मरकुस 10
10
तलाकेरै बारै यीशुरी शिक्षा
(मत्ती 19:1-12; लूका 16:18)
1यीशु अपड़ा चैला सेईतै कफरनहूम शहर छडि दिता, जां फिरी सै यहूदिया जिल्है बतै गांहथै जां यरदन नदी पार चलि ग्यै। तैस किनि फिरी भीड़ किट्ठी भौ गैई, तैठि फिरी अपड़ि रीतिरै अनुसार उपदेश दींणा लगा। 2तां फरीसियै तैस किनि अईछी करि तेसैरी परीक्षा लींणैरै तेईनी तैस किना पुच्छु, “क्या मूसेरी व्यवस्थाय मझ एकि मैहणु अपड़ि लाड़िनी तालाक दींणेरी अनुमति आ?” 3यीशु तेन्हांनि उत्तर दित्ता, “मूसै तुहांनि तलाकेरै बारै मझ कितु आज्ञा दितोरी आ?” 4तैन्हैं बौलु, “मूसेरी व्यवस्थाय मझ एकि मैहणुनी अपड़ि लाड़िनी तलाकेरै कागजात लिखि करि तैस छडणैरी आज्ञा दितोरी आ।” 5यीशु तैन्हांं सेईतै बौलु, “तुवाड़ै पूर्वजा केरी जिद्देरी वजहि ला मूसै तुहांनि ऐ हुक्म लिखा।” 6पण शुरूवाति मझ जेख्णी परमेश्वरै सभ किछ बंणाउ, तेनी “मड़द जां जनानि करि-करि बंणाईथ्यै।” 7ऐहै वजह आ कि जेख्णी कोई मड़द ब्याह काता ता सै अपड़ै मयि-बबा छडि करि अपड़ि लाड़ी सिंउ जुड़ी रींहथा। 8जां सै दोईयो अक जांन भूंणै; ऐठणीरै तेईनी सै ऐम्हियां किना दुवां मैहणुवां सैयि ना पण ऐकिऐ मैहणु सैयि अत्तै। 9“ऐठणीरै तेईनी जै परमेश्वरै अक-साथ जौड़ोरै अत्तै, तैन्हांं कौ बि मैहणु अलग ना कांना चहिया।”
10जां बाद मझ, जेख्णी सै चैला सेईतै तैस घरा मझ अकैला थ्या, ता तैन्हैं तैस किना ऐस बारै पुच्छु। 11तेनी तेन्हांनि बौलु, “जै कोई अपड़ि लाड़ी छडि करि होरी सेईतै ब्याह काता ता सै तैस पेहिलिरै विरोधा मझ व्यभिचार काता।” 12जां अगर लाड़ी अपड़ै लाड़ै छडि होरै सिंउ ब्याह काति, ता सै व्यभिचार काति।
छोकरूवनी आशीर्वाद
(मत्ती 19:13-15; लूका 18:15-17)
13फिरी मैहणु छोकरूवा यीशु किनि अंणना लगै, कि सै तैन्हांं पन हत्थ रखि करि तेन्हांनि आशीर्वाद दैला; पण चैलै मैहणु झिड़खाय। 14यीशु ऐ तका करि गुस्सै भौ करि तैन्हांं सेईतै बौलु, ऐन्हां छोकरूवा मूं किनि ऐईंणा देया ऐन्हां मेईं रौका केईनी कि परमेश्वरैरा राज्य ऐतिया मैहणुवां केरा आ। 15आंउ तुहां सेईतै सच बोलता, कि परमेश्वरा अपड़ै राज्य मझ सिर्फ सैहै मैहणु स्वीकार कांने जै तेसैरा राज्य बच्चा केरै समान ग्रहण करेलै। 16फिरी यीशु बच्चै अपड़िया बहिया मझ ल्यै, जां सभनियांं पन हत्थ रखि करि तेन्हांनि आशीष दित्ती।
शैठ जुवान जां अनन्त जीवन
(मत्ती 19:16-30; लूका 18:18-30)
17जां जिहींऐ यीशु जां तेसेरै चैलै निकूंहणेरै तेईनी तियार भुवै तां अक मैहणु तैस किनि खिट दींता या जां तेसेरै सांमणै झुकि करि तैस किना पुच्छु, “हे उत्तम गुरू, आंउ कितु करूं?” कि परमेश्वर मूनी अनन्त जीवन दिया। 18यीशु तैस सेईतै बौलु, “जेख्णी तुवे बोतै कि आंउ अच्छा आ ता तुवाड़ा मतलब कितु आ?” परमेश्वर ऐ सिर्फ अक आ जै सही मझ अच्छा आ। 19तु परमेश्वरेरी आज्ञाय जांणता: “व्यभिचार मेईं काता, हत्या मेईं काता, चोरी मेईं काता, झूठी गवाहि मेईं दींता, कोसनि धोखा मेईं दींता, अपड़ै मयि बबेरा आदर करै।” 20तेनी तैस सेईतै बौलु, “हे गुरू, ऐ सारी आज्ञाय ता आंउ बचपणां किना मनता यौउरा।”
21यीशु तैस धेरै प्यार सिंउ हैरू, जां तैस सेईतै बौलु, अक कम हौरा जै ताउ ऐम्हीं बि कांनेरी जरूरत आ। जै किछ तिंडु आ, तैस बैचि करि पेईंसै गरीब मैहणुवंनी दै। अगर तु ऐहीं काता, ता तिंडै तेईनी स्वर्गा मझ धन मेईंणा। 22जेख्णी तेनी यीशु ऐ बोलता शुणा, ता तेसेरै चैहरै पन उदासी छा गैई, जां सै दुख मंनाता चलि ग्या केईनी कि सै बड़ा अमीर थ्या।
23यीशु चोउवो पासै तका करि अपड़ा चैला सेईतै बौलु, अमीर मैहणुवां केरू परमेश्वरेरै राज्य मझ गांहणु बड़ु मुश्किल आ। 24चैलै तेसैरी गलै ला बड़ै हैरान भुवै, ऐत पन यीशु फिरी बौलु हे बालको जै धना पन भरौसा रखतै तेन्हैरै तेईनी परमेश्वरेरै राज्य मझ गांहणु त्यौतु कठिन आ। 25एकि ऊंटैरू सुईरै पहेनै बत्तै निकूंणु मुशिकल आ, तिहीं अमीर मैहणुरू परमेश्वरेरै राज्य मझ गांहणु बि बड़ु मुशिकल आ। 26ऐ शुणि करि चैलै बड़ै हैरान भौ करि बोलणा लगै, “ऐठणीरा मतलब ऐआ कि कौ बि अपड़ै पापा केरी सजाय किना बचि ना सकता कि सै स्वर्गानि गहि सकिया।” 27यीशु तैन्हांं धेरै हैरी करि बौलु, “मैहणुवां किना ऐ ता ना भौ सकतु, पण परमेश्वर ऐ करि सकता, केईनी कि परमेश्वर सभ किछ करि सकता।” 28पतरस तेसनी बोलणा लगा, “तका, असै ता सभ किछ छडि करि ताउ पिचोरै चलि यौउरै अत्तै।” 29यीशु चैला सेईतै बौलु, आंउ सच बोलता कि ऐतिया कौ ना जेनि अपड़ु सभ किछ मिंडी खुशखबरिरै तेईनी, अपड़ै घर, माँ, बब, भाई-भींण, बच्चै जां जमीन छडि दितोरै भुईया, 30तैन्हांं मैहणुवंनी ऐस जीवना मझ तैस छडोरू किना शाउ गुणा मेईंणु, जिहीं भाई-भींण, जां मयि-बच्चै जां जमीन। ऐठां किना बाद बि मैहणुवां सै सतांणै, पण ऐईंणै वायै टैंमा तेन्हांनि अनन्त जीवन मेईंणा। 31तुहां मझांं जै कोई अपड़ै आपानि बड़ा खास बंणाला, सै खास न समझियुंणा; जां जै अपड़ै आपानि बड़ा खास ना बंणाला सै खास समझियुंणा।
अपड़ि मोउतिरै बारै यीशुरी त्रीं भविष्यवाणी
(मत्ती 20:17-19; लूका 18:31-34)
32यीशु जां तेसेरै चैलै यरूशलेम शहरा मझ गांहणै बाई बत्तै मझ थ्यै, जां यीशु तैन्हांं किना आघै-आघै चलौरा थ्या: चैलै हैरान थ्यै जै तैस पीछै-पीछै चलोरै थ्यै सै डरौरै थ्यै, तां तेनी फिरी सै बाराह चैलै लै करि तैन्हांं सेईतै ऐ बोलणा लगा, जै तैस सेईतै भूंणै बाई थी। 33“तका, असै यरूशलेमनि गांहथै अत्तै जां मैहणुरा पुत्र मतलब आंउ प्रधानयाजका जां यहूदी शास्त्रिया केरै हत्था पकड़वाई गांहणा, जां सै मोउतिरै काबिल ठैहरायुंणा, जां होरनियां जातिया केरै हत्था दियूंणा। 34तैन्हांं मिंडा मजाक उडांणा, तैन्हांं मूं पन थुकणु, मूंनी कोड़ै मांने जां जांनि किना मारी छडणा, जां त्रियें रौजै फिरी मूं जींति गांहणु।”
याकूब जां यूहन्नेरी विनती
(मत्ती 20:20-28)
35तां जब्दीरै पुत्रै याकूब जां यूहन्ने तैस किनि अईछी करि बौलु, “हे गुरू, असै चांहथै थ्यै कि जै कुछ असै ताउ किना मगतै सै तु असेड़ै तेईनी करिया।” 36तां यीशु तैस किना पुच्छु, “तुवे कितु चांहथै अत्तै कि आंउ तुवाड़ै तेईनी करूं?” 37तेनी तैस सेईतै बौलु, “जेख्णी तु अपड़ि महिमाय मझ राज्य करैला ता असु मझियां एकि तिंडै दाऐं जां दुवां तिंडै बाऐं बेशणां चांहथै अत्तै।” 38पण यीशु तैहां सेईतै बौलु, “तुवे ना जांणतै कि तुवे कितु मगतै अत्तै? क्या तुवे सै दुख सैहलै जै आंउ सहन कांननी गांहथा?” जां क्या तुवे मोउतिरी सजा स्वीकार करि सकतै जैस सै मूंनी दींणार अत्तै?
39चैलै तैस सिंउ बौलु, “असु किना भौ सकतु!” यीशु तैन्हांंनि बौलु, “जै दुख आंउ सहन कानें वा; तैस तुवे सेहन करि सकतै; जां जेनि मोउती आंउ मरनार आ, तेनी मोउती तुवे मरि सकतै। 40पण जेन्हैरै तेईनी तियार क्यौरा, तैन्हांं छडि होरै कोस बि अपड़ै देहिणै जां बाऐं पासै रखणै मिंडा कम ना।” 41ऐहीं शुणि करि दशो चैलै याकूबा जां यूहन्ने पन गुस्सै भूंणा लगै। 42तां यीशु सै ऐपु किनि शदा करि तेन्हांनि बौलु, “तुवे जांणतै अत्तै कि जै होरनियां जातिया केरै हाकिम समझियूंतै, सै तैन्हांं पन दबाव बारी करि राज्य कातै; जां जै तैहां मझ बडै अत्तै सै तैन्हां पन हक जतांतै।” 43पण तुहां सिंउ ऐहीं ना भूंणु, केईनी कि जै तुहां मझ महान भूंणा चांहथा सै तुवाड़ा सेवक बंणिया; 44जां जै कोई तुहां मझ प्रधान भूंणा चांहथा सै सभनियांं केरा सेवक बंणिया। 45केईनी कि मैहणुरा पुत्र मतलब आंउ ऐठणीरै तेईनी ना या कि तेसैरी सेवा करियो, पण ऐठणीरै तेईनी यौउरा कि ऐपु सेवा करिया, जां बड़ा सारा मैहणुवां छडांणेरै तेईनी अपड़ि जान दिया।
कांणै बरतिमाईनि टीरा केरा दान
(मत्ती 20:29-34; लूका 18:35-43)
46यीशु जां तेसेरै चैलै यरीहो नगरा मझ यै, फिरी जेख्णी सै यरीहो नगरा मझ निकोत्थै ता तैन्हांं सेईतै अक बडी भीड़ बि चलोरी थी तां तिमाईरा पुत्र बरतिमाई, जै अक अंधा भिखारी थ्या, सिड़किरै किनारै बेठौरा थ्या। 47ऐ शुणि करि कि यीशु नासरी तेठां किना गांहथा, सै जौरै हक दी करि बोलणा लगा, “हे दाऊदेरी संतान, यीशु मूं पन दया कर।”
48सै बड़ै मैहणुवें झिड़खा कि सै चुप बेशिया, पण सै हौरा बि जौरै-जौरै हकै दींणा लगा, “हे दाऊदेरी संतान मूं पन दया कर।” 49तां यीशु रुकि करि बौलु, “ऐस शदा।” मैहणुवें सै कांणा शदा करि तेसनी बौलु, “हिम्मत रख! उठ यीशु ताउ शदांता।” 50सै अपड़ा चौआ सुटि करि झट उठा, जां यीशु किनि या। 51तां यीशु तैस सिंउ बौलु, “तु कितु चांहथा कि आंउ तिंडै तेईनी करूं?” कांणै तैस सिंउ बौलु, “हे गुरू, ऐ कि आंउ तकांणा लगूँ।” 52यीशु तेसनी बौलु, “अपड़ि बत्तै चलि गा तिंडै विश्वासेरी वजहि ला मीं तु ठीक केया।” जां सै तुरन्त तकांणा लगा जां बत्तै मझ तैस पिचालीं-पिचालीं चलि पेया।
Currently Selected:
मरकुस 10: CDJNT
Highlight
Share
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
