मरकुस 11
11
यरूशलेम मझ विजय प्रवेश
(मत्ती 21:1-11; लूका 19:28-40; यूह. 12:12-19)
1जिहींऐ यीशु जां तेसेरै चैलै यरूशलेम शहरा नीड़ पुजतै थ्यै, सै जैतून पहाड़ेरै किनारै बैतफगे जां बैतनिय्याहरे ग्राँ यै, तां तेनी अपड़ै दो चैलै ऐक्यु बोलि करि भेईजै, 2“सांमणेरै ग्राँईयां मझ गहा, जां तैठि पुजतै एकि गधेरै बच्चै, जैस पन कौ बि ऐम्हीं तेईनी चढ़ौरा ना भुईया, बंन्होरा मेईंणा, तैस खोलि करि लै ऐईछा।” 3अगर तुहां मझियां केणुक्या पुछिया, “ऐक्यु केईनी अत्तै कातै?” ता बोलै, “असेड़ै प्रभु यीशु ऐसेरी जरूरत आ, जां तैस छुईं सै इदि भेईजि दींणा।”
4चैलै ग्राँईयां मझ गियै, तैन्हांं गधैरा बच्चा गयि मझ एकि घरेरै दुवारा किनि एकि खुंडी सिंउ बंन्होरा मैआ। जां खोलणा लगै। 5तैन्हांं मझियें जै तैठि खड़ै थ्यै, कोई-कोई बोलणा लगै “ऐ कितु अत्तै कातै, गधेरै बच्चै केईनी अत्तै खोलतै?” 6चैला सिंउ जिहीं यीशु बोलोरू थियु, तीहैं तैन्हैं तेन्हांनि बोलि दित्तु, फिरी मैहणुवें गधिरा बच्चा तैन्हांं लैई गांहणा दिता। 7दो चैलै गधेरै बच्चै यीशु किनि लैई यै जां अपड़ै कुछ लिकड़ै तैस पन रखै जां सै तैस पन बेशि गिया। 8जिहींये यीशु गधै पन सवार भौ करि यरूशलेम धेरै आघै धेरै चला, बड़ै सारै मैहणुवें तेसेरै आघै सिड़की पन अपड़ै लिकड़ै बिछाय करि तेसैरा स्वागत केया। बड़ै सारै होरनियें मैहणुवें सिड़किरै नीड़ियां बुटा केरी डाई बढि करि बिछाई करि तेसैरा स्वागत केया। 9तैन्हांं मझियें किछ मैहणु यीशु अघ्रियालीं-अघ्रियालीं चलोरै थ्यै, बाकि मैहणु तेसेरै पिचालीं-पिचालीं चलोरै थ्यै। हर कोई हकै दींता थ्या, “परमेश्वरेरी जय भुईया जां परमेश्वर तेसनी आशीष दिया जै प्रभुरा नाँ लैकरी ऐईंता!” 10असेड़ै पूर्वज दाऊदा जेतिया अक राजा परमेश्वरैरा आशीर्वाद लैकरी राज्य कांननी ऐईंता। परमेश्वरेरी जय भुईया#11:10 परमेश्वरेरी जय भुईया होशन्ना जै स्वर्गा मझ रींहथा।
11जेख्णी यीशु यरूशलेम शहरा मझ प्रवेश केया तेठां बाद सै मंदरा मझ ग्या। तेनी चोउवो पासै सारी चीजै गौर सिंउ तकाई फिरी तेनी शहर छडि दिता, केईनी कि सन्हेंरा भौ गियौरा थ्या। फिरी सै अपड़ै बाराह चैला सेईतै बैतनिय्याह ग्राँनी चलि ग्या।
अंजीरेरू बुट्टानि श्राप दींणा
(मत्ती 21:18-19)
12दुईं धियाड़ी जेख्णी यीशु जां तेसेरै चैलै बैतनिय्याह किना निकोहि करि यरूशलेमनि गांहथै थ्यै, तां यीशुनि भ्रुख लगी। 13सै दूर किना अंजीरेरू बुटा तका करि तुरन्त तैस नीड़ ऐ तकांणेरै तेईनी ग्या, कि शायद तैस तेत पन कौ फल मेयि गहिया पण पतरै छडि करि किछ न मैउ, केईनी कि फला केरा टैंम न थ्या! 14तां यीशु बुटा सिंउ बौलु, “ऐम्हीं किना तांउ पन कौ फल ना लगणै।” जां तेसेरै चैलै ऐस गलै शुणतै थ्यै।
मंदरा किना व्यापारी कढणै
(मत्ती 21:12-17; लूका 19:45-48; यूह. 2:13-22)
15ऐठां किना बाद यीशु जां तेसेरै चैलै यरूशलेम शहरा पुज्जै जां मंदरेरै आंगणा मझ ग्यै, जां तेनी सै मैहणु तैस जगाय किना भेईर कढणै शुरू करि दित्तै, जै बलीदानेंरे तेईनी इस्तेमाल भूंणारै जनवरा जां होरनियां चीजा लींणैरा जां बैचणैरा कम कातै थ्यै। तेनी पेईंसै बदलणारा केरै मेज ब्राखेरी दित्तै, जां तेनी बलिदानेरै तेईनी कबूतर बैचणारा केरी कुर्सी पलटि दित्ती। 16जां तेनी मैहणुवंनी मंदरेरै आंगणा मझांं कोसनि कौ बि सामान बैचणैरी जां खरीदणैरी अनुमति ना दित्ती। 17जां भाषण करि-करि तेन्हांनि बौलु, कि पवित्र शास्त्रा मझ लिखोरू आ कि परमेश्वरै बोलोरू आ, “मिंडै मंदरनी सभनियांं जातिया केरै मैहणुवां प्रार्थनायरा मंदर बोलणु।” पण तुहैं ऐ डाकुवा केरा अड्डा बणा दितौरा। 18जेख्णी प्रधानयाजक जां यहूदी शास्त्रियै ऐ शुणु, कि यीशु कितु बौलु जां कियु, ता सै तैस मांनेरै तेईनी सौचणा लगै, केईनी कि जै किछ बि तेनी शिख्राउरू थियु तेनी ला मैहणु हैरान भौ गियोरै थ्यै, ऐठणीरै तेईनी सै तेसैरी बधती लौक-प्रियताई ला डरि गियोरै थ्यै। 19जेख्णी संन्हैरा भौ गियौरा थ्या, ता फिरी सै अपड़ै बाराह चैला सेईतै बैतनिय्याह ग्राँनी चलि ग्या।
शुकौरै बुटा किना शिक्षा
(मत्ती 21:20-22)
20दुईं धियाड़ी पिचारी, जेख्णी यीशु जां तेसेरै चैलै वापस यरूशलेम शहरा धेरै गांहथै थ्यै, तैन्हैं अंजीरेरू बुटा धेरै फिरी तकाउ। सै पूरी तराहि सीरै संण शुकि गियौरू थियु! 21पतरसनि सैकेई गल याद यैई, जां तेनी यीशु सेईतै बौलु, “हे गुरू” तका! ऐक्यु अंजीरेरू बुट जैसनि तीं श्राप दितौरा थ्या, शुकि आ गियौरू। 22यीशु तेसनी उत्तर दिता, “विश्वास करा कि जै तुहैं मगोरू आ परमेश्वरा सै कांनु।” 23आंउ तुहां सिंउ सच बोलता कि, जै कोई इस पहाड़ा सेईतै बोलैला, “उठ जां अपड़ै आपा समुन्द्रा मझ सुटि दै” जां अपड़ै दिला मझ शक ना करिया, पण विश्वास करिया कि जै तेनी मगु परमेश्वरा सै कांनु, तेख्णी परमेश्वरा तेसेरै तेईनी ऐ कांनु। 24ऐठणीरै तेईनी आंउ तुहांनि बोलता, कि जै किछ तुवे प्रार्थनाय मझ मगा, ता विश्वास करा की सै जरूर मेईं गांहणु, परमेश्वरा तुवाड़ै तेईनी ऐ कांनु। 25ऐहीं-चारै जेख्णी-केख्णी तुवे खड़ै भौ करि प्रार्थना कातै, ता अगर तुवाड़ै मंना मझ कोसकेरै तेईनी दुख विरोध आ ता माफ करा ऐठणीरै तेईनी कि तुवाड़ा परमेश्वर तुवाड़ा स्वर्गीय पिता जै स्वर्गा मझ बेशता सै पाप माफ करिया। 26जां अगर तुवे माफ ना कातै ता तुवाड़ै पिता परमेश्वरा बि जै स्वर्गा मझ आ, तुवाड़ै पाप माफ ना कांने।
यीशुरै अधिकारा पन स्वाल
(मत्ती 21:23-27; लूका 20:1-8)
27यीशु जां तेसेरै चैलै अक बारी फिरी यरूशलेम शहरा मझ पुज्जै, जेख्णी यीशु मंदरेरै आंगणा मझ पुज्जा जां जेख्णी मंदरा मझ घुमता थ्या ता प्रधानयाजक जां यहूदी शास्त्री जां यहूदी वुजुर्ग तैस किनि अईछी करि पुछणा लगै, 28“जै कम तीं क्यौरै अत्तै तैन्हांं कांनेरा ताउ किनि कितु अधिकार आ? ऐ सभ कांनेरा अधिकार ताउनि कुनि आ दितौरा?” 29यीशु तेन्हांनि उत्तर दिता, “आंउ बि तुहां किना अक गल पुछता; अगर तुहैं मूंनी जुबाव दिया, ता आंउ बि तुहांनि शुणाला कि ऐन्हां कमां कांनेरा अधिकार मूंनी कुनि आ दितौरा जैन्हां आंउ काता। 30यूहन्नेरा बपतिस्मा क्या परमेश्वरेरी तरफि सिंउ थ्या कि मैहणुवां केरी तरफ सिंउ थ्या? मूंनी जुबाव दिया।”
31फिरी सै योकिया सिंउ बेहस कांना लगै कि अगर असै बोलतै परमेश्वरेरी तरफों ता तैस असु किना पुछणु, तां फिरी तुहैं तैस पन विश्वास किना केया? 32जां अगर असै बोलतै कि, मैहणुवां केरी तरफ सिंउ, ता कितु भूंणु, सै डरींतै थ्यै कि, अगर तैन्हैं ऐहीं बौलु ता मैहणुवां तैन्हांं केरै तेईनी परेशानि खड़ी करि दींणी, केईनी कि बड़ा सारा मैहणुवां ऐस गलैरा भरौसा थ्या कि यूहन्ना सच मझ अक भविष्यवक्ता थ्या। 33फिरी तैन्हैं यीशुनि उत्तर दिता, “असै ना जांणतै कि यूहन्ना कुनि भेईजा।” यीशु तेन्हांनि बौलु, “ता मूं बि तुहांनि ना शुणाणु कि मूंनी ऐतियै कम कांनेरा कितु अधिकार आ।”
Currently Selected:
मरकुस 11: CDJNT
Highlight
Share
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
