लूका 3
3
यूहन्ना बपतिस्मा दाता का सौंदेश
(मत्ती 3:1-12; मर 1:1-8; युहन्ना 1:19-28)
1रोमी सम्राट तिबिरियुस महाराजा कै राज कै पोद्ररहवे सालो दै जोबै पुन्तियुस पिलातुस यहूदिया प्रदेश का राज्यपाल थिया। औरौ गलील जिले दा हेरोदेस राजा तैसका भेइया फिलिप्पुसे इतूरैया औरौ त्रखोनीतिस जिले दा राज कौरौ थिए। औरौ लिसानियास अबिलेने जिले दै राज कौरौ थिए। 2औरौ जोबै हन्ना कैफा महायहूदी पुरोहित थिए तैसी दूसै पौरमेशवर का वचन शुनशान जौगैह दा जकर्याह का बैटा यूहन्ना कै धोरे पोऊंचा। 3सै यरदन नोंदी कै नेड़ी-बैड़ी कै सौबी देशो दा जाऐबा, पापौ कै माफी का प्रचार कौरदा लागा कै पाप कौरणा छोड़े दैव, औरौ बपतिस्मा लोव तोबै पौरमेशवर तोंवारै पाप माफ कौरदा। 4जैशैखै यशायाह पौरमेशवर कै बातौ बौताणौवाल़ै कै किताबो दौ लैखयौंदो औसौ;
“उजाड़ जौगैह दै ऐकी धाव दैणौवाल़ै कै धाव रौए शौणै कै,
‘प्रभु कै खातीरदारी कारिए आपणै मनो कै तैयार कौरौ, औरौ तैसकै आणौ कारिए आपी खै सुधारौ।
5हरेक घाटी भोरै जांदी, औरौ हरेक
धारो औरौ टिम्बै धैनै कौरे जांदै;
औरौ जू बांगा औसौ सै सीधा औरौ जू उदे ऊबै औसौ सै सीधै बाट बौणदै।
6औरौ हरेक आदमी पौरमेशवर कै उध्दार कै दैखदा।’”
7जू बौड़ै भीड़ यूहन्ना बपतिस्मा दाता शै बपतिस्मा लोणो कारिए आंव थै, सै तिनु बौल़ौ थिया, “तुऐं लोग शोंगोऊं कै नानड़िया जैशणै जोहरिले औसौ! तुऔं कै कुणै बौल़ौ कै आणौवाल़ै गुस्से शै दोऊड़ो? 8आपी खै साबित कौरौ कै तुऐं आपणै पापौ कै छोडे़बा पौरमेशवर कै ढौबौ फैरै गौवै। औरौ ऐजौ नै सोंचैया कै तुऐं ऐजौ बौलेयौ बौचै सौकौ कै अब्राहम अमारा बुड़ेईक औसौ, हांव तुऔं खै बुलू, की पौरमेशवर इनु पाथरो कौरेयौ अब्राहम कारिए तिथमुंजी दै वंश पौयदा कौरे सौकौ। 9इथकारिए ऐबै तुऐं पौरमेशवर कै न्याय कारिए तैयार रौया, जिथुखै कुराड़ी डाल़ो कै जोड़ो पांदी राखै राए, इथकारिए जू डाल़ आछा फोल़ नै लियाला सैजा काटा जांदा औरौ आगै मुंजी बैगाया जांदा।”
10तोबै लोगै तैसी पूछु, “तौ पौरमेशवर की सौजा शै बोचणौ कारिए आमै का कौरु?” 11यूहन्नाए तिनु जोवाब दिया, “जैसी आदमी कैई दो झागे औसौ सै ऐक झागा तैसीकै दैय दौ, जैसकैंई ऐक बै ना आथी। जैसिया खाणौ औसौ सै बै ऐशैखैई कौरेया।”
12औरौ मामला लोणो वाल़ै बै बपतिस्मा लौन्दै आए औरौ तैसी पूछु, “ओए रै गुरु, आमै का कौरु?” 13तैणै तिनु बौल़ौ, “जू मामला रोमी सरकारे तुऔं लोणो कारिए बौताए राए तिथैदा जादा मामला नै लोएया।” 14औरौ सिपाहीए बै तैसीयांदो ऐजौ पूछु, “आमुए का कौरु?” तैणै तिनी बौल़ौ, “कोसी पांदी जूल्म ना कौरेया, औरौ ना झूठा दोष लाया, औरौ आपणै तौनखा पांदी राजी रौया।”
15जोबै लोगै मसीह कै आणौ कारिए आश लाए लोए थै, तोबै सौबीए आपणै-आपणै मनो दौ यूहन्ना कै बारै मुंजी सोंचै लो थियु, कै सै मसीहा हौए सौकौ। 16तौ यूहन्नाए तिनु सौबी कै जोवाब दिया, “हांव तौ तुऔं पाणी शै बपतिस्मा दियु पौरौ सै आणौवाल़ा औसौ जू मुं दा बै शौकतीशाली औसौ; हांव तौ ऐसी लायक बै आथी ना कै तैसकै जूते कै तशमै खोले सौकु, सै तुऔं खै पवित्र आत्मा औरौ आगै लैई बपतिस्मा दैंदा। 17तैसकौ छाज तैसकै हाथौ दो औसौ,#3:17 इथै स्वर्ग औरौ नरक कै बात चालै रोए जू लोग पौरमेशवरे चोणे राए तिनु सै स्वर्ग दै लौय जांदा पौरौ दुष्ट लोगौ खै सै नरक दै डाल़दा। औरौ सै आपणौ खल़याण आछै शै साफ कौरदा, औरौ सै आपणै गियुँ खै तौ आपणै कोठारो दै कौठै कौरदा, पौरौ भूसो खै तियौं आगी मुंजी जोल़ाए दैंदा जू आग कौलोंई ना हिशदै।”
18औरौ सै बौरिशी शिक्षा देएबा लोगौ कै सुसमाचार शुणादा रौआ।
हेरोदेस राजाए यूहन्ना कै कोयदै खाने दा खौटा
(मत्ती 3:13-17; मर 1:9-11)
19पौरौ जोबै यूहन्नाए गलील जिले कै इलाके कै हेरोदेस राजा खै तैसकै भाई फिलिप्पुस कै घोरवाल़ी हेरोदियास कै साथै कुकर्म कौरणौ कै बारै मुंजी ताड़ा। 20तौ राजा हेरोदेसे तिनु सौबिदा बोढ़यो ऐजा कुकर्म कौरा कै यूहन्ना कै कोयदखाने दा खोटे दिया।
यूहन्ना दवारा यीशु का बपतिस्मा
21जोबै सौबी लोगै बपतिस्मा लौआ, औरौ यीशु बै बपतिस्मा लोयो प्रार्थना कौरे लोए थी, तोबै स्वर्ग खौलै गौ। 22औरौ पवित्र आत्मा शोरीरो कै रुप दा कबूतर कै जैशणै तैसी पांदी उतरा औरौ पौरमेशवरे स्वर्ग पौरैशौ यीशु खै बौल़ौ, “तू मैरा प्यारा बैटा औसौ हांव तांवदा खुश औसौ।”
यीशु कै वंशावली
(मत्ती 1:1-17)
23जोबै यीशु आपी उपदैशो दैन्दा लागा, तौ सै लमसम तीशी सालो का थिया। औरौ जैशै लोग सौमझौ थिए, कै सै यूसुफ का बैटा औसौ औरौ यूसुफ एली का बैटा औसौ, 24औरौ एली मतात का बैटा थिया, औरौ मतात लेवी का बैटा थिया औरौ लेवी मलकी का बैटा थिया औरौ मलकी यना का बैटा थिया औरौ यना यूसुफ का बैटा थिया। 25औरौ यूसुफ मतित्याह का बैटा थिया, औरौ मतित्याह आमोस का बैटा थिया, औरौ आमोस नहूम का बैटा थिया, औरौ नहूम असल्याह का बैटा थिया, औरौ असल्याह नोगह का बैटा थिया। 26औरौ नोगह मात का बैटा थिया, औरौ मात मतित्याह का बैटा थिया, औरौ मतित्याह शिमी का बैटा थिया, औरौ शिमी योसेख का बैटा थिया, औरौ योसेख योदाह का बैटा थिया, 27औरौ योदाह यूहन्ना का बैटा थिया, औरौ यूहन्ना रेसा का बैटा थिया, औरौ रेसा जरुब्बाबिल का बैटा थिया, औरौ जरुब्बाबिल शालतिएल का बैटा थिया, औरौ शालतिएल नेरी का बैटा थिया, 28औरौ नेरी मलकी का बैटा थिया, औरौ मलकी अद्दी का बैटा थिया, औरौ अद्दी कोसाम का बैटा थिया, औरौ कोसाम इलमोदाम का बैटा थिया, औरौ इलमोदाम एर का बैटा थिया 29औरौ एर येशू का बैटा थिया, औरौ येशू इलाजार का बैटा थिया, औरौ इलाजार योरीम का बैटा थिया, औरौ योरीम मतात का बैटा थिया, औरौ मत्तात लेवी का बैटा थिया। 30औरौ लेवी शमौन का बैटा थिया, औरौ शमौन यहूदाह का बैटा थिया, औरौ यहूदाह यूसुफ का बैटा थिया, औरौ यूसुफ योनान का बैटा थिया, औरौ योनान इलकायाकीम का बैटा थिया। 31औरौ इलकायाकीम मलयाह का बैटा थिया, औरौ मलयाह मिनाह का बैटा थिया, औरौ मिनाह मतता का बैटा थिया, औरौ मतता नातान का बैटा थिया, औरौ नातान राजा दाऊद यिशै का बैटा थिया। 32औरौ यिशै ओबेद का बैटा थिया औरौ ओबेद बोअज का बैटा थिया औरौ बोआज सलमोन का बैटा थिया औरौ सलमोन नहशोन का बैटा थिया 33औरौ नहशोन अम्मीनादाब का बैटा थिया, औरौ अम्मीनादाब अरनी का बैटा थिया, औरौ अरनी हेस्रोन का बैटा थिया, औरौ हेस्रोन पेरेस का बैटा थिया औरौ पेरेस यहूदा का बैटा थिया। 34औरौ यहूदा याकूब का बैटा थिया, औरौ याकूब इसहाक का बैटा थिया, औरौ इसहाक अब्राहम का बैटा थिया, औरौ अब्राहम तिरह का बैटा थिया, औरौ तेरह नाहोर का बैटा थिया, 35औरौ नाहोर सरुग का बैटा थिया, औरौ सरुग रऊ का बैटा थिया, औरौ रऊ फिलिग का बैटा थिया, औरौ फिलिग एबिर का बैटा थिया, औरौ एबिर शिलह का बैटा थिया। 36औरौ शिलह कनान का बैटा थिया, औरौ कनान अरफक्षद का बैटा थिया, औरौ अरफक्षद शेम का बैटा थिया, औरौ शेम नूह का बैटा थिया, औरौ नूह लिमिक का बैटा थिया। 37औरौ लिमिक मथुशिलह का बैटा थिया, औरौ मथुशिलह हनोक का बैटा थिया, औरौ हनोक यिरिद का बैटा थिया, औरौ यिरिद महललेल का बैटा थिया, औरौ महललेल कनान का बैटा थिया। 38औरौ कनान एनोश का बैटा थिया, औरौ एनोश शेत का बैटा थिया, औरौ शेत आदम का बैटा थिया, औरौ आदम पौरमेशवर का बैटा थिया।
Currently Selected:
लूका 3: SRXNT
Highlight
Share
Copy
Want to have your highlights saved across all your devices? Sign up or sign in
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
