37जां आसै-पासै हर जगाई तेसैरी चर्चा भूंणा लगी।
पतरसेरी शशु जां होरै मैहणु ठीक कांने
(मत्ती 8:14-17; मरकुस. 1:29-34)
38सै यहूदी सभा घरा मझांं उठिकरि शमौनेरै घरै ग्या। शमौनेरी शशुनि बड़ा तैज बुखार थ्या, जां तैन्हैं तेसेरै तेईनी यीशुरै छंदै कियै। 39तेनी तेसेरै नीड़ खड़ै भौ करि भुखारानि झिड़ख दित्ती, जां बुखार उतरि ग्या, जां सै छुईं उठिकरि तेन्हैरी सेवा-पांणी कांना लगी। 40दीह बुडते टैंमा जैन्हां-जैन्हां केरै तैठि मैहणु बड़िया सारिया बिमारियै ला दुखी थ्यै, सै सभ तैस किनि लै अंणै, जां तेनी एकि-एकि पन हत्थ रखि करि सै ठीक कियै। 41जां बुरी आत्माय चिन्डै दींति जां ऐ बोलती कि, “तु परमेश्वरैरा पुत्र आ” बड़ा मैहणुवां मझां निकोहि गेई। पण सै तैन्हांं झिड़खाईंथ्या जां बोलणा ना दिईंथ्या, केईनी कि सै जांणति थी, कि सै मसीह आ।
यहूदी सभा घरा मझ गहि करि प्रचार कांना
(मरकुस. 1:35-39)
42जेख्णी धियाड़ि भुई ता यीशु निकोहि करि एकि सुनसान जगायनी ग्या, जां मैहणुवां केरी अक बड़ी बडी भीड़ तैस तोपती तैस किनि यैई, जां तैस रौकणा लगी कि, सै तैन्हांं छडि ना गहिया। 43पण यीशु तैन्हांं सेईतै बौलु, “मूं होरनियां नगरा मझ बि परमेश्वरेरै राज्यरी खुशखबरी शुणाणी जरूरी आ, केईनी कि आंउ ऐठणीरै तेईनी भेईजौरा।” 44जां सै गलील प्रदेशेरै यहूदी सभा घरा मझ गहि करि प्रचार काता रिय्हा।
Currently Selected:
लूका 4: CDJNT
Highlight
Share
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
