मरकुस 9
9
1फिरी यीशु भीड़ि जां अपड़ा चैला सेईतै बौलु, “आंउ तुहां सेईतै सच-सच बोलता, कि तुहां मझियां कुछ मैहणु जै ऐठि खड़ै अत्तै, तैन्हांं तकाणु कि तेन्हैरै मरना किना पेहिलै परमेश्वरैरा राज्य अक नवाँ जां शक्तिशाली तरीकै सिंउ अईछी गियौरा।”
यीशुरा रूप बदलियूंणा
(मत्ती 17:1-13; लूका 9:28-36)
2एकि हफ्तै बाद यीशु पतरस जां याकूब जां यूहन्ना सेईतै ल्यै, जां तैन्हां एकि उथड़ै पहाड़ा पनि लै ग्या, जां जेख्णी तैन्हैं यीशु धेरै तकाउ ता तेसैरा रूप बदली ग्या। 3ऐठि तेईनी कि तेसेरै लिकड़ै ऐतियै चमकणा लगै कि धरती पन ऐतिया कौ बि धौबि ना जै ऐतियै चमकईया। 4तां फिरी ऐ दो भविष्यवक्ता मूसा जां ऐलिय्याह प्रकट भुवै; जां सै यीशु सेईतै गलै करींथ्यै।
5ऐत पन पतरसै यीशु सेईतै बौलु, “हे गुरू, असेड़ु ऐठि बेशणु ठीक आ: ऐठणीरै तेईनी असै त्रा तम्बु बंणाय; अक तिंडै तेईनी, अक मूसेरै तेईनी, अक ऐलिय्याहेरै तेईनी।” 6केईनी कि सै न जांणता थ्या, कि कितु उत्तर दींणा। ऐठणीरै तेईनी कि सै बड़ै डरि गियोरै थ्यै। 7तां एकि बदयै सैक्यै ढकि लियै जां परमेश्वरै बदआ मझां बौलु, “ऐ मिंडा प्यारा पुत्र आ, ऐठणीरै तेईनी तुवे ऐसेरी शुणा।” 8जां अजाग्गै तैन्हैं जेख्णी चोउवो पासै तकाउ ता मूसा जां ऐलिय्याह चलि गियोरै थ्यै, जां तैन्हैं सिर्फ यीशुऐ तैन्हांं सेईतै लधा।
9जेख्णी यीशु जां तेसेरै त्रा चैलै पहाड़ा किना उतरतै थ्यै, तेनी तैन्हांं सेईतै बौलु, कोस सिंउ बि ऐ मेईं बोलतै, जै तुहैं तकाउ, जेख्णी तेईनी कि आंउ, मैहणुरा पुत्र, मरि करि जींति ना गंहूँ। 10ऐठणीरै तेईनी तैन्हैं ऐ गलै कोस सिंउ ना बोलि, पण तैन्हैं ऐठणीरै बारै गल कांनी शुरू केयि कि “मौरा मझां जींतियुणैरा कितु मतलब आ?”
11फिरी चैलै तैस किना पुच्छु, “यहूदी शास्त्री केईनी बोलतै कि ऐलिय्याह भविष्यवक्ता मसीह किना पेहिलै ऐईंणा चेहिंथा?” 12-13यीशु तेन्हांनि उत्तर दिता, “ऐ सच आ, कि परमेश्वरै ऐलिय्याह पेहिलै भेईजणैरा वायदा क्यौरा, ता कि सै सभ-किछ दुबारे किना सही करिया। पण आंउ तुहां सिंउ बोलता कि ऐलिय्याह ता चलि यौउरा, जां मैहणुवें तैस सेईतै जै किछ कांनु चाहूं सै करि बेठोरै अत्तै जिहीं पवित्र शास्त्रा मझ तेसेरै बारै मझ लिखोरू आ। पण मैहणुरा पुत्र मतलब मिंडै बारै मझ केईनी ऐहीं लिखोरू आ कि मूं बड़ा दुख सेहन कांना पूंणा जां मैहणुवां आंउ ना मनणा?”
दुष्ट आत्माय किना छुटकारा
(मत्ती 17:14-21; लूका 9:37-43)
14जेख्णी यीशु जां तेसेरै त्रा चैलै होरनियां चैला किनि यै ता तैन्हैं तकाउ, कि तेन्हैरै चोउवो पासै बडी भीड़ लगौरी आ जां किछ यहूदी शास्त्री तैन्हांं सेईतै बेहस कातै अत्तै। 15जिहींऐ सभनियें मैहणुवें यीशु तका, सै बड़ै हैरान भूंणा लगै, जां तां अक मैहणु तैस धेरै दाउड़ी करि या जां तेसेरै पैयिड़ छूतै। 16यीशु तैन्हांं किना पुच्छु, “तुवे ऐन्हां सिंउ कितु बेहस कातै अत्तै?”
17भीड़ि मझांं एकि तेसनी उत्तर दित्ता, “हे गुरू मीं अपड़ा पुत्र जैस मझ बुरी आत्मा थी, ताउ किनि अंणौरा थ्या। जै तैस गल कांना ना दिईंथी। 18जेख्णी-केख्णी बुरी आत्मा तैस पन हमला करींथी, तैस थल्लै ब्राखैरी दिईंथी जां तेसेरै मुँहै बतै शैफ चलींथी, जां दंत चापता, जां सै अकड़ी गांहथा। मीं तिंडा चैलानि बोलोरू थियु, कि सै बुरी आत्माय भेईर कढि दिया पण तेन्हैरै बोलणै ला ना निकोत्थी।” 19ऐ शुणि करि यीशु तेन्हांनि उत्तर दी करि बौलु, “अविश्वासी मैहणुवो, आंउ कियो तेईनी तुहां सेईतै बेशैला? जां कियो तेईनी तुहां सेहता रिहूँ? तैस छोकरू मूं किनि अंणा।”
20ऐठणीरै तेईनी तैन्हैं छोकरू यीशु किनि अंणु जां जेख्णी बुरी आत्माय यीशु तका, ता तेनी तुरंत छोकरू मरोड़ु; जां छोकरू धरती पन ब्रखी गियु जां तेसेरै मुँहै बतै शैफ निकूंणा लगी जां सै लेवटणी दींणा लगा। 21यीशु छोकरूरै बाबै किना पुच्छु, “ऐसेरी ऐ हालत केधियां किना आ भोरी?” तेनी बौलु, “बचपणा किना। 22बड़ै बारी बुरी आत्माय ऐसनि पांणी मझ जां आगी मझ सुट्टी करि मांनेरी कोशिश केयि; पण अगर तु किछ करि सकता ता असु पन तरस खा करि ऐस ठीक करि दै।” 23यीशु तेसनी बौलु, “तुहां शक ना भूंणा चेंहिथा कि आंउ ऐहीं करि सकता! अगर कौ मैहणु मूं पनि विश्वास काता, ता सभ कुछ भौ सकतु।” 24छोकरूरै बाबै इकदम चिंड दी करि बौलु, “हे प्रभु, आंउ विश्वास काता, मिंडी सहायता कर कि आंउ विश्वासा मझ मजबूत भौ गंहूँ।” 25जेख्णी यीशु तकाउ, कि बड़ै सारै मैहणु खिट दी करि ऐठिनी ऐईंतै अत्तै, ता तेनी बुरी आत्मायनी ऐ बोलि करि झिड़ख दित्ती, कि “टट्टा जां टांउणा बंणाणै बाई बुरी आत्माय आंउ ताउनि आदेश दींता, ऐस मझां चलि गा जां दुबारे ऐस मझ मेईं गांहथी।”
26तां सै चिंडै दी करि तैस मिरौड़ी करि, निकई गैई, सै छोकरू हिलु ऐ ना, सै मौरा केरै सामान भौ गियु। ऐठि तेईनी कि बड़ै सारै मैहणु बोलणा लगै कि सै मरि गियौरू आ। 27पण यीशु छोकरूरा हत्थ पकड़ी करि सै उठाउ, जां सै खड़ु उठि गियु। 28बाद मझ, जेख्णी यीशु अपड़ा चैला सेईतै घरा मझ अकैला थ्या, तेख्णी तैन्हैं तैस किना पुच्छु, “कि असेड़ै बोलै सै बुरी आत्मा किना कढि?” 29फिरी यीशु उत्तर दिता, “ऐतेई बुरी आत्माय प्रार्थना कांने बगैर मैहणुवां किना भेईर ना ऐईंती।”
अपड़ि मोउतिरै बारै मझ यीशुरी दुईं भविष्यवाणी
(मत्ती 17:22,23; लूका 9:43-45)
30बाद मझ, यीशु जां तेसेरै चैलै सै जगा छडि दित्ती जां गलील प्रदेश बतै गियै। यीशु ना चांहथा थ्या कि कोसक्यै पता लगिया कि सै कोठि आ। 31केईनी कि सै अपड़ा चैला सिंउ जादा टैंम बेशणा चांहथा थ्या जां तेन्हांनि शिख्रांणा चांहथा थ्या जां तैन्हांं सेईतै बोलींथ्या, “जल्दीऐ मैहणुरा पुत्र मतलब आंउ मैहणुरै हत्था पकड़वाई गांहणा। तैन्हांं मैहणुवां आंउ मारी छडणा; जां मूं मरना किना बाद त्रियें रौजै जींति गांहणु।” 32पण सै गल तेन्हैरी समझि मझ न यैई, जां सै तैस किना पुछणा हैरी डरींथ्यै।
चैला मझ सभनियांं बडा केणु आ?
33फिरी यीशु जां तेसेरै चैलै कफरनहूम मझ अपड़ै घरेनी ग्यै; जेख्णी सै घरा अंतर थ्यै तां यीशु तैन्हांं किना पुच्छु, “तुवे बत्तै मझ कितु बेहस कातै थ्यै?” 34पण सै चुप रिय्है, केईनी कि बत्तै मझ तैन्हैं ऐ बेहस क्यौरी थी कि असु मझांं महान केणु भूंणा। 35फिरी यीशु भुईयां बेशि करि बाराह चैलै ऐपु किनि शदाय जां तेन्हांनि बौलु, “अगर तुहां मझांं कौ महान बणना चांहथा ता सै सभनियांं मझ हल्का जां सभनियांं केरा सेवक बणियां।” 36फिरी यीशु एकि बच्चैनी तेन्हैरै सांमणै खड़ै भूंणनी बौलु, तेनी बच्चा गये ला ल्या जां चैलानि बौलु, 37“अगर कोई मैहणु मिंडै कारण ऐहीं-चारै एकि बच्चै पन दया काता सै सच मझ मिंडा आदर काता। अगर कोई मैहणु मिंडा आदर काता, ता सै सच मझ परमेश्वरैरा आदर काता जेनि आंउ भेईजौरा।”
जै विरोधा मझ ना सैक्या पक्षा मझ
(लूका 9:49,50)
38तां यूहन्ने तैस सिंउ बौलु, “हे गुरू, असै अक मैहणु तुवाड़ु नाँ लै करि बुरी आत्माय कढता लधा, जां असै तेसनी नमां कांना लगै, केईनी कि सै असु चैला मझियां ना थ्या।” 39यीशु बौलु, “तैस मेईं रौका; केईनी कि ऐतिया कौ ना जै मिंडै नाँईयें ला चमत्कारेरै कम करिया जां फिरी मूंनी बुरा बोलिया, 40केईनी कि जै असेड़ै विरोधा मझ नत्तै सै असु सेईतै अत्तै। 41आंउ तुहां सिंउ सच बोलता, कि मसीह पिचोरै चलणैरी वजहि ला, अगर कोई तुवाड़ी थोड़ी तैई मजत बि करिया, जिहीं कि पांणी पिवांणु, ता परमेश्वरा तेन्हांनि जरूर ईनाम दींणा।”
ठौकरिरा कारण बणनु
(मत्ती 18:6-9; लूका 17:1,2)
42जै कौ मूं पन विश्वास कांनारा मझियां एकि बि पाप कांना पन मजबूर करिया, बेशक सै एकि बच्चै सामान भुईया, सै तेसेरै तेईनी छै भूंणु कि अक भारी घौड़ तेसेरै गआ मझ बंन्ही करि डुबणेरै तेईनी समुद्रा मझ सुटि दिया। ता ऐसेरै तेईनी ऐ बड़ी सजा भौ सकती, पण तेसनी ऐठां बि बडी सजा परमेश्वर दैला। 43अगर तिंडा अक हत्थ ताउनि पाप कांननी मजबूर करिया, ता तैस अपड़ै हत्था पाप कांना किना रौक, जिहीं तुवे अक हत्थ बढतै अत्तै, जै तुवाड़ा पाप कांनेरा कारण बंणता। अगर तुवे स्वर्गा मझ गांहथै, भाँवें ताउ किनि अकै हत्थ भुईया, सै अच्छु आ। पण तुहां किनि दो हत्थ भुईया जां तुवे नरका गहिया, ता सै बुरू आ। 44नरका मझ सभनियांं केरै शरीरा खांणार कीड़ै कदि ना मरतै जां आगिरी जलन कदि ना मुकती। 45पाप कांनेरी हर एकि वजहि दूर करा जां तैस वजहि कढा! पाप कांना पूरी तराहि छडि दिया जिहीं तुवे अक पायिड़ बढतै अत्तै, जै तुवाड़ा पाप कानेंरा कारण बंणता। अगर तुवे स्वर्गा मझ गांहथै, भाँवें ताउ किनि अक्कै पायिड़ भुईया, सै अच्छु आ। पण तुहां किनि दो पायिड़ भुईया जां तुवे नरका गहिया, ता सै बुरू आ। 46नरका मझ सभनियांं केरै शरीरा खांणार कीड़ै कदि ना मरतै जां आगिरी जलन कदि ना मुकती। 47अगर तिंडु टीर ताउ पाप कांना पन मजबूर करिया ता तैस कढि सुट। कांणा भौ करि तिंडु परमेश्वरेरै राज्य मझ गांहणु बड़ु अच्छु आ, वजाय ऐठणीरै कि तिंडै दो टीरै होते हुऐ तु नरकेरी तैस आगी मझ सुटियो जै कदि ना बुझती। 48जेठि मरि गियोरै शरीरा खांणारै कीड़ै अत्तै जां सै नरकेरी आग कदि ना हिशति। 49केईनी कि हर अक मैहणु आगी मझ परखी करि शुद्ध करियूंणा, जिहीं लूंणे ला अक बलिदान शुद्ध करियूंता। 50लूंण सलूंणे स्वादिष्ट बंणा दींतु, अगर लूंणैरा स्वाद बिगड़ी गहिया, ता तैस कुनि चीजै ला नमकीन करेलै? तुवाड़ा बर्ताव बि लूंणा सैयि भूंणा चेहिंथा, जां योकिया मझ शान्ति सेईतै बेशा।
Currently Selected:
मरकुस 9: CDJNT
Highlight
Share
Copy
Want to have your highlights saved across all your devices? Sign up or sign in
Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.
